GUY HOLLIS PIERCE, oshilyo shOlutuwiliki lwOonzapo dhaJehova, okwa mana oondjenda mEtiyali, 18 Maalitsa 2014. Okwa li e na oomvula 79 sho etegameno lye lyokuninga omumwahe gwaKristus gwopambepo lya gwanithwa po. —  Heb. 2:10-12; 1 Pet. 3:18.

Guy Pierce okwa valelwa moAuburn moCalifornia moAmerika, mu 6 Novomba 1934 nokwa ninginithwa mo 1955. Mo 1977 okwa hokana nomuholike gwe Penny noya kala taya putudha oyana. Mokuputudha oyana okwi ilongo mo okukala shili e hole aantu. Mo 1982 ye nomukadhi Penny oya li taya kokola ondjila. Mo 1986 okwa ningi omutonatelishikandjo moAmerika moka a kala uule woomvula 11.

Mo 1997, Guy naPenny Pierce oya ningi iilyo yaBetel moAmerika. Omumwatate Pierce okwa li ha longo mOshikondo shIilonga. Ihe mo 1998 okwa langekwa po a kwathele Olutuwiliki mOkomitiye yOnkalonawa yaantu. Pomutumba gwokomumvo gwo-Watch Tower Bible and Tract Society of Pennsylvania ngoka gwa ningilwe mo 2 Kotoba 1999, opwa tseyithwa kutya omumwatate Pierce okwa ninga oshilyo shOlutuwiliki. Moomvula opo dha zi ko, okwa li ha longo mOkomitiye yOnkalonawa yaantu, yOkunyola, yOkunyanyangidha nomOkomitiye yAaunganeki.

Aantu ya za momaputuko ga yooloka oya li ye hole omumwatate Pierce, oshoka okwa li e na iiyolitha noha kala ti imemeha aluhe. Ihe aantu oya li ye mu hole unene omolwohole ye, eifupipiko lye, eitaalo lye lya kola muJehova naasho a li a lenga oompango nomithikampango omiyapuki. Omumwatate Guy Pierce okwa li i itaala thiluthilu kutya omauvaneko gaJehova oge na okugwanithwa, nomolwaashono a kala aluhe a hala okulombwela uuyuni awuhe oshili ndjika.

Omumwatate Pierce okwa li ha longele Jehova kee na ezimbuko. Okwa li ha meneka ongulonene e ta longo sigo omokati kuusiku. Okwa li a talele po iilongo yi ili noyi ili muuyuni, ta tsu aamwatate naamwameme omukumo. Uuna Aabetel nenge yalwe ya li ya hala okupopya naye, ya pumbwa ekwatho nenge omayele ge, okwa li he ya monene ethimbo. Nokuli nokonima yoomvula odhindji, ooitaali ooyakwawo otaya dhimbulukwa natango eyakulo lye ewanawa, uukuume we netsomukumo okuza mOmanyolo.

Omumwatate Pierce okwa thigi ko omukadhi, oyana yahamano, uutekulu nuutekulululwa. Okwa li wo e na aanona oyendji yopambepo. MOlyomakaya mo 22 Maalitsa 2014, omumwatate Mark Sanderson, oshilyo shOlutuwiliki, okwa gandja oshipopiwa shehupulitho poBetel yaBrooklyn. Moshipopiwa moka, omumwatate Sanderson okwa popi kombinga yetegameno lyomumwatate Pierce lyomegulu nokwa lesha shoka Jesus a popile sho a ti: “Megumbo lyaTate omu na omahala gokukala ogendji. . . . Nongele nda yi e tandi mu longekidhile ehala, otandi ka galuka ishewe, ndi mu ile, opo mu ka kale wo nkoka ndi li. Ondjila yaankoka tandi yi, omu yi shi.” —  Joh. 14:2-4.

Omumwatate Pierce itatu ke mu dhimbwa nando. Ihe otwa nyanyukwa, oshoka ‘ondjila yokuya kehala lye lyaaluhe okwa li e yi shi.’