1. Omolwashike hatu vulu okukala twa fa tu wete iinima mbyoka itaatu vulu okumona nando ngashingeyi? (Tala kethano lyopetameko.)

JEHOVA okwe tu pa omagano ga shiga ko, ngoka hage tu kwathele tu kale twa fa tu wete iinima mbyoka inaatu mona nomeho getu gokomutse. Ohage tu kwathele tu kale tu wete iinima mbyoka yi li komeho, nohage tu kwathele tu dhiladhile manga kuyele notu yande omaupyakadhi. Jehova oku shi shoka tashi ka ningwa monakuyiwa. Okwe tu lombwela iinima mbyoka tu na okukala twa tegamena. Nonando itatu vulu oku yi mona ngashingeyi, otatu vulu okukala twa fa tu yi wete nomeho getu gokomutima, nokukala tu na eitaalo kutya otayi ka gwanithwa. —  2 Kor. 4:18.

2, 3. (a) Ngele ohatu kala twa fa tu wete iinima mbyoka ihaayi monika, otashi tu etele uuwanawa washike? (b) Omapulo geni taga yamukulwa moshitopolwa shika?

² Omathimbo gamwe ohatu kala twa fa tu wete iinima mbyoka kaayi na siku yi ningwe. Pashiholelwa, okakadhona otashi vulika ka kale ki iwete ka kayila okambilimbili momadhiladhilo gako. Oshinima shoka kaashi na siku shi ningwe. Yina yaSamuel, Hanna, hasho a li ha kala ta tsu oondjodhi dhomutenya ngaaka. Okwa  kala a fa e wete esiku ndyoka ta ka fala okamwanamati ketsalihangano ka ka longe pamwe naayambi. Shika kasha li ondjodhi, oshoka okwa li a tokola oku shi ninga. Oku kaleka esiku ndyoka momadhiladhilo ge, oshe mu kwathele a gwanithe po euvaneko ndyoka u uvanekela Jehova. (1 Sam. 1:22) Uuna natse tu wete iinima mbyoka Jehova e tu uvanekela momadhiladhilo getu, nena ohatu kala tu wete iinima mbyoka tayi ka ningwa shili. —  2 Pet. 1:19-21.

³ Aapiya yaJehova oyendji yopethimbo lyOmbiimbeli oya li haya kala ya fa ye wete omauvaneko ge ga gwanithwa nale. Shika osha li hashi ya kwathele ngiini? Omolwashike natse tu na okukala hatu dhiladhila kunkene onkalamwenyo yetu tayi ka kala, sho Kalunga ta ka gwanitha po omauvaneko ge?

4. Omolwashike Abel a kala a tegelela onakuyiwa ombwanawa?

⁴ Abel oye omuntu gwotango ngoka a li i itaala momauvaneko gaJehova. Okwa li e shi shoka Jehova a lombwelele eyoka konima sho Adam naEva ya yono. Ombiimbeli otayi ti: “Otandi tula etondathano pokati keni nomukiintu, nopokati koluvalo lwoye noluvalo lwe. Oluvalo lwe otalu nyanyagula omutse gwoye, ongoye noto mu tsu moshithi shompadhi ye.” (Gen. 3:14, 15) Nonando Abel ka li naanaa e shi kutya oshinima shoka otashi ka ningwa ngiini, oku na okukala a li he shi ipula olundji. Otashi vulika a li hi ipula ta ti: ‘Mbela olye ta ka tsuwa moshithi keyoka, opo aantu ya vule okukala ya gwanenena ishewe?’ Abel okwa li i itaala kutya kehe shimwe shoka Jehova u uvaneka otashi ka gwanithwa. Nomolwaashono Jehova a li a hokwa eyambo ndyoka Abel e mu yambele. —  Lesha Genesis 4:3-5; Aahebeli 11:4.

5. Oshike tashi vulika sha kwathele Enok u uvithe nuulaadhi?

⁵ Omulumentu gulwe ngoka a li wo e na eitaalo lya kola muKalunga, oEnok. Okwa li ha kala mokati kaantu mboka haya popi “oohapu dhomatukano” dha tsa ondumbo naKalunga. Ihe Enok okwa li hu uvitha onkundana ombwanawa nuulaadhi. Oku uvithile aantu kutya Jehova ota ka hanagula po aakolokoshi. (Jud. 14, 15) Oshike she mu kwathele e shi ninge? Otashi vulika a li ha kala a fa e wete nkene onkalo tayi ka kala ya tya, uuna aantu ayehe kombanda yevi haya longele Jehova. —  Lesha Aahebeli 11:5, 6.

6. Noa otashi vulika a kala ti ipula nashike konima yEyelu?

⁶ Noa okwa li i itaala muJehova, noina hanagulwa po pamwe naakolokoshi pethimbo lyEyelu. (Heb. 11:7) Omolweitaalo lye, Noa okwa li a ningile Jehova omafikiloyambo. (Gen. 8:20) Konima yEyelu, opwa li pu na omupangeli gumwe gwedhina Nimrod. Okwa li a hala aantu ya tse ondumbo naJehova. Pethimbo lye uuyuni owa ka nayipala ishewe. (Gen. 10:8-12) Noa otashi vulika a li ha kala ti ipula kutya uunake aapangeli aakwanyanya taya ka hulithwa po. Ihe nonando ongaaka, okwa kala e na eitaalo lya kola. Ngaashi Abel, Noa naye okwa li e na uushili kutya sikulimwe Kalunga ota ka hulitha po uulunde neso. Natse wo natu kale twa fa tu wete tu li muuyuni uupe mboka wu li pokuya masiku. —  Rom. 6:23.

7. Abraham, Isak naJakob oya li ya tegelela onakuyiwa ya tya ngiini?

⁷ Abraham, Isak naJakob ayehe oya li haya  kala ya fa ye wete ye li nale muuyuni uupe. Jehova okwa li e yu uvanekele kutya aantu yomiigwana ayihe otaya ka yambekwa okupitila ‘moluvalo’ lwawo. (Gen. 22:18; 26:4; 28:14) Okwa li wo e yu uvanekele kutya oluvalo lwawo otalu ka ninga oshigwana oshinene, notalu ka kala mEvi lyEuvaneko. (Gen. 15:5-7) Oya li yi itaala kutya shoka Jehova e yu uvanekele otashi ka gwanithwa shili, nomolwashono ayehe oya li haya kala ya fa ye wete ye li nale mevi moka. Okuza sho Adam naEva ya yono, Jehova okwa kala ta kwathele aapiya ye aadhiginini yu uve ko kutya monakuyiwa otaya ka thika megwaneneno.

8. Oshike sha ningitha Abraham a kale omuvuliki noku na eitaalo lya kola?

⁸ Abraham okwa li e na eitaalo lya kola, nokwa li ha vulika kuJehova nokuli nomoonkalo oondhigu. Ye nosho wo yalwe mboka aadhiginini oya li ye wete omauvaneko gaJehova ga fa ga gwanithwa po, nonando inashi ningwa pethimbo lyawo. Ombiimbeli otayi popi iinima mbyoka yu uvanekelwa tayi ti: “Oye yi talele kokule noye yi nyanyukilwa.” (Lesha Aahebeli 11:8-13.) Abraham okwa li e shi kutya omauvaneko ngoka Jehova a ninga nale okwe ga gwanitha po. Onkene okwa li i inekela kutya Jehova ota ka gwanitha po wo omauvaneko ge agehe monakuyiwa.

9. Eitaalo lyaAbraham momauvaneko gaKalunga, olye mu kwathele ngiini?

⁹ Abraham okwa kala ha longo shoka Jehova te mu pula, oshoka okwa li i itaala shoka Jehova e mu uvanekela. Pashiholelwa, okwa thigi po oshilando shaandjawo Ur. Okuza mpoka, okwa kala momatsali onkalamwenyo ye ayihe. Okwa li e shi kutya iilando mbyoka ye ya kundukidha itayi kalele, oshoka aapangeli yayo kaya li haya longele Jehova. (Jos. 24:2) Abraham okwa li a tegelela Uukwaniilwa waJehova wu ye wu pangele ombanda yevi sigo aluhe. MAahebeli 11:10, Uukwaniilwa mboka otawu ithanwa “oshilando shoka shi na omikanka dha kolelela, sha sindwa nosha tungwa kuKalunga mwene.” Abraham, Abel, Enok, Noa nosho wo yalwe oya li yi itaala meyumuko. Eitaalo lyawo muJehova olya li hali kolo aluhe, uuna taya dhiladhila kombinga yomwenyo gwaaluhe meviparadisa. —  Lesha Aahebeli 11:15, 16.

10. Uuwanawa wuni Sara a mono sho a li ha kala e wete omauvaneko gaJehova ga fa ga gwanithwa po nale?

¹⁰ Omukulukadhi gwaAbraham, Sara, okwa li e na eitaalo lya kola momauvaneko gaJehova. Nokuli nando okwa li e na omimvo 90, okwa li e na etimaumbwile lyoku ka mona okanona. Okwa li nokuli ha kala a fa e wete oyana ya ninga nale oshigwana oshinene. (Heb. 11:11, 12) Omolwashike a li i itaala moshinima shoka? Omolwaashoka Jehova okwa li a lombwele omulumentu gwe ta ti: “Otandi mu yambeke notandi mu pe oluvalo, e ku valele omumati. Otandi mu yambeke e ta ningi yina yiigwana, nomoluvalo lwe otamu ka za aakwaniilwa.” (Gen. 17:16) Sara okwa ka mona okanona kokamati, Isak, ngaashi naanaa Jehova a li u uvaneke. Oshikumithalonga shika osha ningitha Sara a kale i itaala kutya omauvaneko galwe gaJehova  nago otaga ka gwanithwa po. Natse ngele otwa kala twa fa tu wete omauvaneko ngoka ga gwanithwa po nale, otashi koleke eitaalo lyetu.

11, 12. Oshike sha kwathele Moses, opo ohole ye yokuhola Jehova yi kale ya kola?

¹¹ Moses naye okwa li e na eitaalo momauvaneko gaJehova. Nando okwa li omunagwokombanda muuwa waEgipiti, Moses okwa li e hole Jehova noonkondo. Ka li a hala esimano nenge uuyamba. Aavali ye, Aahebeli, oya li ye mu longo kombinga yaJehova, kutya oku uvaneka okumangulula Aaisraeli muupika noku ya pa Evi lyEuvaneko. (Gen. 13:14, 15; Eks. 2:5-10) Mokukala e wete omauvaneko ngoka ga gwanithwa nale, osha li she mu kwathele, opo ohole ye yokuhola Jehova yi kale ya kola.

¹² Ombiimbeli otayi tu lombwele shoka Moses a li ha kala ta dhiladhila, tayi ti: “Eitaalo olyo lya longitha Moses, sho a koko a vule okutinda kutya ke shi omuna gwomukadhona omuna gwaFarao. Okwa hogolola po okuhepekwa pamwe naantu yaKalunga, ye ina zimina uutoye wuulunde wokathimbo kowala. Oye okwa dhimbulula kutya okuhumbata ondhino omolwOmugwayekwa gwaKalunga oshi vule omauyamba agehe gomuEgipiti, oshoka okwa li e wete ondjambi ndjoka ta ka pewa konakuyiwa.” —  Heb. 11:24-26.

13. Uuwanawa wuni Moses a mono sho a li ha kala e wete omauvaneko gaJehova ga fa ga gwanithwa nale?

¹³ Otashi vulika Moses a li ha dhiladhila muule kombinga yeuvaneko lyaJehova lyokumangulula Aaisraeli muupika. Moses okwa li e shi kutya Jehova ota ka mangulula aantu ayehe meso. Aapiya yaJehova oyendji nayo osho ya li yi itaala wo ngaaka. (Job 14:14, 15; Heb. 11:17-19) Ano, Moses okwa li e shi kutya Jehova oku hole aantu ye noonkondo. Shika osha ningitha Moses a kale e hole Jehova unene, nokukale e na eitaalo lya kola. Oshe mu kwathele wo a kale ta longele Jehova onkalamwenyo ye ayihe. (Deut. 6:4, 5) Sho Farao a li a hala oku mu dhipaga, Moses ka li a tila. Okwa li e shi kutya Jehova ote ke mu pa ondjambi monakuyiwa. —  Eks. 10:28, 29.

14. Aantu yamwe ohaya kala tayi itungile uugumbo ngiini, shi na ko nasha nonakuyiwa?

¹⁴ Aantu oyendji ohaya kala tayi ipula kombinga yonakuyiwa yawo. Ihe omathimbo gamwe ohaya kala ya fa ye wete iinima mbyoka kaayi na siku nayi ka ningwe. Pashiholelwa, oohepele dhimwe ohadhi itungile uugumbo dha ninga aayamba aniwa nosho wo kutya otadhi ka kala dhaa na uupyakadhi washa. Ihe Ombiimbeli otayi ti kutya onkalo muuyuni waSatana otayi kala aluhe yi “na uudhigu noluhodhi.” (Eps. 90:10) Yalwe ohaya dhiladhila kutya omapangelo ogo taga ka kandula po uupyakadhi wuuyuni. Ihe Ombiimbeli otayi ti kutya Uukwaniilwa waKalunga owo owala tawu ke shi ninga. (Dan. 2:44) Opu na ishewe aantu oyendji mboka ye wete kutya uuyuni kawu na siku wu ka lunduluke. Ihe Ombiimbeli otayi ti kutya Kalunga ota ka hanagula po aakolokoshi. (Sef. 1:18; 1 Joh. 2:15-17) Osha yela kutya ayehe mboka haya kala tayi itungile uugumbo, notaya tsu oondjodhi dhomutenya, otaya ka lila.

15. (a) Uuwanawa wuni tatu mono ngele ohatu kala tu wete omauvaneko gomonakuyiwa ngoka Jehova e tu uvanekela ga fa ga gwanithwa nale? (b) Oshike wa halelela oku ka ninga muuyuni uupe?

¹⁵ Jehova okwe tu uvanekela onakuyiwa ombwanawa. Uuna tatu yi dhiladhila, ohashi  tu nyanyudha nohashi tu tsu omukumo tu tsikile oku mu longela. Kutya nduno owu na etegameno lyoku ka kala nomwenyo megulu nenge kombanda yevi, kala wa fa wu wete to ningi nale iinima mbyoka Jehova e ku uvanekela. Ngele etegameno lyoye olyoku ka kala nomwenyo sigo aluhe kombanda yevi, kala ando wa fa wi iwete tamu longo pamwe nookuume koye sho tamu ningi evi oparadisa. Mboka taya wilike iilonga mbyoka oye ku lile po shili, naantu mboka tamu longo pamwe nayo oye hole lela Jehova, ngaashi ngoye wu mu hole. Kapu na nando osha shoka to ipula nasho, oshoka owu na uukolele nosho wo oonkondo. Owa nyanyukwa, oshoka oto vulu okulongitha uunkulungu woye nontseyo yoye wu kwathele yalwe ya simaneke Jehova. Otashi vulika nokuli to kwathele mboka ya yumudhwa ye mu tseye. (Joh. 17:3; Iil. 24:15) Ngele oho kala wi iwete wa fa to ningi iinima mbyoka, ito tsu nando oondjo dhomutenya. Otayi ka ningwa shili, molwaashoka Ombiimbeli osho ya hunganeka. —  Jes. 11:9; 25:8; 33:24; 35:5-7; 65:22.

16, 17. Uuwanawa wuni tatu mono ngele ohatu popi kombinga yomauvaneko ngoka Jehova e tu uvanekela?

¹⁶ Ngele ohatu lombwele aamwatate naamwameme shoka twa hala oku ka ninga muuyuni uupe, otashi tu kwathele nosho wo ooitaali ooyakwetu ya kale ya fa ye wete ye li nale meviparadisa. Katu shi kutya otatu ka kala hatu longo shike lelalela. Ihe ngele otwa kala hatu popi kombinga yaashoka twa hala oku ka longa, otashi ulike kutya otwi itaala shoka Jehova e tu uvanekela. Shika otashi ke tu kwathela tu tsaathane omukumo, notu tsikile okulongela Jehova nomomathimbo omadhigu, ngaashi omuyapostoli Paulus naamwahe yalwe ya li ye shi ningi muRoma. —  Rom. 1:11, 12.

¹⁷ Ngele owa kala ho dhiladhila unene konakuyiwa ndjoka Jehova e tu uvanekela,  otashi ke ku kwathela waa kale to gandja eitulomo lya pitilila kuupyakadhi woye. Ethimbo limwe Petrus okwa li ti ipula unene nonkalamwenyo ye, e ta pula Jesus ta ti: “Tala, otse twa thigi ko iinima ayihe e tatu ku landula. Otatu ka pewa shike?” Jesus okwa yamukula a ti: “Omuna gwOmuntu sho ta ka kuutumba koshipangelapundi shesimano lye, nane wo mboka mwa landula ndje, otamu ka kuutumba kiipangelapundi omulongo niiyali, mu pangule omazimo gaIsrael omulongo nagaali. Nokehe tuu ngoka a thigile ko egumbo nenge aamwayina aalumentu nenge aamwayina aakiintu nenge he nenge yina nenge oyana nenge epya omolwandje, ote ke yi mona lwethele yi vule mbika, nomwenyo gwaaluhe ote gu pewa.” (Mat. 19:27-29) Jesus okwa li a hala Petrus naalongwa ooyakwawo ya kale taya dhiladhila kombinga yiinima iiwanawa mbyoka taya ka ninga monakuyiwa. Shika osha kwathele Petrus naalongwa ooyakwawo ya kale ya fa ye wete taya pangele nale pamwe naJesus megulu, notaya kwathele aantu aavuliki kombanda yevi ya thike megwaneneno.

18. Uuwanawa wuni tatu mono ngele ohatu kala tu wete omauvaneko ngoka Jehova e tu uvanekela ga fa ga gwanithwa nale?

¹⁸ Otwi ilongo shoka sha kwathele aapiya yaJehova ya kale ye na eitaalo lya kola. Abel okwa li ha kala a fa e wete omauvaneko gonakuyiwa ombwanawa ndjoka Jehova u uvaneka ga gwanithwa nale. Molwaashoka okwa li e na eitaalo momauvaneko ngoka, Jehova okwa li e mu hokwa. Abraham okwa li ha kala e wete Jehova a fa a gwanitha po nale euvaneko li na sha ‘noluvalo.’ Shika oshe mu kwathele a vulike kuJehova nando okwa li ta li iipyu niitalala. (Gen. 3:15) Moses okwa li a tala kondjambi ndjoka Jehova e mu uvanekele, naashika oshe mu kwathele a kale e hole Jehova noku kale omudhiginini. (Heb. 11:26) Ngele ohatu kala tatu dhiladhila kombinga yomauvaneko agehe gaJehova, nohatu kala tu wete a fa e ga gwanitha po nale, eitaalo lyetu nohole yetu yokuhola Jehova otayi kolo. Moshitopolwa tashi landula otatu ki ilonga ishewe nkene tatu vulu okulongitha omadhiladhilo getu tu kale twa fa tu wete iinima mbyoka yaa wetike.