TATE okwa valelwa muGraz, shi li muAustria mo 1899. Okwa li omugundjuka pethimbo lyIita yoTango yUuyuni. Okwa li a kwatwa po a ye metangakwiita lyaNdowishi nziya sho Iita Iitiyali yUuyuni ya tameke mo 1939. Okwa sile miita mbyoka ya li moRusia mo 1943. Osho she ende ngaaka ndi kanithe tate sho nda li owala ndi na oomvula mbali. Ompito yoku mu tseya, inandi yi mona. Onda kala nda yuulukwa okukala ndi na tate, unene tuu sho nda mono kutya uumatyona wulwe kosikola owu na oohe. Konima yethimbo, sho nda gwanitha oomvula omulongo nasha, onda li nda mono ehekeleko sho ndi ilongo kombinga yaTate yetu gwomegulu, omunenenene ngoka itaa si. — Hab. 1:12, NW.

Sho ndi na oomvula heyali, onda li nda ningi oshilyo shehangano lyaamati lyuukongindjila. Ehangano lyuukongindjila ndyoka li li muuyuni awuhe olya totwa po mo 1908 muBritania kOndjayi okuluntu yetangakwiita lyaBritania, Robert Stephenson Smyth Baden-Powell. Mo 1916 okwa li a toto po ehangano lyaakongindjila lyuumatyona wepipi lyandje hali ithanwa Wolf Cubs (nenge Cub Scouts).

Onda li ndi hole okuya koontanda ndhoka dha li hadhi ningwa momahuliloshiwike moshilongo. Ohatu lala moontanda twa zala omizalo dhuukongindjila, nokunyanda sho oongoma tadhi dhengwa. Onda li unene tuu handi nyanyukilwa okukala naakongindjila ooyakwetu, tatu imbi uusiku twa kundukidha omulilo nokudhana uudhano mokuti. Otwa li wo twi ilongo oshindji kombinga yeshito, shoka sha li she tu ningitha tu kale tu na olupandu lwiilonga yOmushiti gwetu.

Uumatyona uukongindjila ohawu ladhipikwa wu longe iilonga iiwanawa esiku kehe. Shika osho omoto yawo. Otwa li hatu popithathana tatu ti: “Otwi ilongekidha aluhe.” Epopitho ndyoka onda li ndi hole. Mongundu yetu yuumatyona wu vule pethele, etata lyomuwo owa li Uukatoolika, etata ekwawo owa li Uuprotestande. Kamwe oka li Okabudha.

Okuza mo 1920, iigongi yopaigwana yAakongindjila oya kala hayi ningwa konima yoomvula dhontumba. Onda li nda yi koshigongi shOpaigwana shAakongindjila oshitiheyali muBad Ischl, shaAustria muAuguste mo 1951 nosho wo oshitimugoyi muSutton Park, shi li popepi naBirmingham, moIngilanda muAuguste mo 1957. Poshigongi shoka oshitiyali, opwa li Aakongindjila 33 000 ya za kiilongo nokiitopolwa 85. Aantu 750 000 oya li wo ye ya ye tu talele po, mwa kwatelwa omukwaniilwakiitu gwaIngilanda, Elizabeth. Kungame, shoka osha li sha fa uumwayinathana womuuyuni awuhe. Noinaandi shi tseya kutya onandi ka kale ndi na ekwatathano nuumwayinathana uukumithi wu vule po, ano mboka wopambepo.

Osha li ethimbo lyokwenye mo 1958. Onda li pokumana edheulo lyokugandja iikulya mohotela Grand Hotel Wiesler yi li muGraz, shaAustria. Rudolf Tschiggerl, omuteleki gwiinima iitoye, ngaashi iikuki,  ngoka nda li handi longo naye okwa li a pendje uunzapo wontukuluka. Kanda li ndu uva nando onale kombinga yoshili. Tango okwa li a popi kombinga yelongo lyUukwatatu nokwa ti kutya kali shi elongo lyopaMbiimbeli. Onda patana tandi popile Uukwatatu nonda li nda hala ndu ulike kutya okwa puka. Onda li ndi hole omuniilonga omukwetu ngoka nonda li nda hala oku mu ladhipika a galukile mongeleka yaKatoolika.

Rudolf, ngoka twa li hatu mu ithana Rudi, okwa kongele ndje Ombiimbeli. Onda tsitsimike kutya oyi na okukala yaKatoolika. Onda tameke oku yi lesha nonde shi mono nziya kutya Rudi okwa tula mo okatraktate hoka ka nyanyangidhwa ko-Watchtower Society. Onda tindi okuka lesha, nonda li ndu uvite kutya oshileshomwa shi li ngaaka otashi vulika sha nyolwa momukalo ngoka tagu monika gwa fa gu li mondjila, ihe nani hasho. Ihe onda li ndi na ehalo okukundathana Ombiimbeli naye. Rudi okwa li u uvu ndje ko noka li we a pe ndje oshileshomwa. Muule woomvula ndatu lwaampono, otwa kala hatu ningi oonkundathana dhOmbiimbeli omathimbo nomathimbo ndhoka olundji dha li hadhi yi sigo omokati kuusiku.

Sho nda mana edheulo mohotela mondoolopa moka nda putukila muGraz, meme okwa futile ndje eilongo lya gwedhwa po kosikola yokulonga mohotela. Onkee onda tembukile koBad Hofgastein, ondoolopa yi li mesilu li li moAlps, moka omo mwa li osikola. Oya li hayi longele kumwe noGrand Hotel yi li moBad Hofgastein, nomathimbo gamwe onda li handi longo mo ndi mone ontseyo yi vulithe pwaashoka nda li handi ilongo mosikola.

Rudi okwa li a tumine ondjukithi yandje koshitayimbelewa shi li moVienna. Oshitayimbelewa oshe yi tumine kaamwameme yaali aatumwa, Ilse Unterdörfer naElfriede Löhr. * Esiku limwe ngoka ha longo pomathikilo mohotela okwi ithana ndje e ta ti kutya opu na aakulukadhi yaali ye li pondje mohauto noya li ya hala okupopya nangame. Onda li nda kumwa molwaashoka kanda li ndi ya shi. Ihe onda li nda yi pondje ndika tale kutya oyo oolye. Konima yethimbo, onde ya dhimbulula kutya oya li haya fala iileshomwa yOonzapo miitopolwa yomuNdowishi sho iilonga yokuuvitha ya li yi indikwa manga Iita Iitiyali yUuyuni inaayi tameka. Manga iita inaayi tameka, oya li ya kwatwa po kopolisi yomeholamo (Gestapo) noya li ya tuminwa kokamba yoonkwatwa koLichtenburg. Opo nduno pethimbo lyiita, oya li ya lundululilwa kokamba yi li moRavensbrück, popepi naBerlin.

Aamwameme mboka oya li tayi ihilile mepipi lyameme, onkee onda li nde ya simaneka. Kanda li nda hala okumana po ethimbo lyawo ndi kundathane nayo, nokonima yiiwike nenge yoomwedhi dhontumba tandi ya lombwela kutya inandi hala okutsikila. Onde ya pula owala ngele otaya vulu owala okweetela ndje omusholondondo gwomanyolo kombinga yelongo lyOshikatoolika lyelandulathano lyaayapostoli. Onde ya lombwele kutya otandi ke gu fala komusita gwomongeleka yetu tu ke gu kundathane naye. Onda dhiladhila kutya otandi ka mona nduno kutya oshili oyini.

Elongo lyaKatoolika kaRoma kombinga yelandulathano lyaayapostoli ohali ti kutya okuza komuyapostoli Petrus sigo okoopata oya kala taya landulathana.  (Ongeleka ohayi fatulula pambambo oohapu dhaJesus ndhoka dhi li muMateus 16:18, 19.) Elongo ndyoka ohali ti wo kutya pata iha fundju uuna ta popi iinima yi na ko nasha nelongo te shi ningi ta popi pangeleka, nenge pambelewa. Onda li nde shi itaala nonda li ndi wete kutya ngele pata, ngoka Aakatoolika haye mu ithana Tate Omuyapuki, iha fundju miinima yelongo lyopakalunga noha popile Uukwatatu kutya owoshili, nena oshi na okukala shoshili. Ihe ngele okwa fundju, nena elongo ndyoka otashi vulika lyiifundja. Osho molwaashoka kAakatoolika oyendji elongo lyelandulathano lyaayapostoli olyo elongo lya simanenena. Omalongo ogendji gOshikatoolika kutya nduno oga puka nenge oge li mondjila ogi ikolelela kulyo.      

Sho nda talele po omusita, ka li a vulu okuyamukula omapulo gandje. Okwa li a kutha molaka ye embo lyelongo lyOshikatoolika ndyoka li na elandulathano lyaayapostoli. Onda yi nalyo kegumbo ngaashi a lombwele ndje, e tandi li lesha, nonde mu galukile nomapulo ogendji ga gwedhwa po. Omusita ngoka inaa yamukula omapulo gandje. Okwa ti: “Itandi vulu oku ku itaalitha, nangoye ito vulu okwiitaalitha ndje.  . . Otandi ku halele uuwanawa awuhe!” Ka li we a hala okukundathana nangame.

Pethimbo mpoka, onda li ndi ilongekidha okukonakona Ombiimbeli naIlse naElfriede. Oya longo ndje oshindji kombinga yaTate gwomegulu, Jehova Kalunga, ngoka e li Omuyapuki shili. (Joh. 17:11) Moshitopolwa shoka kamwa li mu na egongalo natango, onkee aamwameme mboka yaali oya li haya ningile okugongala megumbo lyuukwanegumbo mboka wa li wu ulike ohokwe. Aashona owala ya li haya kala po. Aamwameme oya li haya kwatele komeho oyindji yomiitopolwa yokugongala oyo ayeke yaali, molwaashoka kapwa li omumwatate a ninginithwa a kwatele komeho. Omathimbo gamwe, omumwatate a za koshitopolwa shilwe okwa li he ya a gandje oshipopiwa shomontaneho mehala ndyoka lya li hali futilwa.

Ilse naElfriede oya tameke okukonakona Ombiimbeli nangame muKotoba 1958. Onda ninginithwa konima yoomwedhi ndatu muJanuali 1959. Manga inaandi ninginithwa, onde ya pula ngele itandi vulu okuya nayo miilonga yegumbo negumbo ndi ka tale kutya iilonga yokuuvitha ohayi longwa ngiini. (Iil. 20:20) Sho nda longo nayo oshikando shotango, onde ya pula ngele itandi vulu okukala ndi na oshitopolwa shandje shopaumwene. Oya tumine ndje komukunda gumwe, nonda kala handi yi ngame mwene ndika uvithe egumbo negumbo nosho wo okuninga omaishunoko kwaamboka yu ulika ohokwe. Omumwatate gwotango ngoka nda li nda longo naye miilonga yuukalele wegumbo negumbo okwa li omutonatelishikandjo ngoka konima a li e tu talele po.

Mo 1960, sho nda mana osikola yokulonga mohotela, onda galukile kondoolopa hoka nda putukila ndi kwathele aakwanezimo yandje yi ilonge ooshili dhOmbiimbeli. Ihe sigo onena, kapu na nando ogumwe e ya moshili, ihe yamwe oye na ohokwe.

Mo 1961 oshitayimbelewa osha li sha tumine omagongalo oontumwafo tadhi ladhipike uukokolindjila. Kanda li nda hokana, onkee onda mono kutya kandi na eipopilo lyasha tali imbi ndje ndi ye muukokolindjila. Onda popi nomutonatelishikandjo, omumwatate Kurt Kuhn, ndi uve kutya ota ti ngiini kombinga yokulonga iilonga yandje uule woomwedhi dha gwedhwa po, opo ndi vule okulanda ohauto, ndjoka tandi ka longitha muukokolindjila. Okwa ti ngiini? “Mbela Jesus naalongwa ye oya li ya pumbwa ohauto opo ya longe iilonga yethimbo lyu udha?” Shoka osha li sha kwathele ndje! Onda li nda ningi elongekidho lyokuya muukokolindjila nziya ngaashi tashi vulika. Ihe molwaashoka onda li handi longo oowili 72 moshiwike kehe morestolanda yi li mohotela, onda li ndi na okuninga tango omalunduluko.

 Onda pula omuhona gwandje ngele ita vulu okupitika ndje ndi longe oowili 60. Okwa pitike ndje nokwa li a futu ndje sha faathana. Konima yethimbo, onde mu pula ngele otandi vulu okulonga oowili 48 moshiwike. Okwe shi pitike natango nokwa li ha futu ndje omwaalu gwa faathana. Onda li nda pula natango ndi pitikwe ndi longe oowili 36 moshiwike kehe, nenge oowili hamano momasiku gahamano, okwa li natango e shi pitike. Shoka tashi kumitha osho kutya onda li natango nda futwa sha faathana! Osha fa shi li ngeyi kutya omuhona gwandje ka li a hala ndi ye. Molwaashoka onda li ndi itulila po elandulathano ndyoka, onda tameke uukokolindjila wondjigilile, nopethimbo ndyoka omuntu owa tegelelwa wu longe oowili 100 momwedhi.

Konima yoomwedhi ne, onda li nda langekwa po ndi li omukokolindjila i ikalekelwa nosho wo omupiya gwegongalo moshitopolwa Carinthia, shi li mondoolopa Spittal an der Drau. Pethimbo ndyoka, omukokolindjila i ikalekelwa okwa li a tegelelwa a gwanithe po oowili 150 momwedhi. Kanda li ndi na ngoka handi longo naye muukalele, ihe onda li handi pandula ekwatho ndyoka nda li handi pewa komumwameme Gertrude Lobner, ngoka a li omukwatheli megongalo pethimbo ndyoka. *

Mo 1963, onda li nda hiywa ndi ye miilonga yuutumwa. Omathimbo gamwe onda li handi yi komagongalo neshina, ndi na ookofa oondhigu. Aamwatate oyendji kaya li ye na oohauto, onkee kapu na ngoka a li ha vulu okwiila ndje ko kosasiona yomashina. Opo kaandi iyulike, kanda li ndi hole okuya notaxi kegumbo hoka tandi ka kala. Onda li handi yi ko kolupadhi.

Mo 1965, manga nda li inaandi hokana, onda li nda hiywa ndi ye kosikola onti-41 yaGilead. Aalongwa oyendji yomongundu yetu nayo kaya li ya hokana. Shoka sha li sha kumitha ndje, sho nda mana onda li nda tuminwa ndi ka longe koshilongo hoka nda putukila koAustria ndi ka tsikile niilonga yuutonatelishikandjo. Ihe manga inaandi za mo mIilongo ya Hangana, onda li nda pulwa ndi longe nomutonatelishikandjo uule wiiwike ine. Onda li ndi hole noonkondo okulonga nomumwatate Anthony Conte, ngoka a li e hole aantu nosho wo iilonga yomomapya. Okwa li e shi oku yi longa nawa. Otwa li twa longo pamwe naye moshitopolwa oshinene New york shi li moshitopolwa Cornwall.

Sho nda galukile koAustria, onda li nda pewa ndi ka longe moshitopolwa moka nda tsakanene nomumwameme enzuna Tove Merete. Aavali ye oya mono oshili sho e na oomvula ntano. Uuna aamwatate ya pula kutya otwa tsakanene ngiini, ohatu ningi omashendjo tatu ti: “Oshitayimbelewa osho sha li sha longekidha.” Otwa hokana konima yomvula, muApilili mo 1967, otwa li twa pitikwa tu tsikile niilonga yuuyendi.

Omvula ya ka landula ko, onde shi dhimbulula kutya omolwohenda yaJehova, okwa li a hogolola ndje ndi ninge omwanamati gwopambepo. Onkee onda tameke okukala ndi na ekwatathano naTate gwomegulu nosho wo naayehe mboka shi ikolelela kAaroma 8:15 haya ‘igidha kuKalunga taya ti “Tate! Tate!”’

Ngame naMerete otwa li twa tsikile okulonga pamwe miilonga yuutonateli woshikandjo nosho wo woshitopolwa sigo omo 1976. Omathimbo gamwe pothinge, otwa li hatu lala mondunda yi na uutalala wamemememe. Oshikando shimwe, otwa li twa penduka ekumbatha lyetu lya ninga iikangwa koongenge nolya  ninga etokele komifudho dhetu dha talala. Otwa tokola tu kale hatu ende nokashina kokupupyaleka, opo kaatu se uutalala uusiku. Kiitopolwa yimwe, opo tu longithe okayiyogelo uusiku, otwa li hatu ende molumi tu uka kokandjugo hoka ka li kaa ke li melandulathano. Katwa li tu na egumbo lyokukala. Omaandaha kehe otwa li aluhe hatu kala megumbo limwe moka omo twa kala tatu longo mokati koshiwike. Opo nduno, mEtiyali ethimbo lyongula otwa li hatu yi kegongalo lya landula ko.

Onda nyanyukwa okupopya kutya muule woomvula, omukulukadhi gwandje omuholike okwa kala aluhe ekwatho enene kungame. Oku hole iilonga yomomapya, nokapu na nando esiku limwe nde mu ladhipikile a ye muukalele. Oku hole wo ookuume ketu noku na ko nasha nayalwe. Shika osha kala ekwatho enene.

Mo 1976 otwa li twa hiywa tu ka longe koshitayimbelewa shaAustria moVienna. Onda li nda langekwa po ndi li oshilyo shOkomitiye yOshitayimbelewa. Pethimbo ndyoka, oshitayimbelewa shaAustria osho sha li tashi tonatele iilonga yokuuvitha miilongo yomUuzilo waEuropa nosha li osho hashi longekidha okufala iileshomwa meholamo kiilongo mbyoka. Omumwatate Jürgen Rundel okwa li a kwatele komeho moshinima shika, nokwa li ha katuka oonkatu olwindji. Osha li uuthembahenda okulonga naye nokonima onda li nda pulwa ndi tonatele iilonga yokutoloka momalaka omulongo miilongo yomUuzilo waEuropa. Jürgen nomukulukadhi gwe, Gertrude, otaya tsikile okulonga nuudhiginini ye li aakokolindjila yi ikalekelwa moNdowishi. Okutameka mo 1978, oshitayimbelewa shaAustria osha li sha topatopa nokupilinta iifo momalaka gahamano tashi longitha uushina uushona wokunyanyangidha. Otwa li wo twa tumine iifo kiilongo ya yooloka mbyoka ye yi mbesitela. Omumwatate Otto Kuglitsch, ngoka ha longo ngashingeyi nomukulukadhi gwe, Ingrid, koshitayimbelewa shi li moNdowishi, oye naanaa a li ha longekidha iinima mbyoka.

Aamwatate mboka ye li miilongo yi li mUuzilo waEuropa oya li wo haya nyanyangidha iileshomwa miilongo yawo taya longitha eshina lyokunyanyangidha nenge taya ningulula oofilima ndhoka dha longa nale. Ihe nonando ongawo, oya li natango ya pumbwa ekwatho okuza kiilongo yilwe. Jehova okwa li a gamene iilonga mbika, nokoshitayimbelewa otwa ka kala tu hole aamwatate mboka ya li haya longo moonkalo oondhigu. Pethimbo mpoka iilonga oya li yi indikwa uule woomvula odhindji.

Mo 1989, onda li nda mono uuthembahenda wokuya koRomania pamwe nomumwatate Theodore  Jaracz, oshilyo shOlutuwiliki. Elalakano olya li okukwathela aamwatate oyendji ya galukile kehangano. Okutameka mo 1949, oya li ye etha po ehangano omolwomatompelo ogendji noya li ya toto po omagongalo gawo yene. Ihe nonando ongawo, oya li ya tsikile okuuvitha nokuninginitha. Oya li wo ya tulwa moondholongo omolwetokolo lyawo lyopaKriste lyokwaakutha ombinga miita. Oya li owala ya fa aamwatate mboka ya li oshitopolwa shehangano ndyoka lya taambiwa ko koombelewa dhetu oonene. Iilonga oya li natango yi indikwa moRomania, onkee otwa li hatu tsakanene meholamo megumbo lyomumwatate Pamfil Albu, naakuluntugongalo yane mboka ooshikwete po naakalelipo yOkomitiye yomOshilongo shaRomania. Otwa li wo twa yi nomutoloki a za koAustria, Rolf Kellner.

Onguluhi ontiyali yoonkundathana, omumwatate Albu okwa li a ladhipike aakuluntugongalo yakwawo yane ya hangane natse sho a ti: “Ngele itatu shi ningi ngashingeyi, otashi vulika kaatu ka mone we ompito.” Konima yaashoka, aamwatate ye li 5 000 lwaampono oya li ya hangana natse mehangano. Kalya li tuu esindano enene kuJehova, na Satana ka li tuu a dhengwa pomutima!

Lwokuuka pehulilo lyomumvo 1989, manga uukomunisi mUuzilo waEuropa inaawu hula po, Olutuwiliki olwa li lwa hiya ndje nomukulukadhi gwandje tu tembukile koombelewa oonene koNew York. Shika osha li oshinima oshikumithi noonkondo kutse. Otwa li twa tameke iilonga mObetel yaBrooklyn muJuli mo 1990. Mo 1992, onda li nda langekwa po ndi li omukwatheli gwOkomitiye yIilonga yOlutuwiliki, nokuza muJuli 1994, onda li nda mono uuthembahenda wokulonga ndi li oshilyo shOlutuwiliki.

Ethimbo nda kala nokulonga mohotela ndi li omugandji gwiikulya ngashingeyi olya pita. Ngashingeyi ohandi nyanyukilwa okukutha ombinga mokulongekidha nokugandja iikulya yopambepo kaamwatate muuyuni awuhe. (Mat. 24:45-47) Okutala konima oomvula dhi vulithe po 50 ndi li miilonga yi ikalekelwa yethimbo lyu udha, ondi na olupandu olunene nosho wo enyanyu omolwomayambeko gaJehova ngoka a pa uumwayithana wetu muuyuni awuhe. Ondi hole okukala piigongi yopaigwana, mpoka hapu tsuwa omuthindo okwiilonga kombinga yaTate gwetu gwomegulu, Jehova nosho wo oshili yOmbiimbeli.

Ohandi galikana opo aantu omamiliyona ya konakone Ombiimbeli, ya taambe ko oshili, noya longele Jehova ya hangana nuumwayinathana wopaKriste muuyuni awuhe. (1 Pet. 2:17) Onda tegelela wo nondjuulukwe oku ka tala okuza megulu eyumuko kombanda yevi, noku ka mona tate. Ondi na einekelo kutya tate nameme nosho wo aakwanezimo yalwe aaholike otaya ka kala ya hala okulongela Jehova moParadisa.