SHO omuyapostoli Petrus i idhimbike Jesus, okwa lili nokulililila. Jesus okwa li a hala oku mu longitha a kwathele yalwe, nonando osha li tashi ka kala oshidhigu kuPetrus okukala ishewe a kola pambepo. Jesus okwe mu lombwele a ti: “Nongele wa galukile kungame, tsa wo ooyakweni omukumo.” (Luk. 22:32, 54-62) Petrus osho a ningi. Okwa ka ninga omuwiliki megongalo lyopaKriste lyopetameko. (Gal. 2:9) Sha faathana, nokunena ngele omumwatate okwa kuthwa oshinakugwanithwa shuukuluntugongalo oha vulu oku shi galulilwa. Ota ka kala a nyanyukwa sho ta kwathele aamwahe ya kale ya kola pambepo.

Aamwatate yamwe mboka ya li ye na iinakugwanithwa otashi vulika ye yi kuthwa, notapeya sha li she ya yemateke. Julio * okwa kala omukuluntugongalo moSouth Amerika oomvula dha konda po 20. Okwa ti: “Okwiilongekidhila iipopiwa, okutalela po aamwatate nokuninga omatalelopo guusita osha kala oshinima tashi dhana onkandangala onene monkalamwenyo yandje! Iinakugwanithwa mbyoka onda li nde yi kanitha, nonda li ndi uvite nda kanitha oshinima shi na ondilo monkalamwenyo. Osha li lela ethimbo edhigu kungame.” Sho tatu popi ngeyi, Julio omukuluntugongalo.

Omulongwa Jakob okwa nyola a ti: “Italeni aanelago, ngele tamu adhika komamakelo gi ili nogi ili.” (Jak. 1:2) Okwa li ta popi omamakelo ngoka hage tu adha sho tatu hepekwa, nenge molwuulunde wetu. Okwa popi kombinga yokwiihola mwene, yokutongola nosho tuu. (Jak. 1:14; 2:1; 4:1, 2, 11) Uuna Jehova te tu geele, ohashi vulika tu kale twa nika oluhodhi. (Heb. 12:11) Ihe egeeloputudho ndyoka tatu pewa kali na oku tu yuga enyanyu lyetu.

Ihe nonando otu kuthwe iinakugwanithwa mbyoka tu na megongalo, otu na natango ompito yokuulika eitaalo lyetu nosho wo ohole yetu yokuhola Jehova. Otatu vulu wo okutedhatedha kutya omolwashike twa pewelwe iinakugwanithwa mbyoka. Mbela osha li omolwuuwanawa wetu yene? Nenge mbela ohole yokuhola  Jehova oyo ye tu inyengithile tu lalakanene uuthembahenda mboka? Otwa li tuu twa tompwa shili kutya egongalo olye, nolya pumbwa okusilwa oshimpwiyu pahole? (Iil. 20:28-30) Mboka ya li nale aakuluntugongalo ohaya tsikile nokulonga iilonga iiyapuki nenyanyu. Kungawo, otayu ulukile aantu ayehe nosho wo Satana kutya ohole yawo yokuhola Jehova oyashili.

Omukwaniilwa David naye okwa geelwa omolwomayono ge ga kwata miiti. Ihe okwa dhiminwa po, sho a taamba ko epukululo. Okwi imbi a ti: “Aanelago oomboka oondjo dhawo dha dhimwa po, mboka ya kuthilwa po omayono gawo. Omunelago omuntu ngoka OMUWA itee mu pe uusama noke na iifundja nando yasha.” (Eps. 32:1, 2) David okwa li a zulwa kegeeloputudho ndyoka a pewa. Nokwa ningi omusita gwoshigwana shaKalunga omwaanawelela.

Olundji omumwatate ngoka a galulilwa oshinakugwanithwa shuukuluntugongalo oha kala omusita omwaanawa e vulithe nale. Omukuluntugongalo gumwe okwa ti: “Ngashingeyi ohandi kala ndi uvite ko nawa onkalo yaamboka ya yona megongalo, nonkene ndi na oku ya kwathela.” Gulwe okwa ti: “Ngashingeyi onda lenga uuthembahenda wandje wokukwathela aamwatate.”

Katu na okudhiladhila kutya Kalunga ke na siku a ka kale i inekela omuntu ngoka a yona sha kwata miiti. Omupisalomi okwa nyola a ti: “[Jehova] iha tamanana ethimbo kehe.” (Eps. 103:9) Ricardo ngoka a kuthwa uuthembahenda konima sho a kala nokulonga e li omukuluntugongalo omimvo odhindji okwa popi a ti: “Onda li tandi ili ominwe. Onda kala ndi uvite nda kambela sha uule wethimbo ele, nomaiyuvo ngoka oga li gi imbi ndje ndi ninge ishewe omukuluntugongalo, opo ndi kwathele aamwatate. Onda li ndu uvite kutya yalwe itaya ka vula we okwiinekela ndje, kutya ondi kambadhale shi thike peni. Ihe molwaashoka ondi hole okukwathela yalwe, onda li ndi na aakonakonimbiimbeli, handi ladhipike aamwatate pokugongala nokulonga pamwe nayo muukalele. Shika osha kwathele ndje ndi kale ndi na omukumo. Ngashingeyi ondi li ishewe omukuluntugongalo.”

Okukwatela onkone otaku vulu okwiimba omumwatate a galulilwe muukuluntugongalo. Oshi li nawa okukala ngaashi omupiya gwaJehova, David. Okwa li a yi  ontuku sho a mono kutya omukwaniilwa Saul okwe mu tsila ondumbo. David okwa li e na oompito odhindji dhokugalulila Saul uuwinayi, ihe ine shi ninga. (1 Sam. 24:4-7; 26:8-12) Sho Saul a sile molugodhi, David okwa lili. Okwa lili Saul naJonatan ta ti: “Aaholike, Saul naJonatan, aakwetu.” (2 Sam. 1:21-23) David ka li nando a kwatela Saul onkone.

Uuna kaamu uvitathane nenge wu wete gumwe e ku enda nayi, ino etha ondjahi yi pangele omadhiladhilo goye. Pashiholelwa, William gwokoBritania okwa li a kwatela aakuluntugongalo yamwe onkone, sho a kuthwa muukuluntugongalo moka a kala uule womimvo 30. Oshike sha li she mu kwathele a kale e na ondjele? Okwa ti: “Embo lyaJob olya tsu ndje omukumo. Ngele Jehova okwa kwathelele Job, opo a pange ombili nookuume ke yatatu, ngame ongame itaa ka kwathela ndi pange ombili naakuluntugongalo ooyakwetu?” —  Job 42:7-9.

Ngele owe ethele po okulitha oshigunda shaKalunga kungoye mwene, onawa wi ipule kutya omolwashike we shi ningile. Mbela owa li wa gwililwa po komaupyakadhi? Mbela owa li wa lenga unene iinima yilwe monkalamwenyo yoye? Nenge owa li wa teka owala omukumo omolwokwaagwanenena kwayalwe? Dhimbulukwa aluhe kutya sho wa li omukuluntugongalo, owa li wu na ompito yokukwathela yalwe momikalo odhindji. Iipopiwa yoye oya li hayi ya ladhipike. Oshiholelwa shoye osha li hashi ya tsu omukumo, nomatalelopo goye guusita oga li hage ya kwathele yi idhidhimikile omayeleko. Iilonga yoye sho wa li omukuluntugongalo omudhiginini oya li hayi nyanyudha Jehova, nangoye mwene owa li wa nyanyukwa. —  Omayel. 27:11.

Jehova okwa kwathela aamwatate ya kale nenyanyu nosho wo ehalo lyokukwatela komeho megongalo. Ngele owe ethele po nenge wa kuthilwe oshinakugwanithwa shokulitha oshigunda shaKalunga, oto vulu natango “okuninga omuwiliki gwegongalo.” (1 Tim. 3:1) Paulus okwa li ‘ha galikanene aluhe’ Aakriste ooyakwawo muKolossa, opo yu udhithwe nontseyo yokutseya ehalo lyaKalunga nokukala “ngashika [Jehova] a hala ya kale, nokulonga aluhe shoka she mu opalela.” (Kol. 1:9, 10) Ngele owa pewa ishewe uuthembahenda wokukala omukuluntugongalo, pula Jehova e ku pe oonkondo, eidhidhimiko nosho wo enyanyu. Momasiku ngaka gahugunina, oshigwana shaKalunga osha pumbwa aasita aanahole ye shi ambidhidhe pambepo. Mbela ito vulu okukwathela aamwaho? Mbela owu na ehalo lyoku shi ninga?