1, 2. Jesus oku ulike ngiini kutya oku hole aantu noonkondo?

OMWANA gwaKalunga omutango, oye oshiholelwa dhingi shuunongo waJehova wa dhenga mbanda nokwa li “engomba” puHe. Dhiladhila owala kunkene Jesus a li u uvite ‘sho He a yala egulu’ naasho “a dhike omakankameno gevi.” Nonando He okwa shiti iinima oyindji iikumithi, Jesus okwa li ha ‘nyanyukilwa aana yaantu.’ (Omayeletumbulo 8:22-31) Okwa kala e hole aantu okuza owala sho ya shitwa.

² Lwanima Jesus oku ulike ohole ye nuudhiginini we kuHe. Oku ulike wo kutya okuhole aantu noonkondo sho a thigi po egulu nehalo ewanawa, e ye a ninge omuntu kombanda yevi. Shika okwe shi ningi, opo a gandje po ‘omwenyo gwe, a hupithe oyendji.’ (Mateus 20:28; Aafilippi 2:5-8) Sho a li kombanda yevi, Kalunga okwe mu pe oonkondo a longe iikumithalonga. Iikumithalonga mbyoka otayi tu hololele kutya Jesus oku hole aantu noonkondo. Otayi tu ulukile wo iinima iiwanawa mbyoka Jesus ta ka ningila aantu masiku.

3. Otatu ka kundathaneni shike moshitopolwa shika?

 ³ Jesus sho a li kombanda yevi, okwa li hu uvitha “onkundana ombwanawa yUukwaniilwa waKalunga.” (Lukas 4:43, NW) Okwa li e shi kutya Uukwaniilwa mboka otawu ka yapulitha edhina lyaHe notawu ka kandula po omikundu dhaantu adhihe sigo aluhe. Okwa li ha longo iikumithalonga oyindji sho tu uvithile aantu. Iikumithalonga ye oya li yu ulike kutya oku na ko nasha naantu ayehe shili. Omolwashike shoka sha simana kutse? Omolwaashoka iikumithalonga mbyoka a longo otayi tu pe etegameno neinekelo lyonakuyiwa. Natu ka kundathaneni iikumithalonga ine mbyoka Jesus a longo.

4. Oshike sha ningwa po sho Jesus a tsakanene nomulumentu omunashilundu?

⁴ Pethimbo lyuukalele we kombanda yevi, Jesus okwe ku uvitha koshitopolwa hashi ithanwa Galilea. Mushimwe shomiilando yaGalilea, okwa tsakaneke mo omulumentu e na uuvu uuwinayi woshilundu. (Markus 1:39, 40) Omulumentu okwa li te ehama unene, nomolwaashono Lukas ngoka a li ondohotola e mu popi kutya okwa li “a kanyata oshilundu.” (Lukas 5:12) Ombiimbeli otayi hokolola kutya sho omulumentu ngoka a mono Jesus “okwa tsu oongolo koshipala she nokwe mu hehela ta ti: ‘Omuwa, ngele owa hala okwaaludha ndje, oto shi vulu.’” Omulumentu okwa li e shi kutya Jesus oku na oonkondo dhoku mu aludha. Okwa li owala a hala okumona ngele Jesus oku na ngaa ehalo lyoku shi ninga. Omolwashike mbela? Omolwaashoka okwa li i igilila Aafarisayi mboka ya li ye tonde aanashilundu. Ihe oshike sha li momadhiladhilo gaJesus? Jesus okwi ihumbatele ngiini omulumentu ngoka tashi vulika a li a lemana nayi? Andola ngoye owa ningi po shike?

5. Omolwashike Jesus a li e na ehalo okwaaludha omulumentu omunashilundu?

⁵ Omulumentu ngoka omunashilundu okwa fa inaa enda ti igidha ta ti: “Onakunika oshidhila, nakunika oshidhila!” ngaashi sha tegelelwa paMpango yaMoses. (Levitikus 13:43-46) Ihe Jesus ine mu geela. Pehala lyaashono, okwa li e mu uvile uukwawo wanankali, nokwa li a hala oku mu kwathela. Katu shi kutya oshike sha li momadhiladhilo gaJesus, ihe otu shi nkene a li u uvite. Uuvu womulumentu ngoka owa li we mu uvitha lela nayi, naashoka oshe mu inyengitha a longe oshikumithalonga. Jesus okwe mu gumu e ta popi naye nolukeno ta ti: “‘Onda hala, yela.’ Mbalambala oshilundu noshe mu etha nokwa yele.” (Lukas 5:13) Otashi vulika pwa pita ethimbo ele omulumentu ngoka inaa gumwa. Osha yela kutya Jesus okwa li a pewa oonkondo dhokulonga oshikumithalonga shoka kuJehova, opo u ulike kutya oku hole aantu. —  Lukas 5:17.

6. Omolwashike iikumithalonga mbyoka Jesus a longo tayi kumitha, notayi tu longo shike?

⁶ Jesus okwa li a longo iikumithalonga iinene, noonkondo ndhoka a pewa kuKalunga. Ina aludha owala aanashilundu. Okwa aludha wo omikithi dhilwe. Ombiimbeli otayi ti kutya aantu oya kumwa sho ya mono “aathitawi sho taa popi, iitiningili ya aluka, iilema tayi ende, naaposi ya tonata.” (Mateus 15:31) Jesus ka li a pumbwa omuntu gulwe ngoka e na uundjolowele a yambe po oshilyo she sholutu, opo e shi longithe a aludhe ngoka te ehama. Pehala lyaashono, Jesus okwa li e na oonkondo dhokwaaludha iilyo yolutu mbyoka tayi ehama. Okwa li nokuli ha aludha aantu  mepathimo lyeho. Omathimbo gamwe okwa li he shi ningi nando oku li kokule naangoka ta alukwa. (Johannes 4:46-54) Shika otashi tu longo shike? Otashi tu longo kutya Omukwaniilwa gwetu, Jesus Kristus, oku na oonkondo nehalo okuhulitha po uuwehame sigo aluhe. Sho tatu ilongo nkene Jesus a li hu ungaunga naantu, otashi tu tsu omukumo kutya muuyuni uupe ‘ota ka sila oshimbembe nohepele olukeno.’ (Episalomi 72:13) Jesus ota ka aludha ayehe mboka taya alukwa, oshoka okwa halelela oku shi ninga.

7, 8. Hokolola shoka sha ningwa po manga Jesus inaa tsakanena nomulumentu ngoka ta alukwa puBetesda.

⁷ Konima yoomwedhi dhontumba okuza sho a aludha omunashilundu, Jesus okwa zi kuGalilea u uka kuJudea, hoka a tsikile niilonga ye yokuuvitha onkundana ombwanawa yUukwaniilwa waKalunga. Aantu oyendji oya li ye na okukala yu uvu etumwalaka lyaJesus, noya li ya gumwa kohole ye. Jesus okwa li a halelela okuhekeleka oohepele naamboka taya thiminikwa, nokwa li a hala oku ya pa etegameno. —  Jesaja 61:1, 2; Lukas 4:18-21.

⁸ Jesus okwa yi kuJerusalem momwedhi Nisan, a ka dhane Opaasa. Oshilando osha li shu udha aantu ye ya koshituthi shika showina. Jesus okwa yi kedhiya ha li ithanwa Betesda li li kuumbangalantu wotempeli, e ta adha ko omulumentu ngoka oshitiningili.

9, 10. (a) Aavu oya li haya yile shike kedhiya lyaBetesda? (b) Jesus okwa ningi shike pedhiya lyaBetesda, naashika otashi tu longo shike? (Tala kethano lyopetameko.)

⁹ Omolwashike aavu oyendji ya li haya yi kedhiya lyaBetesda? Oya li yi itaala kutya omuvu ota vulu okwaaluka pashikumithalonga, ngele okwa yi medhiya, sho omeya taga nyenganyengithwa. Dhiladhila owala kepiyagano ndyoka lya li hali kala po pedhiya, sho aavu mboka ya pongola, ya polimana, nokaaye na etegameno lya sha, taya kambadhala okwaaludhwa. Omolwashike Jesus a yi kedhiya, nonando ye ka li a pumbwa okwaaludhwa? Ohole ye yokuhola aantu oyo ye mu fala ko. Hoka oko a adha omulumentu ngoka a kala ta alukwa uule woomvula odhindji, dhi vulithe nokuli nopoomvula ndhoka Jesus a kala kombanda yevi. —  Lesha Johannes 5:5-9.

¹⁰ Jesus okwa pula omulumentu ngele okwa hala okweenda ishewe. Dhiladhila owala koluhodhi ndoka omulumentu a li u uvite sho ta lombwele Jesus kutya okwa hala okwaaluka, ihe ita vulu, oshoka ke na ngoka te mu fala medhiya. Jesus okwe mu lombwele a ninge oshinima shoka tashi monika sha fa itaashi vulu okuningwa. Okwa ti na kuthe ontala ye, e te ende, nomulumentu osho a ningi. Oshikumithalonga shika otashi tu ulukile shoka Jesus ta ka ninga muuyuni uupe. Otashi tu ulukile wo kutya Jesus oku hole aantu noonkondo, oshoka oye a li ha kongo mboka ya pumbwa ekwatho. Oshiholelwa shaJesus nashi tu ladhipike tu tsikile nokukonga aantu mboka ya polimana, omolwiinima iiwinayi mbyoka tayi ningwa muuyuni mbuka.

11. Markus 5:25-34 otu ulike ngiini kutya Jesus oku na ko nasha naantu mboka taya alukwa?

¹¹ Lesha Markus 5:25-34. Omukiintu gumwe  okwa kala nuuvu wu sitha ohoni wetiko lyombinzi, uule woomvula 12. Uuvu mbuka owa li wa guma onkalamwenyo ye ayihe, mwa kwatelwa nelongelokalunga lye. Okwa li a yi koondohotola odhindji nokwa longitha iimaliwa oyindji, opo a vule okupangwa. Ihe uuvu we owa geye owala. Esiku limwe, omukiintu ngoka okwa kongo po ondunge ndjoka tayi vulu oku mu kwathela a aluke. Okwa piti mokati kongundu yaantu, e ta kwata koonguwo dhaJesus. (Levitikus 15:19, 25) Sho Jesus a dhimbulula kutya muye omwa zi oonkondo, okwa pula kutya olye e mu gumu. Omukiintu okwa “tsu oongolo koshipala shaJesus, a tila ta kakama nokwe mu lombwele oshili ayihe.” Jesus okwa li e shi kutya Jehova oye a aludha omukiintu ngoka, nokwa popi naye nohenda ta ti: “Mumwandje, eitaalo lyoye lye ku aludha. Inda nombili, ngoye u kale wa aluka kuuvu woye.”

12. (a) Hokolola kutya Jesus okwa li omuntu a tya ngiini. (b) Jesus okwe tu tulila po oshiholelwa shini?

¹² Ohashi tu tsu omukumo okumona nkene Jesus a li hu ulukile aantu ohole, unene tuu mboka taya ehama. Jesus okwa yooloka ko thiluthilu kuSatana, ngoka ha kambadhala oku tu itaalitha kutya katu na oshilonga nokapu na ngoka e tu hole. Iikumithalonga yaJesus otayi tu ulukile kutya oku na ko nasha natse nonomaupyakadhi getu. Otwa pandula sho tu na Omukwaniilwa nOmuyambimukuluntu omunahole. (Aahebeli 4:15) Otashi vulika shi kale oshidhigu kutse oku uva ko nkene omuntu ngoka a kala ethimbo ele te ehama ha kala u uvite, unene tuu ngele tse itatu ehama. Ihe Jesus okwa li hu uvile aavu olukeno, nonando ye ke na esiku e ehamene. Natu kambadhaleni twa mana mo tu mu holele mokuulika ohole. —  1 Petrus 3:8.

13. Eyumuko lyaLasarus ota li tu longo shike kombinga yaJesus?

¹³ Jesus okwa li e na olukeno naamboka ye na omaupyakadhi. Pashiholelwa, peso lya kuume ke Lasarus, Jesus ‘okwa hendwa komutima noku uvu uudhigu meni lye,’ sho a mono nkene aakwanezimo nookuume yaLasarus ya li ya nika oluhodhi. (Lesha Johannes 11:33-36.) Jesus okwa lili, nonando okwa li e  shi kutya ota ka yumudha Lasarus. Ka li a tila a monike kaantu sho ta lili. Jesus okwa li e hole Lasarus nosho wo aamwayina noonkondo. Nomolwaashono a longitha oonkondo ndhoka a pewa kuKalunga a yumudhe Lasarus. —  Johannes 11:43, 44.

14, 15. (a) Oshike tashi ulike kutya Jehova okwa hala okuhulitha po emono lyiihuna? (b) Oshitya ‘oombiladhimbuluko’ otashi tu longo shike?

¹⁴ Ombiimbeli otayi popi kutya Jesus okwa fa lela He, Jehova. (Aahebeli 1:3) Onkene iikumithalonga mbyoka Jesus a longo otayi ulike kutya Jehova naye okwa hala okuhulitha po omikithi, uuwehame nosho wo eso. Masiku Jehova naJesus otaya ka yumudha aantu oyendji. Jesus okwa ti kutya ‘ethimbo otali ya, uuna oonakusa ayehe mboka ye li moombiladhimbuluko’ taya ka yumudhwa. —  Johannes 5:28, 29, yelekanitha NW.

¹⁵ Jesus okwa longitha oshitya ‘oombiladhimbuluko’ u ulike kutya Kalunga ite ya dhimbwa. Kalunga Omunankondoadhihe nOmushiti gwaayihe, ota dhimbulukwa thiluthilu aaholike yetu mboka ya sa, mwa kwatelwa nuukwatya wawo. (Jesaja 40:26) Jehova ita vulu owala oku ya dhimbulukwa, ihe okwa hala wo oku shi ninga. Omayumuko ngoka ga nyolwa mOmbiimbeli otage tu pe oshiholelwa shaashoka tashi ka ningwa monakuyiwa.

16. Ompito yini aapiya yaKalunga taya ka kala ye na?

¹⁶ Ngele inatu shuna monima, otatu ka hupa puudhigu uunene. Shoka otashi ka kala oshikumithalonga oshinenenene kwaa na we. Konima yiita yaArmagedon otatu ka mona wo iikumithalonga oyindji. Pethimbo mpoka aantu otaya ka thika megwaneneno. (Jesaja 33:24; 35:5, 6; Ehololo 21:4) Dhiladhila owala wa tala aantu taya ekelehi omakende gomeho, oontondje, omampango, uutemba niilongitho yokukwathela aathitamatsi yu uve ko. Jehova oku shi shi kutya ayehe mboka taya hupu miita yaArmagedon oya pumbwa okukala ye na oonkondo nuundjolowele, oshoka otaya ka kala ye na iilonga oyindji. Otaya ka ninga evi alihe oparadisa ombwanawa. —  Episalomi 115:16.

17, 18. (a) Omolwashike Jesus a li a longo iikumithalonga? (b) Omolwashike tu na okuninga ashihe shoka sha pumbiwa, opo tu ka kale muuyuni uupe?

¹⁷ “Ongundu onene” ohayi tsuwa omukumo, uuna tayi lesha kombinga yankene Jesus a aludha aavu. (Ehololo 7:9) Iikumithalonga mbyoka ohayi koleke einekelo lyetu kutya monakuyiwa otatu ka aludhwa thiluthilu. Ohayi tu longo wo kutya Omwana gwaKalunga omutango okuhole aantu. (Johannes 10:11; 15:12, 13) Olukeno ndoka Jesus a li hu ulike otalu holola ohole yaJehova onene ndjoka e hole nayo aapiya ye. —  Johannes 5:19.

¹⁸ Nena uuyuni owu udha uuwehame, emono lyiihuna neso. (Aaroma 8:22) Nomolwaashono twa pumbwa uuyuni uupe. Muuyuni mboka aantu ayehe otaya ka kala ye na uukolele, ngaashi Kalunga e ya uvanekela. Maleaki 4:2 otayi tu pe etimaumbwile kutya otatu ka nyanyukwa ngaashi “uutaagona tau dhana omalondo,” molwaashoka otatu ka aludhwa notatu ka kala twa gwana twa gwanenena. Olupandu lwetu neitaalo lyetu muJehova nomomauvaneko ge nayi tu inyengithe tu ninge ashihe shoka sha pumbiwa, opo tu ka kale muuyuni uupe. Otashi tsu omukumo okukala tu shi kutya iikumithalonga yaJesus otayi tu pe oshiholelwa shuuwanawa tawu kalelele, mboka ta ka ningila aantu masiku pethimbo lyelelo lye.