1. Uukwatya wuni tawu vulu oku tu kwathela tu holele Jehova?

JEHOVA okwe tu shita nuukwatya wokuuva ko oonkalo dhooyakwetu, nando tse inatu enda mo nale. (Lesha Aaefeso 5:1, 2.) Uukwatya mbuka otawu vulu ngiini oku tu kwathela tu holele Jehova? Omolwashike tu na okukotokela omukalo moka hatu longitha uukwatya mbuka?

2. Jehova oha kala u uvite ngiini uuna tatu mono iihuna?

² Jehova okwe tu uvanekela onakuyiwa ombwanawa moka itaamu ka kala okumona iihuna kwasha. Aagwayekwa ‘noonzi dhilwe’ oye na etegameno lyoku ka kala nomwenyo gwaaluhe. Aagwayekwa omegulu noonzi dhilwe okombanda yevi. (Joh. 10:16; 17:3; 1 Kor. 15:53) Jehova oha kala u uvite uuwehame mboka hatu kala tu uvite, uuna tatu ningilwa iinima iiwinayi kunena. Pethimbo lyonale, Jehova okwa li u uvu nayi sho oshigwana she sha li tashi hepekwa muEgipiti. Ombiimbeli otayi ti: “Okwe ya nikile uuthigwa.” (Jes. 63:9, OB-1954) Pethimbo sho oshigwana she tashi tungulula otempeli, osha li sha tila aatondi  yasho. Jehova okwa li lela e shi uvitile olukeno. Okwe shi lombwele a ti: ‘Oongoka te mú gumu, ota gumu ondanda yeho lyandje.’ (Sak. 2:12, OB-1954; [Sak. 2:8, OB-2008]) Ngaashi owala yina ha kala e hole okahanona ke, Jehova naye okuhole aapiya ye. Oha kala a hala oku ya kwathela. (Jes. 49:15) Ohatu holele ohole yaJehova mokukala tu uvite ko oonkalo dha yakwetu nokwiitula moonkalo moka ye li. —  Eps. 103:13, 14.

3. Jesus okwa li u uvitile ngiini aantu?

³ Jesus okwa li ha kala u uvitile aantu uukwawo wanankali sho taya mono iihuna, nonando ye ine enda mo nale moonkalo moka ya li. Pashiholelwa, okwa li e shi kutya aantu otaya monithwa iihuna kaawiliki yelongelokalunga. Oya li ye ya tulila po oompango odhindji ndhoka inaadhi za kuKalunga noya li haye ya fundju. Aantu oya li haya kala ya tila aawiliki mboka. (Mat. 23:4; Mark. 7:1-5; Joh. 7:13) Nonando Jesus ka li a tila aawiliki mboka noka li i itaala iifundja yawo, okwa li u uvite ko nkene aantu ya li haya kala yu uvite. Osha li hashi yemateke Jesus noonkondo, ngele a mono nkene aantu taya ningwa nayi. Oya li ye ethiwa “ya fa oonzi dhaa na omusita.” (Mat. 9:36) Jesus okwa li i ilongo kuHe okukala e hole aantu nokukala “omunamutimahenda nomunalukeno.” —  Eps. 103:8.

4. Sho Jesus a mono aantu taya monithwa iihuna, okwa ningi po shike?

⁴ Jesus okwa li e hole aantu ngaashi He. Sho a mono taya monithwa iihuna, okwe ya kwathele. Pashiholelwa, esiku limwe sho Jesus naayapostoli ye ya zi molweendo olule lwokuuvitha ya loloka, oya li ya hala okuthuwa po. Ihe sho ya thiki, Jesus okwa adha aantu ye mu tegelela. Nonando okwa li a loloka, okwa “tameke oku ya longa iinima oyindji.” Okwe shi ningi oshoka okwa li e wete kutya oya pumbwa ekwatho lye. —  Mark. 6:30, 31, 34.

5, 6. Ngele otwa hala okukala tu na ohole ngaashi Jehova, oshike tu na okuninga? Gandja oshiholelwa. (Tala kethano lyopetameko.)

⁵ Ngele otwa hala okukala tu na ohole ngaashi Jehova, oshike tu na okuninga? Dhiladhila konkalo ndjika. Natu tye nduno Alan, omumwatate omugundjuka, ota dhiladhila kombinga yomumwatate omukokele ngoka ihaa vulu okweenda nawa noiha mono ko nawa. Alan okwa dhiladhila koohapu dhaJesus ndhoka tadhi ti: “Shoka mwa hala aantu ye mu ningile, osho ya ningileni wo.” (Luk. 6:31) Alan okwa tameke ti ipula ngeyi: ‘Mbela onda hala aantu ya ningile ndje shike?’ Ye ti iyamukula nee ta ti: ‘Onda halelela aantu ya dhane etanga pamwe nangame!’ Ihe ngele tatu dhiladhila komumwatate omukokele, ye ita vulu okumatuka nenge a dhane etanga. Ano shoka Alan a pumbwa okwiipula osho kutya: ‘Andola onda li omumwatate ngoka, ando onda hala aantu ya ningile ndje shike?’

⁶ Nonando Alan omugundjuka natango, okwa kambadhala okudhiladhila kutya, ando oye a li omukokele, ando oshike a hala oku ningilwa. Okwa tokola okukala pamwe nomumwatate ngoka omukokele nokupulakena nawa kuye. Oku uvu ko kutya ohashi kala oshidhigu komumwatate ngoka okulesha Ombiimbeli, noha nyengwa okweenda uuna tu uvitha egumbo negumbo. Alan okwa mono nkene ta vulu okukwathela omumwatate  ngoka nokwa kala a halelela okuninga ngaashi ta vulu, opo e mu kwathele. Ngele natse otu uvu ko oonkalo dha yalwe noku ya ulukila ohole, otatu holele Jehova. —  1 Kor. 12:26.

7. Ongiini tatu vulu okuuva ko oonkalo dhaamwatate naamwameme?

⁷ Haaluhe hashi kala oshipu okuuva ko oonkalo dhaantu ooyakwetu, unene tuu ngele inatu enda mo nale moonkalo ndhoka. Pashiholelwa, aamwatate naamwameme oyendji oya lulilwa molwaashoka taya alukwa, ya mona oshiponga nenge molwuukokele. Yamwe otaya mono iihuna unene molwepolimano nenge molwaasho haya kala tayi ipula sha pitilila nenge molwaasho ya li haya hepekwa monakuziwa. Yalwe otaya mono iihuna sho taya putudha oyana oyo ayeke, nenge sho oyo ayeke ye li moshili maandjawo. Kehe gumwe oku na omaupyakadhi, nolundji omaupyakadhi ngoka inaga fa getu. Ihe otwa hala okuulukila yalwe ohole nokuya kwathela. Oshike nduno tu na okuninga, tu ya kwathele? Aantu inaya pumbwa ekwatho lya faathana. Ngele otwa pulakene nawa e tatu kambadhala okuuva ko onkalo yomuntu, otatu ka vula oku mu pa ekwatho ta li mu opalele. Oshinima shimwe tatu vulu oku mu ningila oku mu dhimbulukitha nkene Jehova u uvitile omaupyakadhi ge, nenge tu mu kwathele momikalo dhilwe. Uuna tatu shi ningi, otatu holele Jehova. —  Lesha Aaroma 12:15; 1 Petrus 3:8.

8. Oshike sha kwathele Jesus u ulukile aantu olukeno?

⁸ Jehova okunine aantu ayehe olukeno. (Luk. 6:35) Jesus naye okwa li e na olukeno ngaashi He. Oshike sha kwathele Jesus a ulukile aantu olukeno, sho a li kombanda yevi? Okwa li ha dhiladhila kunkene aantu taya ka kala yu uvitile oohapu dhe nenge shoka ta ningi. Pashiholelwa, omukiintu gumwe ngoka a kala ha longo iilonga oyindji iiwinayi, okwe ya kuJesus. Okwa li ta lili unene sigo omahodhi ge ga gwile koompadhi dhaJesus. Jesus okwa li e wete kutya omukiintu nguka okwi iyela ombedhi shili nokwiitedhulula. Okwa mono kutya omukiintu nguka ote ku uva nayi unene, ngele ine mu ulikila olukeno. Okwe mu pandula omolwiilonga ye iiwanawa mbyoka a longo nokwe mu dhimine po. Jesus okwa popi wo nombili nOmufarisayi gumwe ngoka a li inaa panda shoka Jesus a ningile omukiintu ngoka. —  Luk. 7:36-48.

9. Oshike tashi vulu oku tu kwathela tu kale tu na olukeno ngaashi Jehova? Gandja oshiholelwa.

⁹ Ongiini tatu vulu okukala tu na olukeno ngaashi Jehova? Otu na okudhiladhila manga  inaatu popya sha nenge manga inaatu ninga sha, opo tu yaalele yalwe nokaatu ya uvithe nayi. Omuyapostoli Paulus okwa nyola kutya Omukriste ‘ina pumbwa okutamanana,’ ihe oku na okukala “e na olukeno naayehe.” (2 Tim. 2:24) Pashiholelwa, dhiladhila kutya oto ku ulika ngiini olukeno moonkalo ndhika: Natu tye nduno omugandji gwoye gwiilonga ita longo nawa iilonga ye, mbela oto ki inyenga ngiini? Ngele omumwatate ngoka a ningi oomwedhi inee ya ko kOshinyanga shUukwaniilwa okwe ya kokugongala, oshike to ka popya naye? Ngele owu li muukalele e to adha omunegumbo ta ti kutya ita vulu okupopya nangoye, oshoka okwi ipyakidhila unene, oto ke mu ulukila ngiini olukeno? Ngele omukulukadhi gwoye okwe ku pula kutya omolwashike wa ningi omalongekidho gontumba inoo mu lombwela, oto ke mu yamukula ngaa nolukeno? Otu na okukala hatu dhiladhila kombinga yomaiyuvo gaantu ooyakwetu nankene oohapu dhetu tadhi vulu oku ya guma. Shika otashi ke tu kwathela tu kale hatu popi nohatu ningi iinima nolukeno tu ulike kutya otatu holele Jehova. —  Lesha Omayeletumbulo 15:28.

10, 11. Ongiini tatu vulu okwiilonga kuJehova tu kale aanandunge? Gandja oshiholelwa.

¹⁰ Jehova oye omunandunge a shiga ko nota vulu okumona shoka tashi ka ningwa monakuyiwa. Nonando tse katu shi shoka tashi ka ningwa monakuyiwa, otatu vulu okukala aanandunge ngaashi Ye. Ngiini mbela? Manga inoo tokola okuninga sha, dhiladhila kutya otashi ke ku guma ngiini nosho wo yalwe. Inatu kala ngaashi Aaisraeli mboka inaaya dhiladhila kutya oshike tashi ke ya ningilwa, ngele inaya vulika kuJehova. Inaya dhiladhila wo kombinga yekwatathano lyawo naJehova naashoka e ya ningila. Sho Moses a mono kutya Aaisraeli ihaya dhiladhila tango manga inaaya katuka, okwa li e shi shi kutya itaya ka vulika. Okwe ya lombwele a ti: “Oshoka oshigwana shika kashi na omayele nokashi na nando owino. Ando ya li aanandunge, ando oye shi dhimbulula, ando ya mono ehulilo lyawo.” —  Deut. 31:29, 30; 32:28, 29.

¹¹ Pashiholelwa, natu tye nduno otamu endelathana nagumwe. Dhimbulukwa kutya ohashi kala oshidhigu okupangela omaiyuvo goye nomahalo goye gopamilalo, ngele owu li nomuntu ngoka wu hole. Ano, ino ninga nando osha, shoka tashi vulu okuyona po ekwatathano lyoye naJehova. Pehala lyaashono, kala wu na oondunge e to yanda okugwila moshiponga. Pulakena komayele gaJehova gopandunge ngoka taga ti: “Omuntu onkotoki ota tala oshiponga e ta ka holama, ihe mboka yanathangwa omo taa yi e taa yemata.” —  Omayel. 22:3.

12. Omadhiladhilo getu otaga vulu ge tu etele oshiponga shashike?

¹² Omuntu omunandunge oha pangele omadhiladhilo ge. Ngaashi naanaa hatu vulu okulongitha nawa omulilo nenge tu gu  longithe nayi, nomadhiladhilo getu otaga vulu oku tu kwathela nenge oku tu ehameka. Omulilo ohatu vulu oku gu longitha tu teleke iikulya. Ihe ngele inatu gu kwata nawa, otagu vulu okufika po egumbo alihe nenge gu tu dhipage nokuli. Sha faathana, ngele otwa kala hatu dhiladhila kombinga yiipala nenge yiinima yilwe iiwinayi, otatu ki iyadha twa nyengwa okwiipangela sigo twa yono. Shika otashi ka yona po uukuume wetu naJehova. Onkene otu na okukala hatu dhiladhila kwaashoka twa longwa kuJehova. —  Lesha Jakob 1:14, 15.

13. Ongiini Eva a li i itungile uugumbo?

¹³ Otatu vulu okwiilonga ko oshindji komukiintu gwotango, Eva. Jehova okwa pe Adam naEva oshipango, kaaya lye “komuti gwokutseya uuwanawa nuuwinayi.” (Gen. 2:16, 17) Ihe Satana okwa lombwele Eva a ti: “Itamu si shili. Oshoka Kalunga okwa tseya kutya uuna tamu li ko, omeho geni otaga tonata, one notamu fe Kalunga mokutseya uuwanawa nuuwinayi.” Eva okwa tameke ti itungile uugumbo kutya onkalamwenyo ye otayi ka kala ombwanawa, ngele okwa kala ha tokola kuye mwene shoka oshiwanawa naashoka oshiwinayi. Okwa kala te shi dhiladhila ‘nokwa ndhindhilike, omuti nkene gwo opala niiyimati yagwo yi etitha olwiho okuliwa.’ Mbela onkatu yini a katuka? “Okwa toonona ko iiyimati yimwe e ta li. Okwa pe wo omulume, naye wo okwa li.” (Gen. 3:1-6) Oshizemo, ‘uulunde owe etwa muuyuni, nuulunde owe etelele eso.’ (Rom. 5:12) Eva okwa li e na okupangela omadhiladhilo ge, opo kaa yone.

14. Ombiimbeli otayi tu londodha ngiini kombinga yomilalo dha nyata?

¹⁴ Eyono lyaEva kalya li lya kwatela mo onyata yiipala. Ihe Ombiimbeli otayi tu londodha kutya inatu kala hatu idhiladhila tatu ningi iinima iiwinayi, ngaashi okuya momilalo dha nyata. Jesus okwa popi a ti: “Okehe tuu ngoka ta tala omukiintu e mu haluka, oye okwe mu hondele momwenyo gwe.” (Mat. 5:28) Omuyapostoli Paulus okwe tu londodha wo ta ti: “Inamu landula ehalo lyomuntu guulunde.” —  Rom. 13:14.

15. Openi tu na okwiilikolela omaliko, nomolwashike?

¹⁵ Ombiimbeli oya popya wo kutya otu na okukala hatu lalakanene okunyanyudha Jehova, pehala lyokukala hatu dhiladhila owala komaliko. Nonando omuntu oku kale omuyamba, iimaliwa ye itayi vulu oku mu gamena shili. (Omayel. 18:11) Jesus okwa ti kutya omuntu ngoka ti igongelele omaliko ogendji, oti ifundjaleke, oshoka ina lenga Jehova monkalamwenyo ye. Omuntu ngoka ‘ke shi omuyamba koshipala shaKalunga.’ (Luk. 12:16-21) Ngele otwi ilikolele “omaliko megulu,” mokukala hatu ningi shoka tashi nyanyudha Jehova, natse otatu kala twa nyanyukwa. (Mat. 6:20; Omayel. 27:11) Okukala tu na ekwatathano lyopothingo naJehova, osha simanenena shi vulithe omaliko.

16. Openi tatu vulu okumona ekwatho, ngele otu na oshimpwiyu sha pitilila?

¹⁶ Ngele otwa kambadhala okwiigongelela omaliko muuyuni mbuka, otashi ke tu ningitha tu kale tu na iimpwiyu oyindji. (Mat. 6:19) Jesus okwa ti kutya itashi ka kala oshipu komuntu a pitithe Uukwaniilwa waKalunga komeho monkalamwenyo ye, ngele oha kala aluhe ti ipula nomaliko. (Mat. 13:18, 19, 22) Oshikwawo, aantu yamwe ohaya kala aluhe tayi ipula nenge ya tila ya ningilwe sha  oshiwinayi. Ihe ngele otwa kala aluhe tu na oshimpwiyu komwenyo, otashi vulika tu adhike kuuvu nenge tu kanithe eitaalo lyetu muJehova. Pehala lyaashono, otu na okukala twi inekela kutya Jehova ote ke tu kwatha. Ombiimbeli otayi ti kutya “oshimpwiyu shomomutima gwomuntu otashi mu thindile pohi, ihe oohapu dhuukuume ohadhi gu nyanyudha.” (Omayel. 12:25) Onkene ngele owu na oshimpwiyu shasha, shi kundathana nomupiya gwaJehova ngoka e ku shi nawa. Omuvali gwoye, omusamane gwoye nenge omukulukadhi gwoye nosho wo kuume koye kopothingo, ota vulu oku ku tsa omukumo wu kale wi inekela muJehova. Ote ke ku kwathela wo waaha kale we wu na oshimpwiyu sha pitilila.

17. Jehova ohe tu kwathele ngiini uuna tatu ipula unene?

¹⁷ Jehova oku tu shi nawa nota vulu oku tu kwathela tu ngungumaneke omitima dhetu uuna tatu ipula unene. Paulus okwa nyola a ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.” (Fil. 4:6, 7) Onkene aluhe uuna to ipula unene, dhiladhila kekwatho ndyoka Jehova he ku kwatha nalyo, opo wu kaleke po ekwatathano lyoye naye. Ekwatho ndyoka ohe li gandja okupitila mooitaali ooyakweni, maakuluntugongalo, momupiya omudhiginini nomunandunge, maayengeli nokupitila muJesus.

18. Okukala hatu dhiladhila nokuuva ko oonkalo moka aantu ye li, otashi tu kwathele ngiini?

¹⁸ Ngaashi twa kundathana nale, uuna tatu longitha uukwatya wetu wokuuva ko oonkalo dha yalwe, otatu holele Jehova. (1 Tim. 1:11; 1 Joh. 4:8) Otatu ka kala twa nyanyukwa ngele ohatu ulukile aantu ooyakwetu ohole nolukeno. Otatu ka kala wo twa nyanyukwa ngele ohatu dhiladhila tango kiizemo yiilonga yetu nohatu yanda okukala hatu ipula unene. Natu kaleni hatu dhiladhila nkene onkalamwenyo tayi ka kala sho Uukwaniilwa tawu pangele nokukala hatu ningi ngaashi tatu vulu tu holele Jehova. —  Rom. 12:12.