1, 2. Okuputudhwa kwetu nosho wo omudhingoloko gwetu ohayi vulu oku tu nwethwa mo ngiini?

ATUHENI otwa nwethwa mo noonkondo kunkene twa putudhwa nokomudhingoloko gwetu. Ohatu zala momukalo gwontumba, otu hole iikulya yontumba nohatu ihumbata momukalo gwontumba. Omolwashike mbela? Oshinima shimwe, omolwaashoka ohatu nwethwa mo kaantu mboka ye tu dhingilila nokoonkalo dhetu monkalamwenyo.

² Ihe nonando ongaaka, opu na iinima mbyoka ya simana yi vule iikulya mbyoka hatu hogolola nosho wo omukalo ngoka hatu zala. Pashiholelwa, otwa putudhwa tu kale tu shi kutya iinima yini yi li mondjila naambyoka ya taambiwa ko nokutinda mbyoka ya puka nosho wo inaayi taambiwa ko. Iinima oyindji ya tya ngaaka oyi li ehogololo lyopaumwene noya yooloka komuntu nomuntu. Shoka hatu hogolola otashi vulika nokuli tu shi ninge omolweiyuvo lyetu ndyoka hali tu nyenyetele. Ombiimbeli otayi ulike kutya olundji ‘aapagani kaye na ompango, ihe ohaya gwanitha shoka tashi pulwa kompango pandunge dhawo.’ (Rom. 2:14) Ihe ngele kapu na ompango ya yela yaKalunga, mbela otatu ka landula owala omikalo nomithikampango ndhoka twa putudhwa nadho naandhoka dhi li apuhe moshitopolwa shetu?

3. Omolwomatompelo gaali geni Aakriste ihaaya landula omithikampango nomikalo ndhoka dha taambiwa ko apuhe?

³ Konyala opu na omatompelo gaali ga simana kutya omolwashike Aakriste ihaaya landula omikalo nomithikampango ndhoka ya putudhwa nadho naandhoka dhi li moshitopolwa shawo. Lyotango, Ombiimbeli otayi tu dhimbulukitha tayi ti: “Oku na ondjila ndjoka ya yelekana momeho gomulumentu, ihe pehulilo oyo ondjila yeso.” (Omayel. 16:25) Molwaashoka inatu gwanenena, katu na naanaa oonkondo dhokutokola kutya oshike oshiwanawa lela kutse, opo tu wilike oonkatu dhetu nawa. (Omayel. 28:26; Jer. 10:23) Etiyali, Ombiimbeli otayi ulike kutya iikala nomithikampango dhomuuyuni odha nwethwa mo notadhi pangelwa kuSatana, ‘kalunga kuuyuni mbuka.’ (2 Kor. 4:4; 1 Joh. 5:19) Onkee ano, ngele otwa hala Jehova e tu yambeke ye a kale e tu hokwa,  otwa pumbwa okupulakena komayele ngoka ge li mAaroma 12:2. — Lesha.

4. Otatu ka kundathana shike moshitopolwa shika?

⁴ Iitsa mbyoka yi li mAaroma 12:2 oya simana notu na okudhiladhila kuyo neitulomo. Iitsa mbyoka oyo: (1) Omolwashike twa pumbwa ‘okushituluka’? (2) Okushituluka okwa kwatela mo shike? nosho wo (3) Ongiini tatu vulu okushituluka? Natu ka kundathaneni omapulo ngaka.

5. Oohapu dhaPaulus ndhoka dhi li mAaroma 12:2 odha li unene dha nyolelwa oolye?

⁵ Oohapu dhomuyapostoli Paulus ndhoka dhi li montumwafo ndjoka a li a nyolele Aaroma, kadha li dha nuninwa mboka kaaye shi ooitaali nenge aakalimo yomuRoma, ihe Aakriste ooyakwawo aagwayekwa. (Rom. 1:7) Paulus okwa li e ya kumagidha ya shituluke, yo ‘◊“ye ethe okukala ya faathana,” NW] nonkalo yuuyuni mbuka.’ Aakriste mboka ya li muRoma, momumvo 56 E.N. lwaampono, ‘onkalo yuuyuni’ moka ya li oya li ya kwatela mo omikalondjigilile, oohedhi, eihumbato nomizalo dhaantu yomuRoma. Paulus okwa li a longitha oshitya ‘etheni’ (NW) shoka tashi ulike kutya yamwe oya li natango taya nwethwa mo konkalo yuuyuni mboka. Aamwatate naamwameme oya li ya nwethwa mo ngiini pethimbo ndyoka?

6, 7. Pethimbo lyaPaulus, ongiini onkalathano noonkalo dhelongelokalunga muRoma ya li eshongo kAakriste?

⁶ Kunena, aapashiyoni muRoma ohaya mono omakulukuma gootempeli nosho wo giinyanga yomaudhano. Ohaya mono wo oombila oonkulu, oondhimbuluthofano nosho wo uupale wonale niinima yilwe. Yimwe yomiinima mbika oya ningilwe oomvula omayuvi dha ka pita. Iinima mbika yonale otayi gandja uuyelele kombinga yonkalamwenyo yopankalathano nosho wo yomalongelokalunga gomuRoma shonale. Ohatu vulu wo okulesha momambo gondjokonona kombinga yuudhano wokwiitsa nomagongamwele, omathigathano gomatemba, iinyandwa noomusika tayi popi kombinga yiinima yi ili noyi ili, nayimwe nokuli tayi sitha ohoni. Roma osha li wo ondingandinga yiipindi nosha yambapala, onkee ano, aantu oya li taya vulu okwiilikolela omaliko ogendji. — Rom. 6:21; 1 Pet. 4:3, 4.

⁷ Nonando muRoma omwa li mu na ootempeli odhindji moka mu na iikalunga oyindji, Aaroma kaya li haya kala ye na ekwatathano lyopothingo niikalunga mbyoka ya li haya galikana. Kuyo, elongelokalunga olya li unene lya kwatela mo iituthi ngaashi yomavalo, yoohango noyomafumviko mbyoka ya li oshitopolwa shonkalamwenyo yawo. Dhiladhila owala kunkene iinima ayihe mbyoka ya li eshongo kAakriste mboka ya li muRoma. Oyendji oya li ya za meputuko lya tya ngaaka, onkee ano oya li ya pumbwa okushituluka, opo ya ninge Aakriste yashili, neshituluko ndyoka kalya li tali ka hula mesiku lyeninginitho lyawo.

8. Ongiini uuyuni wa nika oshiponga kAakriste kunena?

⁸ Ngaashi pethimbo lyAaroma, uuyuni kunena owa nika wo oshiponga kAakriste mboka yi iyapulila Jehova. Omolwashike mbela? Omolwaashoka ombepo yuuyuni oyi iwetikile momikalo odhindji. (Lesha Aaefeso 2:2, 3; 1 Johannes 2:16.) Otu li aluhe moshiponga shokunwethwa mo kuuyuni, molwashoka esiku kehe otwa dhingililwa  komahalo gawo, komadhiladhilo gawo, komihingo nokomikalo dhawo. Onkee ano, otu na omatompelo ogendji gokuvulika kekumagidho ndyoka lya nwethwa mo ‘kaatu faathane nonkalo yuuyuni mbuka’ notu ‘shituluke.’ Oshike tu na okuninga?

9. Oyendji oya ninga omalunduluko geni manga inaaya thika ponkatu yokuninginithwa?

⁹ Sho omuntu ta konakona Ombiimbeli nokutula miilonga shoka ti ilongo, oha tameke okuninga ehumokomeho lyopambepo. Sho ta ningi ehumokomeho ndyoka, oha ningi omalunduluko monkalamwenyo ye shi ikwatelela kwaashoka i ilonga. Ohe etha po iinima yomalongelokalunga giifundja niikala iiwinayi mbyoka a li e na nale noha kokeke uukwatya wa fa waKristus. (Ef. 4:22-24) Ohatu kala twa nyanyukwa okumona aantu omayuvi omathele taya ningi ehumokomeho li li ngaaka omumvo kehe, e taya ninginithwa shoka shi li endhindhiliko kutya oyi iyapulila Jehova Kalunga. Shika ohashi nyanyudha shili omutima gwaJehova. (Omayel. 27:11) Ihe oshi li nawa tu ipule kutya, mbela omalunduluko ngaka ogo owala ga pumbiwa?

10. Eyooloko lini li li pokati kokushituluka nokuhwepopala?

¹⁰ Sho shene, okushituluka okwa kwatela mo oshindji, kakele owala kokuninga ehumokomeho nenge okuhwepopala. Oshitya ‘shitulukeni’ otashi yelithwa moVine’s Expository Dictionary kutya: “Aaroma 12:2 otaya gandja ekondjithathano pokati kokukala wa faathana niinima yopethimbo ndika [nenge nuuyuni] nokushituluka (nenge nokulunduluka) meni momadhiladhilo okupitila moonkondo dhombepo ondjapuki.” Onkee ano, eshituluko ndyoka Omukriste e na okuninga kali shi owala lyokweetha po omikalondjigilile dha nyata, okupopya neihumbato inaali yogoka. Aantu yamwe mboka kaaye na ontseyo yOmbiimbeli nayo ohaya kambadhala kaaya ninge iinima ya tya ngaaka. Oshike nduno sha kwatelwa mo mokushituluka hoka Aakriste ye na okuninga?

11. Paulus okwa li u ulike kutya okushituluka ohaku ningwa momukalo guni?

¹¹ Paulus okwa nyola a ti: ‘Shitulukeni momadhiladhilo geni.’ Uuna oshitya ‘omadhiladhilo’ tashi longithwa mOmbiimbeli, osha kwatela mo shoka hatu dhiladhila, iikala yetu, nosho wo oonkondo dhetu dhokudhiladhila. Petameko lyontumwafo ye ndjoka a li a nyolele Aaroma, Paulus okwa li a popi kombinga yaantu mboka ya li ye na ‘omadhiladhilo omawinayi.’ Aantu mboka oya li ‘aagoyoki, ye na uuwinayi, ye na olwiho, aakolokoshi, yu udha efupa, edhipago, oontamanana, ekotokelo,’ nosho wo iinima yilwe iiwinayi. (Rom. 1:28-31) Shika osho sha li sha ningitha Paulus a ladhipike mboka ya li ya ningi aapiya yaKalunga noya putukila momudhingoloko gwa tya ngaaka ya ‘shituluke momadhiladhilo gawo.’

12. Aantu kunena ohaya dhiladhila ngiini, niikala mbika otayi vulu ngiini okukala ya nika oshiponga kAakriste?

¹² Shiyemateka, otwa kundukidhwa kaantu yomuuyuni mboka haya ningi iinima mbyoka ya popiwa kuPaulus. Otashi vulika haya dhiladhila kutya okukala metsokumwe nomithikampango nonomakotampango oshinima shonkuluyonale  nokape na ngoka e na oku ge ya thiminikila. Aalongisikola oyendji nosho wo aavali ohaya pitike nohaya humitha komeho “emanguluko” lyokudhiladhila kehe shoka omuntu a hala. Kuyo kehe shimwe oshi li nawa. Nokuli noyendji mboka hayi i ti kutya yo aalongelikalunga oyu uvite kutya oya manguluka okuninga kehe shimwe shoka taya dhiladhila kutya oshi li mondjila, kaaye na oshinakugwanithwa shokuvulika kuKalunga nokiipango ye. (Eps. 14:1) Iikala mbika otashi shi vulika yi kale oshiponga oshinene kAakriste yashili. Mboka inaaya kotoka otaya vulu okukala ya tala ko omalongekidho gopakalunga momukalo gwa faathana. Otashi vulika ya tinde okutsa kumwe nomalongekidho gegongalo notashi vulika nokuli ya nyenyete kombinga yaashoka inaaya hokwa. Nenge otashi vulika kaaya tse kumwe thiluthilu nomayele gopaMbiimbeli ge na ko nasha nomainyanyudho, gokulongitha ointaneta nosho wo gokulalakanena elongo lyopombanda.

13. Omolwashike tu na okwiikonakona paushili?

¹³ Opo kaatu kale we twa faathana nuuyuni, nenge tu zulwe kuwo, otwa pumbwa okukonakona paushili omaiyuvo getu gomuule, iikala yetu, omalalakano getu nosho wo omikalo dhetu. Iinima mbyoka otashi vulika aantu ya kale kaaye yi wete. Yalwe otashi vulika ye tu lombwele kutya otatu shi enditha nawa. Ihe otse awike tu shi shi kutya ngele otwe etha shili tu shitululwe kwaashoka twi ilonga mOmbiimbeli miinima mbyoka ya kwata miiti nokutsikila okukala tatu shitululwa kuyo. — Lesha Jakob 1:23-25.

14. Oshike tashi vulu oku tu kwathela tu ninge omalunduluko ngoka ga pumbiwa?

¹⁴ Okushituluka okwa kwatela mo uukwatya wetu womeni, onkee ano, opo tu mone kutya otu li ngiini meni, otwa pumbwa sha shoka tashi vulu okuhitilila lela meni lyetu. Oshike tashi vulu oku tu kwathela tu ninge ngaaka? Uuna twa tseya kutya Jehova okwa hala tu ninge shike shoka shi li metsokumwe nelalakano lye ndyoka li li mOmbiimbeli, momukalo moka hatu inyenge kwaashoka twa lesha ohagu ulike shoka shi li momitima dhetu nosho wo kutya omalunduluko geni twa pumbwa okuninga, opo tu katuke metsokumwe ‘naashoka sho opalela Kalunga.’ — Rom. 12:2; Heb. 4:12.

15. Okuzulwa kuJehova ohaku e ta eshituluko lini?

¹⁵ Lesha Jesaja 64:8. Ethaneko ndyoka omupolofeti Jesaja a longitha otali tu longo oshinima sha simana. Ongiini Jehova, Omuhongi gwetu, he tu zula tu li eloya? Odhoshili kutya iha lundulula omalutu getu, ando e tu ninge aawanawa unene mokutala. Pehala lyaashono, Jehova oha lundulula omuntu meni, ihe hakombanda. Ngele otwe etha e tu zule, eshituluko ndyoka hali holoka po otali kala lyomeni, nenge lyopambepo ndyoka naanaa twa pumbwa, opo tu vule okukondjitha omanwethomo guuyuni. Okuzulwa ohaku ende ngiini?

16, 17. (a) Yelitha nkene omuhongi gwiiyuma ha longekidha eloya, opo e li honge oshiyuma oshiwanawa. (b) Oohapu dhaKalunga ohadhi tu kwathele ngiini tu shituluke, opo tu kale tu na oshilonga kuJehova?

¹⁶ Opo omuhongi a honge iiyuma iiwanawa, oha longitha eloya ndyoka lyo opalela okuhongitha iiyuma. Ihe nonando ongaaka, okwa pumbwa okuninga iinima iyali. Shotango, eloya ohali opalekwa nawa, opo li ze iiyagaya niinima ayihe mbyoka inaayi pumbiwa okukala mulyo. Opo nduno, ohali tulwa omeya ge eleka e tali lungwa nawa, opo li vule okuhongwa oshinima shoka omuhongi a hala okuhonga.

¹⁷ Ndhindhilika kutya omuhongi gwiiyuma oho opaleke eloya noku li ninga li kale epu noku li ma, opo ihe te li hongo oshiyuma shoka tashi vulika shi kale shondilo nokuli. Mbela otu wete nkene Oohapu dhaKalunga tadhi vulu okudhana onkandangala ya faathana monkalamwenyo yetu? Otadhi vulu oku tu kwathela tu ethe po okudhiladhila kwetu kwonale sho twa li kaatu shi Kalunga nokushituluka tu kale tu na oshilonga momeho ge. (Ef. 5:26) Dhiladhila owala kutya iikando ingapi twa kala nokuladhipikwa tu leshe Ombiimbeli esiku kehe nokukala pokugongala kehe kwopaKriste, mpoka Oohapu dhaKalunga  hadhi kundathanwa. Omolwashike twa kala nokuladhipikwa tu ninge iinima mbika? Omolwaashoka mokuninga ngawo, otatu etha tu zulwe kuJehova. — Eps. 1:2; Iil. 17:11; Heb. 10:24, 25.

18. (a) Omolwashike okutedhatedha kwa simana ngele otwa hala Oohapu dhaKalunga dhi tu nwethe mo noku tu shitulula? (b) Omapulo geni taga vulu oku tu kwathela?

¹⁸ Opo Oohapu dhaKalunga dhi tu shitulule momukalo ngoka gwa pumbiwa, otu na okulesha Ombiimbeli pandjigilile nokwiilonga shoka tayi ti, ihe shoka oshi li owala etameko. Aantu oyendji ohaya lesha Ombiimbeli omathimbo gamwe, noye na ontseyo onshona yaashoka tayi ti. Otashi vulika wa tsakaneka aantu ya tya ngaaka miilonga yomomapya. Yamwe nokuli ohaya vulu okuhokolola oovelise dhimwe dhOmbiimbeli momutse. * Ihe shika otashi vulika shi gume kashona omukalo moka haya dhiladhila nosho wo onkalamwenyo yawo. Oshike mbela ya pumbwa? Opo Oohapu dhaKalunga dhi nwethe mo nokushitulula omuntu, omuntu oku na okweetha dhi ningine meni momutima gwe. Onkee ano, otwa pumbwa okukutha ethimbo lya gwana tu dhiladhile kwaashoka tatu ilongo. Oshi li nawa tu ipule tatu ti: ‘Mbela onda tompwa ngaa kutya shoka tandi ilongo kashi shi owala elongo lyontumba lyopalongelokalunga? Mbela onda mona kutya shika oshili? Shimwe ishewe, mbela ohandi mono ngaa omikalo moka ndi na okutula miilonga shoka tandi ilongo monkalamwenyo yandje nokukala inaandi shi tala ko owala kutya oshinima shoka tandi vulu okulonga yalwe? Mbela ondu uvite kutya Jehova oye ta popi nangame paumwene?’ Okudhiladhila nokutedhatedha komapulo ngoka otaku vulu oku tu kwathela tu kale tu hole Jehova unene nomitima dhetu. Ohole yetu yoku mu hola otayi ka koka. Ngele shoka twi ilongo osha gumu omitima dhetu, nena otatu ka ninga omalunduluko ngoka ga pumbiwa. — Omayel. 4:23; Luk. 6:45.

19, 20. Omayele geni gOmbiimbeli taga vulu oku tu etela uuwanawa ngele otwe ga tula miilonga?

¹⁹ Okulesha pandjigilile Oohapu dhaKalunga nokutedhatedha kudho otaku ke tu inyengitha tu tsikile okuninga shoka tashi vulika twa ninga nale, ano twi ‘ihule omuntu gwetu omukulu pamwe nomikalo dhe, nokuzala omuntu omupe, ngoka ha ningwa aluhe omupe okupitila montseyo yashili.’ (Kol. 3:9, 10, yelekanitha NW.) Eeno shili, otatu vulu lela okupondola sho tatu uvu ko nawa Oohapu dhaKalunga noku dhi tula miilonga. Uukwatya wopaKriste mboka tatu ka mona otawu ke tu kwathela tu igamene komakoto gaSatana noomwigo dhe.

²⁰ Omuyapostoli Petrus ote tu dhimbulukitha ta ti: ‘Vulikeni kuKalunga ne inamu etha, okukalamwenyo kweni ku pangelwe kuuhalu mboka mwa li nawo. Ihe kaleni aayapuki mwaayihe mbyoka tamu yi ningi.’ (1 Pet. 1:14, 15) Okuninga ngaashi tatu vulu, opo tu ethe po okudhiladhila niikala mbyoka twa li tu na nale nokweetha tu shitululwe otaku ke tu etela omalaleko nuuyamba ngaashi tatu ke shi mona moshitopolwa tashi landula ko.