Owa leshele ngaa nawa Ooshungolangelo opo dha piti? Tala ngele oto vulu okuyamukula omapulo taga landula:

Onzi yOpaasa oya li yi na okudhipagwa pethimbo lini mo 14 Nisan?

Oombiimbeli dhimwe odha ti oya li yi na okudhipagwa sho “taku wiwile,” nenge poshitangotoka, ano ngele etango lya ningine, ihe omanga inaaku luudha. (Eks. 12:6) —  12/15, epandja 18-19.

Omakotampango gOmbiimbeli geni aagundjuka ya pumbwa opo ya vule okuninga omatokolo omawanawa?

Ogo ngaka gatatu: (1) Tango konga Uukwaniilwa waKalunga nuuyuuki we. (Mat. 6:19-34) (2) Mona enyanyu mokuyakula yalwe. (Iil. 20:35) (3) Longela Jehova nenyanyu manga wu li omugundjuka. (Omuuv. 12:1) —  1/15, epandja 19-20.

‘Ohango yOnzigona’ otayi ka ningwa uunake? (Eh. 19:7)

‘Ohango yOnzigona’ otayi ka ningwa konima ngele Omukwaniilwa Jesus Kristus a sindana olugodhi lwe, ano konima ngele Babiloni oshinene sha hanagulwa po nongele iita yaArmagedon ya hulu. —  2/15, epandja 10.

Omolwashike Aajuda yomethelemumvo lyotango ya li ya ‘tegelela’ Mesiasa? (Luk. 3:15)

Itatu vulu oku shi koleka kutya Aajuda yomethelemumvo lyotango oya li yu uvite ko ehunganeko lyaDaniel kombinga yaMesiasa ngaashi tu li uvite ko. (Dan. 9:24-27) Ihe otashi vulika yu uvile aasita yoonzi taya hokolola kombinga yomuyengeli ngoka e ya lombwele kombinga yoshinima shoka nenge yu uvile shoka omuhunganeki omukiintu Hanna a popi sho a mono okahanona Jesus potempeli. Opwa li wo aakoneki yoonyothi ye ya okukonga ‘omukwaniilwa gwAajuda ngoka opo a valwa.’ (Mat. 2:1, 2) Konima Johannes Omuninginithi naye okwa ka popya kutya Kristus oku li pokuholoka. —  2/15, epandja 26-27.

Ongiini tu na okukala twa lungama, opo oEeno yetu kaayi ninge oAawe? (2 Kor. 1:18)

Olundji ohapu holoka oonkalo ndhoka hadhi tu ningitha kaatu gwanithe po shoka tu uvaneka. Ihe ngele otu uvaneke sha, otu na okulonga nuudhiginini, opo tu shi gwanithe po. —  3/15, epandja 32.

Ongiini to vulu okuyanda omwigo gwokutala omafano giipala?

Iinima itatu mbyoka tayi ke ku kwathela oyo (1) Galula ko mbala omeho goye komathano taga pendutha omahalo gokuya momilalo. (2) Gamena omadhiladhilo goye mokudhiladhila iinima mbyoka tayi tungu nokugalikana kuKalunga. (3) Kotokela oonkatu dhoye mokuyanda okutala oofilima ndhoka dhi na iinima ya nika iipala nenge omapandja giipala kointaneta. —  5/1, epandja 10-12.

Ohashi vulika pu holoke shike ngele Omukriste okwa thigi po aanegumbo lye a ka konge iilonga koshilongo shilwe?

Ngele aavali oya tokola okukala ya topoka, otapeya shi ehameke omaiyuvo goyana nokunwetha mo nayi omikalo dhawo. Otashi vulika ya kale ye nine aavali yawo iikonene. Naamboka ye li kokule nookuume kawo kopandjokana otashi vulika ya taalele omashongo goku ya momilalo dha nyata. —  4/15, epandja 19-20.

Omapulo gane geni tu na okukaleka momadhiladhilo sho tatu uvitha?

Oolye tandi ka popya nayo? Otandi ke ya adha pehala lini? Ethimbo lini ewanawa oku ya talela po? Ondi na okutameka oonkundathana nayo ngiini? —  5/15, epandja 12-15.