1, 2. Omalunduluko geni ga li ga ningwa ombaadhilila mOpentekoste yomo 33 E.N., noolye ya ka ninga iilyo yoshigwana shaKalunga oshipe? (Tala kethano lyopetameko.)

ESIKU lyOpentekoste yomo 33 E.N., olya simanenena mondjokonona yoshigwana shaJehova kombanda yevi. Omwa li mwa ningwa omalunduluko mepathimo lyeho. Mesiku ndyoka Jehova okwa toto po oshigwana oshipe okupitila mombepo ondjapuki. Oshigwana shoka ohashi ithanwa Israeli shopambepo nenge ‘aantu yaKalunga,’ nenge “Israeli yaKalunga.” (Gal. 6:16) Jehova okwa longitha ombepo ye ondjapuki a hogolole oohandimwe mboka taya ka ninga iilyo yoshigwana oshipe. Omuyapostoli Paulus okwa li a nyola kutya mboka ye li oshitopolwa shoshigwana oshipe, kaya li ya pumbwa okufukalekwa panyama ngaashi oluvalo lwaAbraham. Ihe oya li ye na ‘okufukalekwa momitima dhawo kombepo yaKalunga.’ —  Rom. 2:29.

² Iilyo yotango yoshigwana oshipe shaKalunga oya li aayapostoli nosho wo aalongwa yaKristus omathele. Oya li ya tsakanene naJesus mondjugo yopombanda muJerusalem. (Iil. 1:12-15) Oya li ya udhithwa nombepo ondjapuki ndjoka ye ya ningi oyana yaKalunga yopambepo. (Rom. 8:15, 16; 2 Kor. 1:21) Shika osha gandja eshilipaleko kutya ehangano epe olya ya miilonga, nolya longekidhwa kuKristus nokushilipalekwa nombinzi ye. (Luk. 22:20; lesha Aahebeli 9:15.) Kungeyi aalongwa mboka oya ningi iilyo yoshigwana shaKalunga  oshipe, nenge aantu ye aape. Ombepo ondjapuki oye ya kwathele, opo yu uvithe momalaka gi ili nogi ili ngoka ga li haga popiwa kAajuda nokwaamboka kaaye shi Aajuda. Mboka kaaye shi yeitaalo lyOshijuda oya li ye ya okutalela po muJerusalem okuza kuRoma. Oya li ye ya okudhana Oshituthi shIiwike shAajuda nenge esiku lyaPentekoste. Aantu mbaka oya li yu uvite ko nawa momalaka gawo sho Aakriste mboka ya gwayekwa nombepo tayu uvitha “iilonga iinene yaKalunga.” —  Iil. 2:1-11.

3-5. (a) Petrus okwa li a lombwele Aajuda shike mesiku lyaPentekoste? (b) Oshigwana oshipe osha li shi indjipala ngiini sho opo sha totwa po?

³ Jehova okwa longitha omuyapostoli Petrus a hiye Aajuda naamboka kaaye shi yeitaalo lyOshijuda, opo ya ninge iilyo yoshigwana She oshipe. Oshigwana shoka ohashi ithanwa egongalo lyAakriste aagwayekwa. Mesiku lyaPentekoste, Petrus okwa li a lombwele Aajuda nehwamo ya taambe ko Jesus, omulumentu ngoka ya li ya ‘alele komuti gwomahepeko.’ (NW) Oya li ye na oku shi ninga, molwaashoka “Kalunga okwe mu ningi Omuwa naKristus.” Ongundu yaantu mboka oya li ya pula Petrus kutya oshike ye na okuninga po? Petrus okwe ya yamukula a ti: ‘Itedhululeni, mu ethe uulunde, kehe gumwe gwomune polwe, mu ninginithwe medhina lyaJesus Kristus. Nena Kalunga ota dhimi po oondjo dheni note mu pe omagano gombepo ondjapuki.’ (Iil. 2:22, 23, 36-38, yelekanitha NW.) Mesiku olyo tuu ndyoka aantu 3 000 oya li ya gwedhwa moshigwana shoka oshipe, hashi ithanwa Israeli shopambepo. (Iil. 2:41) Konima yaashono, aayapostoli oya tsikile nokuuvitha nuulaadhi, naantu oyendji oya taamba ko oshili. (Iil. 6:7) Oshigwana oshipe osha li tashi indjipala noonkondo.

⁴ Aalongwa yaJesus oya tameke okuuvithila Aasamaria. Oyendji yomuyo oya taamba ko oshili noya ninginithwa kuFillipus, ihe kaya li ya pewa ombepo ondjapuki. Olutuwiliki lwomuJerusalem olwa li lwa tumu Petrus naJohannes ya ka talele po aamwatate naamwameme aape muSamaria. Aayapostoli mbaka yaali ‘oye ya tenteke ihe iikaha yawo, oyo noya pewa ombepo ondjapuki.’ (Iil. 8:5, 6, 14-17) Momukalo nguka, Aasamaria mboka oya li ya gwayekwa e taya ningi iilyo yoshigwana shaIsraeli shopambepo.

⁵ Mo 36 E.N., Kalunga okwa li a longitha omuyapostoli Petrus a hiye ongundu yilwe yaantu yi ninge oshigwana oshipe, hashi ithanwa Israeli shopambepo. Shika osha ningwa sho Petrus u uvithile Kornelius, omukuluntu gwetangakwiita lyaRoma, naanegumbo lye ayehe nookuume ke. (Iil. 10:22, 24, 34, 35) Ombiimbeli otayi hokolola tayi ti: ‘Ano Petrus manga a li natango ta popi, ombepo ondjapuki oya kulukile moomwenyo dhaayehe mboka ya li ye mu pulakene. Ooitaali Aajuda mboka ya zile kuJoppa pamwe naPetrus, oya li ya kumwa, sho Kalunga a gandja omagano ge gombepo ondjapuki nokaapagani wo.’ (Iil. 10:44, 45) Okuza mpono mboka kaaye shi Aajuda yo inaya fukalekwa, nayo oya hiywa ya ninge oshitopolwa shaIsraeli shopambepo.

6, 7. Omomikalo dhini oshigwana oshipe sha li “oshigwana hashi ithanwa nedhina [lyaJehova],” nosha li sha ningi shike?

⁶ Pokugongala kwolutuwiliki lwAakriste yomethelemumvo  lyotango, omulongwa Jakob okwa tile: “Simon [Petrus] opo a hulitha okupopya nokwa fatulula ngashingeyi, nkene Kalunga a tameke okwiilikolela [oshigwana hashi ithanwa nedhina lye, NW] mokati kaapagani.” (Iil. 15:14) Oshigwana shoka oshipe hashi ithanwa nedhina lyaJehova osha li sha kwatela mo Aajuda naamboka kaaye shi Aajuda. (Rom. 11:25, 26a) Konima yethimbo, Petrus okwe ya nyolele a ti: “Nale kamwa li aantu yaKalunga, ihe ngashingeyi omwa ningi aantu ye.” Petrus okwa li a yelitha elalakano lyoshigwana shika a ti: “One ezimo lya hogololwa, aayambi yOmukwaniilwa, oshigwana oshiyapuki, aantu yaKalunga mwene mwa hogololwa, mu hokolole iilonga ye iinene. Kalunga okwe mu ithana mo momilema, mu ye muuyelele we uukumithi.” (1 Pet. 2:9, 10) Oya li ye na okukala Oonzapo dhaJehova hadhi uvitha nuulaadhi kombinga ye e li Omunamapangelo agehe. Oya li ye na oku mu kalela po nokusimanekitha edhina lye montaneho yaantu.

⁷ Ngaashi owala sha li naIsraeli shopanyama, Jehova okwa li i ithana Israeli shopambepo shi li ‘aantu mboka i ishitile ye mwene.’ (Jes. 43:21) Oya li haya lombwele aantu nuulaadhi kutya Jehova oye Kalunga kashili nonokutya ookalunga yalwe oyiifundja. (1 Tes. 1:9) Oya li ya gandja uunzapo kombinga yaJehova noyaJesus “muJerusalem, muJudea alihe nomuSamaria sigo omiilongo ayihe yokombanda yevi.” —  Iil. 1:8; Kol. 1:23.    

8. Omuyapostoli Paulus okwa li a londodha oshigwana shaKalunga methelemumvo lyotango a ti ngiini?

⁸ Omuyapostoli Paulus ngoka a li ko methelemumvo lyotango, okwa li gumwe ‘gwomoshigwana shoka hashi ithanwa nedhina lyaJehova.’ Okwa li a thikama koshipala shaafilosofi aapagani, ta popile nuulaadhi uunamapangelo waJehova. Okwa popi a ti: “Kalunga ngoka a shiti uuyuni niinima ayihe yi li mo, oye Omuwa gwegulu nogwevi.” (Iil. 17:18, 23-25) Lwopehulilo lyolweendo lwe lwuutumwa, Paulus okwa li a londodha oshigwana shoka sha lukilwa edhina lyaKalunga. Okwa ti: “Oshoka ondi shi shi kutya, ngele nda zi po, omambungu haga lyana otaga ka gwayela mokati keni, gaa na nando ohenda noonzi. Nokuli ethimbo otali ke ya, uuna aalumentu yamwe yomokati keni taa ka kala nokupopya iifundja, yi ihilile aalongwa.” (Iil. 20:29, 30) Pehulilo lyethelemumvo lyotango aashunimonima oyendji oya li yi iwetikile mo sha yela. —  1 Joh. 2:18, 19.

9. Oshike sha li sha ningilwa “oshigwana hashi ithanwa nedhina [lyaJehova]” konima yeso lyaayapostoli?

⁹ Konima yeso lyaayapostoli, uushunimonima owa li wi ihanene muuyuni. Okuza mpono oongeleki dhUukwakriste odha tameke tadhi totwa po. Pehala lyokukala “oshigwana hashi ithanwa nedhina [lyaJehova],” Aakriste mboka aashunimonima oya kutha mo edhina lyaKalunga momatoloko gOombiimbeli odhindji. Oya li ya taamba ko omikalondjigilile dhoshipagani, noinaya simaneka Kalunga okupitila momalongo gawo ngoka ge li ompinge nOmanyolo. Oya li ya wo ya kondjo aniwa iita iiyapuki neihumbato lyawo olya li lya nyata. Onkee ano, konima sho uushunimonima wa tameke, kombanda yevi okwa li owala aalongeli yaJehova aadhiginini aashona. Pethimbo mpoka kapwa li “aantu yaKalunga,” nenge tu tye, oshigwana she shu unganekwa.

10, 11. (a) Jesus okwa hunganeke shike meyele lye li na ko nasha niilya nomawu? (b) Eyele lyaJesus olya li lya gwanithwa po ngiini konima yomumvo 1914, noshizemo osha li shike?

¹⁰ Jesus okwa li a hokolola eyele li na ko nasha niilya nomawu. Meyele moka okwa hunganeke kutya uushunimonima otawu ke shi ningitha oshidhigu noonkondo, opo elongelokalunga lyashili li ndhindhilikwe mo nuupu. Okwa ti kutya “manga aantu ya kotha,” Ondiyapoli oya kunu omawu mokati kiilya mbyoka ya kunwa kaana yOshilongo. Oombuto adhihe otadhi ka kokela mumwe sigo “ehulilo lyonkalelo yiinima.” Jesus okwa yelitha wo kutya “ombuto ombwanawa” otayi thaneke “aana yOshilongo,” omanga “omawu ogo aana yaMwiinayi.” Pethimbo lyehulilo,  Omuna gwomuntu ota ka tuma “aateyi,” mboka ye li aayengeli, opo ya ka yoolole mo omawu miilya. Kungeyi, aana yOshilongo oya li taya ka gongelwa. (Mat. 13:24-30, 36-43) Shika otashi ka ningwa ngiini? Oshe shi ningi ngiini tashi wapa, opo Jehova a kale e na ongundu yaantu yu unganekwa taye mu longele kombanda yevi natango?

¹¹ “Ehulilo lyonkalelo yiinima” ndjika olya tameke mo 1914. Momumvo ngono omo Iita yoTango yUuyuni ya tameke. Aakriste aagwayekwa aashona mboka ye li “aana yOshilongo,” oya li muukwatwa wopambepo waBabiloni Oshinene. Momumvo 1919 Jehova okwa li e ya mangulula mo, nopwa li eyooloko enene pokati kawo ‘nomawu,’ nenge nAakriste yiifundja. Opo ihe okwa gongele “aana yOshilongo” ya ninge oshigwana she shu unganekwa. Shika oshi li egwanitho lyoohapu dhehunganeko lyomupolofeti Jesaja ndyoka tali ti: “Oshilongo otashi valwa tuu mesiku limwe, nenge oshigwana otashi vulu kutotwa po ohaluka? Sion ita hepekwa koshitheta ngele ta vala aanona ye.” (Jes. 66:8) Ovelise ndjika sho tayi popi kombinga yaSion otayi ulike ehangano lyaJehova lyiishitwa yopambepo, sha hala okutya, aayengeli. Sion okwa vala aana yaKalunga sho oshigwana shAakriste aagwayekwa sha totwa po kombanda yevi.

12. Aagwayekwa oyi iyulike ngiini kutya oyo ye li “oshigwana hashi ithanwa nedhina [lyaJehova]” kunena?

¹² Ngaashi Aakriste yomethelemumvo lyotango, “aana yOshilongo,” sha hala okutya, aagwayekwa nayo oye na okukala Oonzapo dhaJehova. (Lesha Jesaja 43:1, 10, 11.) Eihumbato lyawo lyopaKriste otali ke ya yoolola ko kaantu yalwe. Oya li wo taya ka kala ya yoolola ko sho tayu uvitha ‘onkundana ombwanawa yUukwaniilwa yi ningile iigwana ayihe onzapo.’ (Mat. 24:14, yelekanitha NW; Fil. 2:15) Moku shi ninga oya kwathela oombunga dhaantu dhi kale aayuuki nodha yogoka koshipala shaJehova. —  Lesha Daniel 12:3.

13, 14. Mboka kaaye li oshitopolwa shaIsraeli shopambepo oye na okuninga po shike, opo ya galikane nokulongela Jehova ya manguluka, nOmbiimbeli oya li ye shi hunganeke ngiini?

¹³ Otwa mono moshitopolwa sha tetekele kutya moshigwana shaIsraeli shonale, aakwiilongo oya li taya vulu okulongela Jehova ya manguluka.  Ihe aakwiilongo mboka oya li ye na okweendathana noshigwana shaJehova shoka a hangana nasho. (1 Aak. 8:41-43) Sha faathana kunena, mboka kaaye shi oshitopolwa shaIsraeli shopambepo, oye na okweendathana noshigwana shaJehova, shoka shi li “aana yOshilongo.” Aana yOshilongo mboka oye li wo Oonzapo dhaJehova dha gwayekwa nombepo ondjapuki.

¹⁴ Aapolofeti yopethimbo lyonale, oya li ya hunganeke kutya aantu oyendji otaya ka longela Jehova pamwe noshigwana she pethimbo ndika lyehulilo. Jesaja okwa hunganeke a ti: ‘Aantu yayo otaa ka tya: “Natu londeni kondundu yOmuwa, tu ye kotempeli yaKalunga kaIsrael. Ote ke tu nongeka shoka a hala tu longe; otatu ke enda momapola e ga hogolola. Oshoka elongo lyOmuwa otali zi muJerusalem; okuza muSion ota popitha aantu ye.”’ (Jes. 2:2, 3) Omupolofeti Sakaria okwa li a hunganeke oshinima sha faathana sho a ti: “Aantu oyendji niigwana iinankondo otayi ke ya kuJerusalem, yi simaneke Omuwa Omunankondoawike noku mu galikana, e ya yambeke.” Aantu mboka okwe ya popi pathaneko ye li ‘aakwiilongo omulongo ya za momalaka agehe nomiigwana ayihe.’ Otaya ka longela wo Kalunga pamwe naIsraeli shopambepo nokupopya taya ti: “Otwa hala okukala pamwe nane, oshoka tse otu uvu kutya Omuwa oku li nane.” —  Sak. 8:20-23.

15. Omiilonga yini ‘oonzi dhilwe’ hadhi ‘kala pamwe’ naIsraeli shopambepo?

¹⁵ ‘Oonzi dhilwe’ ohadhi ‘kala pamwe’ naIsraeli shopambepo miilonga yokuuvitha onkundana ombwanawa. (Mark. 13:10) Ohaya ningi oshitopolwa shoshigwana shaKalunga ye li “oshigunda shimwe” naagwayekwa, noye na ‘omusita omwaanawa,’ Kristus Jesus. —  Lesha Johannes 10:14-16.

16. Jehova ota ka ninga po shike shoka tashi ka kala oshitopolwa shahugunina ‘shuudhigu uunene?’

¹⁶ Konima yehanagulo lyaBabiloni Oshinene, oshigwana shaJehova otashi ka ponokelwa nonyanya. Pethimbo ndyoka otwa pumbwa okukala tu li kohi yegameno lyaJehova ndyoka ta ka gamena nalyo oshigwana she. Eponokelo ndika olyo tali ka kala oshitopolwa shahugunina ‘shuudhigu uunene.’ Ihe Jehova oye mwene ta ka ukitha iinima nota ka hogolola ethimbo ndyoka te ke shi ninga. (Mat. 24:21; Hes. 38:2-4) Pethimbo ndyoka, Gog ota ka ponokela aantu mboka “ya gongelwa ya kongololwa miigwana,” nenge tu tye, oshigwana shaJehova. (Hes. 38:10-12) Eponokelo ndyoka ngele lya ningwa, Jehova ota ka katuka onkatu, opo a hupithe oshigwana she nota ka kondjitha Gog nongundu ye yaakwiita. Ngele e shi ningi, ota ka simanekitha nokuyapulitha edhina lye. Jehova okwa popi a ti: “Pahedhi ndjika otandi ka ulukila iigwana ayihe kutya ngame omunene nomuyapuki. Otaa ka tseya kutya ongame Omuwa.” —  Hes. 38:18-23.      

17, 18. (a) Otatu ka pewa omalombwelo geni, ngele Gog a ponokele oshigwana shaJehova? (b) Ngele otwa hala Jehova e tu gamene, otu na okuninga shike?

¹⁷ Ngele Gog a ponoka, Jehova ota ka lombwela oshigwana she ta ti: “Ne aantu yandje, indeni momagumbo geni, mu iyedhilile mo. Holameni okathimbo, manga ondjahi yaKalunga tayi pitilile po.” (Jes. 26:20) Omagongalo getu kunena ogo taga thanekwa kuutumbulilo “momagumbo geni” moka tatu ka holamena. Pethimbo ndyoka lya simana, Jehova ote ke tu pa omalombwelo ngoka tu na okulandula, opo tu hupithwe.     

¹⁸ Otu na okuzimina kutya Jehova oku na ko oshigwana she shu unganekwa momagongalo kombanda yevi. Shika otashi ke tu kwathela ngele otwa hala okugamenwa kuJehova pethimbo lyuudhigu uunene. Otu na okutsikila okwaambidhidha oshigwana she nokweendathana lela negongalo. Onkee ano, natse natu popye ngaashi omupisalomi tatu ti: “Omuwa, ngoka ha gandja esindano, na yambeke aantu ye!” —  Eps. 3:8.