1, 2. (a) Okwaambidhidha Jehova nuudhiginini nokwaakutha ombinga momakuyunguto guuyuni mbuka, oku na ekwatathano lyashike? (Tala kethano lyopetameko.) (b) Aantu oyendji ohaya ambidhidha shike nuudhiginini, ihe shika ohashi eta iizemo yini yiyemateka?

AAPIYA yaJehova ihaya kutha ombinga miinima yuuyuni mbyoka hayi topola aantu, ngaashi uukwashigwana, uukwamuhoko nenge omithigululwakalo. Omolwashike mbela? Omolwaashoka otu hole Jehova, ohatu mu ambidhidha nuudhiginini nohatu vulika kuye. (1 Johannes 5:3) Kashi na nduno mbudhi kutya ohatu kala moshilongo shini, ohatu iyutha komithikampango dhaKalunga. Okwaambidhidha Jehova nUukwaniilwa we nuudhiginini, okwa simana ku vulithe iinima ayihe. (Mateus 6:33) Nomolwaashono tatu vulu okutya ‘katu shi yomuuyuni.’ —  Lesha Johannes 17:11, 15, 16; Jesaja 2:4.

² Aantu oyendji ohaya ambidhidha iilongo yawo, omihoko dhawo, omithigululwakalo nokuli noongundu dhomaudhano nuudhiginini. Shi yemateka, shika osha ningitha oyendji yomuyo ya kale taya ningi omathigathano, ye tondathane nomathimbo gamwe ohaya dhipaga nokuli mboka inaaya gama kombinga yawo. Nonando ihatu kutha ombinga momakuyunguto ngoka, ohaga vulu oku tu  guma nosho wo aantu yaandjetu, notashi vulika tu ningwe nayi. Oshipu okugama ombinga ngele omapangelo ohaga ningi omatokolo kaage na uuyuuki. Shika ohashi ningwa oshoka Kalunga okwe tu shita nuukwatya wokumona ngele oshinima shoka tashi ningwa oshu uka nenge inashi uka. (Genesis 1:27; Deuteronomium 32:4) Oho kala wu uvite ngiini ngele opwa ningwa oshinima inaashi uka? Oho vulu ngaa okukala inoo gama ombinga moshinima shoka?

3, 4. (a) Omolwashike ihaatu gama ombinga, uuna pwa holoka omakuyunguto? (b) Oshike tashi ka kundathanwa moshitopolwa shika?

³ Aantu oyendji ohaya gama ombinga uuna pu na omahilathano. Omapangelo ohage ya lombwele kutya osho ye na okuninga, opo ya kale aakwashigwana aawanawa. Ihe tse ohatu landula oshiholelwa shOmuwa gwetu Jesus. Onkene, ihatu kutha ombinga mopolotika, tse ihatu yi kiita. (Mateus 26:52) Aakriste yashili ihaya kala ye wete ombinga yimwe yuuyuni waSatana ombwanawa yi vulithe onkwawo. (2 Aakorinto 2:11) Ihatu kala twa hala nando okukutha ombinga momakuyunguto guuyuni mbuka. —  Lesha Johannes 15:18, 19.

⁴ Omolwokwaagwanenena, otashi vulika tu kale kaatu hole aantu mboka inaaye tu fa. (Jeremia 17:9; Aaefeso 4:22-24) Moshitopolwa shika otatu ki ilonga omakotampango ngoka tage tu kwathele tu kondjithe notu sinde omaiyuvo ngoka haga topola aantu. Otatu ka kundathana wo nkene tatu vulu okwaambidhidha Uukwaniilwa nuudhiginini, mokwiidheula tu kale hatu dhiladhila ngaashi Jehova naJesus.

5, 6. Sho Jesus a li kombanda yevi, okwa li a tala ko ngiini aantu yomihoko dhi ili nodhi ili, nomolwashike?

⁵ Ngele owi iyadha monkalo moka wa nyengwa okukala inoo gama ombinga, ipula to ti, ‘Ando Jesus oye a li monkalo ndjika, ando okwa ningi ngiini?’ Sho Jesus a li kombanda yevi opwa li oontamanana nokwaauvathana pokati kaantu yomuJudea, Galilea nosho wo Samaria. Natu taleni kuyimwe yomiiholelwa mbyoka. Aajuda nAasamaria kaya li haya popi. (Johannes 4:9) Aasadukayi nAafarisayi kaya li haya tsu ya thithe miinima oyindji. (Iilonga 23:6-9) Aajuda mboka ya longwa Ompango oya li ye wete ya simana ye vule mboka inaaye yi longwa. (Johannes 7:49) Omanga oyendji ya li ye tonde aafendelithi nAaroma nenge aapagani. (Mateus 9:11) Ihe Jesus ina kutha mo ombinga moontamanana dha tya ngaaka. Nonando okwa li aluhe ha popi oshili kombinga yaJehova, nokwa li e shi shi kutya Aaisraeli oshigwana shaKalunga shi ikalekelwa, ka li a longo aalongwa ye kutya oya simana ye vule aantu ooyakwawo. (Johannes 4:22) Pehala lyaashono, okwe ya longo ya kale ye hole aantu ayehe. —  Lukas 10:27.

⁶ Omolwashike Jesus kaa li a tala ko aantu yontumba ya simana ye vulithe ooyakwawo? Omolwomukalo moka yo naHe ya tala ko aantu. Jehova sho a shiti aantu okwa li a hala yu udhe evi alihe naantu yomihoko dhi ili nodhi ili. (Genesis 1:27, 28) Onkene, Jehova naJesus ihaya tala ko omuhoko gwontumba, oshilongo shontumba nenge eleka lyontumba lya simana li vule omakwawo. (Iilonga 10:34, 35; Ehololo 7:9, 13, 14) Natu landuleni oshiholelwa shawo oshiwanawa. —  Mateus 5:43-48.

7, 8. (a) Mbela tse otwa gama kulye, nomolwashike? (b) Oshike tashi ka kandula po omaupyakadhi gaantu?

 ⁷ Omolwashike ihaatu ambidhidha nando epangelo lyontumba nenge omupangeli gwontumba? Omolwaashoka otwa gama kuJehova. Oye Omupangeli gwetu. Satana okwa popi moshikunino shaEden kutya Jehova ke shi omupangeli omuwanawa. Satana okwa li a hala aantu ya kale ye wete kutya omukalo gwe gwokupangela ogwo omuwanawa gu vule gwaKalunga. Jehova ohe tu etha tu tokole kutya otwa hala okugama kulye. Ihe mbela ngoye owa ninga etokolo lini? Mbela oho vulika kuJehova molwaashoka wi itaala kutya omukalo gwe gwokuninga iinima ogwo omuwanawa gu vulithe gwoye? Owa tompwa ngaa kutya Uukwaniilwa we owo awike tawu ka kandula po omaupyakadhi goye? Nenge mbela oto dhiladhila kutya aantu otaya vulu okwiipangela nawanawa, nando kaye na Kalunga? —  Genesis 3:4, 5.

⁸ Pashiholelwa, ngele omuntu okwe ku pula kutya owa tala ko ngiini ongundu yontumba yopapolotika, yuuthemba womuntu nomahangano goludhi ndoka, oto ke mu yamukula ngiini? Oongundu dhimwe ndhino otashi vulika hadhi longo moshili nodha hala okukwathela aantu. Ihe tse otu shi shi kutya Uukwaniilwa waJehova owo awike tawu ka kandula po omaupyakadhi gaantu nokukutha po okwaanuuyuuki akuhe. Ohatu landula wo ewiliko lyaJehova okupitila megongalo, pehala lyokuninga shoka kehe gumwe ta dhiladhila kutya oshi li nawa kuye okuninga. Nomolwaashono egongalo lya hangana.

9. Uupyakadhi washike Aakriste yamwe methelemumvo lyotango ya li ye na, nAakriste mboka oya li ya pumbwa okuninga shike?

⁹ Methelemumvo lyotango, Aakriste yamwe yomuKorinto oya li taya nyenyeta taya ti: “Ngame onda gama kuPaulus;” mukwawo ota ti: “Ngame onda gama kuApollos;” mukwawo ota ti: “Ngame onda gama kuPetrus;” mukwawo ota ti: “Ngame onda gama kuKristus.” Sho omuyapostoli Paulus e shi uvu, okwa li a haluka. Mbuka owa li uupyakadhi uunene, oshoka owa li tawu ka yona po ombili yegongalo. Onkee ano, Paulus okwa pula aamwahe ta ti: “Kristus okwa topolwa ano moongundu?” Nokonima okwe ya kumagidha ta ti: “Aamwameme, otandi mu kumagidha medhina lyOmuwa gwetu Jesus Kristus: Uvathaneni mwaashihe shoka tamu popi, opo mokati keni mwaa kale omatopoko. Kaleni nekwatathano, mu na edhiladhilo limwe nelalakano limwe.” Omayele ngaka otaga longo wo nokutse kunena, oshoka megongalo kamu na okukala omatopoko. —  1 Aakorinto 1:10-13; lesha Aaroma 16:17, 18.

10. Omuyapostoli Paulus okwa dhimbulukitha Aakriste shike, noshike tatu ilongo mo?

¹⁰ Omuyapostoli Paulus okwa li a dhimbulukitha Aakriste aagwayekwa kutya uukwashigwana wawo owomegulu. Kaye na okukala yi itula ‘miinima mbyoka yomuuyuni mbuka.’ (Aafilippi 3:17-20) * Aagwayekwa oye li aatumwa mboka taya kalele po Kalunga naJesus. Ngele omutumwa gwepangelo okwa tumwa a ye koshilongo shilwe, ihi idhopo miinima yopapolotika nomomaupyakadhi ngoka tashi vulika ga holoke moshilongo shoka. Sha faathana,  itashi ka kala shi li mondjila ngele aagwayekwa tayi idhopo mopolotika nomomaupyakadhi ngoka taga holoka muuyuni mbuka. (2 Aakorinto 5:20) Mboka ye na etegameno lyoku ka kala nomwenyo sigo aluhe kombanda yevi, ohaya ambidhidha nuudhiginini Uukwaniilwa. Ihaya kutha ombinga momakuyunguto guuyuni mbuka.

11, 12. (a) Iikala yini tu na okuyanda, ngele otwa hala okukala hatu ambidhidha nuudhiginini Uukwaniilwa waKalunga? (b) Omumwameme gumwe okwa li u uvitile ngiini aantu yomuhoko gwontumba, noshike she mu kwathele a lundulule iikala ye?

¹¹ Miitopolwa oyindji muuyuni, aantu ohaya kala ye na ekwatathano ewanawa naantu mboka ye na ondjokonona yimwe, eputuko nelaka lya faathana. Ohaya kala yu uvitile uuntsa mpoka ya za. Ihe inatu etha iikala ya tya ngeyi yi tu nwethe mo. Pehala lyaashono, otu na okulundulula omukalo moka hatu dhiladhila notwa pumbwa okudheula eiyuvo lyetu, opo tu kale ihaatu kutha ombinga miinima yuuyuni monkalo kehe tu li muyo. Ongiini tatu vulu oku shi ninga?

¹² Natu taleni koshiholelwa shomumwameme Mirjeta, * ngoka a valelwa moshilongo shoka sha li nale Yugoslavia. Momudhingoloko moka a putukila, aantu oya li ye tonde Aaserbia. Sho a tseya kombinga yaJehova, okwa mono kutya Jehova ke hole omuhoko gumwe shi vulithe omukwawo. Ihe Satana oye a hala aantu ya kale ye tondathane. Onkee ano, Mirjeta okwa kambadhala okulundulula omukalo moka a li u uvitile Aaserbia. Sho iita ya tukuluka pokati komihoko dhimwe momudhingoloko moka ha zi, Mirjeta okwa tameke okukala ishewe kee hole Aaserbia. Ka li nokuli a hala oku ya uvithila. Okwa li e shi shi kutya iikala mbyoka kayi li nawa, nokwa indile Jehova e mu kwathele kaa kale u uvite ngawo. Okwe mu pula wo opo e mu kwathele a tameke okukokola ondjila. Mirjeta ota ti: “Onda mona okutya okugandja eitulomo kuukalele ohaku kwathele lela. Ohandi kambadhala okuholela uukwatya waJehova wohole, ngele ndi li muukalele. Ngashingeyi onda mona kutya iikala yandje oye ende tayi kana po.”

13. (a) Oshike sha ningilwa omumwameme Zoila, nokwa li inyenge ngiini? (b) Oshike tatu ilongo moshiholelwa shaZoila?

¹³ Zoila, omumwameme ngoka a za kuMeksiko, okwa tembukile koNdowishi. Megongalo lyawo omuna aamwatate naamwameme ya za koshitopolwa shimwe shaAmerika lyokUumbugantu. Zoila okwa ti kutya yamwe yomuyo ohaya kala taya sheke oshilongo shaandjawo, omikalondjigilile dhawo nomusika yawo. Shoka oshe mu geyitha noonkondo. Onkee ano, okwa galikana kuJehova, opo e mu kwathele kee shi tule komwenyo. Andola owa li monkalo ya fa ndjoka, ando owi inyenge ngiini? Yamwe yomaamwatate naamwameme otaya kambadhala natango okupangela omaiyuvo gawo, ngele oyu uvu aantu taya popi nayi mpoka ya za. Onkee ano, inatu hala nando tu popye nenge tu ninge sha, shoka tashi ka ulika kutya otwa tala ko omuhoko gumwe ogwo gwa simana gu vule omikwawo. Inatu hala tu ete etopoko megongalo nenge kehe mpoka tu li. —  Aaroma 14:19; 2 Aakorinto 6:3.

14. Oshike tashi vulu oku ku kwathela wu kale ho tala ko aantu ngaashi Jehova he ya tala ko?

¹⁴ Atuheni otu shi shi nawa kutya oshigwana shaJehova osha hangana. Onkee ano, inatu kala nando tu uvite kutya ehala lyontumba nenge oshilongo shontumba osha simana shi vule iikwawo. Ihe aanegumbo yoye naamboka wa putuka nayo, otashi vulika ye ku nwetha mo wu kale wu hole ehala mpoka wa za. Otashi vulika  poompito dhimwe ho kala kuu hole aantu mboka ya za kiigwana yilwe, ye na omuthigululwakalo gulwe, eleka lilwe noya za momuhoko gulwe. Oshike tashi vulu oku ku kwathela wu lundulule iikala yoye? Tedhatedha kunkene Jehova a tala ko aantu mboka haya kala yu uvitile iilongo yawo uuntsa, nenge mboka haya kala ye wete kutya oya simana ye vule yakwawo. Ninga omapekapeko ga gwedhwa po kombinga yoshinima shika pekonakono lyoye lyopaumwene nenge pelongelokalunga lyuukwanegumbo. Pula wo Jehova e ku kwathele wu kale ho tala ko aantu ngaashi ye he ya tala ko. —  Lesha Aaroma 12:2.

15, 16. (a) Aantu yamwe otaye ki inyenga ngiini molwaashoka twa yooloka ko kuyo? (b) Ongiini aavali taya vulu okukwathela oyana ya kale aadhiginini kuJehova?

¹⁵ Otwa hala okulongela Jehova neiyuvo lya yela. Onkee ano, omathimbo gamwe otashi vulika tu na okukala twa yooloka ko thiluthilu kaalongi pamwe natse, aalongwa ooyakwetu, aashiinda naashiwikile. (1 Petrus 2:19) Jesus okwe tu londodha nokuli kutya aantu otaye ke tu tonda, molwaashoka twa yooloka ko kuyo. Dhimbulukwa kutya aantu oyendji mboka haye tu pataneke kaye shi sha kombinga yUukwaniilwa waKalunga. Onkee ano, kayu uvite ko kutya omolwashike sha simana kutse okwaambidhidha nuudhiginini Uukwaniilwa, pehala lyomapangelo gopantu.

¹⁶ Ngele otwa hala okukala aadhiginini kuJehova, otwa pumbwa okuvulika kuye, kashi na nduno mbudhi kutya aantu otaye ke tu ningila shike nenge otaya ka tya shike. (Daniel 3:16-18) Aagundjuka oyo unene haya mono oshidhigu okukala ya yooloka ko kaantu yalwe. Onkee  ano, aavali, kwatheleni aanona yeni ya kale ye na uupenda kosikola. Aanona otashi vulika ya kale ya tila okutinda ya salute epandela nenge ya kuthe ombinga momasiku gomafudho goshilongo. Pethimbo lyelongelokalunga lyuukwanegumbo, otamu vulu okukonakona nkene Jehova u uvitile iinima mbyoka. Longa aamwoye nkene ye na okuyelitha shoka yi itaala, momukalo gwa yela notagu ulike esimaneko. (Aaroma 1:16) Ngele otashi vulika, ya kwathela mokupopya naalongi yawo, wu ya fatululile kutya oshike mwi itaala.

17. Otu na okuyanda okudhiladhila kwa tya ngiini, nomolwashike?

¹⁷ Otu hole iikulya, elaka, omahala nomikalondjigilile ndhoka twa putukila mudho. Ihe mbela ohatu kala tu uvite aluhe kutya shoka tu hole osho sha simana shi vulithe shoka aantu yalwe ye hole? Jehova okwa hala tu nyanyukilwe eshito lye alihe. (Episalomi 104:24; Ehololo 4:11) Onkene, ku na okukala wu wete kutya omukalo gumwe gwokuninga iinima ogwo gwa simana gu vule dhilwe.

18. Omolwashike tu na okutala ko aantu ngaashi Jehova he ya tala ko?

¹⁸ Jehova okwa hala aantu ayehe yi ilonge kombinga ye, ye mu longele noya kale nomwenyo sigo aluhe. (Johannes 3:16; 1 Timoteus 2:3, 4) Onkee ano, ngele shoka omumwatate ta popi osha yooloka ko kwaashoka twi itaala, otu na okukala tu na ehalo lyokupulakena komadhiladhilo ge, shampa owala kaage li pondje yehalo lyaJehova. Ngele otwe shi ningi, onkalamwenyo yetu otayi ka kala yi hokitha noyi nyanyudha. Otatu ka kala wo twa hangana naamwatate naamwameme. Ngaashi twa zi nokukundathana, molwaashoka ohatu ambidhidha Jehova nuudhiginini nosho wo Uukwaniilwa we, ihatu kutha ombinga momakuyunguto gomuuyuni mbuka. Otu tonde uuntsa nosho wo ombepo yethigathano ndjoka yi li muuyuni waSatana. Inatu pandula tuu sho Jehova e tu longa tu kale tu hole ombili notu kale aaifupipiki! Otu uvite naanaa ngaashi omupisalomi ngoka a popi a ti: “Osho opala sho opalelela aantu ayehe ngele taa kala ye [holathane] ngaashi aamwayinathana.” —  Episalomi 133:1.