1. Omolwashike Jehova a gwana okupandulwa?

“OSHIPEWA kehe oshiwanawa nomagano kehe ga gwana ga pwa” ohaga zi kuJehova ngoka a gwana shili okupandulwa. (Jak. 1:17) Oye Omusita omwaanawa ngoka he tu gwanithile po oompumbwe dhetu dhopalutu nodhopambepo. (Eps. 23:1-3) Oye ha kala “epopilongulu noonkondo dhetu,” unene tuu uuna tu li muudhigu. (Eps. 46:1) Onkee ano, otatu vulu shili okutsa kumwe nomutima aguhe nomupisalomi ngoka a nyola a ti: “Gandjeni omapandulo kOmuwa, oshoka ye omwaanawa; ohole ye oyaaluhe.”— Eps. 106:1.

2, 3. (a) Otatu ka gwila momwigo guni, ngele otwa kala ihaatu pandula Jehova sho e tu yambeka? (b) Otatu ka kundathaneni omapulo geni moshileshwa shika?

² Omolwashike sha simanenena tu dhiladhile kombinga yokugandja omapandulo? Momasiku ngaka gahugunina aantu ihaa pandula, ngaashi naanaa sha hunganekelwe. (2 Tim. 3:2) Aantu oyendji ihaya dhiladhila ko nokuli nokomayambeko ngoka ya mona. Omolwenwethomo lyoongeshefa okupitila momatseyitho giipindi, aantu omamiliyona ohaya kala ya hala omaliko ogendji pehala  lyokukala owala ya gwanenwa naashoka ye na. Ombepo ya tya ngeyika, natse otayi vulu oku tu nwetha mo. Natse otatu vulu tu kale ihaatu pandula ngaashi Aaisraeli yonale, e tatu dhini ekwatathano lyetu naJehova nosho wo omayambeko ngoka e tu pa.— Eps. 106:7, 11-13.

³ Natu dhiladhileni wo uuna twa adhika kuudhigu wontumba. Pomathimbo ngoka oshipu uudhigu wu tu gwilile po e tatu dhimbwa omayambeko ngoka twa mona. (Eps. 116:3) Onkee ano, ongiini tatu vulu okukala hatu pandula? Noshike tashi ke tu kwathela tu kale tu na olupandu, nando otu li muudhigu? Natu shi kundathaneni.

4. Oshike tashi ke tu kwathela tu kale tu na olupandu?

⁴ Opo tu kale hatu pandula Jehova, otu na okutedhatedha komayambeko ngoka Jehova e tu pa nokudhiladhila nawa kesilohenda lye enene. Sho omupisalomi a tedhatedha, okwa li a kuminwa iinima oyindji mbyoka Jehova a ninga.— Lesha Episalomi 40:5; 107:43.

5. Omuyapostoli Paulus ote tu longo shike kombinga yokupandula?

⁵ Otatu vulu okwiilonga oshindji komuyapostoli Paulus ngoka a li ha pandula. Osha yela kutya okwa li ha tedhatedha komayambeko ngoka a pewa, molwaashoka okwa li ha pandula olundji nomutima aguhe. Paulus okwa li e shi kutya ye okwa li ‘nale ha popi nayi Aakriste, he ya tidhagana nohe ya sheke.’ Onkee ano, okwa li a pandula sho Kalunga naKristus ye mu sile ohenda e taye mu pe oshilonga shokuuvitha, nonando nale okwa li e na iikala iiwinayi. (Lesha 1 Timoteus 1:12-14.) Paulus okwa li wo a lenga Aakriste ooyakwawo nokwa li ha pandula Jehova lwiikando omolwuukwatya wawo uuwanawa nomolwiilonga yawo yuudhiginini. (Fil. 1:3-5, 7; 1 Tes. 1:2, 3) Naasho a li muudhigu okwa li ha pandula Jehova, omolwekwatho ndyoka aamwayina yopambepo ye mu pe pethimbo lyo opala. (Iil. 28:15; 2 Kor. 7:5-7) Onkee ano, itashi kumitha sho Paulus ta tsu Aakriste omukumo a ti: “Hambeleleni [nenge, panduleni] ihe Kalunga aluhe. . . . Imbeni omapisalomi, omaimbilo noondjimbo oondjapuki. Imbileni Kalunga omahambelelo taga zi meni moomwenyo dheni.”— Kol. 3:15-17.

6. Oho pandula unene Jehova omolwomayambeko geni?

⁶ Ongiini tatu vulu okukala hatu pandula Jehova ngaashi Paulus? Ngaashi Paulus, otu na okukala hatu dhiladhila muule kiinima mbyoka Jehova e tu ningila. (Eps. 116:12) Oto ka tya shike ngele owa pulwa kutya, ‘Oho pandula Jehova omolwomayambeko geni?’ Mbela ekwatathano lyoye naJehova nalyo oto ke li popya? Nenge oto ka popya kombinga yedhiminopo lyoondjo okupitila mekuliloyambo lyaKristus? Mbela oto ka tumbula omadhina gaamwameme aalumentu naakiintu mboka ye ku kwathele sho wa li muudhigu wi ili nowi ili? Otashi vulika nokuli waaha dhimbwe ko kuume koye kopandjokana nenge aamwoye aaholike. Ngele owa kala ho tedhatedha kunkene Tate yetu omunahole, Jehova, a kala noku ku yambeka, shika otashi ke ku inyengitha wu mu pandule esiku kehe.— Lesha Episalomi 92:1, 2.

7. (a) Omolwashike tu na okukala hatu pandula Kalunga momagalikano getu? (b) Ngele owa kala ho pandula Kalunga momagalikano goye, otashi ku etele uuwanawa washike?

⁷ Ngele otu shi omayambeko agehe ngoka Jehova e tu pa, otatu ka kala twi ilongekidha oku mu pandula momagalikano getu. (Eps. 95:2; 100:4, 5) Oyendji ohaya galikana owala  Kalunga uuna ya hala sha kuye. Ihe tse otu shi shi kutya ohashi nyanyudha Jehova, uuna tatu mu pandula omolwiinima mbyoka tu na. MOmbiimbeli omu na omagalikano ogendji gomapandulo, mwa kwatelwa lyaHanna nolyaHiskia. (1 Sam. 2:1-10; Jes. 38:9-20) Onkee ano, natu holeleni aatilikalunga mbaka aadhiginini mboka ya li haya pandula. Eeno, pandula Jehova momagalikano goye, sho e ku yambeke. (1 Tes. 5:17, 18) Ngele owe shi ningi, oto ka kala wa nyanyukwa, wu hole Jehova unene noto ka hedha popepyeelela naye.— Jak. 4:8.

8. Oshike tashi vulu oku tu ningitha tu kale ihaatu pandula Jehova omolwomayambeko ngoka e tu pa?

⁸ Omolwashike tu na okukala twa kotoka kaatu dhimbwe okupandula Jehova omolwuuwanawa we? Omolwaashoka otwa thigulula iikala yokwaapandula. Dhiladhila owala kaavali yetu yotango, Adam naEva, mboka ya li moshikunino shaEden. Aavali mbaka kaya li ye na ompumbwe yasha, noya li ye na etegameno lyokukala nomwenyo sigo aluhe mombili. (Gen. 1:28) Ashike kaya li ya pandula omayambeko gawo. Molwashoka oya li ye na olwiho, oya kanitha ashihe shoka Jehova e ya pele. (Gen. 3:6, 7, 17-19) Shaashi otu li mokati kaantu mboka ihaaya pandula, natse otashi vulika tu tameke okukala kaatu na ko nasha niinima mbyoka Jehova e tu ningila. Otashi vulika tu ende tatu dhini ekwatathano lyetu naJehova. Otapeya wo tu kale inaatu lenga uuthembahenda wetu wokukala tu li oshitopolwa shuumwayinathana muuyuni awuhe. Otashi vulika wo tu kale twa pwila miinima yomuuyuni mbyoka tayi hulu po masiku. (1 Joh. 2:15-17) Opo tu yande omwigo ngoka, otu na okutedhatedha kombinga yomayambeko getu, nokupandula Jehova aluhe sho tu li oshigwana she.— Lesha Episalomi 27:4.

9. Omolwashike tu na okudhiladhila komayambeko getu, uuna twa adhika kuudhigu wa kwata miiti?

⁹ Otashi ke tu kwathela tu idhidhimikile omaudhigu ga kwata miiti, ngele ohatu pandula nomutima aguhe. Otashi vulika tu ngwangwane ngele otwa adhika kuudhigu wa memememe. Shika otashi vulika shi holoke po uuna kuume kopandjokana a yi pondje yondjokana, wa akukilwa komukithi omudhigu, wa silwa omuholike nenge wa dhengwa koshiponga shopaunshitwe. Pomathimbo ngoka, ngele otwa dhiladhila komayambeko getu, shoka otashi ke tu hekeleka noku tu koleka.  Natu ka taleni komahokololo gayamwe mboka yi iyadhele moonkalo dha tya ngaaka.

10. Irina okwa li a mono uuwanawa washike sho a dhiladhila komayambeko ge?

¹⁰ Irina *, oha kokola ondjila moAmerika. Omusamane gwe ngoka a li omukuluntugongalo okwa yi pondje yondjokana e te mu thigi po nosho wo oyana. Oshike sha kwathele Irina a tsikile okulongela Jehova nuudhiginini? Ota ti: “Otandi pandula Jehova sho a kala ta sile ndje oshimpwiyu. Sho nda kala handi dhiladhila esiku kehe komayambeko gandje, onda mono kutya oshi li uuthembahenda sho Tate yetu gwomegulu nomugameni gwetu e shi ndje noku hole ndje. Ondi shi shi lela kutya ke na siku e ekelehi ndje.” Nonando Irina okwa pita muupyakadhi owindji monkalamwenyo ye, okwa nyanyukwa natango nota tsu ooyakwawo omukumo.

11. Oshike sha kwathele Kyung-sook i idhidhimikile omukithi omudhigu?

¹¹ Kyung-sook, ngoka ha kala moAsia, okwa kala ha kokola ondjila pamwe nomusamane gwe uule woomvula dhi vule 20. Ohaluka okwa monika okankela yokomapunga nokwa lombwelwa kutya oku na ko oomwedhi ndatu nenge hamano ngele odhindji. Ye nomusamane gwe oya pitile muudhigu owundji monakuziwa, ihe uukolele wawo oya li ye wete wu li nawa. Okwa ti: “Omukithi nguka ogwa halutha ndje noonkondo. Onda li ndu uvite kutya kandi na etegameno lyasha nonda li nda tila.” Oshike sha kwathele Kyung-sook i idhidhimike? Ota ti: “Ongulohi kehe manga inaandi ka lala, onda li handi londo pontala yi li pombanda yegumbo lyetu e tandi galikana mokule kombinga yiinima itano mbyoka nda pandula esiku ndyoka. Shika ohashi kwathele ndje ndi kale ndi na omukumo, nokuningitha ndje ndi holole ohole yandje yokuhola Jehova.” Kyung-sook omagalikano ngaka oge mu kwathele ngiini? Okwa ti: “Onda mona kutya Jehova ohe tu kwathele uuna tu li muudhigu, nonda mona wo kutya omayambeko getu itaga vulu okuyelekwa nuudhigu mboka tu na.”

12. Oshike sha hekeleke Jason konima yeso lyomukadhi?

¹² Jason, ngoka ha longo koshitayimbelewa shimwe moAfrika, okwa kala miilonga yethimbo lyu udha uule woomvula dha konda 30. Ota ti: “Omukulukadhi gwandje okwa hulitha oomvula heyali dha piti. Omathimbo gamwe ohandi kala nda nika uuthigwa. Ngele onda etha ndi dhiladhile kuuwehame mboka omukulukadhi gwandje a li ha kala u uvite sho ta kondjo nokankela, ohashi teya ndje omukumo.” Oshike sha kwathele Jason? Ota ti: “Esiku limwe onda dhimbulukwa sho twa li tatu nyanyukilwa pamwe nomukulukadhi gwandje nonda pandula Jehova omolwoshinima shoka. Onda li ndu uvite nda pepelelwa, nokuza mpoka onda kala handi pandula Jehova aluhe ngele onda dhimbulukwa sha oshiwanawa. Shika oshe eta po elunduluko enene. Ohandi kala natango nda nika uuthigwa, ihe okupandula Jehova sho a pele ndje ondjokana ombwanawa nosho wo uuthembahenda woku mu longela pamwe nomuntu ngoka a li e mu hole nomutima aguhe, okwa kwathela ndje noonkondo.”

13. Oshike sha kwathele Sheryl a pite moluhodhi sho a silwa aaholike ye?

¹³ Sheryl ngoka a li e na oomvula 13 okwa kanitha ashihe, sho oshikungulu oshidhigu shedhina Haiyan sha dhenge Filipine mo 2013. Okwa ti: “Egumbo lyetu olya li lya hanagulwa po, noyaandjetu oyendji oya sile mo.” He nayina naamwayina yatatu oya sile moshikungulu shoka. Mbela oshike sha kwathele Sheryl a pite mo moluhodhi ndoka inaa teka omukumo? Omolwaashono Sheryl a kala  ha pandula nokwa kala ha dhiladhila aluhe komayambeko ngoka e na. Ota ti: “Onda mono shoka aamwameme ya ningi ya kwathele nokutsa omukumo mboka ya li ya pumbwa ekwatho. Onda li ndi shi kutya aamwameme kongonga yevi alihe otaya kwatele ndje momagalikano gawo. Onda pandula sho ndi na Jehova ongoKalunga kandje. Ohe tu pe aluhe shoka twa pumbwa.” Eeno, ngele ohatu kaleke omayambeko getu momadhiladhilo, otashi ke tu kwathela twaa gwililwe po koluhodhi. Okukala hatu pandula otaku ke tu kwathela tu pule komeho, nonando otu iyadhe muudhigu.— Ef. 5:20; lesha Aafilippi 4:6, 7.

14. Otatu ka nyanyukilwa shike monakuyiwa? (Tala kethano lyopetameko.)

¹⁴ Mondjokonona ayihe aapiya yaJehova oya kala haya nyanyukilwa omayambeko. Pashiholelwa, konima sho Aaisraeli ya hupithwa miikaha yaFarao netangakwiita lye pEfuta Etiligane, oya li ya nyanyukwa e taya pandula Jehova nomahambelelondjimbo. (Eks. 15:1-21) Jehova ote tu shilipaleke kutya ote ke tu pititha moluhodhi nomuupyakadhi kehe. Eyambeko ndika olimwe lyomomayambeko ngoka twa lenga unene nena. (Eps. 37:9-11; Jes. 25:8; 33:24) Dhiladhila owala nkene tatu ka kala tu uvite sho Jehova ta ka hanagula po aatondi yetu noku tu fala muuyuni uupe moka tamu ka kala ombili nuuyuuki. Itatu ka pandula tuu Jehova mesiku ndyoka!— Eh. 20:1-3; 21:3, 4.

15. Owa tokola okuninga shike momukokomoko gwomumvo 2015?

¹⁵ Otwa tegelela oku ka mona omayambeko ogendji gopambepo taga zi kuJehova momumvo 2015. Ihe otashi vulika wo tu ka adhike komashongo. Ashike otu shi shi kutya Jehova ite ke tu ekelahi. (Deut. 31:8; Eps. 9:9, 10) Ote ke tu pa ashihe shoka twa pumbwa, opo tu vule oku mu longela nuudhiginini. Onkee ano, natu kale twa tokola okuholela omupolofeti Habakuk ngoka a tile: “Nonando omikwiyu inadhi ima, nomiviinu dhaa na omandjembele, nando omiolivi inadhi ima sha, nepya inali vala iilya, nonando oonzi adhihe tadhi si, niigunda yiimuna oyi li owala, otandi nyanyukwa natango nonda panda, oshoka Omuwa Kalunga oye Omukulili gwandje.” (Hab. 3:17, 18) Natu kaleni ano tatu dhiladhila komayambeko getu omumvo nguka aguhe gwo 2015, nokuvulika kenyolo lyokomumvo ndyoka tali ti: “Gandjeni omapandulo kOmuwa, oshoka ye omwaanawa.”— Eps. 106:1.