OMUSAMANE gwaAnita okwa li a thita po kondjahi, sho Anita a ningi Onzapo yaJehova. * Okwa li ha kambadhala oku mu keelele ko kokugongala, e te mu lombwele kaa tumbule we nando edhina lyaKalunga. Shampa e mu uvu te li popi, okwa li ha geye nayi.

Kakele kaashono, omusamane ka li a hala Anita a longe oyana kombinga yaJehova nenge a ye nayo kokugongala. Shika osha li oshidhigu kuye, oshoka okwa li e na okukambadhala okulonga oyana meholamo.

Ehokololo lyaAnita otali ulike kutya yamwe yomaapambele yetu otashi vulika ye tu keelele tu longele Jehova. Nenge otashi vulika wo wu na uupyakadhi wulwe, ngaashi omukithi gwoshinamenena. Otashi vulika okanona koye, omusamane gwoye nenge omukulukadhi gwoye a hulitha. Nenge pamwe omuntu gwaandjeni ngoka wu hole a thiga po Jehova. Mbela oshike to vulu okuninga po, opo wu kale omudhiginini kuJehova moonkalo ndhoka?

Omuyapostoli Paulus okwa ti: “Omu na okwiidhidhimika.” (Aahebeli 10:36) Oshike tashi vulu oku ku kwathela wu idhidhimike?

Uuna wu li muupyakadhi, dhimbulukwa kutya owa pumbwa okwiinekela Jehova e ku kwathele, opo wu idhidhimike. Galikana kuye e ku kwathele. Shoka osho Ana a ningi konima sho omusamane gwe, ngoka ya kala ya hokana uule woomvula 30, a hulitha ombaadhilila. Ana okwa ti: “Omusamane gwandje nkene a yile kiilonga, kegumbo ina galukila ko we. Okwa li e na owala omimvo 52.”

Nonando Ana okwa kala i ipyakidhila kiilonga, shoka inashi kutha po oluhodhi lwe. Okwa ningi po shike? Okwa ti: “Onda mbumbulile Jehova omutima gwandje, e tandi mu indile a kwathele ndje.” Oku shi kutya Jehova okwe mu kwathela, oshoka konima yokugalikana, oha kala e na ombili nokwa pepelelwa. Okwa popi wo a ti: “Kandi na omalimbililo kutya Jehova ota ka yumudha omusamane gwandje.” —  Aafilippi 4:6, 7.

Jehova oku uvanekela aapiya ye kutya ota ka uva omagalikano gawo. (Episalomi 65:2) Ote ke ya pa wo ashihe shoka tashi ya kwathele ya tsikile oku mu longela. Onkee ano, Jehova ote ke ku kwathela wu kale omudhiginini kuye nomoonkalo oondhigu.

Jehova ohe tu kwathele tu idhidhimike ishewe momukalo gulwe. Okwe tu pa aamwatate megongalo. Otatu vulu okwiilonga ko sha kaamwatate yomuTessalonika, mboka ya kwathelathana sho ya li taya hepekwa nonyanya. Pethimbo mpoka, osha li sha simana kuyo ya ladhipikathane. (1 Aatessalonika 2:14; 5:11) Oya kwathele aamwahe ya kale aadhiginini kuJehova mokukala haya gongala pamwe nokukala ye na uukuume wopothingo nayo. Oshike tatu vulu okuninga tu kale aadhiginini ngaashi aamwatate yomuTessalonika?

Otwa pumbwa okupanga uukuume wopothingo naamboka ye li megongalo, nokuya tsa omukumo, unene tuu uuna ye li moonkalo oondhigu. (Aaroma 14:19) Omuyapostoli Paulus okwa li a monithwa iihuna komahepeko nosho wo komaupyakadhi galwe, ihe Jehova okwe mu pe oonkondo dhokwiidhidhimika. Pashiholelwa, Jehova okwa longitha aamwatate ya tse Paulus omukumo. Omuyapostoli Paulus okwa popi ngeyi kombinga yookuume ke ta ti: “Oyo oya kala ekwatho enene kungame.” (Aakolossa 4:10, 11) Aamwatate mbaka oya li ye hole Paulus, nuuna a pumbwa ekwatho, oya li haye mu hekeleke noku mu tsa omukumo. Otashi vulika to dhimbulukwa oompito dhimwe mpoka aamwatate megongalo lyeni ya popi sha nenge ye ku longele sha, shoka she ku tsu omukumo.

Jehova okwe ku pa aakuluntugongalo ye ku kwathele. Otaya vulu oku ku tsa omukumo noku ku pa omayele okuza mOmbiimbeli. Aakuluntugongalo oya fa “eshigo lyokushiga ombepo negameno kiikungulu. Otaa ka fa omilonga dhomeya tadhi tondoka mombuga, ya fa omuzile gwetayimanya enenenene mevi lya notelwa.” (Jesaja 32:2) Ohashi tu hekeleke okutseya kutya aamwatate mbaka oyi ilongekidha oku tu kwathela. Ano ngele owi iyadha moonkalo oondhigu, inda kaakuluntugongalo. Otaya vulu oku ku kwathela wu tsikile okulongela Jehova.

Aakuluntugongalo itaya vulu okukandula po omaupyakadhi goye agehe. Inaya gwanenena ngaashi naanaa ngoye. (Iilonga 14:15) Ihe oto ka kala wu uvite nawa ngele wa yi komukuluntugongalo e tamu galikana pamwe naye, a lombwele Jehova uupyakadhi woye. (Jakob 5:14, 15) Pashiholelwa, aakuluntugongalo moItalia oya li ya kwathele omumwatate gumwe ngoka a lumbu nuuvu wa kwata miiti oomvula odhindji. Omumwatate ngoka okwa ti: “Aamwatate oya kwathele ndje ndi idhidhimike, sho yu ulukile ndje ohole nuukwawo wanankali, mokukala haya talele ndje po olundji.” Ngele nangoye owu na uupyakadhi wontumba, Jehova okwa hala wu pule aakuluntugongalo ye ku kwathele.

Ngele otwa kala twi itula mokulongela Jehova, Jehova ote ke tu kwathela. John osho a li a ningi. Sho a li e na oomvula 39, okwa lombwelwa kutya oku na okankela ndyoka ihaayi kwata aantu oyendji. Okwa li u uvite kutya kashi li pauyuuki sho a kwatwa kuuvu mboka, oshoka ye okwa li omugundjuka natango. Okwa li wo ha kala ti ipula unene nomukadhi nosho wo nokamwanamati, hoka ka li owala ke na oomvula ndatu. Okwa ti: “Omukulukadhi gwandje okwa li e na okusila ndje oshimpwiyu, nosho wo okamwandje. Okwa li wo e na okukala ha fala ndje koshipangelo.” Omolwepango ndyoka lyopaunamiti okwa li ha kala a vulwa noonkondo, lyo nepunda lye olya li hali kala tali ehama. Uupyakadhi we inawu hulila mpoka. John okwa lombwelwa kutya He ote ehamenene nokwa li a pumbwa omuntu gwoku mu kwatha.

Oshike sha li sha kwathele John noyaandjawo pethimbo ndyoka edhigu? John okwa li ha si oshimpwiyu opo ya kale yi itula mokulongela Jehova, nonando okwa li ha kala a vulwa. Okwa ti: “Otwa li hatu yi kokugongala kehe, otwa li hatu yi momapya oshiwike kehe notwa li hatu ningi elongelokalunga lyuukwanegumbo pandjigilile, nonando kasha li oshipu.” John okwa mono nkene sha simana okukaleka ekwatathano lye naJehova lya kola. Nonando petameko sho u uvu kutya oku na uuvu, okwa li a tila nokwa li ti ipula unene, konima okwa ka kala a a pepelelwa. Okwa li e shi kutya Jehova oku mu hole noye a li te mu pe oonkondo ndhoka a pumbwa. Nangoye, Jehova ota vulu oku ku kwathela uuna to ipula unene nenge wa tila. John okwa ti: “Jehova ota vulu oku ku pa oonkondo ngaashi e shi ningile ndje.”

Uuna to mono iihuna, dhimbulukwa oohapu dhaPaulus ndhoka tadhi ti: “Omu na okwiidhidhimika.” Inekela muJehova mokukala ho galikana kuye. Panga uukuume wopothingo naamwatate megongalo, pula ekwatho kaakuluntugongalo e to kala wi itula mokulongela Jehova. Jehova ota vulu oku ku kwathela nuudhigu kehe wu na ngashingeyi nosho wo nuudhigu kehe mboka tashi vulika wu ku adhe monakuyiwa.