1, 2. Jehova oha tala ko ngiini aapiya ye?

UUNA aavali ya tala oyana taya dhana, olundji ohaya kala ya kuminwa oshipewa shawo nuunkulungu wawo. Mbela nangoye owe shi mona? Omunona gumwe otashi vulika e na oshipewa shomaudhano, omanga omukwawo e na omagano gokuthaneka noonyala. Kutya nduno oyana oye na omagano geni, aavali ohaya nyanyukilwa oku ya kwathela ya hwepopaleke uunkulungu wawo.       

² Jehova naye oku na ko nasha naapiya ye. Kuye, aapiya ye oya fa ‘omaliko’ nenge ye na ondilo, unene tuu sho ye na eitaalo naadhiginini. (Hag. 2:7) Ihe otashi vulika wa mona kutya ooitaali ooyakwetu oye na uunkulungu owindji wa yoolokathana. Aamwameme yamwe oye na omagano gokupopya montaneho, omanga yalwe ye na gokuunganeka iinima. Aamwameme oyendji aakiintu oye na omitse hadhi endelele ngele tashi ya pokwiilonga omalaka omakwiilongo nohaye ga popi nawa muukalele. Yo yalwe oye shi okukwathela nawa mboka ya ala nenge okutsa yalwe omukumo. (Rom. 16:1, 12) Mbela inatu pandula sho tu na momagongalo aantu ya tya ngawo?

3. Omapulo geni tatu ka kundathana moshinyolwa shika?

 ³ Ihe otashi vulika ooitaali ooyakwetu yamwe, mwa kwatelwa aagundjuka naamwameme aalumentu mboka opo ya ninginithwa, ya dhiladhile kutya inaya pumbiwa mo megongalo. Otatu ke ya kwathela ngiini opo ya hwepopaleke uunkulungu wawo? Omolwashike tu na okuholela Jehova nokutala kuukwatya wawo uuwanawa?

4, 5. Aatokolihapu 6:11-16 otaya ulike ngiini kutya Jehova oha tala kwaashoka aapiya ye haya vulu okuninga?

⁴ Ombiimbeli oya yelitha kutya Jehova iha tala owala kuukwatya uuwanawa waapiya ye, ihe oha tala wo kuunkulungu wawo. Pashiholelwa, sho Jehova a hogolola Gideon a mangulule oshigwana She kAamidian, otashi vulika a li a kunkwa sho omuyengeli a ti kuye: “OMUWA oku li nangoye, ngoye ependa nomulumentu gwonkama.” Otashi vulika Gideon a li ini itala ko ‘ongomulumentu gwonkama.’ Okwa li e na omalimbililo noku uvite inaa simana. Ihe ngaashi ehokololo tali shi ulike, Jehova okwa li e wete shoka Gideon ta vulu okupondola, nando ye mwene ka li e shi wete. —  Lesha Aatokolihapu 6:11-16.

⁵ Molwashoka Jehova okwa tala kuunkulungu waGideon, okwa li e na einekelo muye kutya ota ka hupitha Israeli. Pashiholelwa, omuyengeli gwaJehova okwa mono Gideon sho ta yungula iilya noonkondo dhe adhihe. Oshikwawo, pethimbo lyOmbiimbeli aanamapya oya li haya yungulile piipale, opo ya yele nuupu. Ihe Gideon okwa li ta yungula iilya meholamo moshikolelo shoomviinu, opo kaa monike kAamidian. Shoka kasha li tuu ondunge ombwanawa! Jehova okwa mono kutya Gideon omulumentu e na oondunge nokwa mono shoka ta vulu okuninga e te mu dheula.         

6, 7. (a) Jehova okwa li a tala ko ngiini Amos, nAaisraeli yamwe oya li ye mu tala ko ngiini? (b) Oshike tashi holola kutya Amos okwa li e shi shoka tashi ningwa pethimbo lye?

⁶ Sha faathana, nando oyendji oya li ya tala ko omupolofeti Amos inaa simana nokwa mwena, Jehova okwa mono shoka ta vulu okuninga. Amos okwa ti ye omusita gwoonzi nomutsiki gwomikwiyu dholudhi ndwoka halu liwa kaakwanaluhepo. Sho Jehova a tumu Amos a ka pukulule omazimo omulongo guukwaniilwa waIsraeli ngoka ga li haga galikana iikalunga, otashi vulika yamwe yomuyo ya li taya dhiladhila kutya ita ka tompola sha. —  Lesha Amos 7:14, 15.

⁷ Nonando Amos okwa zile komukunda gwokuushayi, okwa li e shi aapangeli nomithigululwakalo dhopethimbo lye, shoka tashi ulike kutya ka li a lala ombepo. Otashi vulika a li e shi shoka tashi ningwa muIsraeli, nokwa li uvu kaahalithi kombinga yiigwana yilwe. (Amos 1:6, 9, 11, 13; 2:8; 6:4-6) Aalongwa yamwe yOmbiimbeli yokunena oya ti Amos okwa li onkulungu mokunyola. Amos ina nyola owala oohapu oompu okuuviwa ko nodhi na oonkondo, ihe okwa longitha wo omafaathanitho. Ka li a tila okupukulula omusaaseri omukolokoshi Amazja. Shika osha holola kutya Jehova okwa hogolola omuntu e li mondjila e na uunkulungu mboka ta vulu okulongitha, mboka tashi vulika kaawa li wu iwetikile. —  Amos 7:12, 13, 16, 17.

8. (a) Jehova okwa shilipaleke David ngiini? (b) Omolwashike Episalomi 32:8 tali tsu omukumo mboka ye wete inaaya gwana nenge kaaye na uunkulungu?

⁸ Eeno, Jehova oha tala kuunkulungu waapiya ye. Oku uvanekele omukwaniilwa David kutya ote ke mu wilika aluhe ‘e te mu tonatele.’ (Lesha Episalomi 32:8.) Oohapu ndhoka otadhi tu tsu omukumo, oshoka Jehova ote ke tu kwathela tu adhe omalalakano ngoka tashi vulika twa li twa dhiladhila kutya itatu ke ga adha. Ngaashi owala omulongi ha wilike omulongwa ngoka kee na naanaa ontseyo, Jehova  naye ohe tu wilike sho tatu humu komeho pambepo. Jehova ota vulu okulongitha wo ooitaali ooyakwetu ye tu kwathele. Ngiini mbela?

9. Otatu ka ‘lalakanena’ ngiini uuwanawa wayalwe ngaashi Paulus a ti natu ninge?

⁹ Paulus okwa kumagidha Aakriste ayehe ya ‘lalakanene’ uuwanawa wooitaali ooyakwawo. (Lesha Aafilippi 2:3, 4.) Oohapu ndhoka Paulus a popi, odha kwatela mo okukala hatu ndhindhilike omagano ngoka yalwe ye na e tatu ulike kutya otu ga wete. Ohatu kala tu uvite ngiini ngele omuntu oku ulike kutya okuwete ehumokomeho ndyoka twa ninga? Shika ohashi tu tsu omukumo, opo tu tsikile okuhuma komeho. Shaa faathana, ngele otu ulukile ooitaali ooyakwetu kutya oye na oshilonga, otashi ke ya tsa omukumo ya hume komeho pambepo.       

10. Oolye unene tuu ya pumbwa ekwatho lyetu?

¹⁰ Oolye unene ya pumbwa ekwatho lyetu? Omathimbo nomathimbo atuheni otwa pumbwa ekwatho lyi ikalekelwa. Ashike aagundjuka nenge aamwameme aalumentu mboka opo ya ninginithwa oya pumbwa okukala yu uvite lela kutya nayo oye na ombinga momaipyakidhilo gegongalo. Shoka otashi ke ya kwathela yu uve ko kutya otwe ya pumbwa. Ihe ngele itatu gandja eitulomo kaamwameme mboka, otashi vulu shi ya sithe uunye e taya kala inaaya hala we okulalakanena iinakugwanithwa ya gwedhwa po, ngaashi Ombiimbeli tayi ti naya ninge. —  1 Tim. 3:1.

11. (a) Omukuluntugongalo gumwe okwa kwathele ngiini omugundjuka gumwe a kale kee na ohoni? (b) Oshike to ilongo mehokololo lyaJulien?

¹¹ Ludovic, omukuluntugongalo ngoka naye a kwathelelwe sho a li omugundjuka ota ti: “Ngele onda ulukile omumwameme omulumentu kutya ondi na ko nasha naye, oha ningi ehumokomeho nziya.” Ludovic okwa popi shi na ko nasha naJulien, omugundjuka ngoka e na ohoni, a ti: “Julien omathimbo gamwe okwa li ha kambadhala okukwathela megongalo ihe okwa li ha kakadhala. Ihe onda li ndi wete kutya oku li nawa nokwa halelela okukwathela yalwe megongalo. Pehala lyokukala nde mu limbililwa, onda kala handi tala unene komaukwatya ge omawanawa, e tandi kambadhala oku mu ladhipika.” Konima yethimbo, Julien okwa ningi omuyakuligongalo, nongashingeyi oku li omukokolindjila gwondjigilile.       

12. Oshike tu na okuninga opo tu kwathele aamwameme ya hwepopaleke uunkulungu wawo? Gandja oshiholelwa.

¹² Ngele otwa hala okukwathela aamwameme ya hwepopaleke uunkulungu wawo, otu na okukala hatu nongele oonkalo dhawo. Ngaashi twe shi mono mehokololo lyaJulien, pehala lyokutala komaukwatya gawo omawinayi, otu na okutala kwaangoka omawanawa nokuunkulungu mboka tawu vulu okuhwepopalekwa. Jesus naye osho a li a ningi shi na ko nasha nomuyapostoli Petrus. Nonando omathimbo gamwe Petrus okwa li ta monika a fa omutengatengi, Jesus okwa ti kutya eitaalo lye otali ka kala lya kola ngaashi emanya. —  Joh. 1:42.

13, 14. (a) Barnabas okwa longitha ngiini oondunge dhokuyoolola moshinima shaMarkus? (b) Ongiini omumwameme gumwe omulumentu omugundjuka a kwathelwa komukuluntugongalo? (Tala kethano lyopetameko.)

¹³ Barnabas okwa li a longitha oondunge dhokuyoolola moshinima shaJohannes, ngoka hi ithanwa wo Markus mOshiroma. (Iil. 12:25) Markus okwa li ‘a kwatha miilonga,’ tashi vulika a li ta yakula Paulus naBarnabas moompumbwe dhawo dhopalutu pethimbo lyolweendo lwawo lwotango lwuutumwa. Ihe nonando ongaaka, sho ya thiki muPamfilia, Markus okwe ya thigi hoka. Oya yi oyo ayeke yu uka kolundume  taya piti moshitopolwa sha nika oshiponga. (Iil. 13:5, 13) Ihe konima yethimbo, Barnabas okwa tala kuukwatya uuwanawa waMarkus, ihe haamboka uuwinayi e te mu dheula. (Iil. 15:37-39) Shika osha kwathele omugundjuka ngoka a ninge omupiya gwaJehova a koka pambepo. Konima yethimbo Markus okwa li muRoma ta kwathele Paulus sho a li mondholongo, naasho Paulus a nyolele egongalo lyokuKolossa, okwa li e mu popile muuwanawa. (Kol. 4:10) Dhiladhila owala kenyanyu ndyoka Barnabas a li u uvite sho Paulus a pula Markus a ye e ke mu kwathele! —  2 Tim. 4:11.

¹⁴ Alexandre, omukuluntugongalo ngoka opo a li a langekwa po, ota dhimbulukwa nkene a kwathelwa komumwatate gumwe ta ti: “Sho nda li omugundjuka osha li oshidhigu kungame okugalikana montaneho. Omukuluntugongalo gumwe oku ulukile ndje nkene ndi na okwiilongekidhila egalikano nokukala nda manguluka. Pehala lyokukala ihaa pula ndje we ndi galikane, okwa kala ha pula ndje olundji ndi shi ninge pokugongala kwiilonga yomomapya. Konima yethimbo, inandi kala we nda tila.”

15. Paulus okwa pandula ngiini aamwayina?

¹⁵ Uuna twa mono uukwatya uuwanawa mOmukriste omukwetu, mbela ohatu mu pandula ngaa? MAaroma ontopolwa 16, Paulus okwa li a pandula ooitaali ooyakwawo ye vule 20 omolwomaukwatya gawo omawanawa ngoka ge mu ningitha a kale e ya hokwa. (Rom. 16:3-7, 13) Pashiholelwa, Paulus okwa popi kutya Andronikus naJunias oya kala taya longele Kristus ethimbo ele ye mu vule, u ulike kuudhiginini wawo. Paulus okwa tumbula wo yina yaRufus nenyanyu, ngoka tashi vulika e mu silile nawa oshimpwiyu.

16. Ngele omugundjuka okwa kala ha pandulwa, otashi vulika shi ete oshizemo shini?

¹⁶ Ngele ohatu pandula ooitaali ooyakwetu, otashi vulika shi ete iizemo iiwanawa. Natu tale koshiholelwa shomumati gumwe omugundjuka, Rico, gwomoFulaanisa, ngoka a li a teka omukumo sho he ngoka kee shi Onzapo, a li inaa hala a ninginithwe. Rico okwa dhiladhila kutya oku na okutegelela sigo a ningi omukuluntu, opo a vule nawa okulongela Jehova. Okwa li wo a yemata, oshoka okwa li ha shekwa kosikola. Frédéric, omukuluntugongalo ngoka a pulwa a konakone naye, ota ti: “Onda pandula Rico, oshoka omapataneko ngoka a li e na otaga holola kutya ka li omumbanda mokupopya shoka itaala.” Shika osha li sha ningitha Rico a kale a tokola toko okulonga shoka shu uka noshe mu hedhitha popi nahe. Rico okwa ka ninginithwa sho e na oomvula 12.

17. (a) Ongiini tatu vulu okukwathela aamwameme aalumentu ya hume komeho? (b) Omutumwa gumwe okwa li ha kwathele aagundjuka aalumentu ngiini, noshizemo osha li shini?

¹⁷ Ethimbo kehe tatu pandula omwiitaali omukwetu omolwoshinima shontumba shoka a longa nawa, otatu mu kumike a longele Jehova a mana mo. Sylvie * ngoka a kala ta longo oomvula odhindji mObetele moFulaanisa ota ti  kutya, ooitaali aakiintu nayo otaya vulu okupandula ooitaali ooyakwawo aalumentu. Ota ti kutya aakiintu otashi vulika ya mone oshinima shontumba shoka aalumentu tashi vulika kaaya mone. Onkee ano “oohapu dhawo tadhi tungu otadhi ka gwedha ko ketsomukumo ndyoka ooitaali aalumentu ya pyokoka haya gandja. Ondi uvite kutya okupandula yalwe oshinakugwanithwa shandje.” (Omayel. 3:27) Jérôme, omutumwa ngoka e li moshilongo French Guiana, okwa kwathela aalumentu oyendji aagundjuka ya kale ya gwana okuninga aatumwa. Ota ti: “Onda koneka kutya omugundjuka oha kala e na omukumo, ngele onde mu pandula moshinima shontumba shi na ko nasha nuukalele we nenge sho a gandja omulombo gwa dhiladhilwa nawa pokugongala. Shika ohashi ya kwathele ya hume komeho.”

18. Uuwanawa washike hawu zi mokulonga pamwe naalumentu ooitaali aagundjuka?

¹⁸ Otatu vulu wo okukwathela ooitaali ooyakwetu ya koke pambepo ngele ohatu longo nayo. Omukuluntugongalo ota vulu a pule omwiitaali omulumentu omugundjuka ngoka e shi okulongitha okompiuta a pilinte iinima yontumba okuza ko-jw.org mbyoka tayi ka tsa aakokele mboka kaaye na ookompiuta omukumo. Nenge ngele opu na oshilonga wu na oku shi longa pOshinyanga shUukwaniilwa, omolwashike itoo pula omugundjuka a longe pamwe nangoye? Ngele owe shi ningi, oto ka tseya kutya omugundjuka oku na uunkulungu washike mboka to vulu okutanga e to tala nkene ta humu komeho. —  Omayel. 15:23.

19, 20. Omolwashike tu na okukwathela yalwe ya hume komeho?

¹⁹ Jehova sho a langeke po Josua a wilike oshigwana shaIsraeli, okwa lombwele Moses ‘a tse Josua omukumo noku mu koleke.’ (Lesha Deuteronomium 3:28.) Nena aantu oyendji muuyuni awuhe otaye ya moshili. Kakele kaakuluntugongalo, Aakriste ayehe ya pyokoka pambepo oye na okukwathela aalumentu aagundjuka naamboka opo ya ninginithwa ya hwepopaleke uunkulungu wawo. Nokungeyi oyendji otaya ka kala ya gwana okuya miilonga yethimbo lyu udha notaya ka ‘vula okulonga yakwawo.’ —  2 Tim. 2:2.

²⁰ Kutya nduno otu li megongalo enene nenge tu li owala mongundu ndjoka opo yi li pokuninga egongalo, natu kwatheleni aagundjuka ya kale yi ilongekidhila oku ka pewa iinakugwanithwa monakuyiwa. Shika otatu ka vula oku shi ninga, ngele otwa holele Jehova ngoka ha tala aluhe kuukwatya uuwanawa waapiya ye.