MIILONGA mbyoka tayi longwa kombanda yevi kunena onkundana ombwanawa oyo yimwe yomiilonga ya simanenena. Oshi li uuthembahenda uunene okulonga pamwe naJehova moshilonga shika. Ihe omathimbo gamwe ohashi kala oshidhigu kaakokolindjila nokaauvithi okukala aalaadhi muukalele. Omolwashike mbela?

Aauvithi yamwe ngele tayu uvitha egumbo negumbo aantu oyendji ihaye ya adha mo. Ngele omo ye ya adha, oyendji ihaya kala ya hala okupulakena, yo yamwe otashi vulika ye ya ngwandjagule. Yamwe ohaya uvithile miitopolwa iinene moka mu na aantu haya pulakene nawa. Ohaya kala ya tila kutya itaya ka vula okuuvithila aantu ayehe. Aauvithi yamwe mboka ya kala nokuuvitha oomvula noomvula oya teka omukumo sho ehulilo inaali ya natango.

Otatu ka tsakaneka omashongo muukalele ngoka taga vulu oku tu teya omukumo. Shika otashi ningwa oshoka otu li muuyuni tawu pangelwa ‘komuhindadhi,’ Satana Ondiyapoli. Onkee ano, oshi li oshidhigu omathimbo gamwe okuuvitha onkundana ombwanawa. —  1 Joh. 5:19.

Ihe kutya nduno owu tsakaneke omashongo ge thike peni muukalele, kala wu shi shi nokutya Jehova ote ke ku kwathela wu ga sinde. Oshike tashi ke ku kwathela wu kale wu na uulaadhi muukalele? Tala kiinima tayi landula.

Omumvo kehe, aantu oyendji ohaya ninginithwa e taya ningi Oonzapo dhaJehova. Aauvithi mboka ya pyokoka otaya vulu oku ku longa oshindji muukalele ngele opo wa ninginithwa. Ngele ngoye omuuvithi a pyokoka, mbela ito vulu okukwathela aauvithi aape? Ngele owe shi ningi otashi ke ku nyanyudha.

Jesus okwa li a longo aalongwa ye nkene ye na okuuvitha. Okwa li e shi kutya opo ya kale ya pyokoka muukalele oku na oku ya longa. (Luk. 8:1) Nonena aauvithi aape oye na okudheulwa, opo ya kale haye shi enditha nawa.

Ngele omuuvithi oha yi muukalele, itashi ti kutya okwa pyokoka. Onkene okwa pumbwa natango okudheulwa. Ngoka te mu enditha po na kale e na olukeno nohole, ye ne mu longe iinima tayi  landula: (1) okwiilongekidha shoka ta ka popya muukalele nokwiiyenditha po, (2) okutameka oonkundathana naantu, (3) okugandja iileshomwa, (4) okuninga omaishunoko nosho wo (5) okutameka omakonakonombiimbeli. Omuuvithi omupe ota vulu wo okuninga omuuvithi a pyokoka ngele oha tala nkene aauvithi ya pyokoka taya uvitha noku ya holela. (Luk. 6:40) Oha kala e na omukumo ngele oku shi kutya opu na omuntu ngoka i ilongekidha oku mu kwathela. Ote ke shi enditha wo nawa ngele oha pandulwa, noha pewa omayele kombinga yiinima mbyoka e na okulongela ko. —  Omuuv. 4:9, 10.

Omathimbo gamwe oshidhigu okupopya naantu mboka to adha momagumbo. Onkene oshiwanawa wu kale to popi naangoka to longo naye momapya. Dhimbulukwa kutya Jesus okwa li a tumu aalongwa ye ye ku uvithe ye li “ooyaali nooyaali.” (Luk. 10:1, OB-1954) Shika oshe ya kwathele ya kale taya tsaathana omukumo nokuladhipikathana. Ano natse otu na ompito ombwanawa “okutsaathana omukumo” sho tatu uvitha nooitaali ooyakwetu. —  Rom. 1:12.

Otamu vulu okupopya kombinga yashike? Mbela opu na gumwe gwomune a tsakanekele omuntu ngoka tu ulike ohokwe? Owi ilonga sha oshiwanawa mekonakono lyopaumwene nenge pelongelokalunga lyuukwanegumbo? Mbela pokugongala opwa popilwe oshinima shoka she ku tsa omukumo? Oto vulu kupopya kombinga yiinima ayihe mbyoka. Omathimbo gamwe otashi vulika wu kale to longo nomuntu waahe mu shi nawa. Oto vulu oku mu pula kutya oshili okwe yi mono ngiini. Oto vulu wo oku mu pula omapulo ngaashi: Oshike she ku tompo kutya ndika olyo ehangano lyaJehova? Iinakugwanithwa yini a li e na nomashongo geni a tsakaneka sho te yi gwanitha po? Oto vulu wo oku mu lombwela iinima mbyoka wa pita muyo monkalamwenyo. Kutya nduno aantu otayi inyenge ngiini, otamu vulu okukumagidhathana ‘nokukwathathana’ sho mu li muukalele. —  1 Tes. 5:11.

Ngele otwa hala tu kale tu na uulaadhi muukalele, otu na okukala hatu konakona Ombiimbeli nuukeka paumwene. “Omupiya omudhiginini nomunandunge” okwa nyanyangidha uuyelele wi ili nowi ili mboka tatu vulu okulongitha sho tatu yi konakona. (Mat. 24:45, NW) Natu kundathaneni epulo limwe ndyoka omuntu ta vulu okuninga omapekapeko sho ta ningi ekonakono lyopaumwene. Epulo ndyoka olyo: Omolwashike okuuvitha kwa simana? Okampungu “ Omolwashike wu na okukala omulaadhi muukalele?” oke na omatompelo gontumba.

Iitsa mbyoka yi li mokampungu otayi ke ku inyengitha  wu tsikile okuuvitha nuulaadhi ngele we yi konakona. Itulila po wo elalakano wu konge iitsa yilwe yopamanyolo kutya omolwashike tu na okuuvitha nuulaadhi. Ngoye to kala ho tedhatedha kiitsa mbyoka naambyoka yi li mokampungu. Ngele owe shi ningi, otashi ke ku kwathela wu kale omulaadhi muukalele.

Ehangano lyaJehova ohali tu kwathele olundji nkene tu na okuhwepopaleka uukalele wetu. Pashiholelwa, ohali tu lombwele kutya kakele kokulonga egumbo negumbo otatu vulu okunyolela aantu oontumwafo, okupopya nayo mongodhi opo tu ya uvithile. Otatu vulu wo okuuvitha mepandaanda nenge pomahala gaayehe, okuuvithila aantu ontukuluka nenge kiilonga. Otatu vulu wo oku ka uvithila hoka ku na ompumbwe yaauvithi nenge kaaku na Oonzapo.

Mbela ino hala oku shi ninga? Oyendji mboka ye shi ninga oya tompola po sha. Tala kiiholelwa itatu tayi landula.

MUukalele Wetu wUukwaniilwa ohamu holoka omaetopo nkene tatu vulu okutameka omakonakonombiimbeli. Omumwameme gwedhina April okwa li e ga tula miilonga. Okwa pula yatatu yomaaniilonga pamwe naye a konakone nayo Ombiimbeli. Okwa li a kumwa noonkondo sho ayehe ya zimine. Okwa li wo a nyanyukwa sho ayehe ya tameke okuya pokugongala.

Okafo kUukalele oke tu ladhipikile wo tu ulukile aantu iitopolwa yokondandalunde miifo yetu mbyoka tashi vulika ya kale ya hokwa. Omutonatelishikandjo gumwe moAmerika okwa li a faalele aakuluntu yiilonga yomahangano gomataiyela oshifo sho-Awake! shoka tashi popi kombinga yomataiyela. Ye nomukadhi oya li wo ya gandja iifo yo-Awake! yi na oshitopolwa “Understanding Your Doctor,” koondohotola 100. Okwa ti kutya omatalelopo ngoka oga li ga kwathele aantu oyendji, noshe  ya ningitha ya kale ya hokwa iileshomwa nokuuvitha kwetu. Okuza mpono sho ya kala nokutseya aantu muukalele, omutonatelishikandjo nomukadhi oya li ya ningi omaishunoko ogendji.

Omumwameme Judy okwa nyolele ehangano oshoka okwa li a nyanyukilwa eetopo ndyoka lya ningwa mokafo kUukalele lyokuuvithila aantu mongodhi. Okwa ti kutya yina oku na oomvula 86, ye ke na naanaa uukolele, ihe ohu uvithile aantu olundji mongodhi. Oshizemo yina okwa li a tameke okukonakona Ombiimbeli nomukulupe ngoka a li e na oomvula 92.

Omaetopo ngoka haga ningwa miileshomwa yetu ohaga longo shili. Kambadhala owala oku ga tula miilonga. Ngele owe shi ningi, oto ka kala omulaadhi muukalele noto ke wu nyanyukilwa.

Oshike hashi ulike kutya otwa pondola muukalele? Mbela omwaalu gwiileshomwa mbyoka twa gandja, omakonakonombiimbeli ngoka tu na, nenge omwaalu gwaantu mboka twa kwathela ya ninge Oonzapo dhaJehova? Dhiladhila kombinga yaNoa. Mbela okwa li a kwathele aantu yangapi ya longele Jehova? Aanegumbo lye owala ya li ya taamba ko euvitho lye. Ihe Noa naye okwa li omuuvithi ha pondola. Shoka shi na oshilonga osho okulongela Jehova nuudhiginini. —  1 Kor. 4:2.

Aauvithi oyendji oye shi mona kutya ngele oyi itulile po omalalakano ngoka taya vulu okugwanitha po, ohaya nyanyukilwa uukalele. Omalalakano gamwe ngoka otaga adhika mokampungu: “ Itulila po omalalakano ngoka to vulu okwaadha.”

Pula Jehova e ku kwathele wu pondole muukalele woye nowu kale tawu ti sha. Oto ka kala wu uvite ombili ngele owa gwanitha po omalalakano goye, noto ka kala wu uvite kutya oto longo nuudhiginini mokuuvitha onkundana ombwanawa.

Odhoshili kutya ihashi kala aluhe oshipu okuuvitha onkundana ombwanawa. Ihe oto vulu okuninga po sha, opo wu kale omulaadhi muukalele. Kala ho popi naangoka to longo naye. Kala ho konakona Ombiimbeli muule paumwene. Shi ninga pandjigilile. Kala ho tula miilonga omayele gomupiya omudhiginini nomunandunge. Itulila po omalalakano ngoka to vulu okugwanitha po. Ihe oshinima sha simanenena shoka wu na okudhimbulukwa osho shika kutya, Jehova Kalunga okwe ku pa uuthembahenda wokuuvitha onkundana ombwanawa nowokukala Onzapo ye. (Jes. 43:10) Ngele owa tsikile okukala omulaadhi muukalele, oto ka kala wu na enyanyu enene.