1, 2. (a) Omolwashike wi itaala kutya Jehova oku hole aantu ye? (b) Aantu oya shitwa nompumbwe yini?

OMOLWASHIKE wi itaala kutya Jehova oku hole aantu ye? Manga inoo yamukula epulo ndyoka, tala tango kiiholelwa tayi landula: Aamwatate naamwameme oya kala haya tsu omumwameme Taylene omukumo, uule woomvula dhontumba. Oye mu lombwele kutya ina pumbwa okulonga shi vulithe poonkondo dhe. Okwa ti: “Ando Jehova okwa li kee hole ndje, ando ina kala ha pe ndje omayele ethimbo kehe.” Brigitte ngoka a kala ta putudha aanona ye yaali konima sho omusamane gwe a hulitha, ota ti: “Okuputudha aanona muuyuni waSatana oshinima oshidhigu, unene tuu ngele owu li ongoye awike. Ihe ondi itaala kutya Jehova oku hole ndje, oshoka okwa kala ha wilike ndje muudhigu kehe, ye ina etha ndi gwile muudhigu wu vule oonkondo dhandje.” (1 Aakorinto 10:13) Sandra oku na uuvu mboka itaawu vulu okwaaludhwa. Koshigongi shimwe, omumwameme gumwe okwa li u ulukile Sandra olukeno. Omusamane  gwaSandra ota ti: “Nonando ka twa li tu mu shi nale, shoka a ningi oshe tu nyanyudha. Iinima mbyoka aamwatate naamwameme haya ningi, kutya nduno iishona, ohayi ulukile ndje kutya Jehova oku tu hole.”

² Tate Jehova okwa shita aantu nompumbwe yokukala ye holike noyokukala ye hole aantu. Ihe oshipu okuteka omukumo, ngele otatu ehama nenge tu na uupyakadhi wopamahupilo nenge molwaashoka ihaa tu mono iizemo iiwanawa muukalele. Ngele otwa tameke okukala tu uvite kutya Jehova ke tu hole we, natu dhimbulukwe kutya okwe tu lenga, noku li putse te tu tsu omukumo note tu kwathele. Ke na esiku e tu dhimbwe, ngele otwa kala aadhiginini kuye. —  Jesaja 41:13; 49:15.

3. Oshike tashi vulu okukoleka eitaalo lyetu kutya ohole yaJehova otayi kalelele?

³ Oonzapo adhihe ndhoka dha tumbulwa metetekelo, odhi itaala kutya Kalunga okwa kala pamwe nayo pethimbo lyuudhigu. Natse otatu vulu okukala tu na einekelo kutya oku li pamwe natse. (Episalomi 118:6, 7) Moshileshwa shika, otatu ka kundathana iinima ine mbyoka tayi ulike kutya Jehova oku tu hole. Iinima mbyoka oyo: (1) eshito lye, (2) Ombiimbeli, (3) egalikano (4) ekulilo. Ngele otwa tedhatedha kiinima iiwanawa mbyoka Jehova a ninga, otashi ke tu kwathela tu kale twa lenga ohole ye tayi kalelele. —  Lesha Episalomi 77:11, 12.

4. Eshito lyaJehova otali tu longo shike?

⁴ Uuna tatu tala keshito lyaJehova, ohatu ilongo kutya oku tu hole lela. (Aaroma 1:20) Pashiholelwa, Jehova ina shita owala evi, opo tu kale ko, ihe okwa hala tu nyanyukilwe onkalamwenyo. Otwa pumbwa iikulya, na Tate Jehova okwe tu pa iikulya yomaludhi ogendji mbyoka tatu vulu okunyanyukilwa. (Omuuvithi 9:7) Omumwameme Catherine ngoka ha kala moKanada, oku hole okutala eshito pethimbo lyoongala tadhi sheneke. Ota ti: “Ohashi kumitha ndje okumona nkene iimeno hayi tameke okuhapa. Oongala tadhi tsapuka nuudhila tawu sheketa. Muudhila moka omwa kwatelwa wumwe uushuushuka mboka hawu ya okulya moshikwatelwa shoka shi li pondje, pekende lyokombitha yandje. Jehova oku na okukala e tu hole, sho he tu pe iinima ayihe mbyoka hayi tu nyanyudha.” Tate yetu oha nyanyukilwa eshito lye, nokwa hala tu li nyanyukilwe wo. —  Iilonga 14:16, 17.

5. Omukalo moka Jehova a shita aantu, otagu holola ngiini ohole ye?

⁵ Jehova okwe tu pa uunkulungu wokulonga iilonga noku yi nyanyukilwa. (Omuuvithi 2:24) Okwa pa aantu oshinakugwanithwa shoku udha evi, oku li longa nokusila oshimpwiyu oohi, uudhila niinamwenyo yilwe yi li ko. (Genesis 1:26-28) Okwe tu shita wo nomaukwatya omawanawa, opo tu vule oku mu holela. —  Aaefeso 5:1.

6. Omolwashike tu na okukala tu hole Oohapu dhaKalunga noonkondo?

⁶ Jehova okwe tu pa Ombiimbeli, oshoka oku tu hole noonkondo. Otayi tu lombwele shoka twa pumbwa okutseya kombinga ye, nankene u uvitile aantu. Pashiholelwa, Ombiimbeli otayi tu lombwele nkene Jehova a li u uvitile Aaisraeli mboka ya li haya yono olundji. Episalomi 78:38 otayi ti: “Kalunga okwa kala omunahenda; okwe ya dhimine po omayono gawo ye ine ya yona po. Omathimbo nomathimbo okwa mweneke ondjahi ye ye ine etha yi mu tone.” Okutedhatedha kovelise ndjoka, otashi ke ku kwathela wu mone kutya Jehova oku ku hole noku na ko nasha nangoye. Otatu vulu okukala tu na einekelo kutya Jehova oku tu hole noonkondo. —  Lesha 1 Petrus 5:6, 7.   

7. Omolwashike Ombiimbeli yi na ongushu kutse?

 ⁷ Omolwashike Ombiimbeli yi na okukala yi na ongushu kutse? Omolwaashoka Jehova oha popi natse okupitila muyo. Ngele omuvali nokamwana ohaya popi ya mangulukilathana, otaya koleke ohole yawo notaya kala yi inekelathana. Jehova oye Tate omunahole. Nonando inatu mu mona nando onale noinatu uva ewi lye, oha popi natse okupitila mOmbiimbeli. Natu kale aluhe hatu pulakene kuye. (Jesaja 30:20, 21) Uuna tatu lesha Ombiimbeli, ohatu tseya Tate Jehova ngoka he tu wilike nohe tu gamene, nohatu kala twe mu inekela. —  Lesha Episalomi 19:7-11; Omayeletumbulo 1:33.

8, 9. Jehova okwa hala tu tseye shike? Gandja oshiholelwa tashi zi mOmbiimbeli.

⁸ Jehova okwa hala tu kale tu shi kutya oku tu hole noiha tala owala kokwaagwanenena kwetu. Oha tala komaukwatya getu omawanawa. (2 Ondjalulo 16:9) Natu kundathaneni nkene Jehova a li a mono uuwanawa momukwaniilwa Jehosafat gwaJuda. Jehosafat okwa li a zimine a ye nomukwaniilwa Ahab gwaIsraeli, ya ka kondjithe Aasiria puRamot shaGilead. Ndyoka olya li etokolo lya puka. Nonando aapolofeti yiifundja 400 oya li ya lombwele Ahab kutya ota ka sindana molugodhi, omupolofeti gwaJehova, Mikaia, okwa lombwele Jehosafat naAhab kutya ngele oya yi kolugodhi, otaya ka sindika. Shoka osho naanaa sha ningwa. Ahab okwa sile molugodhi naJehosafat okwa zi koshakapalwa. Konima yolugodhi, Jehova okwa longitha Jehu a ka pukulule Jehosafat. Ihe Jehu okwa lombwele wo omukwaniilwa a ti: “Mungoye omu na ngaa uuwanawa washa.” —  2 Ondjalulo 18:4, 5, 18-22, 33, 34; 19:1-3.

⁹ Oomvula opo dha zile ko, Jehosafat okwa li a tumu aambala, Aalevi naayambi ya talele po iilando yaJuda, ya longe aantu Ompango yaJehova. Oya li ya pondola, oshoka naantu yomiigwana yilwe oya li ya tseya Jehova. (2 Ondjalulo 17:3-10) Onkee ano, nonando Jehosafat okwa ningi etokolo lya puka, Jehova ina dhimbwa iilonga ye iiwanawa mbyoka a longele petameko. Oshiholelwa shika otashi hekeleke, oshoka natse omathimbo gamwe ohatu puka. Ihe ngele otwa kambadhala okulongela Jehova nuudhiginini, ota tsikile okukala e tu hole, noita ka dhimbwa iilonga iiwanawa mbyoka twa longa.

10, 11. (a) Omolwashike egalikano li li omagano gi ikalekelwa, ngoka Jehova e tu pa? (b) Kalunga oha yamukula ngiini omagalikano getu? (Tala kethano lyopetameko.)

¹⁰ Omusamane ngoka e hole oyana oha pulakene kuyo, uuna taya popi naye. Oha kala a hala okuuva shoka yu uvite, oshoka oku ya hole noonkondo. Tate yetu omunahole, Jehova, naye osho e li ngaaka. Oha pulakene komagalikano getu. Oshi li uuthembahenda uunene okupopya naTate yetu.

¹¹ Tate Jehova okuume ketu, noha kala aluhe a hala okupulakena komagalikano getu. Otatu vulu oku mu galikana ethimbo kehe. Taylene ngoka a tumbulwa metetekelo, ota ti: “Oto vulu oku mu lombwela kehe shoka wa hala.” Ngele otwa lombwele Tate Jehova omadhiladhilo getu gomuule, otashi vulika e tu yamukule okupitila menyolo, moshileshwa miileshomwa yetu nenge e tu tse omukumo okupitila maamwatate naamwameme. Jehova ohu uvu omaindilo getu  taga zi komutima, noku tu uvite ko, nonando yalwe otashi vulika kaaye tu uvite ko. Sho ha yamukula omagalikano getu, otashi ulike kutya oku tu hole nohole tayi kalelele.

12. Omolwashike tu na okukonakona omagalikano ngoka ga nyolwa mOmbiimbeli? Gandja oshiholelwa.

¹² Otatu vulu okwiilonga iinima ya simana momagalikano ngoka ga nyolwa mOmbiimbeli. Otashi ka kala oshiwanawa, ngele otwa kala hatu ga konakona omathimbo gamwe, pelongelokalunga lyetu lyuukwanegumbo. Ongushu yomagalikano getu otayi ka hwepopala, ngele otwa tedhatedha komagalikano ngoka gaapiya yaKalunga yonale. Pashiholelwa, oto vulu okukonakona egalikano lyaJona ndyoka a galikana neifupipiko, sho a li mela lyohi onene. (Jona 1:17–2:10) Konakona wo egalikano lyaSalomo lya za komutima, ndyoka a galikana peyapulo lyotempeli. (1 Aakwaniilwa 8:22-53) Nenge wu tedhatedhe kegalikano ndyoka Jesus e tu lombwele, opo e tu longe okugalikana. (Mateus 6:9-13) Sha simanenena, ‘oompumbwe dhoye kala aluhe ho dhi tseyithile Kalunga.’ Kungeyi, ‘ombili yaKalunga, ndjoka yi vule uunongo auhe wopantu, otayi gamene omwenyo gwoye nomadhiladhilo goye.’ Shika otashi ke tu kwathela tu kale twa lenga unene ohole yaTate Jehova ndjoka tayi kalelele. —  Aafilippi 4:6, 7.

13. Ekulilo olye tu pa ompito yashike?

¹³ Tate Jehova okwe tu pe omagano gekulilo, “opo tu kale tu na omwenyo.” (1 Johannes 4:9) Otaga ulike kutya Jehova oku tu hole noonkondo. Omuyapostoli Paulus okwe shi popi a ti: “Kristus okwa sile aakolokoshi pethimbo lyu uthwa kuKalunga. Osho oshinima oshidhigu, omuntu gwontumba ngele ta si omolwomuyuuki. Eeno, pamwe otashi vulika, omuntu gwontumba ta si omolwomuntu gumwe omwaanawa. Ihe Kalunga okwe tu hololele kutya oku tu hole, Kristus sho a si peha lyetu, manga twa li aalunde.” (Aaroma 5:6-8) Ekulilo olimwe lyomiinima mbyoka Tate Kalunga a ningi, opo e tu ulukile kutya oku tu hole, notali tu pe ompito yokukala tu na ekwatathano lyopothingo naye.

14, 15. Ekulilo otali gandja ompito yashike (a) kAakriste aagwayekwa? (b) kwaamboka ye na etegameno lyokukala nomwenyo kombanda yevi?

¹⁴ Okangundu okashona kAakriste oku ulukilwa ohole yaJehova tayi kalelele momukalo gwi ikalekelwa. (Johannes 1:12, 13; 3:5-7) Okangundu haka okwe ka gwayeka nombepo ondjapuki. Shika oshe ya ninga oyana yaKalunga. (Aaroma 8:15, 16) Omolwashike Paulus a ti kutya oya kuutumba ya “wape okupangela pamwe [naKristus] megulu,” nonando yamwe oye li natango kombanda yevi? (Aaefeso 2:6) Omolwaashoka Jehova okwe ya pa etegameno lyoku ka kala nomwenyo gwaaluhe megulu. —  Aaefeso 1:13, 14; Aakolossa 1:5.

¹⁵ Ayehe mboka kaaye shi aagwayekwa otaya vulu okuninga okuume kaKalunga, ngele  oya kala yi itaala mekulilo. Oye na wo ompito yokuninga oyana yaKalunga noyokukala nomwenyo sigo aluhe meviparadisa. Ekulilo otali holola kutya Tate Jehova oku hole aantu ayehe. (Johannes 3:16) Itashi nyanyudha tuu okukala tu shi kutya ngele otwa kala tatu longele Tate Kalunga nuudhiginini, ote ke tu pa onkalamwenyo ombwanawa muuyuni uupe! Onkee ano, natu ulike kutya otwa lenga ekulilo, oshoka otali ulike kutya Kalunga oku tu hole nohole tayi kalelele.

16. Okutedhatedha kohole yaKalunga, otashi ke tu inyengitha tu ninge shike?

¹⁶ Omikalo adhihe moka Jehova e tu ulukila ohole, itatu dhi mana. Omukwaniilwa David okwi imbi a ti: “Omadhiladhilo goye, Kalunga, olye te ga tseya? Ogo ogendji taga nyengana okuyalulwa. Ngele tandi ga yalula, ogo ogendji ge thike pehekevi lyopefuta.” (Episalomi 139:17, 18) Ngele otwa kala hatu tedhatedha komikalo ndhoka Jehova e tu ulukila ohole ye, otashi ke tu inyengitha tu kale tu mu hole notu mu longele nomwenyo aguhe.

17, 18. Omomikalo dhini tatu vulu okuulika kutya otu hole Tate Kalunga?

¹⁷ Otatu vulu okuulukila Tate Jehova ohole yetu momikalo odhindji. Pashiholelwa, otatu vulu oku shi ninga mokulombwela yalwe onkundana ombwanawa yUukwaniilwa. (Mateus 24:14; 28:19, 20) Otatu vulu wo oku mu ulukila ohole yetu mokukala aadhiginini, uuna tu li momamakelo ngoka taga yeleke eitaalo lyetu. (Lesha Episalomi 84:11; Jakob 1:2-5.) Nonando omamakelo oga kale omadhigu shi thike peni, otu na uushili kutya Jehova oku tu wete note ke tu kwathela, oshoka oku tu hole. —  Episalomi 56:8.

¹⁸ Ohole yetu yokuhola Jehova oyo hayi tu inyengitha tu tedhatedhe kiinima ayihe iiwanawa mbyoka a shita. Ohatu ulike kutya otu mu hole notu hole Oohapu dhe, ngele otwa kala hatu dhi konakona nuukeka. Ohatu galikana aluhe kuJehova, oshoka otu mu hole notwa hala okukoleka ekwatathano lyetu naye. Nuuna tatu tedhatedha komagano omawanawa gekulilo, ohole yetu yoku mu hola ohayi koko lela. (1 Johannes 2:1, 2) Ndhika omikalo owala omishona, moka tatu vulu okuulukila Tate Jehova kutya otwa lenga ohole ye ndjoka tayi kalelele.