“Shi ningeni nokudhimbulukwa ndje”
‘Sho a hambelele, okwa pambula oshikwiila nokwa ti: “Shika [otashi thaneke, NW] olutu lwandje talu gandjwa omolweni. Shi ningeni nokudhimbulukwa ndje.”’—1 KOR. 11:24.
1, 2. Aayapostoli otashi vulika ya li ya dhiladhila shike manga Jesus inaaya molweendo lwe lwahugunina kuJerusalem?
AALANGELI yomuJerusalem oya li ya mono oshitata shotango shomwedhi. Oshigongi shaatokoli osha li sha lombwelwa e tashi popi kutya omwedhi gwotango Nisan ogwa tameka. Yo aatumwa taya taandelitha onkundana ndjoka. Aayapostoli oya li ye shi shi kutya Opaasa oyi li popepi. Notashi vulika ya li ya mono kutya Jesus okwa hala okwiidhenga ondjila a ye kuJerusalem manga Opaasa inaayi tameka.
2 Pethimbo mpoka Jesus naayapostoli ye oya li muPerea (handiyaka yaJordan) molweendo lwe lwahugunina lwokuya kuJerusalem. (Mat. 19:1; 20:17, 29; Mark. 10:1, 32, 46) Sho esiku lyotango lyomwedhi gwOshijuda Nisan lya tokolwa kutya otali ka kala uunake, okwa li taku ka kala ku na owala omasiku 13 opo Opaasa yi dhamwe, ano peningino lyetango mo 14 Nisan.
3. Omolwashike shu uka sho Aakriste ye na ko nasha nesiku lyOpaasa?
3 Esiku lyUulalelo wOmuwa, ndyoka hali ipumu mumwe nesiku lyOpaasa, otali ka kala mo 14 Apilili 2014, konima sho etango lya ningina. Ndyoka otali ka kala esiku lyi ikalekelwa kAakriste yashili nosho wo kwaamboka yu ulika ohokwe. Omolwashike? Omolwoohapu ndhika tatu lesha mAakorinto yotango 11:23-25, ndhoka tadhi ti: “Jesus uusiku mbwiyaka a gwaalekwa, okwa kutha oshikwiila, okwa hambelele, okwe shi pambula nokwa ti: ‘Shika [otashi thaneke, NW] olutu lwandje talu gandjwa omolweni. Shi ningeni nokudhimbulukwa ndje.’ Osho tuu wo okwa kutha oshitenga.”
4. (a) Omapulo geni tatu vulu okwiipula kombinga yEdhimbuluko? (b) Esiku lyEdhimbuluko ohali yalulwa ngiini omumvo kehe? (Tala oshimpungu “Edhimbuluko lyomo 2014.”)
4 Nopwaahe na omalimbililo opo to ka kala poshiningwanima shika shimwe shoka Jesus a li a lombwele aalanduli ye ya kale haye shi dhimbulukwa komumvo. Ipula komeho yethimbo to ti: ‘Ongulohi ndjoka ndi na oku yi ilongekidhila ngiini? Iinima yini kondandalunde tayi ka longithwa? Oshike tashi ka ningwa poshiningwanima shoka? Oshiningwanima shika nosho wo iinima mbyoka tayi ka longithwa pethimbo mpoka otayi ti shike kungame?’
OMANDHINDHILIKO
5. Jesus okwa li a unganeke pu ningwe omalongekidho gashike opo a dhane Opaasa yahugunina naayapostoli ye?
5 Sho a li a lombwele aayapostoli ye ya ka longekidhe ondunda opo ya ka lile mo uulalelo wOpaasa, Jesus ine ya lombwela nkene ye na oku yi ninga yi kale tayi monika nawa. Pehala lyaashono, otashi vulika owala a li a hala ondjugo ya yela noya andjuka. (Lesha Markus 14:12-16.) Oya li ye na okulongekidha iinima yontumba yuulalelo, ngaashi oshikwiila inaashi ya efulika nomaviinu omatiligane. Konima sho ya li uulalelo wOpaasa, Jesus okwa gandja eitulomo komandhindhiliko ngoka gaali.
6. (a) Konima yuulalelo wOpaasa, Jesus okwa li a popi shike kombinga yoshikwiila? (b) Oshikwiila sha tya ngiini hashi longithwa pEdhimbuluko?
6 Omuyapostoli Mateus ngoka a li po konima okwa nyola a ti: “Ano sho ya li taa li, Jesus okwa kutha oshikwiila, okwa hambelele, okwe shi pambula nokwe shi pe aalongwa ye e ta ti: ‘Kwateni, lyeni.’” (Mat. 26:26) Ngaashi aluhe hashi ningwa pOpaasa, “oshikwiila” kasha li sha tulwa efulika. (Eks. 12:8; Deut. 16:3) Oshikwiila osha li sha ningwa nuusila woomboloto (wheat flour) nomeya, noina mu gwedhwa nando efulika nenge omongwa nenge iitowalekithi yilwe. Molwaashoka kasha li sha tulwa efulika, kasha li tashi vulu okufula. Onkee ano osha li tashi ka kala inaashi tulwa sha nando nando, sha fa omakoko nohashi pambuka nuupu. Kunena, manga Edhimbuluko inaali thika, aakuluntugongalo ohashi vulika ya pule gumwe a ninge oshikwiila shoka ta longitha uusila woomboloto nomeya, tashi ningwa nuugadhi uushona. (Ngele kapu na uusila woomboloto, otashi vulu okuningwa nuusila wepungu nenge womahangu.)
7. Jesus okwa li a popi kombinga yomaviinu geni, nomaviinu geni taga vulu okulongithwa pEdhimbuluko kunena?
7 Mateus okwa tsikile ko a ti: ‘Jesus okwa kutha wo oshitenga, okwa hambelele nokwe shi ya pe e ta ti: “Nweni mo amuhe.”’ (Mat. 26:27, 28) Shoka Jesus a li a kutha osha li oshitenga shomaviinu omatiligane. (Kasha li tashi wapa ga kale omeya gomandjembele, oshoka omandjembele oga adhika ga kuka nalenale.) Jesus ka li ompinge nokulongithwa kwomaviinu pOpaasa nonando kaga li oshitopolwa shuulalelo mboka wotango muEgipiti. Okwa li nokuli e ga longitha pethimbo lyUulalelo wOmuwa. Onkee ano Aakriste ohaya longitha omaviinu pEdhimbuluko. Molwaashoka ongushu yombinzi yaJesus kaya li ya pumbwa okwiindjipalekwa nenge okukolekwa, omaviinu ngoka haga longithwa ihaga kala ga gwedhwa iitowalekithi. Ohapu longithwa omaviinu ngoka inaaga gwedhwa sha, ngoka ga kolwa megumbo nenge ngoka haga landithwa ngaashi o-Burgundy nenge o-Claret.
OMANDHINDHILIKO TAGA TI SHA
8. Omolwashike Aakriste ye na ko nasha neityo lyoshikwiila nomaviinu?
8 Omuyapostoli Paulus okwa popi sha yela kutya Aakriste ayehe oye na okudhana Uulalelo wOmuwa, ihe haayapostoli owala. Okwa li a nyolele ooitaali ooyakwawo muKorinto a ti: ‘Elongo ndyoka nde li mú etele, onde li pewa kOmuwa nokutya: Omuwa Jesus okwa kutha oshikwiila, okwa hambelele, okwe shi pambula nokwa ti: “Shika [otashi thaneke, NW] olutu lwandje talu gandjwa omolweni. Shi ningeni nokudhimbulukwa ndje.”’ (1 Kor. 11:23, 24) Metsokumwe noohapu ndhoka, sigo okesiku ndika, omumvo kehe Aakriste ohaya dhimbulukwa oshiningwanima shika noye na ko nasha neityo lyoshikwiila nomaviinu.
9. Aantu yamwe oye na etaloko lini lya puka kombinga yoshikwiila shoka Jesus a longithile?
9 Aakwangeleka yamwe ohaya popi kutya Jesus okwa ti: ‘Shika osho olutu lwandje,’ onkee ano oyi itaala kutya oshikwiila shoka osha li sha lundulukile pashikumithalonga molutu lwe lela. Ihe shoka kashi li mondjila. * Jesus mwene opo a li paayapostoli ye aadhiginini pethimbo opo tuu mpoka noshikwiila inaashi fulikwa shoka ya li taya ka lya opo sha li wo. Ano osha yela kutya Jesus okwa li ta popi pathaneko ngaashi a li e shi ningi wo piikando yilwe.—Joh. 2:19-21; 4:13, 14; 10:7; 15:1.
10. Oshikwiila shoka sha li sha longithwa pUulalelo wOmuwa otashi thaneke shike?
10 Kaayapostoli, oshikwiila shoka ya li taya ka lya masiku noya li ye shi wete osha li tashi thaneke olutu lwaJesus. Mbela olutu luni? Ethimbo limwe aapiya yaKalunga oya li ye na euvoko kutya molwaashoka Jesus okwa li a pambula oshikwiila ihe kapu nando esipa limwe lye lya li lya nyanyulwa, oshikwiila shoka osha li tashi thaneke “olutu lwaKristus,” egongalo lyaagwayekwa. (Ef. 4:12; Rom. 12:4, 5; 1 Kor. 10:16, 17; 12:27) Ihe mokweendela ko kwethimbo, oya li ya mono okuza mOmanyolo kutya oshikwiila otashi thaneke olutu lwaJesus lwopantu. Jesus okwa li e “ehamekwa palutu,” nokuli e ta alelwa. Onkee ano, pUulalelo wOmuwa, oshikwiila otashi thaneke olutu lwaJesus lwopanyama ndwoka lwa “humbata oondjo dhetu.”—1 Pet. 2:21-24; 4:1; Joh. 19:33-36; Heb. 10:5-7.
11, 12. (a) Hokolola kutya Edhimbuluko lyeso lyaJesus oha li dhanwa ngiini. (b) Omaviinu ngoka ga li ga longithwa pUulalelo wOmuwa otaga thaneke shike?
11 Shoka otashi tu kwathele nduno tu uve ko shoka Jesus a popile kombinga yomaviinu. Ombiimbeli otayi ti: “Osho tuu wo okwa kutha oshitenga, sho ya mana okulya uulalelo, e ta ti: ‘Oshitenga shika [otashi thaneke, NW] ehangano epe tali kolekwa nombinzi yandje.’” (1 Kor. 11:25) Mbela oshitenga sho sheneshene shoka Jesus a li e na osho ehangano epe? Aawe. Oshitya “oshitenga” otashi ulike kwaashoka sha li mo, ano omaviinu. Jesus okwa li a ti kutya omaviinu otaga thaneke shike nenge oge lile po shike? Ombinzi ye ndjoka ya tilwahi.
12 MEvaangeli lyaMarkus otatu lesha mo oohapu dhaJesus ndhoka tadhi ti: “Ndjika oyo ombinzi yandje, ombinzi yehangano, ndjoka tayi tilwahi omolwoyendji.” (Mark. 14:24) Eeno, ombinzi yaJesus oya li tayi ka ‘tilwahi omolwoyendji okudhima po oondjo.’ (Mat. 26:28) Onkee ano, oshu uka sho omaviinu omatiligane taga thaneke ombinzi yaJesus yo yene. Omolwombinzi ndjoka, otatu vulu okumangululwa omolweyambo, shoka shi li ‘okudhiminwa po oondjo dhetu.’—Lesha Aaefeso 1:7.
Aayapostoli oya li ya nu omaviinu ngoka taga thaneke ombinzi yaJesus yehangano epe (Tala okatendo 11, 12)
SHOKA HASHI NINGWA PEDHIMBULUKO LYESO LYAKRISTUS
13. Oshike hashi ningwa pEdhimbuluko lyeso lyaKristus lyokomumvo?
13 Ngele opo lwotango to kala pEdhimbuluko nOonzapo dhaJehova, oshike to ka kala wa tegelela shi ningwe po? Oto ka mona kutya edhimbuluko ndyoka ohali ningilwa mehala tali monika nawa nolya yela, moka kehe gumwe ta vulu okunyanyukilwa oshiningwanima shoka. Otashi vulika mu kale mwa tulwa oongala dha ningwa momukalo ngoka itaagu piyaganeke nenge itaadhi ku ningitha wu kale wa fa wu li poshituthi shontumba. Omukuluntugongalo a pyokoka ota ka gandja oshipopiwa shi ikolelela kOmbiimbeli kombinga yedhimbuluko momukalo gwa yela notagu simanekitha. Ota ka kwathela ayehe ya kale ye na olupandu kombinga yaashoka Kristus e tu ningila. Okwa li a si e li iikulila, opo tu vule okukala nomwenyo. (Lesha Aaroma 5:8-10.) Omugandji gwoshipopiwa ota ka yelitha omategameno gaali ga yoolokathana gAakriste ngoka ga popiwa mOmbiimbeli.
14. Omategameno geni haga kundathanwa moshipopiwa shEdhimbuluko?
14 Etegameno limwe olyoku ka pangela pamwe naKristus megulu. Omwaalu omushona gwaalanduli yaKristus, ngaashi aayapostoli ye aadhiginini oye na etegameno ndika. (Luk. 12:32; 22:19, 20; Eh. 14:1) Aakriste oyendji mboka taya longele Kalunga nuudhiginini pethimbo lyetu oye na etegameno ekwawo. Oye na etegameno lyokukala nomwenyo sigo aluhe meviparadisa. Opo nduno ehalo lyaKalunga otali ka gwanithwa kombanda yevi wo ngaashi megulu, oshinima shoka Aakriste ya kala nokugalikana. (Mat. 6:10) NOmbiimbeli otayi popi sha yela kombinga yoonkalo oombwanaweelela ndhoka taya ka vula okunyanyukilwa sigo aluhe.—Jes. 11:6-9; 35:5, 6; 65:21-23.
15, 16. Oshikwiila ohashi longithwa ngiini pethimbo lyUulalelo wOmuwa?
15 Lwopehulilo lyoshipopiwa, omugandji gwoshipopiwa ota ka popya kutya ethimbo olya thika okuninga shoka Jesus a li a lombwele aayapostoli ye ya ninge. Ngaashi sha popiwa metetekelo, otapu ka longithwa omandhindhiliko gaali, oshikwiila inaashi ya efulika nomaviinu omatiligane. Mbika otayi vulu okukala ya tulwa nale poshitaafula shi li popepi nomugandji gwoshipopiwa. Opo nduno ota ka gandja eitulomo kehokololo ndyoka li li mOmbiimbeli ndyoka tali popi shoka Jesus a tile nokwa ningile sho a li adhike po oshituthi shika. Pashiholelwa, ehokololo lyaMateus otali ti: “Jesus okwa kutha oshikwiila, okwa hambelele, okwe shi pambula nokwe shi pe aalongwa ye e ta ti: ‘Kwateni, lyeni, shika [otashi thaneke, NW] olutu lwandje.’” (Mat. 26:26) Jesus okwa li a pambula oshikwiila inaashi ya efulika opo e shi topolele aayapostoli ye mboka ya li ye mu gama kolulyo nokolumoho. PEdhimbuluko mo 14 Apilili, oto ka mona oshikwiila inaashi ya efulika shoka shi li muuyaha sha pambulwa nale miipambu.
16 Otapu ka longithwa uuyaha wa gwana, opo okutaambekidhwa kwaayehe kaaku kwate ethimbo olindji. Shika itashi ka kala sha kwatathana nomithigululwakalo dhontumba. Otapu ka galikanwa paufupi, nopo nduno oshikwiila otashi ka taambekidhwa melandulathano shi ikolelela kwaashoka tashi opalele pethimbo ndyoka. Ngaashi sha ningilwe momagongalo ogendji mo 2013, otashi vulika pu ka kale omwaalu omushona gwaamboka taya ka lya oshikwiila (nenge nokuli kaapu ka kale nando ogumwe).
17. Jesus okwa tula po omukalo guni ngoka hagu landulwa pEdhimbuluko shi na ko nasha nomaviinu?
17 Konima yaashoka omugandji gwoshipopiwa ota ka ukitha eitulomo kwaashoka Mateus a tsikile nokupopya, a ti: ‘Jesus okwa kutha wo oshitenga, okwa hambelele nokwe shi ya pe e ta ti: “Nweni mo amuhe; shika [otashi thaneke, NW] ombinzi yandje, ombinzi yehangano, tayi tilwahi omolwoyendji oyokudhima po oondjo.”’ (Mat. 26:27, 28) Mokulandula omukalo ngoka, otapu ka galikanwa ishewe, nopo nduno ‘iitenga’ yomaviinu omatiligane otayi ka taambekidhwa kwaayehe mboka ye li po.
18. Kutya nduno aantu aashona oya kutha ombinga momandhindhiliko nenge nokuli kaapu na gumwe e shi ningi, omolwashike sha simana natango okukala pEdhimbuluko?
18 Oyendji mboka ye li pEdhimbuluko ihaya kutha ombinga momandhindhiliko sho taga taambekidhwa, molwashoka Jesus okwa li u ulike kutya mboka taya ka pangela mUukwaniilwa we womegulu oyo owala ye na okukutha ombinga mugo. (Lesha Lukas 22:28-30; 2 Tim. 4:18) Ayehe yalwe mboka taya kala po oye li aatali nesimaneko. Nonando ongawo, osha simana okukala pUulalelo wOmuwa molwaashoka okukala po ohaku ulike kutya oya lenga noonkondo ekuliloyambo lyaJesus. Pethimbo lyEdhimbuluko, otaya vulu okutedhatedha komalaleko nuuyamba ngoka taya vulu okumona omolwekuliloyambo lyaJesus. Oye na etegameno lyokukala yamwe ‘yomongundu onene’ ndjoka tayi ka hupa ‘puudhigu uunene’ mboka wu li pokuya. Yo oye li aalongelikalunga mboka taya ka kala ‘ya yoga oonguwo dhawo noye dhi yelitha nombinzi yOnzigona.’—Eh. 7:9, 14-17, yelekanitha NW.
19. Oto vulu okuninga shike opo wu ilongekidhile Uulalelo wOmuwa?
19 Oonzapo dhaJehova muuyuni awuhe ohadhi ilongekidhile oshiningwanima shika shi ikalekelwa. Manga ku na iiwike natango, otatu ka kutha ombinga mokuhiya oyendji ngaashi tashi vulika opo ya ka kale po. Ishewe, momasiku ngoka gokuuka pEdhimbuluko, oyendji yomutse otatu ka lesha mOmbiimbeli kombinga yaashoka Jesus a ningile nosho wo kombinga yaashoka sha li sha ningwa momasiku ngoka mo 33 E.N. Otu na okukala twa ninga omalongekidho, opo tu shilipaleke kutya opo tatu ka kala. Otashi ka kala shi li nawa tu thike kuyele manga eimbilo lyotango negalikano inaayi tameka opo tu taambe ko aayenda notu vule okugandja eitulomo kopolohalama ayihe. Atuheni, kutya nduno otu li iilyo yegongalo nenge aayenda, otatu ka mona uuwanawa owindji ngele otwa kala nokulandula mOombiimbeli dhetu sho oovelise tadhi leshwa. Shoka sha simanenena, okukala kwetu pEdhimbuluko otaku ka ulika kutya otwa pandula nomutima aguhe ekuliloyambo lyaJesus notaku ka ulika wo evuliko kelombwelo lye, ndyoka tali ti: “Shi ningeni nokudhimbulukwa ndje.”—1 Kor. 11:24.
^ okat. 9 Omulongwantu Omundowishi Heinrich Meyer ota ti: ‘Molwaashoka olutu lwaJesus kalwa li lwa tewa natango (lwu na omwenyo natango) nosho wo kutya ombinzi Ye kaya li ya tika natango, kapu na gumwe gwomaayenda [aayapostoli] a li ta vulu okudhiladhila . . . kutya oya li taya li lelalela olutu lwe lela nokunwa ombinzi yOmuwa, [onkee] Jesus Ye mwene ka li a hala oohapu dhe dhi uviwe ko momukalo ngoka ya li itaaye dhi taamba ko.’
