1. Iinima yini aantu haya dhiladhila kutya inayi puka?

UUYUNI mbuka tu li muwo, owu na omikalo dha nyata. Pashiholelwa, aantu oyendji ohaya dhiladhila kutya inashi puka komuntu okukala eshenge nenge okuya momilalo nomuntu ngoka kee shi kuume ke kopandjokana. Oomuvi, omambo, oongalo nomatseyitho giipindi ogu udha onyata yiipala. (Episalomi 12:8) Ihe Jehova ota vulu oku tu kwathela tu kale nonkalamwenyo ndjoka tayi mu nyanyudha. Ano, otatu vulu okukala twa yogoka nenge twa yela, muuyuni mbuka wu na omikalo dha nyata noonkondo. —  Lesha 1 Aatessalonika 4:3-5.

2, 3. (a) Omolwashike tu na okuyanda omahalo ga puka? (b) Oshike tatu ka kundathaneni moshitopolwa shika?

² Ngele otwa hala okunyanyudha Jehova, otu na okuyanda kehe shimwe shoka e tonde. Ihe molwaashoka tse inatu gwanenena, otashi vulika tu yulwe komikalo dha nyata, ngaashi owala ohi hayi vulu okuyulwa. Onkene ngele otwa tameke okudhiladhila iinima ya nyata, otu na oku yi dhima po nziyanziya. Ngele itatu shi ningi, ehalo lya puka ota li koko mutse, nongele otwa mono ompito, otatu ka yona.  Ombiimbeli otayi shi yelitha tayi ti: “Uuhalu ngele wa ningi uusimba, otau vala uulunde.” —  Lesha Jakob 1:14, 15.

³ Ehalo lya puka otali vulu okukoka momitima dhetu. Nomolwaashono twa pumbwa okukotokela omahalo getu. Ngele otwa yanda omahalo ga puka, otatu ka yanda okuya moluhondelo noku iyetela iilanduliko yi ehameka. (Aagalati 5:16) Moshitopolwa shika otatu ka kundathaneni kombinga yiinima itatu mbyoka tayi vulu oku tu kwathela tu kondjithe omahalo ga puka. Iinima mbyoka oyo: uukuume wetu naJehova, omayele ngoka ge li mOohapu dhe nekwatho ndyoka hali zi kAakriste mboka ya koka pambepo.

4. Omolwashike sha simanenena kutse, tu hedhe popepi naJehova?

⁴ Ombiimbeli otayi lombwele mboka ya hala ‘okuhedha kuKalunga’ tayi ti: “Yelitheni iikaha yeni, . . . Opalekeni omitima dheni.” (Jakob 4:8) Molwaashoka Jehova Okuume ketu kopothingo, inatu hala owala a kale a hokwa iilonga yetu, ihe otwa hala wo a kale a hokwa shoka hatu dhiladhila. Ngele omadhiladhilo getu oga yogoka noga yela, omitima dhetu nadho otadhi ka kala dha yela. (Episalomi 24:3, 4; 51:6; Aafilippi 4:8) Jehova oku uvite ko kutya molwaashoka inatu gwanenena, otashi vulika tu tameke okudhiladhila iinima ya nyata. Ihe molwaashoka inatu hala oku yemateka Jehova, ohatu ningi ngaashi tatu vulu tu yande omadhiladhilo ga puka. (Genesis 6:5, 6) Ano, otu na okuninga kehe shoka tatu vulu tu kaleke omadhiladhilo getu ga yogoka.

5, 6. Ongiini egalikano tali vulu oku tu kwathela tu kondjithe omahalo ga puka?

⁵ Ngele otwa kala hatu pula ekwatho lyaJehova okupitila megalikano, ote ke tu kwathela tu kondjithe omadhiladhilo ga nyata. Ohe tu pe ombepo ye ondjapuki, opo tu vule okukala twa yogoka. Otatu vulu okulombwela Jehova momagalikano getu kutya otwa hala a kale a hokwa shoka hatu dhiladhila. (Episalomi 19:14) Otu na okupula Jehova neifupipiko a tale ngele momitima dhetu omu na omahalo gontumba omawinayi, ngoka taga vulu oku tu ningitha tu yone. (Episalomi 139:23, 24) Natu tsikileni okupula Jehova e tu kwathele tu yande onyata yiipala nokulonga shoka shu uka, nonando oshi kale oshidhigu. —  Mateus 6:13.

⁶ Manga inaatu tseya kombinga yaJehova, otashi vulika twa li tu hole okulonga iinima mbyoka inaa hokwa notashi vulika tatu kondjitha natango omahalo ga puka. Ihe Jehova ota vulu oku tu kwathela tu ninge omalunduluko, opo tu longe shoka a hokwa. Pashiholelwa, konima sho omukwaniilwa David a hondele naBatseba, okwi iyele ombedhi e ta pula Jehova e mu pe “omutima omuyogoki,” noku mu kwathela a kale omuvuliki. (Episalomi 51:10, 12) Ngele otwa li tu na omahalo ga puka ngoka ga hwama monakuziwa notatu kambadhala natango oku ga kondjitha, inatu teka omukumo. Jehova ota vulu oku tu kwathela, opo ehalo lyetu lyokuvulika kuye nolyokulonga shoka shu uka, li kale li vule ehalo lyetu lyokuninga shoka sha puka. Ota vulu wo oku tu kwathela tu pangele omadhiladhilo getu ngoka inaa ga gwanenena. —  Episalomi 119:133.

7. Ongiini Oohapu dhaKalunga tadhi vulu oku tu kwathela tu yande omadhiladhilo ga nyata?

⁷ Jehova oha yamukula omagalikano getu okupitila mOohapu dhe, Ombiimbeli. Ohatu adha mo uunongo we mboka wa yogoka. (Jakob 3:17) Uuna tatu lesha Ombiimbeli esiku kehe, ohatu kala tu na omadhiladhilo ga yogoka. (Episalomi 19:7, 11; 119:9, 11) Ohatu adha mo wo iiholelwa nomalondodho, ngoka hage tu kwathele tu yande omadhiladhilo ga nyata nomahalo ga puka.

8, 9. (a) Oshe ende ngiini opo omumati gumwe a ye momilalo nomukiintu ohonda? (b) Oshiholelwa shoka shi li mOmayeletumbulo ontopolwa ontiheyali, otashi tu kwathele tu yande oonkalo dhini?

 ⁸ MOmayeletumbulo 5:8, Kalunga ote tu londodha tu kale kokule nonyata yiipala. MOmayeletumbulo ontopolwa ontiheyali, ota mu popiwa kombinga yomumati ngoka a li te ende mepandaanda, popepi pokolonela yegumbo lyomukiintu ohonda. Omukiintu ngoka okwa li “a zala lela ngohonda.” Okwe ende u uka komumati e te mu shambakana, nokwe mu thipi komilungu. Okwe mu lombwele wo oohapu ndhoka dha pendutha muye omahalo ga nyata. Omumati ngoka ka li a yanda omahalo ngoka, naashoka oshe mu fala sigo a yi naye momilalo. Okwa yono, nonando kali e na elalakano lyokuyona. Konima yeyono lye, okwa ka mona iilanduliko iiwinayi. Andola okwa dhiladhilile nawa koshizemo sholuhondelo, andola okwa kala kokule nomukiintu ngoka. —  Omayeletumbulo 7:6-27.

⁹ Ngaashi omumati ngoka a popiwa mOmayeletumbulo, natse otatu vulu okuninga omatokolo kaage li mondjila, molwaashoka inaatu konenena oshiponga manga shi li kokule. Pashiholelwa, oopolohalama dhimwe uusiku kotiivii ohadhi ulike iinima ya nyata. Otashi ka kala oshiponga oshinene okukala tatu tala otiivii pethimbo ndyoka, tatu lundulukile koopolohalama dhi ili nodhi ili. Osha nika wo oshiponga ngele ohatu yi komapandja gokointaneta ngoka kaatu shi kutya oge na shike nenge komahala hoka aantu hayi itumine omatumwalaka paintaneta, ihe ohaku kala wo omatseyitho ge na sha niinima ya nyata nosho wo omathano giipala. Moonkalo dha tya ngawo, otashi vulika shoka tatu tala shi kokeke omahalo ga puka mutse,  ngoka tage ke tu ningitha kaatu vulike kuJehova.

10. Omolwashike sha nika oshiponga okukala wu na ekwatathano lya pitilila nomuntu ngoka inoo hala okuya naye mondjokana nenge kee shi kuume koye kopandjokana? (Tala kethano lyopetameko.)

¹⁰ Ombiimbeli otayi tu lombwele nkene aalumentu ye na okukalathana naakiintu. (Lesha 1 Timoteus 5:2.) Omukriste ke na okukala e na ekwatathano lya pitilila nomuntu ngoka kee shi kuume ke kopandjokana nenge kee shi omuntu ngoka a hala okuya naye mondjokana. Ke na okudhana nomaiyuvo ga yakwawo. Aantu yamwe ohaya dhiladhila kutya kashi na epuko lya sha okwiihumbatela omuntu momikalo dhiihole, ngaashi okundifauka, okutala omuntu miikolo yomeho noku mu pepa nomeho, shampa owala anuwa itoo mu gumu. Ngele aantu yaali oya tameke okukala ye na ekwatathano lya pitilila pokati kawo, otashi vulika ya tameke okukala ye na omadhiladhilo ga nyata, shoka tashi ka fala moluhondelo. Oshinima shika osha ningwa nale, notashi vulu okuningwa natango.

11. Oshike tatu ilongo koshiholelwa shaJosef?

¹¹ Josef okwe tu tulila po oshiholelwa oshiwanawa. Omukulukadhi gwaPotifar okwa kala ha kambadhala okumakela Josef a ye naye momilalo. Josef okwe mu tindi, ihe omukulukadhi gwaPotifar ina hulitha po oku mu kondjitha. Kehe esiku okwa pula Josef “a lale naye.” (Genesis 39:7, 8, 10) Omulongwantu gumwe gwOmbiimbeli okwa yelitha ta ti kutya omukulukadhi gwaPotifar okwa li e na einekelo kutya ngele oye li naJosef oyo ayeke, Josef ote ke mu hala. Ihe Josef okwa li a tokola toko, opo kaa yulwe koohapu dhe nenge a kale e na iihole naye. Kungeyi, ina etha omahalo ga puka ga koke momutima gwe. Sho omukulukadhi gwaPotifar a kwata onguwo yaJosef e ta kambadhala oku mu thiminika ya lale, Josef “okwa thigi onguwo ye miikaha ye e ta yi ondapo pondje.” —  Genesis 39:12.

12. Otu shi shi ngiini kutya shoka hatu tala otashi vulu okuguma omitima dhetu?

¹² Jesus okwe tu londodha kutya shoka hatu tala otashi vulu okuguma omitima dhetu, e tashi kokeke omahalo ga puka mutse. Okwa ti: “Okehe tuu ngoka ta tala omukiintu e mu haluka, oye okwe mu hondele momwenyo gwe.” (Mateus 5:28) Shika osho naanaa sha ningilwa omukwaniilwa David. ‘Manga ta lyanga kontala yongulu, okwa mono omukulukadhi ti iyogo,’ ihe ka li i ikeelele kee mu tale nenge kee mu dhiladhile. (2 Samuel 11:2) Nonando omukulukadhi ngoka okwa li a hokanwa, David okwa tameke okukala e mu hala e ta yi naye momilalo.

13. Omolwashike tu na okuninga “etokolo lya kola” nomeho getu, nongiini tatu vulu oku shi ninga?

¹³ Ngele otwa hala okuyanda omadhiladhilo ga nyata, otu na okuholela Job, ngoka a ti: “Onda ningi etokolo lya kola.” (Job 31:1, 7, 9) Ngaashi Job, otatu vulu okutokola toko, kaatu tale omuntu nokahalu. Uuna tatu mono ethano lya nyata kokompiuta, komapulakata gomatseyitho giipindi, miifo nenge kehe ngaa mpoka, natu punguluke nziyanziya.

14. Oshike tu na okuninga ngele otwa hala okukala twa yogoka?

¹⁴ Ngele to dhiladhila kwaashoka twa kundathana, otashi vulika wa dhimbulula kutya owa pumbwa ishewe okuninga oshindji, opo wu kondjithe omahalo ga puka. Ngele owa pumbwa okuninga omalunduluko, ga ninga meendelelo. Oto vulu okuyanda oluhondelo nokukala wa yogoka, uuna to vulika kwaashoka Jehova ta ti. —  Lesha Jakob 1:21-25.

15. Ngele ohashi kala oshidhigu okukondjitha omahalo ga puka, omolwashike sha simanenena okupula ekwatho?

¹⁵ Otashi vulika shi kale oshidhigu okukondjitha omahalo ga puka. Onkene popya nagumwe megongalo, ngoka a longela Jehova uule wethimbo ele, nota vulu oku ku pa omayele okuza mOohapu dhaKalunga. Nonando  oshidhigu okulombwela omuntu gwontumba omaupyakadhi goye gopaumwene, osha simanenena wu pule ekwatho. (Omayeletumbulo 18:1; Aahebeli 3:12, 13) Aakriste mboka ya koka pambepo otaya vulu oku ku kwathela wu mone mpoka wu na okulundulula. Ninga nduno omalunduluko ngoka, opo wu kaleke po uukuume woye naJehova.

16, 17. (a) Ongiini aakuluntugongalo taya vulu okukwathela mboka taya kondjitha omahalo ga puka? Gandja oshiholelwa. (b) Omolwashike sha simanenena kwaamboka haya tala omathano giipala ya konge ekwatho mbalambala?

¹⁶ Aakuluntugongalo oya dheulwa nelalakano lyokukwathela egongalo. (Lesha Jakob 5:13-15.) Omulumentu gumwe omugundjuka ngoka a za koBrasilia, okwa kala oomvula odhindji ta kondjitha omahalo ga puka. Ota hokolola ta ti: “Onda li ndi shi kutya shoka handi dhiladhila inashi hokiwa kuJehova. Ihe onda li nda sa ohoni okulombwela yalwe kombinga yomaiyuvo gandje.” Omukuluntugongalo gumwe okwa dhimbulula kutya omugundjuka ngoka okwa pumbwa ekwatho. Okwe mu ladhipike a pitike aakuluntugongalo ye mu kwathele. Omugundjuka ngoka okwa ti: “Onda li nda kuminwa ohenda ndjoka ndu ulukilwa kaakuluntugongalo nankene yu uvu ko onkalo yandje. Onda li ndu uvite nokuli kutya inandi gwana okuulukilwa ohenda ndjoka. Oya pulakene nawa kuupyakadhi wandje noya longitha Ombiimbeli, opo yu ulukile ndje kutya Jehova okuhole ndje natango, noya galikana wo pamwe nangame. Shoka osha kwathele ndje ndi taambe ko nuupu omayele gOmbiimbeli ngoka ya pe ndje.” Konima sho omugundjuka ngoka a koleke ekwatathano lye naJehova, okwa popi a ti: “Onda mona kutya osha simanenena okukonga ekwatho, pehala lyokukambadhala okuhumbata omaupyakadhi goye, ongoye awike.”

¹⁷ Ngele owu na omukalondjigilile gwokutala omathano giipala, pula ekwatho mbalambala. Ngele owa tegelele pu pite ethimbo ele wu pule ekwatho, oto ki iyadha wa ya mepuko lya kwata miiti, ngaashi moluhondelo. Oto ka ehameka yalwe noto ka ningitha aantu ya popile Jehova muuwinayi. Aamwatate naamwameme oyendji oya pula ekwatho kaakuluntugongalo noya taamba ko omayele gawo. Oye shi ningi, opo ya nyanyudhe Jehova, noya vule okukala megongalo lyopaKriste. —  Episalomi 141:5; Aahebeli 12:5, 6; Jakob 1:15.

18. Owa tokola toko okuninga shike?

¹⁸ Uuyuni waSatana otawu ende tawu nayipala ngele tashi ya pomahalo ga puka. Ihe aapiya yaJehova ohaya longo nuudhiginini, opo ya kaleke omadhiladhilo gawo ga yela noga yogoka. Jehova oku ya uvitile lela uuntsa. Natu kale popepi naJehova nokulandula omayele ngoka hatu adha mOohapu dhe nosho wo megongalo lyopaKriste. Ngele tatu shi ningi, otatu ka kala twa nyanyukwa notatu ka kala neiyuvo lya yela. (Episalomi 119:5, 6) Monakuyiwa, konima ngele Satana a hanagulwa po, otatu ka kala sigo aluhe muuyuni waKalunga mboka wa yogoka.