1, 2. (a) Omwenyo gwaaluhe otatu ke gu mona ngiini? (b) Oshike tashi ke tu kwathela tu kale twa pwila molweendo lwetu lwopaKriste?

SHO twa ningi Aakriste, otwa fa aantu mboka ya tameke nolweendo. Otatu ke shi pondola owala molweendo lwetu ngele otwa kala aadhiginini kuKalunga. Ngele otwe shi ningi otatu ka mona omwenyo gwaaluhe. Jesus okwa ti: “Ngoka ti idhidhimike sigo ehulilo, ota hupithwa.” (Mat. 24:13) Opo tu adhe uuthikilo molweendo lwetu, otwa pumbwa okukala aadhiginini kuKalunga sigo “ehulilo.” Kashi na nduno mbudhi kutya ehulilo lyonkalamwenyo yetu nenge ehulilo lyuuyuni mbuka tu li waSatana. Ihe otu na aluhe okukala twa kotoka, opo kaatu piyaganekwe kuuhalu wuuyuni mbuka. (1 Joh. 2:15-17) Oshike tashi ke tu kwathela tu kale twa pwila lela molweendo lwetu lwopaKriste moka tu li?

² Ongele tatu landula oshiholelwa oshiwanawa shoka Jesus e tu tulila po. Otatu ki ilonga kutya Jesus omuntu a tya ngiini, sho tatu konakona kombinga yolweendo lwe nenge yonkalamwenyo ye ndjoka ya popiwa mOmbiimbeli. Otashi ke tu kwathela wo tu kale tu mu hole notwe mu itaala. (Lesha 1 Petrus 1:8, 9.) Omuyapostoli  Petrus okwe shi popi sha yela kutya Jesus okwe tu thigila oshiholelwa tu shi landule. (1 Pet. 2:21) Uuna tatu shi ningi, otatu ka vula okwiidhidhimika sigo ehulilo. * Moshitopolwa sha tetekele otwi ilongo mo nkene tatu vulu okukala tu na eifupipiko nosho wo olukeno ngaashi Jesus. Moshitopolwa shino, otatu ki ilonga mo nkene tatu vulu okukala tu na uulaadhi nosho wo oondunge dhokuyoolola twe mu fa.

3. Uulaadhi oshike, noha shi ende ngiini tu kale tu wu na?

³ Uulaadhi owo uukwatya mboka hawu nkondopaleke nohawu tu kwathele tu idhidhimikile oothina nomaupyakadhi gambandayevi. Ohawu tu kwathele wo tu kale hatu popile shoka shu uka. Otawu vulu oku tu kwathela tu kale twa ngungumana nokukala aadhiginini kuKalunga ketu uuna tatu hepekwa. Uulaadhi otawu tegamekwa nuukwatya ngaashi etilokalunga, einekelo nosho wo ohole. Omolwashike mbela? Ngele otu na uumbanda wokukala twa tila okuyemateka Kalunga, itatu ka kala twa tila aantu. (1 Sam. 11:7; Omayel. 29:25) Okukala tu na einekelo muJehova otashi ke tu kwathela tu gandje eitulomo konakuyiwa, pehala lyokukala owala tatu keme omolwomaupyakadhi. (Eps. 27:14) Ohole ohayi tu inyengitha tu kale aalaadhi, nuuna tatu hepekwa nokuli. (Joh. 15:13) Otatu ka kala aalaadhi ngele otwi inekela muKalunga nohatu holele Omwana. —  Eps. 28:7.

4. Jesus okwa li u ulike ngiini uulaadhi sho e li motempeli? (Tala kethano lyopetameko.)

⁴ Sho Jesus a li e na oomvula 12 okwa li u ulike uulaadhi sho a li “motempeli, a kuutumba mokati kaalongi Aajuda.” (Lesha Lukas 2:41-47.) Aalongi mboka oya li ye shi nawa momutse Ompango yaMoses. Kakele kOmpango, oya li wo ye shi oonkuluhedhi dhOshijuda, ndhoka dha li dha ningitha Ompango yi kale omutengi kaantu. Ihe Jesus ka li a tila okupopya naalongi mboka. Okwa kala “te ya pula” omapulo. Jesus ka li ta pula omapulo ngoka haga pulwa olundji kaanona. Okwa li te ya pula omapulo gomuule, ngoka ga li ga ningitha aalongi mboka ya pakalaleke omakutsi noya dhiladhile muule. Ngele aalongi mboka oya li ya hala okukwata Jesus nomapulo ngoka tage etitha oontamanana, oya li ya hulile mokwena kwa hula. Ayehe mboka ya li taya pulakene kuJesus oya li ya kuminwa lela elongo lye. Aalongi Aajuda nayo “oya kuminwa oondunge dhe nomayamukulo ge.” Osha yela kutya Jesus okwa li a popile oshili ndjoka tayi adhika mOohapu dhaKalunga nuulaadhi.

5. Omomikalo dhini Jesus a li u ulike uulaadhi muukalele we?

⁵ Jesus okwa li u ulike uulaadhi momikalo dhi ili nodhi ili muukalele we. Pashiholelwa, okwa li a lombwele aantu kutya aalongi Aajuda oya li taye ya pukitha nomalongo gawo giifundja. (Mat. 23:13-36) Oshikwawo, ine etha a nwethwe mo kuuyuni. (Joh. 16:33) Ihe okwa tsikile okuuvitha nonando okwa li ta patanekwa. (Joh. 5:15-18; 7:14) Iikando iyali, okwa li nokuli o opaleke otempeli nopwaahe na uumbanda washa, sho a tidha mo mboka ya li taya nyateke elongelokalunga lyashili. —  Mat. 21:12, 13; Joh. 2:14-17.

6. Jesus okwa li u ulike ngiini uulaadhi mesiku lye lyahugunina kombanda yevi?

⁶ Jesus okwa li u ulike uulaadhi mesiku lye lyahugunina kombanda yevi. Okwa li e shi ulike ngiini? Okwa li e shi shoka ta ka ningilwa ngele Judas e mu gwaaleke. Ihe sho ta li Opaasa pamwe naalongwa ye, Jesus okwa li a lombwele Judas a ti: “Shono to ningi, shi ninga  nziya.” (Joh. 13:21-27) Meyana lyaGetsemane, Jesus okwi i ihololele ye mwene aakwiita mboka ya li ye ya oku mu kwata po. Okwa li e shi kutya oku li pokudhipagwa, ihe nonando ongaaka, okwa li a gamene aalongwa ye. Okwa lombwele aakwiita a ti: “Etheni, aalumentu mbaka ya ye.” (Joh. 18:1-8) Sho aapanguli mompangu yopombanda yAajuda ya li taye mu pula omapulo, Jesus okwa li e ya lombwele a manguluka kutya oye Kristus, Omwana gwaKalunga. Ka li a tila omuyambi omukuluntu ngoka a li ta kongo omatompelo giifundja e mu dhipagithe. (Mark. 14:60-65) Jesus okwa kala omudhiginini kuKalunga sigo omeso, sho a alelwa komuti gwomahepeko. Sho ta fudha mo omufudho gwe gwahugunina, okwi igidha a ti: “Ayihe ya gwanithwa!” —  Joh. 19:28-30.

7. Aagundjuka, omu uvite ngiini sho mu li Oonzapo dhaJehova, nongiini tamu vulu okuulika uulaadhi weni?

⁷ Kosikola. Ongiini tatu vulu okukala aalaadhi ngaashi Jesus? Aagundjuka otamu ku ulika kutya ne aalaadhi ngaashi Jesus ngele tamu lombwele aanasikola ooyakweni nosho wo yalwe kutya ne Oonzapo dhaJehova. Nonando otashi vulika mu shekwe, otamu ka kala mu uvite uuntsa nuunambano sho hamu ithanwa nedhina lyaJehova. (Lesha Episalomi 86:12.) Aantu yamwe otashi vulika ya kale ya hala mu itaale melongo lyoevolusi, ihe kala wi inekela kutya shoka Ombiimbeli tayi ti kombinga yeshito oshoshili. Longitha okambo The Origin of Life — Five Questions Worth Asking wu yamukule mboka taye ku “pula okufatulula etegameno ndyoka li li” mungoye. (1 Pet. 3:15) Shika otashi ke ku nyanyudha oshoka owu shi kutya oto popile nuulaadhi oshili ndjoka tayi adhika mOmbiimbeli.

8. Omolwashike tu na okuuvitha nuulaadhi? Gandja omatompelo.

⁸ Muukalele wetu. Aakriste yashili otwa pumbwa ‘okuuvitha nuulaadhi oohapu dhaJehova,’ molwaashoka oye e tu pa uuthemba mboka. (Iil. 14:3, NW) Omolwashike tu na oku shi ninga? Omolwomatompelo taga landula. Limwe, otu shi shi nokutya shoka tatu uvitha oshoshili, molwaashoka osha kankamena kOohapu dhaKalunga, Ombiimbeli. (Joh. 17:17) Etompelo lilwe, “otse aalongi pamwe naKalunga,” nokwe tu pa ombepo ye ondjapuki yi tu kwathele muukalele wetu. (1 Kor. 3:9; Iil. 4:31) Etompelo ekwawo, otu hole Jehova nosho wo aantu ooyakwetu, naashoka ohashi tu inyengitha tu ninge ngaashi tatu vulu tu ya lombwele onkundana ombwanawa. (Mat. 22:37-39) Omolwuulaadhi wetu otatu pula komeho niilonga yokuuvitha nopwaahe na ezimbuko. Otwa tokola twa mana tu thikithe oshili kwaayehe mboka ya “pukithwa,” noya tsikithwa pambepo kaawiliki yomalongelokalunga giifundja. (2 Kor. 4:4) Shimwe ishewe, otatu ka tsikila okuuvitha onkundana ombwanawa, kutya nduno aantu inaya hala oku yi pulakena, nenge taye tu hepeke. —  1 Tes. 2:1, 2.

9. Ongiini tatu vulu okuulika uulaadhi uuna tatu hepekwa?

⁹ Uuna tatu hepekwa. Ngele otwi inekela muKalunga, ote ke tu pa eitaalo nosho wo uulaadhi mboka twa pumbwa, opo tu idhidhimikile oothina. Uuna twa silwa, ohatu kala twa nika oluhodhi, ihe ihatu kanitha etegameno. Ohatu kala tu na omukumo kutya “Kalunga, ngoka kuye haku zi ekwatho alihe” ote ke tu hekeleka. (2 Kor. 1:3, 4; 1 Tes. 4:13) Otashi vulika tu kale tatu ehama nenge tu mone oshiponga, ihe ohatu iyageke epango kehe ndyoka tali yemateke Kalunga ketu. Shika ohatu shi ningi nonando otashi vulika tu li muuwehame uunene. (Iil. 15:28, 29) Ngele otwa polimana otashi vulika ‘eiyuvo lyetu li tu pe uusama.’ Ihe nonando ongawo, ihatu shuna monima. Ohatu kala twi inekela muJehova, ngoka ha kala aluhe  “popepi naamboka ya dhengwa pevi.” * —  1 Joh. 3:19, 20; Eps. 34:18.

10. Oondunge dhokuyoolola oshike, na Aakriste mboka ye dhi na ohaya popi ngiini nohayi ihumbata ngiini?

¹⁰ Omuntu ngoka e na oondunge dhokuyoolola oha kala e shi kutya oshike sha puka noshike shi li mondjila. Oha ningi aluhe shoka shi li mondjila. (Heb. 5:14) Omukriste ngoka e na oondunge dhokuyoolola oha ningi omatokolo ngoka taga koleke ekwatathano lye naJehova. Oha kala a kotoka, opo kaa popye omalaka ga honga ngoka tage ehameke yalwe. Omukriste ngoka oha popi oohapu ndhoka tadhi tungu yalwe, oshinima shoka hashi nyanyudha Jehova. (Omayel. 11:12, 13) Omukriste a tya ngaaka “omutalanteni.” (Omayel. 14:29) Ohe “ende u ukilila,” nenge tu tye oha ningi omatokolo omawanawa monkalamwenyo ye ayihe. (Omayel. 15:21) Oshike tashi ke tu kwathela tu kale tu na oondunge dhokuyoolola? Otu na okukonakona Oohapu dhaKalunga nokutula miilonga shoka tatu ilongo mudho. (Omayel. 2:1-5, 10, 11) Jesus okwa li e na oondunge dhokuyoolola. Onkee ano, otatu vulu wo okutala koshiholelwa she noku shi landula.

11. Jesus oku ulike ngiini mokupopya kwe kutya oku na oondunge dhokuyoolola?

¹¹ Mokupopya kwe. Jesus mokupopya kwe nomeihumbato lye okwa li hu ulike kutya oku na oondunge dhokuyoolola. Sho a li tu uvitha onkundana ombwanawa okwa li a longitha oohapu oombwanawa ndhoka aantu ya li ya kuminwa. (Mat. 7:28; Luk. 4:22) Olundji okwa li ha totha mOohapu dhaKalunga, nokwa li e shi naanaa kutya enyolo lini e na okulesha monkalo kehe. (Mat. 4:4, 7, 10; 12:1-5; Luk. 4:16-21) Ishewe, aantu mboka ye mu uvile ta fatulula Omanyolo oya li ya hendwa lela koomwenyo. Konima sho a yumudhwa, Jesus okwa li a popi naalongwa ye yaali mboka ya li yu uka kuEmmaus e te ya yelithile omanyolo ngoka taga popi kombinga ye. Pehulilo lyoonkundathana dhawo aalongwa oya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo!” —  Luk. 24:27, 32.

12, 13. Ehokololo lini tali ulike kutya Jesus okwa li omunahenda noku na ondjele?

¹² Uukwatya we nosho wo iikala ye. Oondunge dhokuyoolola odha li dha kwathele Jesus a kale “omutalanteni.” (Omayel. 16:32) Okwa li “omunambili” noku shi okwiipangela. (Mat. 11:29) Okwa li aluhe hi idhidhimikile aalongwa ye nonando oya li haya ningi omapuko ogendji. (Mark. 14:34-38; Luk. 22:24-27) Nokuli naasho a li ta hepekwa okwa kala a ngungumana. —  1 Pet. 2:23.

¹³ Oondunge dhokuyoolola odho wo dha li dha kwathele Jesus a kale e na ondjele. Okwa li e shi elalakano lyOmpango yaMoses, naashika oshe mu kwathele a kale hu ungaunga nawa naantu. Pashiholelwa, tala kunkene i ihumbatele omukiintu ngoka a li e na “uuvu wetiko lyombinzi.” (Lesha Markus 5:25-34.) Pampango  yaMoses, omukiintu nguka okwa li a nika oshidhila noka li e na okuguma nando omuntu. (Lev. 15:25-27) Ihe okwa li e ende mokati kaantu, opo a ka gume onguwo yaJesus. Naasho e shi ningi Jesus ine mu ganda. Omolwashike mbela? Omolwaashoka okwa li e shi kutya uukwatya ngaashi “esilohenda nokwiinekelwa” owo wa li wa simana unene, pehala lyokukala owala ta komangele shoka Ompango tayi ti. (Mat. 23:23) Jesus okwa lombwele omukiintu nombili a ti: “Mumwandje, eitaalo lyoye lye ku aludha. Inda nombili, ngoye u kale wa aluka kuuvu woye.” Ehokololo ndika kali shi tuu ewanawa oku tu ulukila nkene oondunge dhokuyoolola dha li dha kwathele Jesus u ulike olukeno!

14. Jesus okwa li a hogolola eithano lini monkalamwenyo ye, noshike sha li she mu kwathele a kale ta gandja eitulomo kulyo?

¹⁴ Mokukalamwenyo kwe. Jesus okwa li u ulike kutya oku na oondunge dhokuyoolola monkalamwenyo ye. Okwa li ha ningi omatokolo ngoka ge mu kwathele a kale ta longo iilonga yokuuvitha noku yi gwanitha po. Uukalele owo wa li eithano lye. (Luk. 4:43) Pashiholelwa, ka li e na iinima mbyoka tayi mu imbi a longithe ethimbo lye noonkondo dhe muukalele. (Luk. 9:58) Okwa li e shi kutya oku na okudheula yalwe ya tsikile niilonga yokuuvitha konima yeso lye. (Luk. 10:1-12; Joh. 14:12) Okwa li u uvanekele aalongwa ye kutya ota ka kala noku ya kwathela muukalele “omasiku agehe sigo ehulilo lyuuyuni.” —  Mat. 28:19, 20.

15. Ongiini tatu vulu okuulika oondunge dhokuyoolola mokupopya kwetu?

¹⁵ Okupopya kwetu. Ongiini ngame nangoye tatu vulu okukala tu na oondunge dhokuyoolola ngaashi Jesus? Uuna tatu popi naamwatate nosho wo naamwameme natu popye oohapu ndhoka tadhi tungu, pehala lyokupopya iinima mbyoka tayi teya omukumo. (Ef. 4:29) Uuna tatu lombwele yalwe etumwalaka lyUukwaniilwa waKalunga, oohapu dhetu nadhi kale tadhi “hokitha omuntu.” Opo tu shi ninge otu na okukokeka uunkulungu wokupopya. (Kol. 4:6) Iitya yetu nayi kale ya hogololekeka, nokukala tu shi kutya aantu otayi ipula nashike noye na ohokwe miinima yini. Aantu otaya ka kala ya hokwa okupulakena kutse, uuna tatu longitha oohapu ombwanawa,  netumwalaka lyetu otali ka ningina nuupu momitima dhawo. Shimwe natango, natu kale hatu lesha mOmbiimbeli ngele tatu yelithile aantu eitaalo lyetu, molwaashoka Oohapu dhaKalunga odhi na oonkondo. Etumwalaka lyOmbiimbeli otali vulu okwiinyengitha omuntu shi vulithe kehe shimwe shoka tatu vulu oku mu lombwela. —  Heb. 4:12.

16, 17. (a) Ongiini tatu vulu okuulika kutya otu na ondjele, noihatu geye mbala? (b) Oshike tashi ke tu kwathela tu gandje eitulomo kuukalele wetu?

¹⁶ Uukwatya wetu nosho wo iikala yetu. Oondunge dhokuyoolola otadhi ke tu kwathela tu pangele omaiyuvo getu uuna tatu thiminikwa. Ohadhi kwathele wo kehe gumwe gwomutse a kale ihaa “geye mbala.” (Jak. 1:19) Uuna gumwe e tu yemateka, onawa tu kambadhale tu uve ko kutya omolwashike a popile nenge a katuka momukalo ngono. Otashi ke tu kwathela tu mu dhimine po nuupu nokaatu kale twe mu geela. (Omayel. 19:11) Oondunge dhokuyoolola ohadhi tu kwathele tu kale tu na ondjele, nokaatu kale twa tegelela aamwatate naamwameme megongalo ya kale ya gwanenena. Onawa tu kale tu shi kutya omuntu kehe otashi vulika a kale e na uupyakadhi we, mboka tse itaatu ke wu uva ko naanaa thiluthilu. Onkee ano, natu kale hatu pulakene uuna ooitaali ooyakwetu taya popi. Mpoka tashi vulika, natu kale hatu tifuka, pehala lyoku ya kondjitha ya ninge shoka twa hala. —  Fil. 4:5.

¹⁷ Okukalamwenyo kwetu. Okuuvitha onkundana ombwanawa oku li uuthembahenda wa dhenga mbanda mboka twe wu inekelelwa. Onkee ano, otwa hala okuninga omatokolo ngoka tage tu kwathele tu kale twa kanyatela kuukalele wetu. Natu kale twa tula Jehova pondondo yotango monkalamwenyo yetu. Inatu etha nando osha monkalamwenyo shi tu imbe tu longithe ethimbo lyetu nosho wo oonkondo dhetu mokuuvitha onkundana ombwanawa manga twa tegelela ehulilo. —  Mat. 6:33; 24:14.

18. Ongiini tatu vulu okutsikila nolweendo lwetu ndoka talu tu fala sigo omomwenyo gwaaluhe, nowa tokola toko okuninga shike?

¹⁸ Oshi li uuthembahenda uunene okwiilonga omaukwatya gamwepo gaJesus. Dhiladhila owala kutya otatu ka mona uuwanawa wu thike peni ngele otwa tsikile nokukonakona nosho wo nokwiilonga uukwatya we wulwe, tse tatu kambadhala oku mu holela. Atuheni natu kaleni twa tokola toko okuholela Jesus. Uuna tatu shi ningi, otatu ka tsikila nolweendo lwetu ndoka talu tu hedhitha popepi naJehova notalu tu fala sigo omomwenyo gwaaluhe.