1, 2. (a) Owa hala unene oku ka ninga shike mOparadisa? (Tala kethano lyopetameko.) (b) Oshike tashi ke tu etela unene enyanyu?

OTWA tegelela nondjuulukwe oku ka mona “omwenyo gwaaluhe.” Omuyapostoli Paulus okwa popi kutya hoka okwo “okukalamwenyo kwashili.” (Lesha 1 Timoteus 6:12, 19.) Oyendji yomutse otatu ka kala mOparadisa kombanda yevi sigo aluhe. Oshidhigu okudhiladhila kutya otashi ka kala shi li ngiini okupenduka ongula kehe wu na uukolele, wa nyanyukwa nowa gwanenwa. (Jesaja 35:5, 6) Dhiladhila owala nkene to ka kala wu uvite, sho wu li nookuume naakwanezimo, mwa kwatelwa mboka taya ka yumudhwa. (Johannes 5:28, 29; Iilonga 24:15) Oto ka kala wu na ethimbo lya gwana lyokwiilonga iinima iipe nokuhwepopaleka uunkulungu mboka wu na nale. Pashiholelwa, oto ka vula okwiilonga oshindji kombinga yuunongononi. Nenge wu ki ilonge okuhika oshihikomwa nenge okuthaneka omagumbo, opo wu vule oku ka thaneka egumbo lyoye mwene.

² Nonando otwa halelela oku ka ninga iinima mbyoka, okulongela Jehova okwo taku ke tu etela unene enyanyu. Dhiladhila  owala nkene onkalamwenyo tayi ka kala, uuna aantu ayehe taya ka yapula edhina lyaJehova notaya ka zimina okupangelwa kuYe. (Mateus 6:9, 10) Otatu ka nyanyukwa okumona evi lyu udha aantu ya gwanenena, ngaashi Tate Kalunga a li a hala shi kale petameko. Itashi ka kala tuu oshipu okupanga uukuume naTate Jehova, sho te tu kwathele tu kale twa gwanenena! —  Episalomi 73:28; Jakob 4:8.

3. Oshike tu na okwiilongekidhila ngashingeyi?

³ Otwi itaala kutya Kalunga ota ka ninga iinima ayihe mbyoka iiwanawa, oshoka “Kalunga iha nyengwa kusha.” (Mateus 19:25, 26) Ngele otwa hala oku ka kala nomwenyo gwaaluhe muuyuni uupe, onawa tu kambadhale ngashingeyi “okwiimonena” omwenyo ngoka. Otu shi kutya ehulilo masiku otali ya, onkee ano, otu na okuulika monkalamwenyo yetu kutya otwe li tegelela ethimbo kehe. Otu na okuninga ashihe shoka tatu vulu ngashingeyi, opo tu ilongekidhile onkalamwenyo muuyuni uupe. Natu ka taleni nkene tatu vulu oku shi ninga.

4. Ongiini tatu vulu okwiilongekidhila onkalamwenyo muuyuni uupe ngashingeyi? Gandja oshiholelwa.

⁴ Ongiini tatu vulu okwiilongekidhila onkalamwenyo muuyuni uupe ngashingeyi? Ngele otwa hala okutembukila koshilongo shilwe, otashi vulika tu ninge iinima yontumba, opo twi ilongekidhile etembu ndyoka. Pashiholelwa, otashi vulika twi ilonge elaka nomithigululwakalo dhaantu yamo. Otashi vulika wo tu kambadhale okuteleka iikulya yokoshilongo shoka. Sha faathana, otatu vulu okukala twa fa nale tu li muuyuni uupe, opo twi ilongekidhile onkalamwenyo ndjoka. Natu kundathaneni omikalo dhimwe moka tatu vulu oku shi ninga.

5, 6. Ngele otwi ilongo okuvulika komalombwelo taga zi kehangano lyaJehova, otashi tu kwathele ngiini tu ilongekidhile onkalamwenyo muuyuni uupe?

⁵ Muuyuni mbuka tu li muwo, Satana okwa hala okudhiladhilitha aantu kutya otaya vulu okuninga kehe shoka ya hala. Oyendji oyu uvite kutya oye na okukala ya manguluka, noinaya pumbwa okuvulika kuTate Kalunga. Oshizemo? Oyi iyetela okumona iihuna neyeme enene. (Jeremia 10:23) Ihe Tate Jehova, Omupangeli omunahole. Itashi ka kala tuu oshiwanawa oku ka kala muuyuni uupe, moka aantu ayehe haya vulika kuYe!

⁶ Otatu ka nyanyukilwa okulandula omalombwelo ngoka ehangano lyaJehova tali ke tu pa muuyuni uupe, oku tu kwathela tu ninge evi oparadisa ombwanawa, notu longe mboka taya yumudhwa. Tate Jehova ote ke tu pa iilonga oyindji. Ihe ongiini ngele mboka taya kwatele komeho oye tu pula tu ninge oshinima shoka kaatu hole? Mbela otatu ka vulika ngaa? Otatu ka ninga ngaa ngaashi tatu vulu tu shi gwanithe po nenyanyu? Opo tu ilongekidhile omwenyo gwaaluhe muuyuni uupe, otwa pumbwa okuvulika komalombwelo ngoka tatu pewa kehangano lyaJehova ngashingeyi.

7, 8. (a) Omolwashike tu na okulongela kumwe naamboka taya kwatele komeho? (b) Omalunduluko geni Aakriste yamwe ya li ye na okuninga? (c) Muuyuni uupe, oshike tashi ka kala sha simana?

⁷ Opo tu ilongekidhile onkalamwenyo muuyuni uupe, otu na okwiilonga okukala twa gwanenwa, okulongela kumwe nehangano lyaJehova nonooitaali ooyakwetu. Pashiholelwa, ngele otwa pewa oshinakugwanithwa oshipe, natu shi taambe ko nenyanyu, nokuninga ngaashi tatu vulu tu kale twa nyanyukwa  notwa gwanenwa. Ngele otwa kala hatu longele kumwe naamboka taya kwatele komeho ngashingeyi, osho tatu ka ninga nomuuyuni uupe. (Lesha Aahebeli 13:17.) Sho Aaisraeli ya yi mevi lyeuvaneko, oya topolelwa omahala mpoka ye na okukala. (Numeri 26:52-56; Josua 14:1, 2) Muuyuni uupe, katu shi mpoka tatu ka tulwa tu kale. Ihe ngele otu na elongelokumwe ngashingeyi, otatu kala twa nyanyukilwa okulongela Tate Jehova, kutya nduno otwa tulwa peni.   

⁸ Itawu ka kala tuu uuthembahenda uunene okulongela Kalunga muuyuni uupe, kohi yelelo lyUukwaniilwa we! Shika otashi tu ningitha tu longele kumwe nehangano lyaJehova ngashingeyi, nokulonga kehe shoka twa pewa tu longe. Omathimbo gamwe otashi vulika tu pewe oshinakugwanithwa oshipe. Pashiholelwa, Aabetele yamwe moAmerika, oya pulwa ya ka kokole ondjila. Omanga aatonateli aayendi yamwe, ya pulwa ya ninge aakokolindjila yi ikalekelwa, omolwoomvula dhawo nenge molwoonkalo dhilwe. Otaya longo nenyanyu moshilonga shawo oshipe, naJehova ote ya yambeke. Ngele otwa pula ekwatho kuJehova megalikano, e tatu ningi ngaashi tatu vulu tu mu longele, nokwiilonga okukala twa gwanenwa noshinakugwanithwa shetu, otatu ka kala twa nyanyukwa, naJehova ote tu yambeke. (Lesha Omayeletumbulo 10:22.) Ongiini ngele muuyuni uupe otwa pulwa kehangano lyaJehova tu ka kale kehala lyontumba, omanga twa li twa hala oku ka kala kehala limwe li ili? Pethimbo mpoka, ehala nenge iilonga mbyoka tatu ka pewa, hayo tayi ka kala ya simana. Otatu ka kala owala twa pandula, sho tu li muuyuni uupe. —  Nehemia 8:10.

9, 10. (a) Omolwashike tatu ka pumbwa eidhidhimiko muuyuni uupe? (b) Ongiini tatu vulu okuulika ngashingeyi kutya otu na eidhidhimiko?

⁹ Muuyuni uupe, otashi vulika omathimbo gamwe tu ka kale twa pumbwa eidhidhimiko. Pashiholelwa, otashi vulika tu uve kutya yamwe oya nyanyukwa, sho aakwanezimo nookuume ya yumudhwa. Ihe tse, otashi vulika tu na okutegelela okathimbo, opo aaholike yetu ya yumudhwe. Ngele shoka oshe ke tu ningilwa, mbela otatu ki idhidhimika ngaa, e tatu nyanyukilwa pamwe naamboka ya nyanyukwa? (Aaroma 12:15) Ngele otwi ilongo okutegelela neidhidhimiko Tate Jehova a gwanithe po omauvaneko ge ngashingeyi, otashi ke tu kwathela tu ki idhidhimike nomuuyuni uupe. —  Omuuvithi 7:8.

¹⁰ Ngele otu na eidhidhimiko uuna ehangano lya lundulula efatululo kombinga yoshili yOmbiimbeli, shika otashi tu kwathele wo, tu ilongekidhile uuyuni uupe. Mbela ohatu konakona ngaa uuyelele mboka uupe, e tatu tegelele neidhidhimiko, ngele katu wu uvite ko? Ngele osho, nena nomuuyuni uupe otashi ka kala oshipu okwiidhidhimika, ethimbo kehe Jehova te tu pe omalombwelo omape. —  Omayeletumbulo 4:18; Johannes 16:12.

11. Omolwashike tu na okukala hatu dhimine po ooyakwetu ngashingeyi, naashika otashi ke tu kwathela ngiini muuyuni uupe?

 ¹¹ Omukalo gulwe gwokwiilongekidhila uuyuni uupe, ogwo okudhiminathana po. Pethimbo lyElelo lyaKristus lyOomvula Eyuvi, otashi ka kutha ethimbo, opo aantu ayehe ya kale ya gwanenena. (Iilonga 24:15) Mbela otatu ka kala ngaa tu hole ooyakwetu noku ya dhimina po? Ngele ohatu dhimine po aantu ngashingeyi notu na ekwatathano ewanawa nayo, otashi ka kala oshipu oku shi ninga nomuuyuni uupe. —  Lesha Aakolossa 3:12-14.

12. Omolwashike tu na okwiilongekidhila ngashingeyi onkalamwenyo muuyuni uupe?

¹² Muuyuni uupe, otashi vulika itaatu ka pewa aluhe shoka twa hala, nenge tu ka pumbwe okutegelela tu shi pewe. Otatu ka pumbwa okukala tu na olupandu notwa gwanenwa nonkalo kehe tu li. Oshi li ngeyi kutya, otatu ka pumbwa tu kale tu na omaukwatya ngoka Tate Jehova te tu longo ngashingeyi. Ngele ohatu ulike omaukwatya ngoka ngashingeyi, otashi ulike kutya uuyuni uupe owolela kutse, notatu ilongekidhile oku ka kala nomwenyo sigo aluhe. (Aahebeli 2:5; 11:1) Oshikwawo, otatu ulike kutya otwa hala shili okukala muuyuni moka aantu ayehe haya vulika kuTate Jehova.

13. Muuyuni uupe, oshike tatu ka kala twa pititha komeho monkalamwenyo yetu?

¹³ Muuyuni uupe, otatu ka kala tu na ashihe shoka twa pumbwa tu nyanyukilwe onkalamwenyo. Ihe shoka tashi ke tu nyanyudha unene, ekwatathano lyetu lyopothingo naTate Jehova. (Mateus 5:3) Otatu ka kala twi ipyakidhila miilonga ye, notatu ka nyanyukilwa oku mu longela. (Episalomi 37:4) Onkee ano, ngele otwa pititha Tate Jehova komeho monkalamwenyo yetu ngashingeyi, otatu ilongekidhile uuyuni uupe. —  Lesha Mateus 6:19-21.

14. Aagundjuka otaya vulu okwiitulila po omalalakano geni miilonga yaJehova?

 ¹⁴ Ongiini tatu vulu okugwedha ko kenyanyu lyetu, sho tatu longele Tate Jehova? Omukalo gumwe ogwo okwiitulila po omalalakano. Ngele ngoye omugundjuka, lalakanena okulongitha onkalamwenyo yoye, mokulongela Jehova. Omolwashike itoo ningi omapekapeko miileshomwa yetu, wu tale kutya iilonga yini yethimbo lyu udha to vulu okulalakanena? * Popya naamboka ya kala taya longele Tate Jehova miilonga yethimbo lyu udha uule woomvula odhindji. Ngele owa longitha onkalamwenyo yoye mokulongela Jehova, ote ke ku dheula. Edheulo ndyoka lya dhenga mbanda, otali ke ku kwathela wu mu longele muuyuni uupe.

15. Omalalakano ishewe geni tatu vulu okwiitulila po miilonga yaTate Jehova?

¹⁵ Omalalakano ngoka tatu vulu okwiitulila po miilonga yaJehova, itatu ga mana. Pashiholelwa, oto vulu okwiitulila po elalakano lyokuhwepopaleka uunkulungu woye muukalele. Nenge wu kambadhale okuuva ko nawa omakotampango gOmbiimbeli, nokwiilonga nkene wu na oku ga tula miilonga monkalamwenyo yoye. Otatu vulu okukambadhala okuhwepopaleka okulesha kwetu montaneho nenge iipopiwa yetu nomatyokosha getu pokugongala. Oshitsa oshi li mpano kutya: Ngele owi itulile po omalalakano miilonga yaJehova, otashi ku kwathele wu kale wu na uulaadhi notashi ku kwathele wi ilongekidhile onkalamwenyo muuyuni uupe.

16. Omolwashike okulongela Tate Jehova ku li oshinima sha dhenga mbanda monkalamwenyo?

¹⁶ Ngele otwa longitha ethimbo lyetu twi ilongekidhile onkalamwenyo muuyuni uupe, mbela otatu mana po ethimbo lyokutyapula onkalamwenyo ngashingeyi? Aawe.  Okulongela Jehova osho oshinima sha dhenga mbanda monkalamwenyo. Ihatu longele Jehova kethiminiko nenge ando molwaashoka twa hala okuhupa puudhigu uunene. Ngele otu na ekwatathano ewanawa naTate Jehova, onkalamwenyo yetu otayi kala ombwanawa notayi nyanyudha. Tate Jehova osho e tu shita ngaaka. Okukala tu holike kuTate Kalunga nohatu wilikwa kuye monkalamwenyo yetu, itashi yelekwa nasha. (Lesha Episalomi 63:1-3.) Atuheni otatu vulu okukala twa nyanyukwa, oshoka otatu longele Jehova nomutima aguhe. Yamwe mboka ya kala taye mu longele ethimbo ele, ohaya ti kutya ndjika oyo onkalamwenyo ya dhenga mbanda. —  Episalomi 1:1-3; Jesaja 58:13, 14.   

17. Iinima yetu yopaumwene nosho wo omainyanyudho, otayi ka kala pondondo yini mOparadisa?

¹⁷ Otatu ka nyanyukilwa omainyanyudho nokuninga iinima yetu yene mOparadisa. Tate Jehova oye mwene e tu shita nomahalo ngoka, note tu uvanekele kutya ota ka “kutitha iinamwenyo ayihe.” (Episalomi 145:16; Omuuvithi 2:24) Ohatu nyanyukilwa omainyanyudho nosho wo okufudha po, ihe iinima mbyoka ohatu yi nyanyukilwa unene tuu ngele otwa pititha ekwatathano lyetu naTate Jehova komeho. Nomuuyuni uupe osho tashi ka kala ngaaka. Onkee ano, osha simana, ‘tangotango tu kongeni Uukwaniilwa waKalunga,’ nokukala twa tala komayambeko ngoka hatu mono, sho tatu longele Tate Jehova. —  Mateus 6:33.

18. Ongiini tatu vulu okuulika kutya otatu ilongekidhile oku ka kala mOparadisa sigo aluhe?

¹⁸ Onkalamwenyo muuyuni uupe otayi ka kala ombwanawa kwaana we. Natu ilongekidhileni “okukalamwenyo kwashili” ngashingeyi, opo tu ulike kutya otwa halelela oku ka kala muuyuni mboka. Natu kokeke omaukwatya ngoka Tate Jehova te tu longo, nokuuvitha onkundana ombwanawa nuulaadhi. Otatu vulu okukala twa nyanyukwa, ngele ohatu pititha komeho okulongela Jehova monkalamwenyo yetu. Otwi itaala thiluthilu kutya Jehova ota ka gwanitha po ashihe e shi uvaneka muuyuni uupe. Onkee ano, natu kaleni twa fa nale tu li muuyuni mboka uupe.