1, 2. (a) Moses okwa ningi etokolo lini sho a gwanitha oomvula 40? (Tala kethano ndyoka li li petameko.) (b) Omolwashike Moses a tokola a hepekwe pamwe noshigwana shaKalunga?

MOSES okwa li e shi uuwanawa mboka ta vulu okumona muEgipiti. Omwa li mu na omagumbo omanene guuzeko. Ye okwa li omuna gwokombanda nokwa “longwa uunongo auhe wAaegipiti,” mwa kwatelwa uungongi, iikwanyothi, omwaalu nuunongononi. (Iil. 7:22) Okwa li ta vulu okuninga omuyamba nomunenentu nokumona uuwanawa awuhe mboka Aaegipiti yowala itaaya vulu okumona.

² Ihe sho a gwanitha oomvula 40, okwa ningi etokolo ndyoka lya kumitha aambala yaEgipiti ayehe. Okwa tokola a yalulilwe mumwe nAaisraeli mboka ya li aapika. Omolwashike mbela? Omolweitaalo lye. (Lesha Aahebeli 11:24-26.) Eitaalo lye olye mu ningitha a kale e wete Jehova. Molwashoka Moses okwa li e na uupambepo wa kola, okwa li i itaala muJehova, Kalunga ‘ngoka ihaa monika,’ nomomauvaneko ge. —  Heb. 11:27.

3. Moshileshwa shika otatu ka yamukula omapulo gatatu geni?

³ Ngaashi Moses, natse otwa pumbwa okukala tu na omeho geitaalo, opo Jehova a kale omuntu gwolela kutse notu mone kutya uuyuni itawu tu pe sha. Eeno, otwa pumbwa ‘eitaalo.’ (Heb. 10:38, 39) Opo tu koleke eitaalo lyetu, natu kundathaneni shoka Aahebeli 11:24-26 ya ti kombinga yaMoses. Ndhindhilika omayamukulo gomapulo  ngaka sho tatu kundathaneni: Eitaalo lyaMoses olye mu kwathele ngiini kaa sindwe komahalo gopanyama? Eitaalo lye olye mu kwathele ngiini a kale a lenga oshilonga she, nonando okwa li a dhinika? Nomolwashike Moses a li e “wete ondjambi ndjoka te ke yi pewa konakuyiwa”?

4. Moses okwa li a dhimbulula shike kombinga ‘yuutoye wuulunde’?

⁴ Omolweitaalo lye Moses okwa li a mono kutya “uutoye wuulunde” owopakathimbo. Otashi vulika yamwe ya tye kutya nando Egipiti osha li shu udha iikalunga nuumpulile, osha li oshilongo oshinankondo muuyuni, omanga oshigwana shaJehova sha li muupika. Ihe Moses okwa li e shi shi kutya Jehova ota vulu okuninga po sha. Nonando mboka ya li taya gwanitha po omahalo gawo gopanyama oya li ya fa taye shi enditha nawa, Moses okwa li i itaala kutya aakolokoshi otaya ka kombwa po. Nomolwashono a tindi “uutoye wuulunde wokathimbo kowala.”

5. Oshike tashi ke ku kwathela wu tinde “uutoye wuulunde wokathimbo kowala”?

⁵ Ongiini nangoye to vulu okutinda “uutoye wuulunde wokathimbo kowala”? Dhimbulukwa kutya uutoye wuulunde ihawu kalelele. Kala wu na eitaalo kutya “uuyuni niinima ayihe yi li mo mbyoka aantu ye yi hokwa, otayi hulu po.” (1 Joh. 2:15-17) Ngele owa tedhatedha konakuyiwa yaakolokoshi, oto ka mona kutya oye li ‘pehala tali pundukitha notaa kulukile mehanagulo.’ (Eps. 73:18, 19) Uuna to makelwa, ipula to ti: ‘Mbela onda hala onakuyiwa ya tya ngiini?’

6. (a) Omolwashike Moses a tindi okwiithanwa “omuna gwomukadhona omuna gwaFarao”? (b) Omolwashike to dhiladhila kutya Moses okwa ningi etokolo ewanawa?

⁶ Eitaalo lyaMoses olye mu kwathele wo a hogolole eithano lye. “Eitaalo olyo lya longitha Moses, sho a koko a vule okutinda kutya ke shi omuna gwomukadhona omuna gwaFarao.” (Heb. 11:24) Moses ini imbembeleka kutya ota vulu okulongela Kalunga e li omuna gwokombanda ye ta longitha uuyamba we a kwathele Aaisraeli ooyakwawo. Pehala lyaashoka, okwa tokola okukala e hole Jehova nomutima gwe aguhe, nomwenyo gwe aguhe nonoonkondo dhe adhihe. (Deut. 6:5) Etokolo ndika olye mu gamene komaupyakadhi ogendji. Nokuli eliko olindji lyaEgipiti olya yiwa nalyo kAaisraeli. (Eks. 12:35, 36) Farao okwa li a dhipagwa konima sho a sithwa ohoni. (Eps. 136:15) Omanga Moses a hupithwa nokwa li a longithwa kuKalunga okuhupitha oshigwana shaIsraeli. Moses okwa li a pondola shili monkalamwenyo ye!

7. (a) PaMateus 6:19-21, omolwashike tu na okutala konakuyiwa ndjoka tayi kalelele? (b) Hokolola ehokololo ndyoka tali ulike eyooloko pokati komaliko gokombanda yevi nomaliko gopambepo.

⁷ Ngele ngoye omugundjuka to longele Jehova, eitaalo lyoye otali vulu ngiini oku ku kwathela wu hogolole eithano lyoye? Oshi li pandunge okwiilongekidhila onakuyiwa. Ihe mbela eitaalo momauvaneko gaKalunga otali ke ku inyengitha wu hogolole onakuyiwa yopakathimbo nenge oondjoka tayi kalelele? (Lesha Mateus 6:19-21.) Sophie, ngoka a li omundanisi dhingi, okwa li e na okuninga etokolo ndyoka. Omahangano ogendji moAmerika oga li ga hala oku mu pa oshimaliwa shokwiilongitha, noompito odhindji ndhoka hadhi kala dha halika koyendji odha li dhe mu egulukila. Okwa ti: “Osha li hashi uvitha ndje nawa sho ndi holike. Onda li ndi wete nokuli ndi li pombanda ndi vule yakwetu. Ihe nonando ongaaka, kanda li nda nyanyukwa.” Konima okwa tala okavidio Young People Ask — What Will I Do With My Life? Ota ti: “Onda dhimbulula kutya kanda li tandi longele Jehova nomutima aguhe, nonando pataloko lyuuyuni onda li nda pondola nonda li ndi holike kaantu oyendji. Onda galikana nda mana mo kombinga yoshinima shika, nokonima onda thigi po eithano lyandje lyokundanisa.” Etokolo ndyoka oku li uvitile ngiini? Ota ti: “Ihandi ipulile ko we kokukalamwenyo  hoka nda li ndi na nale. Ngashingeyi onda nyanyukwa shili. Otandi kokola ondjila pamwe nomusamane gwandje. Katu shi aanamadhina tse katu na omaliko ogendji. Ihe otu na Jehova, aakonakonimbiimbeli nomalalakano gopambepo. Inandi yemata nando sho nde etha po eithano lyandje ekulu.”

8. Omayele geni gOmbiimbeli taga vulu okukwathela omugundjuka a hogolole eithano lye?

⁸ Jehova oku shi shoka tashi ku opalele. Moses okwa ti: “Pulakena ngashingeyi shoka OMUWA Kalunga koye te ku pula: Tila OMUWA, ngoye u landule ondjila ye. Kala u mu hole, mu longela komutima gwoye aguhe nokomwenyo gwoye aguhe, ngoye u dhiginine iipango nomautho ge agehe. Otandi yi ku pe nena omolwelago lyoye.” (Deut. 10:12, 13) Landula eithano ndyoka tali ke ku kwathela wu kale wu hole Jehova noku mu longela “komutima gwoye aguhe nokomwenyo gwoye aguhe,” manga wu li omugundjuka. Oto vulu okukala neinekelo kutya eithano ndyoka otali ke ku etela ‘elago.’

9. Hokolola kutya omolwashike sha li oshidhigu kuMoses okulonga oshilonga she.

⁹ Moses “okwa dhimbulula kutya okuhumbata ondhino omolwOmugwayekwa gwaKalunga oshi vule omauyamba agehe gomuEgipiti.” (Heb. 11:26) Moses okwa li ‘Omugwayekwa gwaKalunga,’ molwashoka Jehova okwe mu hogolola a tembudhe Aaisraeli muEgipiti. Moses okwa li e shi kutya oshilonga shoka otashi ka kala oshidhigu notashi ke mu ‘dhinitha’ nokuli. Omuisraeli gumwe okwe mu sheke a ti: “Olye e ku ningi omuleli nomutokolihapu gwetu?” (Eks. 2:13, 14) Konima yethimbo Moses okwa pula Jehova a ti: “Sho Aaisraeli itaa pulakene ndje, ngele nduno omukwaniilwa?” (Eks. 6:12) Ihe opo Moses i ilongekidhile okudhinwa hoka, okwa lombwele Jehova iimpwiyu ye. Jehova okwe mu kwathele ngiini a gwanithe po oshilonga shoka oshidhigu?

10. Jehova okwa kwathele ngiini Moses a longe oshilonga she?

¹⁰ Tango, Jehova okwe mu shilipaleke a ti: “Ondi li pamwe nangoye.” (Eks. 3:12) Oshitiyali, Jehova okwe mu nothele ko keityo lyedhina Lye, a ti: “Otandi ka kala kehe shoka nda hala okukala.” * (Eks. 3:14, NW) Oshititatu, Jehova okwa pe Moses oonkondo dhokulonga iilongankondo, u ulike kutya okwa tumwa kuKalunga. (Eks. 4:2-5) Noshitine, Jehova okwe mu pe Aaron a ninge omupopikalelipo gwe nomuyakuli gwe, opo e mu ambidhidhe moshilonga shoka. (Eks. 4:14-16) Sho Moses a ka thika pehulilo lyonkalamwenyo ye, okwa li i itaala shili kutya Kalunga oha kwatha aapiya Ye ya gwanithe po oshilonga kehe shoka te ya pe. Nomolwashono a li a lombwele Josua a ti: “OMUWA oye mwene te ku wilike e ta kala pamwe nangoye. Ite ku thigi po noite ku etha, onkee ano ino tyololoka nenge u kale wa tila.” —  Deut. 31:8.

11. Omolwashike Moses a li a lenga oshilonga she?

¹¹ Shaashi Jehova okwa li te mu kwatha, Moses okwa li a lenga oshilonga she nokwa li e shi tala ko ‘shi vule omauyamba agehe gomuEgipiti.’ Nokuli kuye okulongela Kalunga Omunankondoawike oku vule okulongela Farao! Nokukala ‘Omugwayekwa’ gwaJehova oku vule okukala omuna gwokombanda muEgipiti. Moses okwa li a lalekwa nuuyamba, oshoka okwa li a lenga oshilonga she. Okwa li e na uukuume wopothingo naJehova ngoka e mu pe “oonkondo okuninga iinima iinene niitilithi” sho ta fala Aaisraeli kEvi lyEuvaneko. —  Deut. 34:10-12.

12. Oshilonga shini twa pewa kuJehova tu na okukala twa lenga?

¹² Jehova okwe tu pa wo oshilonga shokuuvitha okupitila mOmwana, ngaashi e shi pele omuyapostoli Paulus nosho wo yalwe. (Lesha 1 Timoteus 1:12-14.) Atuheni otu na uuthembahenda wokuuvitha onkundana ombwanawa.  (Mat. 24:14; 28:19, 20) Yamwe otaya longo miilonga yethimbo lyu udha. Yo mboka ya pyokoka otaya longo momagongalo ye li aayakuligongalo nenge aakuluntugongalo. Ihe otashi vulika aakwanezimo nayalwe mboka kaaye li moshili ya kale ye wete oshilonga shetu inaashi simana notashi vulika ye ku sheke sho to iyamba. (Mat. 10:34-37) Ngele owe etha ye ku teye omukumo, otashi vulika wu shi se uunye, nenge wu kale wa limbililwa ngele oto vulu ngaa shili oku shi longa. Ngele oshe ku ningilwa, eitaalo lyoye otali ke ku kwathela ngiini wu idhidhimike?

13. Jehova ohe tu kwathele ngiini tu gwanithe po oshilonga shetu?

¹³ Indila Jehova e ku kwathe, wi itaala kutya ote ke shi ninga. Mu lombwela iimpwiyu yoye ayihe. Ote ke ku kwatha wu pondole, oshoka oye e ku pa oshilonga shika. Ote ke ku kwatha ngiini? Omomukalo naanaa moka a kwathele Moses. Tango, Jehova ote ku shilipaleke ta ti: “Ino tila —  ongame ndi li pungoye! Ongame Kalunga koye —  ino limbililwa! Otandi ku kankameke e tandi ku kwatha; otandi ku gamene notandi ku hupitha.” (Jes. 41:10) Oshitiyali, ote ku dhimbulukitha kutya omauvaneko ge oge shi okwiinekelwa, ta ti: “Onda popi, notashi ka gwanithwa.” (Jes. 46:11) Oshititatu, Jehova ote ku pe “oonkondo dhi vule ndhoka dhopaunshitwe,” wu gwanithe po oshilonga shoye. (2 Kor. 4:7, NW) Oshitine, opo wu idhidhimikile oshilonga shoye, Tate yetu omunahole okwe ku pa aamwatate muuyuni awuhe ye ku ‘kumagidhe noku ku kwatha.’ (1 Tes. 5:11) Sho Jehova te ku kwathele okulonga oshilonga shoye, eitaalo lyoye muye otali kolo noto ka kala wa lenga oshilonga kehe te ke ku pa, shi vulithe uuyamba kehe wokombanda yevi.

14. Omolwashike Moses a li e na uushili kutya ota ka pewa ondjambi?

¹⁴ Moses “okwa li e wete ondjambi ndjoka te ke yi pewa konakuyiwa.” (Heb. 11:26) Nonando ka li e shi oshindji kombinga yonakuyiwa, okwa longitha shoka e shi a ninge omatokolo. Ngaashi hekulululwa Abraham, Moses okwa li i itaala kutya Jehova ota vulu okuyumudha aasi. (Luk. 20:37, 38; Heb. 11:17-19) Eitaalo lye momauvaneko gaKalunga olye mu kwathele kaa dhiladhile kutya okwa hepeka onkalamwenyo ye sho a kala oomvula 40 ta yi ontuku naasho a kala oomvula 40 mombuga. Nonando ka li e shi oshindji kombinga yegwanithopo lyomauvaneko gaKalunga, okwa li i itaala miinima mbyoka kaayi wetike.

15, 16. (a) Omolwashike tu na okukala twa tala kondjambi yetu? (b) Omalaleko nuuyamba geni kohi yUukwaniilwa wa halelela okumona?

 ¹⁵ Mbela oho kala ngaa wu wete “ondjambi” ndjoka to ka pewa? Ngaashi Moses, katu na natango uuyelele wi ihwa po kombinga yomauvaneko gaKalunga. Pashiholelwa, inatu “tseya kutya ethimbo otali thiki uunake” uuna uudhigu uunene tawu ka tameka. (Mark. 13:32, 33) Ihe otu shi oshindji kombinga yOparadisa tu vule Moses. Nonando katu na uuyelele awuhe, otu na omauvaneko ga gwana kombinga yonkalamwenyo kohi yUukwaniilwa waKalunga ngoka tage tu kwathele tu kale tu yi wete. Ngele momadhiladhilo getu otu wete nkene uuyuni uupe tawu ka kala, shika otashi ke tu kwathela tu konge tango Uukwaniilwa. Ngiini? Dhiladhila owala: Mbela oto ka landa ngaa egumbo ndyoka waa shi naanaa? Nandonando! Sha faathana, itatu ki itula moshinima shoka itaashi eta po sha. Otu na okukala tu wete nomeho geitaalo nkene onkalamwenyo tayi ka kala kohi yUukwaniilwa.

¹⁶ Opo wu kale wa yelelwa nawa nkene onkalamwenyo yoye tayi ka kala kohi yUukwaniilwa waKalunga, kala wu iwete wu li mOparadisa. Pashiholelwa, sho to konakona kombinga yaantu mboka ya li ko manga Jesus inee ya kombanda yevi, dhiladhila shoka to ke ya pula sho taya ka yumudhwa. Dhiladhila wo shoka taye ke ku pula kombinga yomasiku gahugunina. Dhiladhila kenyanyu ndyoka to ka kala wu na sho to ka mona oohokulululwa noku ya longa kombinga yaashoka Kalunga e ya ningila. Dhiladhila wo nkene to ka kala wu uvite sho to ilongo kombinga yiilikama. Dhiladhila kekwatathano lyopothingo ndyoka to ka kala wu na naJehova sho to ende to thiki megwaneneno.

17. Otashi ke tu kwathela ngiini kunena, ngele otwa kala tu wete ondjambi yetu ndjoka ihaayi monika?

¹⁷ Ngele otwa kala tu wete ondjambi yetu ndjoka ihaayi monika, otashi ke tu kwathela tu pule komeho nenyanyu nokuninga omatokolo ga kankamena konakuyiwa tayi kalelele. Paulus okwa nyolele Aakriste aagwayekwa a ti: “Ngele tatu tegamene shoka kaatu shi wete, nena otatu shi tegamene neidhidhimiko.” (Rom. 8:25) Shika osha kwatela mo Aakriste ayehe mboka ye na etegameno lyomwenyo gwaaluhe. Nonando inatu pewa natango ondjambi yetu, omolweitaalo lyetu lya kola otwa tegelela neidhidhimiko ‘ondjambi ndjoka tatu ke yi pewa konakuyiwa.’ Ngaashi Moses, ihatu dhiladhila kutya otwa hepeka oomvula adhihe ndhoka twa kala tatu longele Jehova. Ihe otwi itaala kutya “shoka shi wetike, otashi kala owala okathimbo, ihe shoka itaashi vulu okumonika, otashi kala aluhe.” —  Lesha 2 Aakorinto 4:16-18.

18, 19. (a) Omolwashike tu na okukondja, opo tu kaleke eitaalo lyetu lya kola? (b) Otatu ka kundathana shike moshileshwa tashi landula?

¹⁸ Eitaalo ohali tu kwathele tu ‘kale tu na einekelo lya kola miinima mbyoka twe yi tegamena naambyoka itaatu vulu oku yi mona ngashingeyi.’ (Heb. 11:1) Omuntu ngoka ha dhiladhila panyama oha kala e wete kutya okulongela Jehova inaku simana. Kuye iinima yopambepo ‘ohayi kala ye mu nikila uugoya.’ (1 Kor. 2:14) Ihe tse, otu na etegameno lyoku ka kala nomwenyo sigo aluhe noku ka mona aasi taya yumudhwa, iinima mbyoka aantu yomuuyuni inaaya tegelela yi ningwe. Ngaashi aalongwantu yopethimbo lyaPaulus mboka ya li taya ti Paulus “omupopyagani,” aantu oyendji kunena oyu uvite kutya shoka hatu uvitha iipolopolo yowala. —  Iil. 17:18.

¹⁹ Molwashoka otwa kundukidhwa kaantu kaaye na eitaalo, otu na okukondja tu kaleke eitaalo lyetu lya kola. Indila Jehova, opo “eitaalo lyoye lyaa kane.” (Luk. 22:32) Kala ho dhiladhila kiilanduliko yuulunde, kuuwanawa mboka hawu zi mokulongela Jehova noketegameno lyomwenyo gwaaluhe. Eitaalo lyaMoses olya li lye mu kwathele a mone wo iinima yilwe. Moshileshwa tashi landula, otatu ka konakona nkene eitaalo lya kwathele Moses ‘a mone Kalunga, nando iha monika.’ —  Heb. 11:27.