Epulo ndika olya simana unene tuu kwaamboka ya silwa ookuume kawo kopandjokana. Aantu mboka otashi vulika ya halelela oku ka kala ishewe pamwe nookuume kawo kopandjokana muuyuni uupe, ngele ya yumuka. Omusilwalume gumwe okwa ti: “Ngame nomukulukadhi gwandje hatse twa tokola tu hulithe po ondjokana yetu. Otwa li twa halelela okukala twa hangana mokulongela Kalunga tu li aaihokani sigo aluhe. Sigo onena osho handi kala ndi uvite ngawo.” Mbela opu na ngaa etompelo lyokukala netegameno kutya oonakuyumudhwa otaya ka hokana ishewe? Kapu na eyamukulo lyothaatha.

Iileshomwa yetu oya kala uule woomvula tayi ti kutya eyumuko nondjokana mbyoka ya popiwa kuJesus, oya li tayi ulike keyumuko ndyoka tali ka ningwa kombanda yevi. Oya tile wo kutya muuyuni uupe, mboka taya ka yumudhwa otashi vulika itaaya ka hokanwa nenge itaaya ka hokana. * (Mat. 22:29, 30; Mark. 12:24, 25; Luk. 20:34-36) Mbela otashi vulika oohapu ndhoka Jesus a popile tadhi popi kombinga yaamboka taya ka yumudhwa ya ye megulu? Natu konakoneni shoka Jesus a ti.

Mbela Jesus okwa li ta popi noolye sho a popi kombinga yeyumuko? (Lesha Lukas 20:27-33.) Jesus okwa li ta popi nAasadukayi mboka ya li inaayi itaala meyumuko. Oye mu pula kombinga yeyumuko nosho wo kombinga yondjokana pokati komuselekadhi nasuwala ye, opo ye mu yeleke. * Jesus okwa ti kuyo: “Aana yuuyuni mbuka ohaa hokana nohaa hokanwa. Ihe oomboka taa talwa yo opala okuya muuyuni mbwiyaka nomeyumuko lyokuusi, ihaa hokana nongaashi ihaa hokanwa. Oshoka itaa wapa we okusa, oshoka oyo ya fa aayengeli, noyo aana yaKalunga, oshoka oyo aana yeyumuko.” —  Luk. 20:34-36, OB-1954.

Omolwashike iileshomwa yetu ya tile kutya Jesus okwa li ta popi kombinga yaamboka taya ka yumudhilwa kombanda yevi? Otwa thikile pehulithodhiladhilo ndyoka omolwomatompelo gaali. Lyotango, otashi vulika Aasadukayi ya li taya dhiladhila kombinga yeyumuko lyokombanda yevi, nomolwaashono kwa li taku dhiladhilwa kutya Jesus oku na okukala e ya yamukula shi ikolelela kwaashoka ya li taya dhiladhila. Netiyali, Jesus okwa hulitha eyamukulo lye noohapu tadhi popi kombinga yaAbraham, Isak naJakob, ootatekulululwa aatilikalunga mboka taya ka yumudhilwa kombanda yevi. —  Luk. 20:37, 38.

Ihe otashi vulika Jesus a li ta popi kombinga yaamboka taya ka yumudhilwa megulu. Omolwashike mbela tatu vulu okutya ngawo? Natu kundathaneni omatumbulo gaali ga simana.     

‘Mboka taa talwa yo opala okuya meyumuko lyokuusi.’ Aagwayekwa aadhiginini oyo ‘yo opalela Oshilongo shaKalunga’ nenge Uukwaniilwa waKalunga. (2 Tes. 1:5, 11) Oya talika ye li aayuuki noya gwana okumona omwenyo omolwekuliloyambo; nongele ya si, Kalunga ohe ya tala ko ongaamboka yaa na oondjo. (Rom. 5:1, 18; 8:1) Ohaya ithanwa “aanelago naalalekwa nuuyamba” noyo opalela okuyumudhilwa megulu. (Eh. 20:5, 6) Mepingathano naashoka, mwaamboka taya ka yumudhwa ya kale nomwenyo kombanda yevi, omwa  kwatelwa wo ‘aawinayi.’ (Iil. 24:15) Mbela mboka otaya vulu ngaa okutiwa ‘otaa talwa yo opala’ okuyumudhwa?

“Itaa wapa we okusa.” Jesus ina tya: “Itaa ka sa we.” Ihe okwa ti: “Itaa wapa we okusa.” Oombiimbeli dhilwe odha toloka oohapu ndhoka dha ti, “itaa pangelwa we keso” nenge “eso kali na we oonkondo oku ya pangela.” Aagwayekwa mboka ya kala aadhiginini sigo eso, ohaya yumudhilwa omwenyo gwaana ehulilo megulu. (1 Kor. 15:53, 54) Mboka taya ka yumudhilwa megulu, kaye na we siku ya ka se. *

Ngele tatu tala kwaashoka twa zi nokukundathana, otatu vulu okuya pehulithodhiladhilo lini? Otapeya Jesus a li ta popi kombinga yaamboka taya ka yumudhilwa megulu. Ngele osho, shika otashi tu longo iinima yontumba kombinga yaamboka taya ka yumudhilwa megulu: Ihaya yi mondjokana, ihaya vulu okusa noya fa aayengeli. Ihe ehulithodhiladhilo ndika otali pendutha omapulo gontumba.    

Lyotango, omolwashike Jesus a popi kombinga yeyumuko lyoku ka kala megulu sho ta yamukula Aasadukayi, mboka tashi vulika ya li taya dhiladhila kombinga yeyumuko lyokukala kombanda yevi? Jesus ka li aluhe ha yamukula mboka taye mu pataneke metsokumwe naashoka taya dhiladhila. Pashiholelwa, sho a yamukula Aajuda mboka ya li ye mu pula endhindhiliko, okwa ti: “Kumunii po otempeli ndjika, ngame notandi yi tungulula momasiku gatatu.” Jesus otashi vulika a li e shi kutya otaya dhiladhila kombinga yotempeli yo yene, ‘ihe otempeli ndjoka Jesus a li ta popi, olutu lwe.’ (Joh. 2:18-21) Otapeya Jesus a li u uvite kutya ina pumbwa okuyamukula Aasadukayi aafudhime mboka inaayi itaala meyumuko nomaayengeli. (Omayel. 23:9; Mat. 7:6; Iil. 23:8) Pehala lyaashoka, otashi vulika a li a hala okuhololela aalongwa ye aadhiginini uuyelele kombinga yeyumuko ndyoka. Aalongwa mbaka otaya ka kala netegameno lyoku ka yumukila megulu.

Etiyali, omolwashike Jesus a hulitha oonkundathana dhe ta popi aantu mboka taya ka yumudhilwa kombanda yevi, ngaashi Abraham, Isak naJakob? (Lesha Mateus 22:31, 32.) Ndhindhilika kutya manga Jesus inaa popya kombinga yaalumentu mbaka aatilikalunga, okwa ti: “Ihe kombinga yeyumuko lyaasi.” Sho a popi oohapu ndhoka otashi vulika a li a hala okuulika kutya ngashingeyi ota popi kombinga yeyumuko lyokombanda yevi. Jesus okwa li e shi kutya Aasadukayi oyi itaala momanyolo gaMoses, nomolwaashono a popi oohapu ndhoka Kalunga a lombwelele Moses poshihwa sha hwama, opo e ya pe uumbangi wa gwedhwa po kutya Kalunga ota ka yumudha aantu ya ka kale kombanda yevi. —  Eks. 3:1-6.    

Etitatu, ngele nani Jesus okwa li ta popi kombinga yeyumuko lyomegulu, mbela shika otashi ti kutya mboka taya yumukile kombanda yevi otaya ka vula okuhokana? Ombiimbeli inayi yamukula epulo ndyoka thiluthilu. Ngele Jesus okwa li ta popi kombinga yeyumuko lyomegulu, nena oohapu dhe inadhi popya sha kombinga yangele mboka taya ka yumudhilwa kombanda yevi muuyuni uupe otaya ka hokana nenge itaya ka hokana.

Otu shi kutya Ombiimbeli otayi ti kutya eso ohali hulitha po ondjokana. Onkee ano, ngele kuume koye kopandjokana okwa hulitha, ino kala wu uvite ondjo, ngele owa tokola okuhokanununa. Ndyoka etokolo lyopaumwene, nokape na ngoka e na okupa omuntu uusama sho a hala okwiimonena kuume kopandjokana. —  Rom. 7:2, 3; 1 Kor. 7:39.

Otashi vulika tu na omapulo ogendji kombinga yonkalamwenyo muuyuni uupe. Ihe pehala lyokukala tatu fekele, otu na owala okutegelela tu ka tale shoka tashi ka ningwa po. Ihe otu na uushili kutya aantu ayehe aavuliki otaya ka kala ya nyanyukwa, oshoka Jehova ota ka gwanitha po thiluthilu oompumbwe dhawo nomahalo gawo agehe. —  Eps. 145:16.