1, 2. Omolwashike Jesus a hokolola eyele lyiimaliwa?

JESUS okwa popi eyele lyiimaliwa a tseyithile aagwayekwa oshinakugwanithwa shawo. Ihe aalongwa ye yalwe nayo oya kwatelwa mo. Onkee ano, atuheni otwa pumbwa okuuva ko nawa eyele ndika, kutya nduno otu na etegameno lyokuya megulu nenge olyokukala kombanda yevi.

² Eyele ndika Jesus okwe li popi uunake? Okwe li popi sho a li ta lombwele aalongwa ye kombinga yendhindhiliko ndyoka tali ku ulika kutya okwa ninga Omukwaniilwa. Endhindhiliko ndyoka olya li tali ka ulika wo kutya ethimbo lyehulilo nenge omasiku gahugunina oga tameka. (Mat. 24:3) Eyele ndika nalyo olimwe lyomiinima mbyoka Jesus a popi sho ta gandja endhindhiliko lyehulilo lyuuyuni. Otali gwanithwa pethimbo lyetu.   

3. Oshike tatu ilongo mo momayele ngoka ge li muMateus ontopolwa 24 no-25?

³ Eyele lyiimaliwa halyo alike Jesus a popi. Opu na wo omayele gatatu ngoka nago e ga popi sho ta hokolola kombinga yomasiku gahugunina. Omayele agehe otaga popi kombinga yuukwatya mboka aalanduli ye ye na okukala ye  na. Omayele ngaka otaga adhika muMateus 24:45 sigo 25:46. Eyele lyotango otali popi kombinga yomumati nenge yomupiya omudhiginini nomunandunge. Omupiya nguka okwa thikama po mokangundu kaagwayekwa mboka ya pewa oshinakugwanithwa shokulonga oshigwana shaJehova. Oku na okukala omudhiginini nomunandunge. * Eyele ekwawo olyaakadhona omulongo. Meyele ndika Jesus ota londodha aagwayekwa ya kale yi ilongekidha noya tonata. Omolwashike mbela? Omolwaashoka kaye shi esiku nenge otundi uuna te ya. * Eyele lya landula ko ndyoka Jesus a popi, eyele lyiimaliwa. Okwe li popi a longe aagwayekwa kutya oye na okulonga nuudhiginini sho taya longo iilonga yawo yopaKriste. Hugunina Jesus okwa popi eyele lyoonzi niikombo. Eyele ndika olya nuninwa mboka ye na etegameno lyokukala nomwenyo sigo aluhe kombanda yevi. Okwa yelitha kutya oye na okukala aadhiginini nokukambadhala ya mana mo ya kwathele aagwayekwa. * Oshileshwa shika otashi fatulula shoka eyele lyiimaliwa tali ti.

4, 5. Omulumentu gwomeyele lyaJesus ota thaneke lye? Iimaliwa mbyoka a li e na oyi thike peni?

⁴ Lesha Mateus 25:14-30. Meyele lyiimaliwa, Jesus okwa popi kombinga yomulumentu ngoka e ke enda kiilongo. Meyele lilwe lya faathana naandyoka, Jesus okwa popi kombinga yomulumentu ngoka a yi a ka ninge omukwaniilwa. * (Luk. 19:12) Uule woomvula iileshomwa yetu oya kala hayi fatulula kutya omulumentu ngoka oJesus, ngoka a yi megulu momumvo 33. Jesus ina thikila ta ningi omukwaniilwa sho a thiki megulu. Okwa li e na okutegelela sigo aatondi ye ya ‘tulwa kohi yoompadhi dhe.’ Shika osha ningilwe mo 1914. —  Heb. 10:12, 13.

⁵ Omulumentu gwomeyele lyaJesus okwa li e na iimaliwa omayuvi gahetatu nenge iitalenti ihetatu. Mbyoka iimaliwa oyindji lela. * Manga inaa ya, okwe yi thigile aamati nenge aapiya ye e te ya lombwele ye yi likolithe iimaliwa iikwawo. Iimaliwa mbika oya li yi na ongushu komulumentu gwomeyele. Sha faathana, Jesus naye okwa li e na oshinima shoka shi na ongushu kuye. Oshinima shoka oshike mbela? Iilonga mbyoka a li ha longo sho a li kombanda yevi.

6, 7. Iimaliwa otayi thaneke shike?

⁶ Okuuvitha okwa li kwa simana kuJesus noonkondo. Molwaashoka okwa li e hole okuuvitha, aantu oyendji oya ningi aalongwa ye. (Lesha Lukas 4:43.) Ihe okwa li e shi kutya opu na natango aantu oyendji  mboka taya ka taamba ko onkundana ombwanawa. Nomolwaashono a lombwele aalongwa ye a ti: “Yelutheni omeho geni, mu tale kutya omapya oga thika okuteywa.” (Joh. 4:35-38) Omunepya e na oondunge ke na esiku a thige po epya ndyoka lya thika okuteywa. Jesus ota vulu okuyelekanithwa nomunepya omunandunge. Nomolwaashono manga Jesus inaa shuna megulu, okwa lombwele aalongwa ye a ti: “Indeni ano, ka ningeni aantu ayehe aalongwa yandje.” (Mat. 28:18-20) Sho e ya lombwele oohapu ndhoka, okwe ya pe oshinakugwanithwa sha simana shokuuvitha, shoka sha fa eliko li na ongushu. —  2 Kor. 4:7.

⁷ Jesus okwa pe aagwayekwa oshinakugwanithwa shokuninga aantu aalongwa, ngaashi omulumentu gwomeyele a pe aapiya ye iimaliwa. (Mat. 25:14) Ano iimaliwa otayi thaneke oshinakugwanithwa shokuuvitha nokuninga aantu aalongwa.

8. Nonando omupiya kehe okwa pewa omwaalu gwe gwiimaliwa, omuwa gwawo okwa li a tegelela aapiya ayehe ya ninge shike?

⁸ Jesus okwa ti kutya omulumentu okwa pe omupiya gumwe iimaliwa omayuvi gatano, omutiyali okwe mu pe omayuvi gaali nomutitatu okwe mu pe iimaliwa eyuvi limwe. (Mat. 25:15) Kehe omupiya okwa pewa omwaalu gwe, ihe ayehe oya li ya tegelelwa ya longe ya mana mo ya tanithe iimaliwa mbyoka. Shika otashi ulike kutya naJesus okwa tegelela aagwayekwa ya longe ya mana mo sho taya uvitha. (Mat. 22: 37; Kol. 3:23) Aalongwa yaJesus oya tamekele okuninga aantu yomiigwana ayihe aalongwa pOpentekoste yomo 33. Embo lyIilonga yaayapostoli otali shi yelitha kutya oya li ya longo ya mana mo. * —  Iil. 6:7; 12:24; 19:20.

9. (a) Aapiya yaali aainekelwa oya kwata ngiini iimaliwa mbyoka ya pewa, naashika otashi tu longo shike? (b) Mboka ye na etegameno lyokukala nomwenyo sigo aluhe kombanda yevi oye na okuninga shike?

⁹ Aamati yotango yaali mboka ya kwata nawa iimaliwa yomuwa gwawo, otaya thaneke aamwahe yaJesus pethimbo ndika lyehulilo. Aamati mbaka oya kala nokuuvitha nuudhiginini, unene tuu okuza mo 1919. Aamati yaali mboka ya popiwa meyele, kehe gumwe okwa pewa omwaalu gwe, ihe itashi ti kutya opu na oongundu mbali dhaagwayekwa. Ayehe yaali oya kambadhala ya mana mo ya tanithe iimaliwa mbyoka ya pewa. Ihe mbela aagwayekwa oyo owala ye na okuuvitha nokulonga yalwe ya mana mo? Aawe. Eyele lyoonzi niikombo otali tu longo kutya ayehe mboka ye na etegameno lyokukala nomwenyo sigo aluhe kombanda yevi, oye na okukwathela aagwayekwa mokuuvitha onkundana ombwanawa, noye na okukala ye yi inekela. Oye na wo okukala ya lenga uuthembahenda mboka woku ya kwathela. Eeno, aapiya yaJehova ayehe “oshigunda shimwe,” nomolwaashoka ayehe hayu uvithile aantu noku ya ninga aalongwa. —  Joh. 10:16.

10. Endhindhiliko lini tali ulike kutya otu li momasiku gahugunina?

¹⁰ Jesus okwa hala aalanduli ye ayehe ya longe ya mana mo, ya ninge aantu oyendji aalongwa, ngaashi aalongwa ye yomethelemumvo lyotango ya li haya ningi. Mbela aalanduli ye osho ngaa taya ningi nena? Eeno, molwaashoka eyele lyaJesus lyiimaliwa otali  gwanithwa momasiku ngaka gahugunina. Aantu oyendji oyu uva onkundana ombwanawa shi vulithe nale noya ninga aalongwa. Molwaashoka aalanduli ayehe yaJesus otaya longo ya mana mo, omumvo kehe ohapu ninginithwa omangathithi gaantu. Aantu mbaka nayo ohaya tameke okuuvitha. Jesus okwa li a gandja endhindhiliko ndyoka tali ku ulika kutya otu li momasiku gahugunina. Iilonga ayihe mbika tayi longwa nosho wo oshizemo oshiwanawa shoka twa mona, otashi ulike kutya okuuvitha nako okwa kwatelwa mo mendhindhiliko ndyoka. Kapu na omalimbililo kutya Jesus okwa nyanyukilwa iilonga mbyoka tayi longwa kaalanduli ye.

11. Otu shi shi ngiini kutya Jesus ote ya pethimbo lyuudhigu uunene?

¹¹ Jesus okwa ti: ‘Konima yethimbo ele omuwa gwaamati mbeyaka okwa galuka ihe nokwe ya yalulitha.’ (Mat. 25:19) Omuwa Jesus naye ota ka yalulitha aagwayekwa lwopehulilo lyuudhigu uunene. Otu shi shi ngiini? Jesus okwa popi lwiikando oyindji mehunganeko lye ndyoka li li muMateus ontopolwa 24 nosho wo 25 kutya ota galuka. Pashiholelwa, sho a li ta popi kombinga yuudhigu uunene okwa ti aantu otaya “ka mona Omuna gwOmuntu te ya te ende kiikogo yokegulu.” Pethimbo mpoka Jesus ota ka pangula wo aantu. Nomolwaashono a londodha aalanduli ye mboka taya adhika ko ya kale ya tonata, a ti: “Inamu tseya, esiku olini Omuwa gweni te ya.” Okwa ti wo kutya “Omuna gwOmuntu ote ke ya pethimbo tuu ndyoka inaamu mu tegelela.” (Mat. 24:30, 42, 44) Onkee ano, Jesus meyele lyiimaliwa okwa li ta popi kombinga yaasho te ke ya okupangula aantu nokuhanagula po uuyuni waSatana. *

12, 13. (a) Omuwa okwa ti shike kaapiya ye yaali, nomolwashike? (b) Uunake aagwayekwa ya tulwa iihako? (Tala wo oshimpungu “Oya gwana okutulwa iihako.”) (c) Mboka taya longo pamwe naagwayekwa otaya ka pewa ondjambi yashike?

¹² Sho omulumentu a galuka okwa mono kutya omupiya ngoka a pele iimaliwa omayuvi gatano, okwe yi likolitha iimaliwa yilwe omayuvi gatano. Naangwiyaka a pele iimaliwa omayuvi gaali, okwe yi likolitha iimaliwa yilwe omayuvi gaali. Omuwa gwawo okwe ya lombwele ayehe a ti: “Iyaloo, mumati  ngoye omwaanawa nomwiinekelwa! Ongoye wa kala omwiinekelwa miishona, otandi ku pe okupangela oyindji.” (Mat. 25:21, 23) Omuwa Jesus ye ota ka ninga po shike sho te ke ya monakuyiwa?

¹³ Sho uudhigu uunene wu li pokuya, aagwayekwa aadhiginini mboka taya adhika natango ye na omwenyo kombanda yevi, otaya ka tulwa iihako kuKalunga. Shampa ya tulwa iihako, Jesus ote ke ya yumudha ya ka kale nomwenyo megulu. (Eh. 7:1-3) Shika otashi ka ningwa manga Armagedon inee ya. Ihe ongiini kombinga yaamboka ye na etegameno lyokukala kombanda yevi, mboka taya longo pamwe naagwayekwa miilonga yokuuvitha? Otaya ka adhika nale ya pangulwa noya monika kutya yo oonzi. Otaya ka pewa ondjambi yomwenyo kombanda yevi kohi yUukwaniilwa waKalunga. —  Mat. 25:34.

14, 15. Mbela Jesus okwa li ta ti kutya oyendji yomaagwayekwa otaya ka kala aawinayi naananyalo? Shi yelitha.

¹⁴ Eyele olya popi wo kombinga yomupiya ngoka a pewa oshitalenti shimwe. Omumati ngoka ka li e shi likolitha iimaliwa yilwe, nenge e shi tule mombaanga, shi gwedhwe iihohela. Pehala lyaashono, okwe shi fumvike. Omuwa okwa ti kutya omupiya nguka omwiinayi nomunanyalo. Iimaliwa okwe yi mu kutha e te yi pe omupiya gwotango. Omupiya omwiinayi oku umbilwa “momilema dhopondjelela,” moka a kala ta lilagana. —  Mat. 25:24-30; Luk. 19:22, 23.

¹⁵ Jesus sho a ti kutya gumwe gwomaapiya ye yatatu okwa li omwiinayi nomunanyalo, ka li a hala okutya yamwe yomaagwayekwa otaya ka kala ya fa omupiya ngoka.  Shika otu na uushili musho, molwaashoka otwa yelekanitha eyele ndika nomayele galwe gaali. Meyele lyomupiya omudhiginini nomunandunge, Jesus okwa popi kombinga yomupiya omwiinayi ngoka ta hepeke aapiya ooyakwawo. Ihe Jesus ka li a hala okutya mboka ye li iilyo yomupiya omudhiginini nomunandunge otaya ka ninga aawinayi. Pehala lyaashono, okwa li ta londodha aagwayekwa, opo kaaya kale ya fa omupiya ngoka omwiinayi. Omanga meyele lyaakadhona omulongo, Jesus okwa popi kombinga yaakadhona yatano omagoya. Meyele moka ka li a hala okutya etata lyaagwayekwa otali ka kala omagoya. Pehala lyaashono, Jesus okwa li ta londodha aantu kombinga yaashoka sha li tashi ka ningwa po ngele oya kala inaayi ilongekidha noinaaya tonata. * Sha faathana, meyele lyiimaliwa nenge lyiitalenti, Jesus ka li a hala okutya oyendji yomaagwayekwa momasiku gahugunina otaya ka kala aawinayi naananyalo. Okwa popi eyele ndika, opo a londodhe aagwayekwa kaaya kale ya fa omupiya ngwiyaka omwiinayi, ihe ya tsikile okulonga iilonga yokuuvitha nuudhiginini. —  Mat. 25:16.   

16. (a) Iinima iyali yini tatu ilongo meyele lyiimaliwa nenge lyiitalenti? (b) Oshitopolwa shika otashi tu kwathele ngiini tu uve ko eyele lyiitalenti? (Tala oshimpungu “Otu na okuuva ko ngiini eyele lyiimaliwa nenge lyiitalenti?”)

¹⁶ Iinima iyali yini tatu ilongo meyele lyiimaliwa nenge lyiitalenti? Shotango, Jesus okwa pe aalongwa ye aagwayekwa eliko li na ongushu, ano oshinakugwanithwa sha simana shokuuvitha nokuninga aantu aalongwa. Oshitiyali, Jesus okwa tegelela atuheni tu longe miilonga yokuuvitha nuudhiginini. Ote ke tu pa ondjambi, ngele otwa kala tatu longo iilonga mbika neidhidhimiko, nuudhiginini nokukala hatu vulika lela kuye. —  Mat. 25:21, 23, 34.