MUJUNI 1970, sho nda li ndi na oomvula 20, onda taambwa moombete moshipangelo moPennsylvania, moAmerika. Pethimbo mpoka onda li muukwiita. Opwa li omupangi ngoka a li ta tala elondo lyandje lyombinzi, konima yetata lyowili kehe. Omulumentu ngoka a li owala e vule ndje noomvula oonshona, okwa li a tila shili, oshoka ombinzi yandje oya li tayi ende tayi gu pevi nayi. Onde mu pula nda ti: “Ino mona nando onale omuntu e li pokusa mbela?” Oshipala she osha lembe sho ta zimine kutya ina mona nale omuntu e li monkalo ndjoka. Onda li tandi monika nda fa tandi hala okusa, ihe onda hupu. Ondjokonona yandje oyo ndji.

Onda akukilwa kuuvu, sho nda li handi longo niikwamashina moshitandelo moVietnam, pethimbo lyiita. Onda li ndi hole okukwathela mboka taye ehama nenge ya monithwa oshiponga miita. Elalakano lyandje olya li okuninga omutandi. MoVietnam onda thiki mo muJuli 1969. Onda li nda pewa oshiwike ndi igilile oowili dhaVietnam nonkalo yombepo, ngaashi aakwiita ayehe aape ya li haya pewa.

Onda pewa ndi longe moshipangelo shaakwiita kuuninginino waVietnam. Aakwiita oyendji mboka ya monithwa oshiponga molugodhi, oya li haya etwa koshipangelo komadhagadhaga ombaluwali. Onda li ndi hole oshilongo shetu nosho wo iilonga, nonda li nda halelela okukwathela oohailwa ooyakwetu nondjungu. Aakwiita mboka ya mona oshiponga oya li haya longekidhwa tango manga inaaya falwa nziyanziya koshitandelo. Etando olya li hali ningilwa muundunda wa ningwa niipeleki, moka mwa li mu na omipepo tadhi talaleke mo. Moshitandelo omwa li hamu longo omutandi, omukotheki naapangi yaali, mboka ya li haya longo nuudhiginini ya hupithe oomwenyo. Onda li handi mono momadhagadhaga mu na ooshako oonduudhe, ihe kadha li hadhi helulwa mo. Onda li nda lombwelwa kutya omu na iintimbu yaakwiita mboka ya topelwa koomboma molugodhi. Shoka osha li oshikando shandje shotango miita.

Oshikando shotango nda lombwelwa oshili kOonzapo dhaJehova, onda li omushona. Meme okwa li ha konakona Ombiimbeli nOonzapo, ihe ina ka ninginithwa. Onda li ndi hole lela okukala po pekonakono lye. Esiku limwe, sho tatu ende pOshinyanga shUukwaniilwa natate ngoka a hokana meme, onde mu pula nda ti: “Ehala olyashike ndyono?” Okwa  yamukula a ti: “Aantu mboka ya kala kokule.” Molwaashoka onda li ndi mu hole nonde mu inekela, onda pulakene kuye, noinandi endathana we nOonzapo dhaJehova.

KoVietnam, onda zi ko nda mona iinima oyindji iiwinayi mbyoka hayi ehameke ndje pamadhiladhilo. Oya li ya ningitha omaiyuvo gandje ga kale ga sa. Onda li ndi wete pwa fa kaapu na ngoka u uvite ko lela shoka tashi ningwa moVietnam. Otandi dhimbulukwa aahololimadhiladhilo yamwe mboka ya li taya ula aakwiita yaAmerika kutya ohaya dhipaga aanona. Shika osha tameke sho yu uvu omahokololo kombinga yaanona mboka ya dhipagwa moVietnam. Iinima ayihe mbika oya ningitha ndje ndi kale ndu uvite kutya onda pumbwa okukala nekwatathano naKalunga.

Onda tameke okuya koongeleka dhi ili nodhi ili, sho tandi kongo Kalunga. Onda li ndi hole Kalunga, ihe kanda li ndi hole shoka tashi ningwa moongeleka. Pehulilo, onda yi kOshinyanga shUukwaniilwa moDelray Beach, moFlorida. Okugongala hoka kwandje kwotango okwa li mOsoondaha, muFebuluali 1971.

Sho nda thiki pOshinyanga shUukwaniilwa, onda adha oshipopiwa shomontaneho tashi hulu. Onda tokola ndi kale po pEkonakono lyOshungolangelo. Itandi dhimbulukwa shoka sha li tashi kundathanwa, ihe otandi dhimbulukwa nda fuuka kuunona tawu kongo omanyolo mOmbiimbeli. Ngame onda li owala tandi pulakene, nokulengalenga. Sho tandi yi, omumwatate Jim Gardner, ngoka a li e na oomvula 80, okwa popitha ndje. Okwa pe ndje okambo Oshili Ndjoka Tayi Fala kOmwenyo Gwaaluhe, e ta ti: “Ino hala okambo haka?” Onde ka taamba, e tatu ningi oshilage tu konakone Ombiimbeli naye Etine ongulonene.

Konima yokugongala esiku ndyoka onda li ndi na okuya kiilonga. Onda li handi longo moshipangelo moBoca Raton, moFlorida. Oskofa yandje oya li tayi ka tameka po 11 gwuusiku sigo opo 7 yongula. Ongulohi ndjoka kapwa li aavu oyendji, onkene onda li nda vulu okulesha okambo kandje nawa. Omupangi gumwe okwe ka yugu ndje e ta tala epeko lyako. Okwa pula ndje ngele onda hala okuninga Onzapo yaJehova. Onde ke mu yugulula e tandi mu lombwele kutya inandi lesha mo naanaa oshindji, ihe onda li lela tandi dhiladhila okuninga Onzapo. Okwe etha ndi leshe okambo kandje sigo nde ka mana ko ongulohi ndjoka.

Sho omumwatate Gardner e ya tu konakone, onde mu pula nda ti: “Otatu ka konakona shike ano?” Okwa yamukula ndje a ti: “Okambo heyaka nde ku pele.” Sho nde mu lombwele kutya onde ka lesha nale ka pwa ko, okwa lombwele ndje nombili a ti: “Natu konakone po nduno ontopolwa yotango.” Onda li nda kumwa okumona kutya iinima oyindji kanda li nani nde yi uva ko. Okwa pula ndje ndi konge omanyolo ogendji mOmbiimbeli yandje yo-King James Version. Onda li ndu uvite kutya onda li tandi ilongo kombinga yaKalunga kashili, Jehova. Ongula yesiku ndyoka otwa konakona oontopolwa ndatu mokambo hoka. Okuza mpoka, otwa kala hatu konakona oontopolwa ndatu ongulonene yEtine kehe. Onda li ndi hole shili okukonakona nomumwatate ngoka omugwayekwa,  nosha li uuthembahenda uunene okukonakona nomuntu ngoka a li e shi omumwatate Charles T. Russell.

Sho nda konakona iiwike yontumba, onda pitikwa ndi kale handi uvitha onkundana ombwanawa. Okuuvitha momagumbo kasha li oshipu kungame, ihe Jim okwa kwathele ndje ndi sinde uumbanda wandje. (Iilonga 20:20) Onda tameke okukala ndi hole uukalele. Uukalele owo uuthembahenda uunene mboka ndi na. Onda nyanyukwa sho tandi vulu okulonga pamwe naKalunga. —  1 Aakorinto 3:9.

Ngashingeyi nandi mu lombwela kombinga yohole yandje yotango yokuhola Jehova, oshoka oya simana lela kungame. (Ehololo 2:4) Oya kwathela ndje ndi idhidhimikile omadhiladhilo omawinayi giinima mbyoka nda mona miita, nondi idhidhimikile omaupyakadhi galwe. —  Jesaja 65:17.

Mo 1971, onda tidhwa mo mokafuleta kaavali yandje moka nda li handi zi. Onda tidhilwa mo shike? Tate ngoka a li a hokana meme, ka li a hala mokafuleta ke mu kale hamu zi Onzapo yaJehova. Pethimbo mpoka inandi adhika ndi na oshimaliwa oshindji, oshoka onda adhika owala opo nda landa oohema dhokuya muukalele, opo ndi kale tandi monika nda fa omulongeli gwaJehova. Oshipangelo osha li hashi futu ndje owala konima yiiwike iyali. Onda li ngaa ndi na oshimaliwa, ihe osha li sha pungulwa mombaanga koMichigan hoka nda za. Onda kala handi lala mohauto uule womasiku gontumba. Onda li handi iyogele pooseevesa.

Esiku limwe sho nda zimbuka, onda yi kOshinyanga shUukwaniilwa, manga ku na natango oowili dhontumba, opo elongekidho lyiilonga yomomapya li tameke. Sho nda kuutumba konima yOshinyanga ndi li ongame awike, onda tameke okudhiladhila iinima mbyoka nda mona koVietnam. Onda li ndu  uvite ezimba lyomuntu a pya nonda li nda fa ndi wete ombinzi. Onda kwatwa kuumbanda. Onda li nokuli nda fa ndi wete nondi uvite aakwiita taya pula ndje ya tila, taya ti: “Ote hupu ngaa? Ote hupu ngaa?” Onda li handi kala ndi shi kutya itaya hupu, ihe onda li handi kambadhala oku ya hekeleka noku ya lombwela kutya oye li nawa. Onda li nda gwililwa po lela komadhiladhilo nokomaiyuvo.

Onda li tandi lili, ngame tandi galikana kuJehova. (Episalomi 56:8) Pompito mpoka onda tameke okudhiladhila muule kombinga yeyumuko. Onda mono kutya nani eyumuko oli li lela etegameno ewanawa. Jehova ota ka yumudha aakwiita mbeyaka, notaya ka mona ompito yokwiilonga oshili kombinga ye. Eyumuko otali ka kutha po uuwehame niihuna ayihe mbyoka twa mono notwa piti muyo. (Iilonga 24:15) Oshinima shoka sho nde shi uvu ko nawa, ohole yandje yokuhola Jehova oya kolo, shi vulithe nale. Esiku ndyoka sigo onena oli ikalekelwa kungame. Okuza kesiku ndyoka, uuna ndi li muudhigu, ohandi kambadhala oku li dhimbulukwa, oshoka olyo esiku nda tameke okukala ndi hole lela Jehova.

Pethimbo lyiita aantu ohaya longo iikulumuna, nangame onda li nde yi longo. Ihe shoka hashi hekeleke ndje, okutedhatedha komanyolo gaali ngoka ndi hole. Lyotango, oli li mEhololo 12:10, 11, ndyoka tali ti kutya Ondiyapoli oya sindwa keuvitho lyetu nokombinzi yaJesus. Etiyali, oli li mAagalati 2:20 nohali dhimbulutha ndje kutya Jesus okwa sila ndje. Ohandi pandula Jehova sho a dhimina ndje po okupitila mekuliloyambo lyaKristus. Onkee ano, ondi na eiyuvo lya yela nonda halelela okulombwela aantu ooyakwetu kombinga yaKalunga ketu omunahole, Jehova. —  Aahebeli 9:14.

Uuna tandi dhiladhila kombinga yonkalamwenyo yandje, ohashi kala sha yelela ndje kutya Jehova okwa kala aluhe ta kwatha ndje. Pashiholelwa, esiku Jim u uvu kutya ohandi lala mohauto yandje, okwa fala ndje komumwameme ngoka a li e na oondunda dhokuhiilitha megumbo lye. Ondi itaala kutya Jehova okwa li a longitha Jim nosho wo omumwameme ngoka, opo a kwathele ndje ndi kale ndi na ehala ewanawa lyokukala. Jehova oku na shili ohenda, noha kwatha aalongelikalunga ye aadhiginini.

Onda li ndi na okuya koMichigan muMei 1971. Manga inaandi za mo moFlorida, onda kutha ondumba yiifo e tandi yi tula mohauto. Onda tameke okuhinga ndu uka mo muumbangalantu mo. Sho ndi li pokuza mo moshitopolwa shaGeorgia, iileshomwa yandje ayihe oya li ya pwa po nale. Onda li handi uvitha nuulaadhi, onkundana ombwanawa yUukwaniilwa, kehe mpoka tandi yi. Onda li handi uvithile moondholongo, nonda li handi gandja nokuli uufo kwaamboka handi adha muundjugo pomahala gokuvululukilwa, uuna ndi li mela lyondjila. Sigo onene ohandi ipula ngele opu na yamwe yomuyo ya taamba oshili. —  1 Aakorinto 3:6, 7.

Sho opo nde ya moshili, kanda li lela ndi shi okupopya naantu, unene tuu aantu yaandjetu. Omathimbo gamwe onda li handi popi nde ya ukilila unene. Molwaashoka ondi hole noonkondo aamwameme, John naRon, onda li handi ya thindile eitaalo lyandje epe, uuna tandi ya uvithile. Konima yethimbo, onde ke ya pa ombili. Ihe onda tsikile okugalikana, opo ya taambe ko oshili. Ngashingeyi Jehova okwa kwathela ndje ndi kale handi popi naantu nuukeka, uuna tandi uvitha nenge tandi longo aantu. —  Aakolossa 4:6.

Ekwatathano lyandje naJehova olyo aluhe tango monkalamwenyo yandje. Ihe opu na wo yalwe mboka ndi hole noonkondo, unene tuu omukulukadhi gwandje omuholike, Susan. Onda kala tandi kongo aluhe omukulukadhi ngoka ta ka kwathela ndje ndi tsikile okulongela Jehova. Susan, omukulukadhi e  na omukumo nomatokolo, noku hole lela Jehova. Esiku limwe onde ke mu talela po kaandjawo koRhode Island, sho twa li tatu endelathana. Onde mu adha a kuutumba pokawalanda ta lesha Oshungolangelo pamwe nOmbiimbeli ye. Shoka sha gumu ndje ooshoka kutya okwa li ta lesha omanyolo agehe ngoka ge etwa mo moshileshwa, nando kasha li shokukonakonwa. Onda li ndi wete kutya ekwatathano lye naJehova olya simana lela kuye. Otwa ka hokana muDesemba 1971. Onda nyanyukwa sho ndi na omukwathi omuwanawa. Ihe shoka nda nyanyukilwa unene osho kutya nonando okuhole ndje, ohole ye yokuhola Jehova oyo tayi ya tango.

Jehova okwe tu pa omagano, aamati yaali, Jesse naPaul. Oya kala taya wilikwa kuJehova sho taya putuka. (1 Samuel 3:19) Ohashi tu nyanyudha, sho ye na ekwatathano ewanawa naye. Ayehe oya kala taya longele Jehova ethimbo lyu udha, uule woomvula dha konda po 20. Otaya tsikile natango oku mu longela, oshoka nayo ohaya dhimbulukwa ohole yawo yotango yokuhola Jehova. Ondi hole wo iitenya yandje, Stephanie naRacquel, mboka nda tala ko ya fa aamwandje. Onda nyanyukwa sho aamwandjemati ya hokana aakulukadhi mboka ye hole Jehova tashi zi komutima, nohaya longitha onkalamwenyo yawo oku mu longela. —  Aaefeso 6:6.

MoRhode Island ondi na mo ookuume oyendji, oshoka onda ningile mo oomvula 16. Otandi dhimbulukwa natango aakuluntugongalo ya pyokoka  mboka twa li hatu longo nayo. Onda pandula wo aatonateli aayendi mboka ya kwathele ndje. Oshi li uuthembahenda uunene sho nda kala handi longele Jehova pamwe naalumentu mboka haya dhimbulukwa ohole yawo yotango yokuhola Jehova. Mo 1987, otwa tembukile koNorth Carolina hoka kwa li ku na ompumbwe onene. Nako otu na ko ookuume oyendji. *

MuAuguste 2002, otwi ithanwa tu ka longe kObetel koPatterson, moAmerika. Onda li handi longo moshikondo shiilonga, omanga Susan a li ha longo nokuyoga oonguwo. Iilonga mbika okwa li e yi hole. MuAuguste 2005, onda pewa uuthembahenda wokuninga oshilyo shOlutuwiliki. Kanda li ndi wete nda gwana okupewa uuthembahenda mbuka. Susan naye okwa li e wete kutya iilonga nomalweendo ogendji unene. Ke hole okutuka nondhila, ihe otu na okutuka olundji nondhila omolwiilonga. Omayele omawanawa ngoka ha pewa kaakulukadhi yalwe mboka ya hokanwa kiilyo yOlutuwiliki, ohage mu kwathele noonkondo. Ohage mu inyengitha a kale a tokolotoko okukwathela ndje. Ondi mu hole unene sho ha kwathele ndje.

Mombelewa yandje ondi na mo omathano ngoka haga dhimbulukitha ndje kutya onkalamwenyo yandje oya kala ombwanawa lela. Onda mona omayambeko ogendji, sho handi kambadhala nda mana mo okudhimbulukwa ohole yandje yotango yokuhola Jehova.