1. Paulus okwa li e uvitile ngiini mboka taya longele Jehova nuudhiginini?

OMUYAPOSTOLI Paulus okwa li ha dhimbulukwa mboka hayu uvitha nuudhiginini onkundana ombwanawa. Okwa nyola a ti: “Ohatu mu dhimbulukwa koshipala shaKalunga Tate, nkene mu na eitaalo li na iilonga, nkene mu na ohole tayi mu longitha nuupenda nonkene okutegamena kweni Omuwa gwetweni Jesus Kristus kwa kola.” (1 Tes. 1:3) Odhoshili kutya Jehova naye oha dhimbulukwa iilonga yaayehe mboka haye mu longele nuudhiginini, kutya nduno oshindji nenge oshishona. —  Heb. 6:10.

2. Oshike tatu ka kundathana moshitopolwa shika?

² Kutya nduno onale nenge onena, aapiya yaJehova oyendji oya ninga omaiyambo ogendji, opo ye mu longele ethimbo lyu udha. Natu taleni kunkene yamwe ya li ye mu longele methelemumvo lyotango. Otatu ka tala wo kiilonga yimwe yethimbo lyu udha mbyoka hayi longwa ngashingeyi kaapiya yaJehova nokutala nkene tatu vulu oku ya kwathela.

3, 4. (a) Methelemumvo lyotango yamwe oya li ya longo iilonga yini yethimbo lyu udha? (b) Oya li haya hupu ngiini?

³ Jesus okwa li a tameke okuuvitha kombinga yUukwaniilwa konima owala sho a ninginithwa nokwa dheula wo yalwe nayo ye shi ninge. (Luk. 3:21-23; 4:14, 15, 43) Sho Jesus a si, aayapostoli ye oya kwatele  komeho iilonga yokuuvitha, niilonga mbika oya tamunuka mo. (Iil. 5:42; 6:7) Aakriste yamwe, ngaashi Filippus, oya li aayevaangeli naatumwa muPalestina. (Iil. 8:5, 40; 21:8) Paulus nayalwe oya li haye ku uvitha kiitopolwa yokokule. (Iil. 13:2-4; 14:26; 2 Kor. 1:19) Pashiholelwa, yamwe ngaashi, Silvanus (Silas), Markus naLukas oya li ya nyola omambo gamwe gOmbiimbeli nenge ya li oohamushanga. (1 Pet. 5:12) Aamwameme aakiintu oya li ya longo pamwe naamwatate mbaka aadhiginini. (Iil. 18:26; Rom. 16:1, 2) Ohatu lesha nenyanyu kombinga yiimoniwa yawo yituntula mOmanyolo gopaKriste gOshigreka. Niimoniwa yawo otayi ulike kutya Jehova oha dhimbulukwa aapiya ye nohe ya gwanithile po oompumbwe dhawo.

⁴ Mboka ya li miilonga yethimbo lyu udha methelemumvo lyotango oya li ya kwathelwa ngiini pashimaliwa? Omathimbo gamwe, Aakriste ooyakwawo oya li ye ya taamba ko momagumbo gawo noku ya kwathela momikalo dhilwe, ashike kaya li haya pula ya kwathelwe. (1 Kor. 9:11-15) Oohandimwe nomagongalo oya li ye ya kwathele nehalo ewanawa. (Lesha Iilonga 16:14, 15; Aafilippi 4:15-18.) Paulus nosho wo yalwe oya li wo haya longo omathimbo gamwe, opo ya mone oshimaliwa.

5. Aaihokani yamwe oya ti shike kombinga yokukala kwawo miilonga yethimbo lyu udha?

⁵ Nena opu na wo oyendji mboka taya longele Jehova nuudhiginini miilonga yethimbo lyu udha. (Tala oshimpungu “ Iilonga yi ili noyi ili yethimbo lyu udha.”) Mbela oyu uvitile ngiini ehogololo ndyoka ya ninga? Uuna to ya pula epulo ndyoka, otashi ke ku ladhipika nangoye wu ninge sha faathana. Natu taleni koshiholelwa shimwe: Omumwatate gumwe ngoka a li omukokolindjila gwondjigilile, e ta ningi omukokolindjila i ikalekelwa, omutumwa nolwanima Omubetel koshilongo kaashi shi shaandjawo, ota ti: “Onda mona kutya okuya miilonga yethimbo lyu udha oko ehogololo limwe ewanawa nda ninga. Sho ndi na oomvula 18, onda li nda nyengwa okuninga etokolo kutya pokati kokuya kouniveesiti, kokukonga iilonga nenge okuya muukokolindjila nandi kuthe po shike. Onda mona kutya Jehova iha dhimbwa omaiyambo ngoka omuntu wa ninga, opo wu ye miilonga yethimbo lyu udha. Onda li nda vulu okulongitha uunkulungu mboka Jehova a pa ndje momikalo ndhoka ando inaandi vula oku shi ninga, ando onda hogololele eithano lyomuuyuni.” Omukulukadhi gwe ota ti: “Oshilonga kehe twa li twa longo osha kwathele ndje ndi hume komeho pambepo. Otwa li tu uvite aluhe kutya Jehova ote tu gamene note tu wilike, nokuli momikalo ndhoka ando inaatu shi ningilwa, ando otwa li inaatu ya miilonga yethimbo lyu udha. Ohandi pandula Jehova esiku kehe sho tatu mu longele ethimbo lyu udha.” Mbela nangoye owa hala okukambadhala okuya miilonga yethimbo lyu udha, opo wu kale wu uvite ngawo?

6. Jehova oku uvitile ngiini iilonga mbyoka hatu mu longele?

⁶ Eeno, yamwe oonkalo dhawo itadhi ya pitike okuya miilonga yethimbo lyu udha ngashingeyi, ihe nonando ongaaka otaya kambadhala okulongela Jehova ngaashi taya vulu. Otu na einekelo kutya Jehova okwa lenga iilonga yawo. Dhiladhila kwaamboka Paulus a tumbula muFilemon 1-3 nosho wo ayehe mboka ya li megongalo lyaKolossa. (Lesha.) Paulus okwa li a lenga iilonga yawo mbyoka Jehova naye a lenga. Tate yetu gwomegulu okwa pandula wo iilonga mbyoka to mu longele. Ihe mbela ongiini to vulu okwaambidhidha mboka ye li miilonga yethimbo lyu udha ngashingeyi?

7, 8. Uukokolindjila owa kwatela mo shike? Ongiini yalwe megongalo taya vulu okukwathela aakokolindjila?

⁷ Ngaashi aauvithi yomethelemumvo lyotango, aakokolindjila nayo ohaya tsu egongalo omukumo. Oyendji ohaya uvitha oowili 70 omwedhi kehe. Mbela oto ke ya kwathela ngiini?

⁸ Omumwameme gumwe omukokolindjila  gwedhina Shari okwa ti: “Molwashoka aakokolindjila ohaya kala momapya esiku alihe, ohaya monika ya kola pambepo. Ihe nayo oya pumbwa okutsuwa omukumo.” (Rom. 1:11, 12) Omumwameme gumwe ngoka a kokolele ondjila uule woomvula odhindji, okwa popi kombinga yaakokolindjila megongalo lyawo, a ti: “Ohaya longo yaa na ezimbuko. Ohaya pandula, ngele aaniihauto ye ya pula ya ye nayo momapya, ngele yalwe ye ya hiya ya ka lye pamwe nayo, ye ya pe okamaliwa komahooli nenge ye ya kwathele pashimaliwa momukala gulwe. Shoka ohashi ya ulukile kutya owu na ko nasha nayo.”

9, 10. Yamwe megongalo oya li ya ningi shike, opo ya kwathele aakokolindjila?

⁹ Mbela ino hala okwaambidhidha aakokolindjila momapya? Omukokolindjila gwedhina Bobbi okwa ti: “Otwa pumbwa ooitaali ooyakwetu mboka taya vulu okulonga pamwe natse mokati koshiwike.” Omukokolindjila gulwe megongalo olyo tuu ndyoka, okwa ti: “Ihashi kala oshipu okumona omuntu ngoka to ka longa naye komatango.” Omumwameme gumwe ngoka ngashingeyi e li kObetel yaBrooklyn ota dhimbulukwa nawa sho a li ha kokola ondjila, ta ti: “Omumwameme gumwe ngoka a li e na ohauto okwa lombwelele ndje a ti, ‘Kehe ethimbo kuu na ngoka to ka longa naye, dhengela ndje owala opo tu ye pamwe.’ Okwa li a kwathele ndje shili ndi tsikile nuukokolindjila.” Shari ota ti: “Olundji shampa aakokolindjila mboka kaaye na ookuume kopandjokana ya zi momapya, ohaya kala ya sa ezaza. Omathimbo nomathimbo oto vulu oku ya hiya kelongelokalunga lyuukwanegumbo weni. Ohashi ya kumike wo ngele owe ya kwatele mo momaipyakidhilo galwe.”

¹⁰ Omumwameme gumwe ngoka a kala ta kokola ondjila konyala uule woomvula 50, okwa popi kombinga yekwatho ndyoka ye nosho wo aamwameme yalwe mboka inaaya hokanwa ya li ya mono, ta ti: “Aakuluntugongalo oya li haye tu talele po ethimbo kehe konima yoomwedhi dhontumba. Oya li haye tu pula kombinga yiilonga yetu, yuukolele nokuuva ngele otu na uupyakadhi washa. Oya li haye ya kokafuleta ketu ya tale ngele otwa pumbwa sha.” Shika otashi tu dhimbulukitha nkene Paulus a li a pandula ekwatho ndyoka a pelwe komusamane gumwe muEfeso. —  2 Tim. 1:18.

11. Uukokolindjila wi ikalekelwa owa kwatela mo shike?

¹¹ Omagongalo gamwe oga yambekwa shili sho ge na aakokolindjila yi ikalekelwa. Aakokolindjila  mbaka ohaya uvitha oowili 130 omwedhi kehe. Yo ihaya longo, opo ando ya mone oshimaliwa, oshoka ohaya kala unene taya uvitha nenge taya longo iilonga yilwe megongalo. Opo ya gandje eitulomo lyawo kuukalele, ohaya mono okamaliwa okuza koshitayimbelewa ka gwana oompumbwe dhawo omwedhi kehe.

12. Aakuluntugongalo nosho wo yalwe otaya vulu ngiini okwaambidhidha aakokolindjila yi ikalekelwa?

¹² Ongiini tatu vulu okukwathela aakokolindjila yi ikalekelwa? Omukuluntugongalo gumwe e li koshitayimbelewa ngoka hu ungaunga nayo, ota ti: “Aakuluntugongalo oya pumbwa okupopya nayo, okutseya kutya oye li moonkalo dhini nokumona kutya ongiini taya vulu oku ya kwathela. Ooitaali yamwe ohaya dhiladhila kutya aakokolindjila yi ikalekelwa oye li nawa, oshoka ohaya mono okamaliwa. Ihe aamwameme megongalo otaya vulu oku ya kwathela momikalo dhilwe.” Ngaashi aakokolindjila yondjigilile, aakokolindjila yi ikalekelwa nayo oya pumbwa ookuume yokulonga nayo momapya. Mbela ito vulu okulonga pamwe nayo?

13, 14. (a) Oshike tu na okukaleka momadhiladhilo kombinga yaatonateli yiikandjo naakulukadhi yawo? (b) Oshike to vulu okuninga, opo wu kwathele mboka ye li miilonga yuuyendi?

¹³ Olundji aatonateli yiikandjo naakulukadhi yawo, aamwameme naamwatate ye na eitaalo lya kola nohaye tu tsu omukumo. Ashike nayo oya pumbwa okutsuwa omukumo, ookuume yokulonga nayo momapya nosho wo okukwatelwa mo momainyanyudho gontumba. Ongiini ngele oya akukilwa kuuvu e taya taambelwa moombete, pamwe nokuli ya pumbwa etando nenge ekwatho lilwe lyopaunamiti? Ohashi ya nyanyudha shili ngele aamwahe taye ya kwatha noompumbwe dhawo nenge taye ya ulukile kutya oye na ko nasha. Dhiladhila owala nkene Lukas, ‘ndohotola omuholike’ ngoka a nyola embo lyIilonga, a li u ulukile Paulus nosho wo aayendi pamwe naye kutya oku na ko nasha nayo. —  Kol. 4:14; Iil. 20:5–21:18.

¹⁴ Aatonateli aayendi naakulukadhi yawo oya pumbwa ookuume mboka taye ya ulukile ohole noku ya tsa omukumo. Omutonatelishikandjo gumwe okwa nyola a ti: “Ookuume kandje ohaya mono kutya uunake nda pumbwa okutsuwa omukumo. Ohaya pula ndje omapulo ga dhiladhilwa nawa, naashika ohashi kwathele ndje ndi ya lombwele shoka tandi ipula nasho. Nonando oya pulakene owala itaaya ti sha, shoka ohashi kwathele ndje lela.” Aatonateli yiikandjo naakulukadhi yawo ohaya pandula aamwameme naamwatate sho tayu ulike kutya oye na ko nasha nayo.

15, 16. Omolwashike oshilonga shoka hashi longwa kAabetel sha simana? Ongiini tatu vulu oku ya ambidhidha?

¹⁵ Muuyuni awuhe, mboka haya longele kObetel ohaya longo oshilonga sha simana shoka tashi ambidhidha euvitho lyonkundana ombwanawa. Ngele megongalo lyeni nenge moshikandjo sheni omu na Aabetel, ongiini to vulu oku ya ambidhidha?

¹⁶ Ngele opo ye ya mo mObetel, ohashi vulika ya kale ya sa ezaza, molwaashoka ye li kokule noyaandjawo nenge nookuume kawo. Aabetel mbaka aape ohaya kala ya nyanyukwa shili ngele iilyo yegongalo nosho wo Aabetel ooyakwawo taya panga uukuume nayo. (Mark. 10:29, 30) Iilonga yawo kObetel ohayi ya pe ompito yokuya kokugongala oshiwike kehe nokuya momapya. Ashike omathimbo gamwe, Aabetel otapeya ya kale ye na iilonga oyindji. Otashi ka kala nawa ngele iilyo yegongalo oyu uvite ko onkalo ndjoka nokuulika wo kutya oya lenga iilonga mbyoka Aabetel taya longo. —  Lesha 1 Aatessalonika 2:9.

17, 18. Mboka ye li miilonga yethimbo lyu udha kiilongo yilwe, ohaya longo iilonga yini?

¹⁷ Mboka haya ka longela kiilongo yilwe otashi vulika ye na okwiilonga elaka epe, okulya iikulya mbyoka inaayi igilila nokwiilonga  omikalondjigilile omipe. Mboka haya longo pondje yoshilongo miilonga yethimbo lyu udha ohaya longo iilonga yini?

¹⁸ Yamwe aatumwa mboka ya dheulwa nawa nohaya kala aluhe taya uvitha nokudheula yalwe megongalo. Oshitayimbelewa ohashi longekidhile aatumwa ehala lyokukala nosho wo okamaliwa kokwiikwatha nako. Yalwe ohaya tuminwa kiilongo yilwe ya ka longe koshitayimbelewa nenge ya ka kwathele nokutunga iitayimbelewa, oombelewa dhokutoloka, Iinyanga yIigongi nenge Iinyanga yUukwaniilwa. Mbaka ohaya longekidhilwa wo iikulya, ehala lyokukala nokukwathelwa noompumbwe dhilwe. Ngaashi naanaa Aabetel, mbaka nayo oye li lela eyambeko komagongalo, oshoka ohaya yi kokugongala pandjigilile nokulonga pamwe nomagongalo momapya.    

19. Ongiini to vulu okukwathela mboka ye li miilonga yethimbo lyu udha mboka ya tuminwa moshilongo sheni?

¹⁹ Ongiini tatu vulu okwaambidhidha mboka ye li miilonga yethimbo lyu udha? Dhimbulukwa kutya uuna opo ye ya moshilongo, otashi vulika inaaya igilila iikulya yamo. Onkee ano, uuna to ya hiya ye ye ya lye pamwe nangoye, otashi ka kala nawa wu ya pule kutya ohaya li shike nenge pamwe oya hala okulola iikulya yopamuthigululwakalo. Ya idhidhimikila sho taya ilongo elaka nomikalondjigilile dhomoshilongo sheni. Otapeya shi kwate ethimbo yu uve ko elaka lyeni, ihe oto vulu oku ya kwathela nombili nkene ye na okutumbula iitya, oshoka oya hala okwiilonga!     

20. Ongiini tatu vulu okwaambidhidha mboka ye li miilonga yethimbo lyu udha nosho wo aavali yawo?

²⁰ Mboka ye li miilonga yethimbo lyu udha ohaya kulupa, naavali yawo nayo ohaya kulupa. Ngele aavali yawo oye li moshili, ohaya kala ya hala oyana ya tsikile noshilonga shawo. (3 Joh. 4) Ihe ngele aavali yawo oya pumbwa ekwatho, aapiya mbaka ohaya ningi ngaashi taya vulu, opo ye ya kwathele noku ke ya talela po mpoka tashi wapa. Ihe nonando ongawo, mboka ye li pegumbo otaya vulu wo okukwathela aavali yaamboka ye li miilonga yethimbo lyu udha uuna ya pumbwa ekwatho. Kungeyi, otaya ambidhidha mboka ye li miilonga yethimbo lyu udha. Inatu dhimbwa kutya mboka ye li miilonga yethimbo lyu udha otaya ambidhidha nuudhiginini iilonga mbyoka ya simanenena nena kombanda yevi, ano iilonga yokuuvitha. (Mat. 28:19, 20) Mbela ngoye nenge egongalo lyeni itali vulu okukwathela aavali yaamboka ye li miilonga yethimbo lyu udha?

21. Mboka ye li miilonga yethimbo lyu udha ohaya kala yu uvitile ngiini ekwatho netsomukumo ndyoka haya pewa kuyalwe?

²¹ Mboka haya yi miilonga yethimbo lyu udha, ohaya yi mo nelalakano lyokulongela Jehova nokukwathela yalwe, ihe haku ninga aayamba. Ohaya pandula ekwatho kehe taya pewa. Omumwameme gumwe ngoka ta longele koshilongo shilwe okwa ti: “Omuntu nando owa nyolelwa owala ontumwafo yomapandulo, oho kala wa nyanyukwa sho yalwe taye ku dhiladhila noya pandula oshilonga shoka to longo.”

22. Oto tile ngiini iilonga yethimbo lyu udha?

²² Okulongela Jehova ethimbo lyu udha, ohaku etele omuntu enyanyu shili monkalamwenyo. Kapu na we omukalo gulwe omwaanawa gwokukalamwenyo. Mboka ye li miilonga mbika ohaya ilongo uukwatya mboka ya pumbwa nena nomuuyuni uupe. Otayi ilongekidhile oku ka longa iilonga mbyoka tayi ka longwa kaapiya ayehe yaJehova kohi yUukwaniilwa waKalunga. Onkee ano, atuheni natu tsikileni ‘okudhimbulukwa iilonga nohole yaamboka taya longo nuupenda’ miilonga yethimbo lyu udha. —  1 Tes. 1:3.