1. Otu li momathimbo geni ngashingeyi?

OTU li ‘momathimbo omadhigu.’ ‘Omasiku gahugunina’ oga tameke mo 1914, noonkalo kombanda yevi odha kala tadhi nayipala. (2 Timoteus 3:1-5, OB-1954) Nonando ongawo, otwa tegelela oonkalo dhi nayipale ishewe shi vulithe nale, oshoka Ombiimbeli oya hunganeka kutya “aakolokoshi naafudhime otaa tsikile okuza muuwanawa yu uka muuwinayi.” —  2 Timoteus 3:13.

2. Aantu oyendji ohaya nyanyukilwa omainyanyudho ga tya ngiini? (Tala kethano lyopetameko.)

² Aantu oyendji kunena, ohayi inyanyudha mokutala nenge mokuninga iinima mbyoka ya kwatela mo omiyonena nenge iihulo, nenge uumpulile noondemoni. Pashiholelwa, olundji ointaneta, oopolohalama kotiivii, oomuvi, omambo niifo, ohayi ningitha omiyonena niihulo yi kale ya tali ka ko kutya iinima yi li nawa. Iikala ya tya ngeyi oya li hayi tilitha aantu muuyuni wonale, ihe ngashingeyi oya taambiwa ko noyi li paveta momahala  gamwe. Ihe shika inashi hala okutya Jehova okwa hokwa iikala ya tya ngaaka. —  Lesha Aaroma 1:28-32.

3. Aantu oyendji oya tala ko ngiini mboka hayi iyutha komithikampango dhaKalunga?

³ Methelemumvo lyotango, aantu oya li wo haya tala iinima mbyoka yi na omiyonena niihulo, opo yi inyanyudhe. Ihe aalanduli yaJesus kaya li haya tala iinima mbyoka, oshoka oya li hayi iyutha komithikampango dhaKalunga. Shika osha ningitha aantu mboka ye ya dhingoloka ya kale ya “kumwa.” Oshizemo? Aantu mboka oya tameke okusheka Aakriste nokuya hepeka. (1 Petrus 4:4) Sigo onena, aantu oyendji ohaya kala ya kuminwa aantu mboka hayi iyutha komithikampango dhaKalunga. Ombiimbeli otayi tu londodha nokuli kutya mboka haya landula oshiholelwa shaJesus Kristus “otaa ka hepekwa.” —  2 Timoteus 3:12, yelekanitha OB-1954.

4. Omolwashike kaatu na okukala tu hole uuyuni mbuka?

⁴ Ngele otwa hala okulonga ehalo lyaKalunga, itatu vulu okukala tu “hole uuyuni nenge iinima ayihe yomuuyuni.” (Lesha 1 Johannes 2:15, 16.) Satana, “kalunga komuuyuni mbuka,” oye ta pangele uuyuni. Oha longitha omalongelokalunga, omapangelo, omahangano nenge oongeshefa nomatseyitho giipindi, opo a pukithe aantu. (2 Aakorinto 4:4; 1 Johannes 5:19) Inatu hala tu nwethwe mo kuuyuni mbuka, nomolwaashono tu na okuyanda ookuume aawinayi. Ombiimbeli otayi tu londodha sha yela tayi ti: “Inamu puka. Ookuume aawinayi otaa yonagula omikalo omiwanawa.” —  1 Aakorinto 15:33, yelekanitha OB-1954.

5, 6. Oolye mboka kaatu na okweendathana nayo, nomolwashike?

⁵ Ngele otwa hala okukala tu na ekwatathano ewanawa naJehova, katu na okukala hatu endathana naantu mboka haya longo iilonga iiwinayi. Maantu mboka omwa kwathelwa mboka haya ti kutya otaya longele Jehova, ihe ihaya vulika kuye. Ngele omuntu a tya ngawo okwa yono eyono lya kwata miiti, e ta kala ini iyela ombedhi, katu na nando okweendathana naye. —  Aaroma 16:17, 18.

⁶ Olundji, aantu ohaya kala ya hala okwoopalela ookuume kawo nokukala ya hokiwa kuyo. Ano, ngele ohatu endathana naamboka ihaaya vulika kuKalunga, otatu ka thiminikwa tu longe shoka nayo haya longo. Pashiholelwa, ngele otu na uukuume wopothingo naahondeli, otatu ka kala twe ya fa. Shika osha ningilwa aamwatate naamwameme yamwe, naamboka inaayi iyela ombedhi, oya kondwa. (1 Aakorinto 5:11-13) Ngele omuntu ini iyela ombedhi, otaka ka kala monkalo ya faathana naandjoka ya hokololwa kuPetrus. —  Lesha 2 Petrus 2:20-22.

7. Oolye tu na okupanga uukuume wopothingo nayo?

⁷ Nonando otu hole aantu ayehe, katu na nando okukala tu na uukuume wopothingo  naantu mboka ihaaya vulika kuTate Kalunga. Osha puka ngele Onzapo yaJehova tayi endelathana nomuntu ngoka inaa ninginithwa nenge ihaa longele Jehova nuudhiginini. Osha simanenena okukala twa hokiwa kuJehova, shi vulithe okukala twa hokiwa kwaamboka kaaye mu hole. Otu na owala okukala tu na uukuume wopothingo naamboka haya longo ehalo lyaKalunga. Jesus okwa ti: “Oshoka kehe tuu ngoka ta gwanitha ehalo lyaKalunga, oye omumwameme omulumentu nomumwameme omukiintu nameme.” —  Markus 3:35.

8. Ookuume aawinayi, oya li ya nwetha mo ngiini Aaisraeli?

⁸ Ngele otu na ookuume aawinayi otaye ke tu fala moshiponga. Natu taleni kwaashoka sha ningilwa Aaisraeli, manga inaaya thika mEvi lyeuvaneko. Jehova okwe ya londodha kombinga yaantu mboka ya li mevi ndyoka. Okwa ti: “Ino inyongamena kookalunga yawo nenge u ya galikane, noino taamba eitaalo lyawo u li holele. Hanagula po ookalunga yawo ngoye u kumune po oongundhimanya dhawo. Ngele oto longele ndje, ngame Omuwa Kalunga koye.” (Eksodus 23:24, 25) Ihe oyendji yomAaisraeli kaya li ya vulika komalombwelo gaKalunga nokaya li aadhiginini kuye. (Episalomi 106:35-39) Oya ka mona oshizemo shini? Jehova okwe ke ekelahi oshigwana shoka e ta hogolola egongalo lyopaKriste, olyo li ninge aantu ye. —  Mateus 23:38; Iilonga 2:1-4.

9. Omolwashike iikundaneki yomuuyuni mbuka ya nika oshiponga?

⁹ Iikundaneki oyindji muuyuni, ngaashi oopolohalama kotiivii, omapandja gokointaneta nomambo, otayi vulu okuyona po ekwatathano lyetu naJehova. Iinima mbyoka ihayi kwathele Aakriste ya kale yi itaala muJehova nomomauvaneko ge. Ihe ohayi hwahwameke aantu ya kale yi inekela muuyuni waSatana wa kolokosha. Onkee ano, otwa pumbwa okukala twa kotoka, opo kaatu tale, kaatu leshe nenge kaatu pulakene kiinima mbyoka tayi ka kokeka mutse ‘uuhalu wuuyuni.’ —  Titus 2:12.

10. Oshike tashi ka ningilwa iikundaneki yuuyuni mbuka?

¹⁰ Masiku uuyuni waSatana niikundaneki mbyoka ya nika oshiponga, otayi ka hanagulwa po. Ombiimbeli oya ti: “Uuyuni niinima ayihe yi li mo mbyoka aantu ye yi hokwa, otayi hulu po. Ihe ngoka ta longo shoka Kalunga a hala, ota kala e na omwenyo aluhe.” (1 Johannes 2:17) Omupisalomi okwi imbi a ti: “Aakolokoshi otaa ka tidhwa po.” Okwa gwedha ko wo a ti: “Aayifupipiki otaa ka thigulula evi notaa ka mona uulinawa nombili.” Sigo uunake? Omupisalomi okwa ti: “Aayuuki otaa ka thigulula evi e taa kala mo sigo aluhe.” —  Episalomi 37:9, 11, 29.

11. Kalunga ohe tu kwathele ngiini tu tsikile okukala aadhiginini kuye?

¹¹ Ehangano lyaJehova olya yooloka ko kuuyuni waSatana, oshoka ohali tu kwathele tu kale mondjila ndjoka tayi fala komwenyo gwaaluhe. Jesus okwa galikana kuJehova a ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Jehova oha longitha ehangano lye, li tu pe kehe shoka twa pumbwa, opo tu mu tseye. Pashiholelwa, otu na iifo oyindji, uumbo, omambo, uuvidio nepandja lyetu lyokointaneta.  Mbika ohayi tu kwathele tu tsikile nokulongela Kalunga. Ehangano lye ohali tu longekidhile okugongala pandjigilile momagongalo ge vulithe 110 000 muuyuni awuhe. Shoka hatu ilongo mOmbiimbeli pokugongala hoka nopiigongi iinene, ohaku koleke eitaalo lyetu muJehova nomomauvaneko ge. —  Aahebeli 10:24, 25.

12. Yelitha kutya Ombiimbeli oya hala okutya ngiini, sho tayi ti oondjokana “odhi na okukala dhopakriste.”

¹² Aakriste mboka ya hala okuya mondjokana, oye na okukala ya kotokela mboka haya endathana nayo. Ombiimbeli otayi tu londodha tayi ti: “Inamu kambadhala okulongela kumwe naamboka yaa shi ooyitaali, oshoka shika itashi vulika. Shoka shi li mondjila naashoka sha puka, otayi vulu ngiini okukala kumwe? Uuyelele nomilema otayi vulu ngiini okukala mumwe?” (2 Aakorinto 6:14) Ombiimbeli otayi lombwele aapiya yaJehova kutya oondjokana dhawo “odhi na okukala dhopakriste.” Sha hala okutya, oye na okuya mondjokana nomuntu ngoka i iyapulila Jehova, a ninginithwa nohi iyutha komithikampango dhaJehova. (1 Aakorinto 7:39) Ngele owa yi mondjokana nomuntu ngoka e hole Jehova, oto ka kala wu na kuume ngoka te ke ku kwathela wu kale omudhiginini kuKalunga.

13. Kalunga okwa li a pe Aaisraeli oshipango shini kombinga yondjokana?

¹³ Jehova oku shi shoka she tu opalelela. Oshipango she kutya oondjokana “odhi na okukala dhopakriste,” okwe shi popile nale. Pashiholelwa, natu tale kwaashoka Jehova a li a lombwele Aaisraeli kombinga yaantu mboka ihaaye mu longele. Okwa popi okupitila muMoses a ti: “Ino hokanathana nayo, yo yaa hokane aamwoye, oshoka otaa ka kutha aamwoye pOmuwa yo ya ka longele iikalunga. Ngele shika tashi ningwa, Omuwa ote ku geele e te ku dhimi po ohaluka.” —  Deuteronomium 7:3, 4.

14, 15. Oshike sha ningilwa Salomo, sho i ipwililikile oshipango shaJehova?

¹⁴ Konima sho Salomo a ningi omukwaniilwa gwaIsraeli, okwa galikana a pewe uunongo, na Jehova okwa yamukula egalikano lye. Salomo okwa kala a tseyika apuhe, oshoka okwa li omuleli gwoshigwana sha lalekwa nuuyamba nokwa li omunandunge a shiga ko. Omukwaniilwakiintu gwaSheba okwa li a kuminwa uunongo waSalomo, e ta ti: “Uunongo woye nuuyamba woye uunene u vule shoka nda lombwelwa.” (1 Aakwaniilwa 10:7) Oshiholelwa shaSalomo otashi tu longo shoka tashi vulu okuningilwa omuntu ngoka hi ipwililikile oshipango shaKalunga, e ta yi mondjokana nomuntu ngoka ihaa longele Jehova. —  Omuuvithi 4:13.

¹⁵ Nonando Jehova okwa li a yambeke Salomo, Salomo ka li a vulika koshipango she. “Okwa li e hole aakiintu oyendji aakwiilongo,” mboka ihaaya longele Jehova. Mokweendela  ko kwethimbo, okwa hokana aakiintu aana yokombanda 700 naakiintu yoponto 300. Oshe ke mu etela iizemo yini? Salomo sho a kulupa, aakulukadhi ye “oye mu simanekitha iikalunga iikwiilongo, . . . Okwa yono kOmuwa.” (1 Aakwaniilwa 11:1-6) Eendathano ewinayi olye mu nwetha mo noina kala we omudhiginini kuJehova. Ngele shika osha ningilwa Salomo, natse otashi vulu oku tu ningilwa. Nomolwaashono kaatu na okudhiladhila tu ye mondjokana nomuntu ngoka kee hole Jehova.

16. Ombiimbeli oya gandja omayele geni kwaamboka ye na ookuume kopandjokana, mboka ihaaya longele Jehova?

¹⁶ Ongiini ngele omuntu okwa ningi Onzapo, ihe kuume ke kopandjokana ke shi Onzapo? Ombiimbeli otayi ti: “Osho ngeyi ne wo aakiintu, vulikeni kaalumentu yeni, opo aalumentu mboka inaa itaala oohapu dhaKalunga, ya falwe meitaalo komikalo dheni. Itamu pumbwa oku shi ninga noohapu.” (1 Petrus 3:1) Aasamane mboka ye na aakulukadhi ihaaya longele Jehova, nayo otaya vulu okutula miilonga enyolo ndika. Ombiimbeli oya popya sha yela nawa, sho ya ti: Kala omusamane nenge omukulukadhi omwaanawa e to tula miilonga omithikampango dhaKalunga dhi na ko nasha nondjokana. Ngele kuume koye kopandjokana ngoka ihaa longele Jehova, okwa mono kutya owu na iikala iiwanawa, ota ka kala wo a hala okulongela Jehova. Shika osha ningilwa aaihokani oyendji.

17, 18. Oshike sha kwathele Noa naanegumbo lye ya hupe pEyelu, noshike sha kwathele Aakriste yomethelemumvo lyotango ya hupe, sho Jerusalem sha hanagulwa po?

¹⁷ Ookuume aawinayi otaya vulu oku ku nwetha mo wu kale ihoo vulika kuJehova. Ihe ookuume aawanawa, otaya vulu oku ku kwathela wu kale omudhiginini kuJehova. Noa okwe tu tulila po oshiholelwa oshiwanawa. Okwa li ko pethimbo mpoka “uuwinayi waantu kombanda yevi” wa li wi indjipala, ‘nomadhiladhilo gawo ga li ga pilaala ethimbo alihe.’ (Genesis 6:5) Aantu oya li aakolokoshi unene, naashoka osha ningitha Jehova a tokole a hanagule po uuyuni mboka wuukolokoshi. Ihe Noa okwa li a yooloka ko kuyo. Ombiimbeli otayi ti kutya okwa li omulumentu “omuyuuki,” nokwa “kala mekwatathano naKalunga.” —  Genesis 6:7-10.

¹⁸ Noa ka li he endathana naantu mboka kaaye hole Jehova. Ye naanegumbo lye, oya longo nuudhiginini mokutunga onguluwato, nokwa kala “omuuvithi guuyuuki.” (2 Petrus 2:5) Noa nomukulukadhi gwe nosho wo oyanamati yatatu naakulukadhi yawo, oya kala ye na uukuume wopothingo. Oya kala haya longo shoka sha hokiwa kuKalunga. Oshizemo, oya hupu pEyelu. Atuheni mboka tu li kombanda yevi kunena, otwa za moluvalo lwawo. Onkee ano, otu na okupandula sho Noa naanegumbo lye ya vulika kuJehova, naasho ya yanda eendathano ewinayi. Aakriste yomethelemumvo lyotango, nayo oya ningile oshinima sha faathana. Kaya li ye endathana naantu mboka kaaye hole Jehova. Oya li ya vulika kuye, e taya hupu, sho Jerusalem sha hanagulwa po mo 70 E.N. —  Lukas 21:20-22.

19. Oshike tashi ke tu kwathela tu kale aadhiginini kuJehova?

¹⁹ Ngaashi Noa naanegumbo lye nosho wo Aakriste yomethelemumvo lyotango, natse ihatu endathana naantu mboka kaaye hole Jehova. Otu na omamiliyona gaamwatate naamwameme aadhiginini mboka tatu vulu okuhogolola tu pange uukuume nayo. Otaye ke tu kwathela tu ‘kale twa kola meitaalo,’ sho tu li momathimbo ngaka omadhigu. (1 Aakorinto 16:13; Omayeletumbulo 13:20) Dhiladhila owala kunkene tashi ka kala oshiwanawa, sho tatu ka hupa pehanagulo lyuuyuni mbuka wa kolokosha, noku ka kala muuyuni uupe waKalunga. Osha simana tu yande ookuume aawinayi neendathano ewinayi ngashingeyi!