1, 2. Esiku Jesus a yumudhwa okwa hekeleke aalongwa ye ngiini?

OLYA li esiku moka Jesus a yumuka. Aalongwa ye yaali oya li taya ende yu uka komukunda gu li konyala ookilometa 11.2 okuza kuJerusalem. Oya li ya nika oluhodhi, oshoka kaya li ye shi kutya Jesus okwa yumuka. Ohaluka Jesus okwe ya holokele e te ende pamwe nayo, nokwe ya hekeleke. Okwe shi ningi ngiini? “Okwe ya fatululile shoka sha tiwa kombinga ye mOmanyolo agehe okutameka momambo gaMoses sigo omambo agehe gaahunganeki.” (Luk. 24:13-15, 27) Nomolwaashono oomwenyo dhawo dha li dha hwama, sho te ya “fatululile” nawa Omanyolo. —  Luk. 24:32.

² Ongulohi yesiku olyo tuu ndyoka aalongwa mbaka oya shuna kuJerusalem noya hokololele aayapostoli shoka ya ningilwa. Manga taya hokolola, Jesus okwe ya ihololele. Ihe aayapostoli oya kwatwa kuumbanda noya li ya limbililwa. Jesus okwe ya tsu ngiini omukumo? Ovelise otayi ti: “Okwa patulula omadhiladhilo gawo, yu uve ko Omanyolo.” —  Luk. 24:45.

3. Omashongo geni hashi vulika tu tsakaneke, noshike tatu vulu okuninga, opo tu kale twa nyanyukilwa uukalele wetu?

³ Natse omathimbo gamwe otashi vulika tu kale twa teka omukumo, ngaashi aalongwa mboka, molwaashoka pamwe hatu  longo nuudhiginini miilonga yOmuwa, ihe ihatu mono iizemo iiwanawa. (1 Kor. 15:58) Nenge tu kale twa yematekwa kaakonakoni mboka tu wete itaaya humu komeho. Otapeya nokuli yamwe mboka tatu kwathele ya pilamene Jehova. Mbela oshike tatu vulu okuninga, opo tu kale twa nyanyukilwa uukalele wetu? Oshinima shimwe shoka tashi tu kwathele osho okukala tu uvite ko nawa shoka omayele gaJesus ngoka ga nyolwa mOmanyolo taga ti. Natu ka kundathaneni gatatu gomugo, opo tu moneni shoka tatu ilongo mo.   

4. Eyele lyaJesus lyomukuni ngoka a kotha otali ti ngiini?

⁴ Lesha Markus 4:26-29. Eyele lyomukuni ngoka a kotha otali ti ngiini? Omuntu ngoka ta popiwa meyele ndika, ota thaneke aauvithi yUukwaniilwa. Ombuto otayi thaneke etumwalaka lyUukwaniilwa ndyoka tali uvithilwa aanamitima omiwanawa. Omukuni oha longo iilonga ye omutenya ngaashi naanaa hashi ningwa, ‘nuusiku oha ka lala e ta penduka ongula.’ Ohashi pula ethimbo, opo ‘ombuto yi mene nokukoka,’ okuza sho ya kunwa sigo opeteyo. Ohayi mene ‘kuyo yene’ kashona nakashona sigo ya koko. Sha faathana, omuntu naye oha koko pambepo kashona nakashona. Ngele omuntu okwa ningi ehumokomeho e ta tokola okulongela Jehova Kalunga, ohe mu iyapulile e ta ninginithwa, nokungawo oti imike iiyimati.

5. Omolwashike Jesus a popi eyele lyomukuni ngoka a kotha?

⁵ Omolwashike Jesus a popi eyele ndika? Okwe shi ningi, opo e tu kwathele tu tseye kutya Jehova oye ha kokitha ombuto yoshili momitima dhaamboka “ya hala oku ka mona omwenyo gwaaluhe.” (Iil. 13:48, NW; 1 Kor. 3:7) Tse ohatu kunu owala ombuto noku yi tekela, ihe ihatu vulu oku yi thiminika noku yi endeleleka yi koke. Ngaashi owala omukuni gwomeyele lyaJesus, natse katu shi nkene ombuto hayi koko. Olundji ihatu mono kutya ombuto otayi koko, molwaashoka ohatu kala twi ipyakidhila niilonga yetu yesiku kehe. Ihe mokweendela ko kwethimbo, aalongwa aape, otashi vulika ya tameke okwiimika iiyimati nokulonga pamwe natse miilonga yeteyo, ano miilonga yokuuvitha. —  Joh. 4:36-38.   

6. Oshike tu na okuzimina ngele tashi ya pehumokomeho lyomukonakonimbiimbeli?

⁶ Oshike tatu ilongo meyele lyomukuni ngoka a kotha? Shotango, otu na okuzimina kutya katu na oonkondo dhokweendelelitha omukonakonimbiimbeli a hume komeho pambepo. Nonando ohatu ningi ashihe shoka sha pumbiwa tu mu kwathele, itatu ke mu thiminika a ninginithwe. Pehala lyaashono, eifupipiko otali ke tu kwathela tu mone kutya oye mwene e na okutokola okwiiyapulila Kalunga. Jehova oha taamba ko owala eiyapulo lyomuntu, ngele okwe li ningi molwashoka e mu hole. —  Eps. 51:12; 54:6; 110:3.

7, 8. (a) Oshike ishewe tatu ilongo meyele lyaJesus lyomukuni ngoka a kotha? Gandja oshiholelwa. (b) Shika otashi tu longo shike kombinga yaJehova naJesus?

⁷ Oshitiyali, okuuva ko eyele ndika otashi ke tu kwathela kaatu teke omukumo, ngele otu wete iilonga yetu itaayi pondola. Onkee ano, otwa pumbwa eidhidhimiko. (Jak. 5:7, 8) Ngele otwa longa nuudhiginini tu kwathele omukonakoni, ihe oshili inayi koka momutima gwe, itashi ti kutya katu shi aalongi aawanawa. Jehova oha kokeke owala ombuto yoshili momitima dhaamboka aaifupipiki noya hala okulunduluka. (Mat. 13:23) Onkee ano, itashi ti kutya itatu pondola muukalele, ngele mboka tatu kwathele inaya hala okuninginithwa. Jehova iha tala komwaalu gwaantu mboka taya taamba ko shoka tatu longo, opo ando a tye otwa pondola muukalele. Pehala  lyaashono, okwa lenga oonkambadhala adhihe ndhoka tatu ningi. —  Lesha Lukas 10:17-20; 1 Aakorinto 3:8.

⁸ Oshititatu, olundji ihatu mono omutima gwomuntu nkene tagu lunduluka. Pashiholelwa, aaihokani mboka ya li taya konakona nomutumwa oye mu lombwele kutya oya hala okuninga aauvithi inaaya ninginithwa. Omutumwa okwe ya lombwele kutya ngele oya hala okuninga aauvithi inaaya ninginithwa, oye na tango okweetha po okuhila omakaya. Ihe okwa li a kumwa, sho aaihokani mbaka ye mu lombwele kutya oye ge etha po oomwedhi dhontumba dha piti. Oye ge ethele po shike? Oya dhimbulula kutya Jehova oku tonde uufudhime nokwa li e ya wete sho taya hili omakaya meholamo. Onkee ano, oya tokola kutya ngele itaya vulu okuhila omakaya uuna omutumwa opo e li, nena oye na oku ga etha po. Ohole yawo yokuhola Jehova oye ya kwathele ya ninge etokolo li li mondjila. Oya li taya koko pambepo, nonando omutumwa ka li e shi wete.

9. Eyele lyoshiyulitho shoohi otali ti ngiini?

⁹ Lesha Mateus 13:47-50. Eyele lyaJesus lyoshiyulitho shoohi otali ti ngiini? Jesus okwa ti euvitho lyetumwalaka lyUukwaniilwa otali yelekanithwa nokuumbila oshiyulitho mefuta. Ngaashi owala oshiyulitho nenge onete hayi kwata ondumba ‘yoohi dhomaludhi agehe,’ niilonga yetu yokuuvitha ohayi nana aantu omamiliyona yomiigwana yi ili noyi ili. (Jes. 60:5) Shika otashi kolekwa komwaalu gwaantu omamiliyona mboka haye ya kiigongi yetu nosho wo kEdhimbuluko omumvo kehe. Aantu yamwe yomwaamboka oya fa oohi “oombwanawa” nohaya ningi iilyo yegongalo lyopaKriste. Ihe yalwe, oya fa oohi “oombwinayi,” na Jehova ine ya hokwa.

10. Omolwashike Jesus a popi eyele lyoshiyulitho shoohi?

¹⁰ Omolwashike Jesus a popi eyele ndika? Okuyoolola oohi huka itaku ulike kepangulo lyahugunina ndyoka tali ka ningwa puudhigu uunene. Pehala lyaashono, otaku ulike kwaashoka tashi ningwa momasiku gahugunina guuyuni mbuka uuwinayi. Jesus okwa li u ulike kutya haayehe mboka ye hole etumwalaka lyUukwaniilwa taya ka kala ya hala okuninga aapiya yaJehova. Aantu oyendji mboka haye ya kokugongala kwetu nenge hatu konakona nayo Ombiimbeli inaya hala okwiiyapulila Jehova. (1 Aak. 18:21) Opu na wo yalwe nokuli ihaaya gongala we natse. Aagundjuka yamwe oya putudhwa kaavali Oonzapo, ihe inaya kokeka ohole yawo yokuhola Jehova. Jesus okwa tsu omuthindo kutya kehe gumwe gwomutse oku na okuninga etokolo kuye mwene. Ngele tatu ningi omatokolo ge li mondjila, Jehova ohe tu tala ko twa fa ‘omaliko’ nenge tu na ongushu. —  Hag. 2:7.

11, 12. (a) Otatu vulu ngiini okumona uuwanawa meyele lyoshiyulitho shoohi ndyoka Jesus a popi? (b) Shika otashi tu longo shike kombinga yaJehova naJesus?

¹¹ Otatu vulu ngiini okumona uuwanawa meyele lyoshiyulitho shoohi? Ngele otu uvite ko shoka eyele ndika tali ti, otashi ke tu kwathela kaatu teke omukumo unene nenge kaatu kale twa yemata, uuna omukonakonimbiimbeli nenge okanona ketu kamwe inaaka taamba ko oshili. Shika ohashi vulu okuningwa nokuli nando ohatu ningi oonkambadhala dha mana mo. Omuntu iha ningi omupiya gwaJehova, molwaashoka owala ha konakona Ombiimbeli nenge a putukila poshili. Ayehe mboka inaaya hala okuvulika kepangelo lyaJehova Kalunga, itaya vulu okukala aapiya ye.

¹² Mbela shika otashi ti kutya mboka ya thiga po oshili kaye na siku ya pitikwe ya galukile megongalo? Nenge mbela ngoka ini  igandjela natango Jehova ke na we siku ne ke shi ninge? Hasho nando. Oku na natango ompito okuninga kuume kaJehova manga uudhigu uunene inaawu ya. Jehova ote yi ithana ta ti: “Galukileni kungame, nangame tandi galukile kune.” (Mal. 3:7) Shika osha tsuwa omuthindo meyele ekwawo lyaJesus lyomumati a kanene. —  Lesha Lukas 15:11-32.   

13. Eyele lyaJesus lyomumati a kanene otali ti ngiini?

¹³ Eyele lyaJesus lyomumati a kanene otali ti ngiini? He omunahenda ngoka ta popiwa meyele muka ota thaneke Tate yetu gwomegulu omunahole, Jehova. Omumati ngoka a pula ko eliko lye nokwe li hanagula po, ota thaneke mboka ya thiga po egongalo. Sho ya yi muuyuni waSatana, oya fa ya yi “koshilongo shokokule,” ano kokule naJehova. (Ef. 4:18; Kol. 1:21) Ihe yamwe konima yethimbo ohaya mono kutya oya ninga epuko enene e taya galukile kuJehova. Nonando kashi shi oshipu kuyo, ohaye shi ningi. Molwaashoka oyi ifupipike e tayi itedhulula, Tate yetu ohe ya dhimine po e te ya taamba ko. —  Jes. 44:22; 1 Pet. 2:25.

14. Omolwashike Jesus a popi eyele lyomumati a kanene?

¹⁴ Omolwashike Jesus a popi eyele ndika? Jesus okwa yelitha kutya Jehova okwa hala mboka ye mu thiga po ya galukile kuYe. He ngoka ta popiwa meyele ina kala nando ta dhiladhila kutya omwana ke na siku na ka galuke. Sho omusamane nguka a mono omwana “manga a li kokule,” okwa matuka e ke mu tsakaneke e te mu papatele. Okwa li a hala omwana a tseye kutya okwe mu taamba ko. Eyele ndika nali inyengithe mboka ya thiga po oshili ya galukile nziya kuJehova. Otashi vulika ekwatathano lyawo naJehova lya nkundipala, ya sa ohoni nenge oshidhigu kuyo okugaluka. Ihe otashi ke eta owala uuwanawa, oshoka Jehova, Jesus nosho wo aayengeli otaya ka kala ya nyanyukwa. —  Luk. 15:7.   

15, 16. (a) Otatu vulu ngiini okumona uuwanawa meyele lyaJesus lyomumati a kanene? Gandja iiholelwa. (b) Shika otashi tu longo shike kombinga yaJehova naJesus?

¹⁵ Otatu vulu ngiini okumona uuwanawa meyele lyomumati a kanene? Otu na okuholela Jehova. Inatu kala nando ‘aayuuki unene’ e tatu kala inaatu taamba ko omuntu ngoka a  tokola a galukile kegongalo. Shaashi shika otashi ka ‘hulitha po’ ekwatathano lyetu naJehova. (Omuuv. 7:16) Meyele ndika otatu ilongo mo ishewe kutya omuntu ngoka a thiga po oshili, “onzi ashike ya kana,” ihe ina yiilila. (Eps. 119:176) Ngele otwa tsakanene nomuntu ngoka a thiga po egongalo, mbela otatu ke mu kwathela ngaa a galuke? Mbela otatu ka tseyithila ngaa nziya aakuluntugongalo, opo ye mu kwathele? Ngele otu uvite ko eyele ndika sho tali ti nokutula miilonga shoka tatu ilongo mulyo, otatu ke shi ninga.     

¹⁶ Yamwe mboka ya thigile po oshili, oya pandula noonkondo sho Jehova e ya sile ohenda nokwe yu ulukile ohole, naasho wo egongalo lye ya kwathele. Omumwatate ngoka a kala a kondwa uule woomvula 25 ota ti: “Enyanyu lyandje otali hunga noonkondo okuza sho nda galulilwa megongalo naasho Jehova a ‘dhimi po oondjo dhandje.’ (Iil. 3:19) Ayehe megongalo otaya ambidhidha ndje shili noye na ko nasha nangame! Ngashingeyi ondi na aamwameme oyendji yopambepo.” Omukadhona gumwe omugundjuka ngoka a galukile moshili konima yoomvula ntano ota ti: “Kandi na iitya nomatumbulo okupopya nkene nda li ndu uvite, sho nda mono tandi ulukilwa ohole ndjoka ya popiwa kuJesus. Okukala mehangano lyaJehova itaku yelekwa nasha!”

17, 18. (a) Otwi ilongo shike momayele ngaka gatatu twa zi nokukundathana? (b) Otu na okukala twa tokola toko okuninga shike?

¹⁷ Otatu ilongo mo shike momayele ngaka gatatu? Shotango, otu na okuzimina kutya katu na oonkondo dhokweendelelitha omukonakonimbiimbeli a hume komeho pambepo. Shoka ohatu shi ethele momake gaJehova. Oshitiyali, inatu tegelela ayehe mboka haye ya kokugongala nenge hatu konakona nayo ya ka longele Jehova. Hugunina, nando yamwe oye ethe po Jehova, inatu dhiladhila nando kutya oya yiilila. Natu kale twa tegamena kutya onaya ka galuke ngaa. Nuuna ya galuka, natu ya taambe ko nomake agehe ngaashi Jehova ha ningi.

¹⁸ Natu tsikileni okukonga ontseyo, euvoko nuunongo. Uuna tatu lesha omayele gaJesus, natu ipule kutya otaga ti ngiini, omolwashike ga nyolwa mOmbiimbeli, oshike tatu ilongo kugo naashoka tage tu longo kombinga yaJehova naJesus. Ngele otwe shi ningi, nena otatu ku ulika kutya otu uvite ko eityo lyoohapu dhaJesus.