NATU tye nduno Aakriste aagundjuka oya tokola ya ka tale okamuvi. Aanasikola ooyakwawo otaya hokolola kutya okamuvi hoka okawanawa lela. Sho ya thiki pehala mpoka taka dhanenwa, oya mono kutya omapulakata oge na omathano gaantu ye na iilwitho iinene naakiintu ya zala uuhulukweya uuhupi. Otaya ka ninga po shike? Mbela otaya ka tsikila owala nokutala okamuvi hoka?

Oshiholelwa shoka shi li pombanda, otashi holola kutya opu na omatokolo ogendji ngoka tu na okuninga, ngoka taga vulu okuguma uupambepo wetu nekwatathano lyetu naJehova. Otashi vulika omathimbo gamwe to dhiladhila wu ninge oshinima shontumba, ndele otashi vulika waa shi ninge we, sho we shi dhiladhilulula. Mbela shika otashi ti owu na omitima mbali nenge owa ninga nawa sho wa ninguluka?

Molwaashoka otu hole Jehova, otwe mu iyapulile oomwenyo dhetu e tatu ninginithwa. Otwa halelela shili okukala aadhiginini kuKalunga. Ihe omutondi gwetu, Satana Ondiyapoli, okwa halelela oku tu ethitha po Jehova. (Eh. 12:17) Otwa ninga etokolo okulongela Jehova nokuvulika kiipango ye. Itashi ka kala tuu shinikitha oluhodhi, ngele otwa ninguluka e tatu etha po okulongela Jehova! Ngele otwe shi ningi, otashi ke tu kanithitha oomwenyo dhetu.   

Oomvula dhi vule 2 600 dha piti, omukwaniilwa gwaBabilon, Nebukadnezzar, okwa li a ningi oshiyelekela oshinene shoshingoli nokwa gandja elombwelo kutya aantu ayehe oye na oku shi inyongamena noku shi galikana. Ngoka itee shi ningi, okwa li te ku umbilwa meziko lya hanya. Ihe Shadrak, Meshak naAbednego, aalumentu yatatu aatilikalunga, inaye shi ninga. Molwaashoka inaya inyongamena oshiyelekela shoka, oyu umbilwa meziko lya hanya. Nonando Jehova okwe ya hupitha pashikumithalonga, oya tokola okusa, pehala lyokweetha po okulongela Kalunga. —  Dan. 3:1-27.

 Konima, omupolofeti Daniel nando okwa li e shi kutya ngele aantu oye mu mono ta galikana otashi vulika e ku umbilwe mekololo lyoonime, okwa tsikile nokugalikana. Eeno, okwa kala ta galikana Jehova lutatu mesiku, ngaashi a kala ha ningi shito. Moshinima shika, Daniel ina ninguluka. Okwa li a tokola okukala ta longele Kalunga kashili. Noshizemo osho kutya, omupolofeti nguka okwa li a hupithwa “moshiponga shokuliwa po koonime.” —  Dan. 6:1-27.

Aapiya yaKalunga nena mboka yi iyapulila Kalunga, nayo oya tokola oku mu longela. Oonzapo dhaJehova posikola yimwe muAfrika odha li dha tindi okukutha ombinga miinima yopapolotika. Oya lombwelwa kutya ngele itaya kutha ombinga pamwe naalongwa ooyakwawo, nena otaya tidhwa po posikola. Inapu pita ethimbo ele sho oministeli yelongo ya talele po ondoolopa ndjoka e tayi popi naalongwa mboka. Aalongwa mbaka oye mu yelithile nesimaneko, kaaye na uumbanda kutya omolwashike ihaaya kutha ombinga. Okuza kesiku ndyoka, aamati naakadhona mbaka oya kala taya hiti osikola noitaya thiminikwa we nando ye ethe po Jehova.

Natu taleni wo kuJoseph ngoka omukadhi a kwatwa kokankela e ta hulitha ombaadhilila. Aakwanezimo lye oya li ya simaneka etokolo lye li na ko nasha niinima mbyoka hayi ningwa pomafumviko. Ihe molwaashoka aapambele yomukadhi kaye li moshili, oya li ya hala pefumviko pu ningwe iinima yopamuthigululwakalo mbyoka itaayi nyanyudha Kalunga. Joseph ota ti: “Molwaashoka inandi ya etha ya ninge shoka ya hala, oya kambadhala okunwetha mo aamwandje, ihe inaya pondola. Aapambele oya li ya hala okulala taya imbi yo taya galikana uusiku awuhe paandjetu. Ihe onde ya lombwele kutya ngele oya hala oku shi ninga, itaye shi ningile paandjetu. Oya li ye shi shi kutya oshinima shoka itashi tsu kumwe neitaalo lyandje nolyomukulukadhi gwandje. Onkee ano, sho twe shi kundathana olule, oya tokola ye ke shi ningile kulwe.

“Ondi indile ekwatho kuJehova opo kaatu yone nando oshipango she shimwe, pethimbo alihe ndika lyoluhodhi. Jehova okwa li a pulakene komagalikano gandje nokwe tu kwathele tu kale aadhiginini, nando otatu thiminikwa.” Joseph noyana oya li ya tokola toko kaaya ninguluke, ye ethe po Jehova.

Ethimbo efupi konima owala yOpaasa mo 32 E.N., omukiintu gumwe gwomuFoinikia shomuSiria okwa yi kuJesus Kristus sho a li muSidon. Omukiintu nguka okwi indile Jesus lwiikando a tidhe mo ompwidhuli momwanakadhona. Oshikando shotango sho e mu pula, Jesus ine mu yamukula. Pehala lyaashono, okwa lombwele aalongwa ye a ti: “Ngame inandi tuminwa kaantu yalwe, okoonzi ndhoka dha kana dhomAaisraeli odho adhike.” Sho omukiintu a tsikile nokupula, Jesus okwa ti kuye: “Inashi opala okukutha oshikwiila shuunona noku shi umbila uumbwena.” Omukiintu nguka oku ulike kutya oku na eitaalo enene, sho a yamukula a ti: “Eeno, Omuwa, ihe nuumbwena wo ohau li uundjagumuke mboka tau gu koshililo shooyene yawo.” Jesus okwa ninguluka e ta aludha okamwanakadhona ke. —  Mat. 15:21-28.

Jesus okwa li ta holele Jehova, sho a li ha ninguluka uuna onkalo tayi shi pitike. Pashiholelwa, Kalunga okwa li a hala okuhanagula po Aaisraeli sho ya ningi ontana yoshingoli, ihe Moses okwa galikana Kalunga a dhiladhilulule oshinima shoka. —  Eks. 32:7-14.

Omuyapostoli Paulus okwa li ha holele Tate Jehova naJesus. Opwa li pu na ethimbo limwe Paulus a li inaa hala okweenda naMarkus molweendo lwe lwuutumwa, molwaashoka Markus okwa thigile po Paulus naBarnabas molweendo lwawo lwotango lwuutumwa. Ihe konima yethimbo, Paulus okwa ka mona kutya Markus okwa lundulula nota ka kala ekwatho enene kuye. Onkee ano, okwa lombwele Timoteus a ti: “Ngele to ya, etelela Markus, oshoka onde mu pumbwa, a kwathe ndje miilonga.” —  2 Tim. 4:11.

Mbela tseni ohatu holele ngaa Tate Jehova naJesus? Ngele ohatu holele Tate yetu gwomegulu  omunahole, omunahenda nomwiidhidhimiki, otatu ka kala hatu ninguluka uuna sha pumbiwa. Pashiholelwa, otatu vulu okulundulula nkene twa tala ko omuntu gwontumba. Ngele Jehova naJesus oya li haya ninguluka nando oya gwanenena, nena natse otatu vulu okukala hatu ninguluka konima ngele twa konakona onkalo moka omuntu e li.   

Ngele tashi ya pomalalakano gopambepo, onawa tu kale hatu ninguluka. Yamwe mboka taya konakona Ombiimbeli ethimbo ele nohaye ya kokugongala, otashi vulika ya kale ya tila okuninginithwa. Nenge aamwatate yamwe otashi vulika ya kale ya tila okuninga aakokolindjila, nonando otaya vulu. Omanga aamwatate yalwe kaaye na naanaa ehalo lyokutaamba ko iinakugwanithwa megongalo. (1 Tim. 3:1) Mbela owa kwatelwa mo maantu mbaka ya tumbulwa metetekelo? Jehova ote ku hiya wu taambe ko uuthembahenda mboka. Omolwashike itoo ninguluka e to tameke okulongela Kalunga nokuyakula yalwe? Shika otashi ke ku etela enyanyu.

Ella ota hokolola ngeyi kombinga yiilonga ye koshitayimbelewa shOonzapo dhaJehova muAfrika, ta ti: “Sho nde ya mObetel, kanda li ndi shi ngele otandi kala mo. Onda li nda hala okulongela Jehova nomwenyo aguhe, ihe kanda li nda hala okutopoka noyaandjetu. Petameko onda li nde ya yuulukwa shili. Ihe onda tokola kaandi shune kegumbo, sho omwiitaali ngoka twa li naye mondunda a tsu ndje omukumo. Ngashingeyi mObetel onda ninga mo oomvula omulongo, ihe onda hala natango okukala muka tandi yakula aamwatate, ngele onkalo otayi shi pitike.”

Mbela oto dhimbulukwa shoka sha ningwa po, sho Kain a tsile mumwayina ondumbo e ta  kwatwa ko kongeyo? Kalunga okwe mu lombwele kutya ota ka kala e mu hokwa, ngele ta longo uuwanawa. Kalunga okwe mu kumagidha a pangele uulunde mboka wa li we mu ‘langela posheelo.’ Kain okwa li ta vulu okuninguluka nokulundulula iikala ye, ihe okwa tokola kaa pulakene kekumagidho lyaKalunga. Shinikitha oluhodhi, Kain okwa dhipaga mumwayina, naashika oshe mu ningi omudhipagi gwotango. —  Gen. 4:2-8.

Natu taleni wo koshiholelwa shomukwaniilwa Ussia. Petameko okwa li a longo shoka shu uka koshipala shaJehova nokwa kala te mu kongo. Ihe Ussia okwa ka yona po edhina lye ewanawa sho a ningi omunuuntsa. Nonando ka li omuyambi, okwa ka fika iitsinino motempeli. Mbela Ussia okwa li a ninguluka, sho aayambi ye mu ganda kee shi ninge? Aawe. Pehala lyaashono, Ussia okwa “geele aayambi” e ti ipwililikile elondodho lyawo. Oshilanduliko osho kutya Jehova okwe mu dhenge nuuvu woshilundu. —  2 Ondjal. 26:3-5, 16-20.

Eeno, omathimbo gamwe otu na okuninguluka lela. Natu taleni koshiholelwa shopethimbo lyetu. Joachim okwa ninginithilwe mo 1955, ihe mo 1978 okwa kondwa. Konima yoomvula dhi vule 20, okwa itedhulula e ta galukile ishewe megongalo. Omathimbo opo ga zi ko, okwa pulwa komukuluntugongalo kutya omolwashike she mu pula olule a galuke. Joachim okwa yamukula a ti: “Onda li ndi na uuntsa nonda thita po kongeyo. Otandi ipe shili uusama sho inaandi galukila kegongalo mbala. Ihe naasho nda li nda kondwa, onda li ndi shi shi kutya Oonzapo dhaJehova ohadhi longo oshili.” Joachim okwa li e na okulundulula iikala ye nokwiitedhulula.

Otashi vulika tu ki iyadhe monkalo yontumba moka twa pumbwa okuninguluka nokulundulula oondjila dhetu. Natu shi ningeni, opo tu opaleleni Jehova. —  Eps. 34:8.