1. Omuyapostoli Johannes okwe tu ladhipike tu dhiladhile kombinga yashike, nomolwashike?

OMUYAPOSTOLI JOHANNES ote tu ladhipike muJohannes gwotango 3:1, tu dhiladhile muule kombinga yohole onene yaJehova ndjoka e tu hole nayo. Okwa ti: “Taleni ohole mpoka yi thike, Tate sho e tu hole!” Uuna tatu tedhatedha kunkene Jehova e tu hole nankene he tu ulukile ohole ye, otatu ka hedha popepi naye notatu ka kala tu mu hole shi vulithe nale.

2. Omolwashike hashi kala oshidhigu ku yamwe okwiitaala kutya Jehova oku ya hole?

² Mupyamunene, oyendji inayi itaala naanaa kutya Kalunga ota vulu okukala e ya hole. Ohaya dhiladhila kutya Kalunga ke na ko nasha naantu. Oyi itaala kutya oku lile po owala okutula po oompango, nokugeela mboka itaaya vulika ku ye. Omalongo giifundja ohaga dhiladhilitha yamwe nokuli kutya Kalunga omukwanyanya noitaya vulu okukala ye mu hole. Yamwe oyu uvite kutya Kalunga oku hole aantu ayehe, kashi  na nduno mbudhi kutya otaya longo shike. Ihe ngoye owa kwathelwa kOmbiimbeli, opo wu tseye oshili kombinga yaJehova. Owu shi shi kutya ohole oyo uukwatya waJehova wa dhenga mbanda nokwa gandja Omwana, opo e ku kulile. (Johannes 3:16; 1 Johannes 4:8) Ihe otashi vulika molwonkalo yontumba, shi kale oshidhigu kungoye wu kale wi itaala kutya Jehova oku ku hole shili.

3. Oshike tashi tu kwathele tu itaale kutya Jehova oku tu hole shili?

³ Opo tu vule okwiitaala shili kutya Jehova oku tu hole, otwa pumbwa tango okuuva ko kutya oye e tu shita. Oye wo e tu pa omwenyo. (Lesha Episalomi 100:3-5.) Nomolwaashono Ombiimbeli tayi popi kutya omuntu gwotango ‘oAdam yaKalunga.’ (Lukas 3:38) Jesus okwe tu longo wo tu ithane Jehova ta tu ti: “Tate yetu, ngu u li megulu.” (Mateus 6:9) Ano Jehova oTate, noku tu hole ngaashi naanaa omuvali omwaanawa ha kala e hole oyana.

4. (a) Tate Jehova omuvali a tya ngiini? (b) Otatu ka kundathana shike moshitopolwa shika nomwaashoka tashi landula?

⁴ Oyendji ohaya mono oshidhigu okwiitaala kutya omusamane ota vulu okukala omuntu omunahole. Otashi vulika ya li haya ningwa nayi koohe, sho ya li aanona natango. Ihe Jehova ke na esiku a ninge nayi oyana. Oye omuvali dhingi. (Episalomi 27:10) Oku tu hole noonkondo nohe tu sile oshimpwiyu momikalo odhindji. Ngele otu wete nkene Jehova e tu hole, natse otatu ka kala tu mu hole. (Jakob 4:8) Moshitopolwa shika otatu ka kundathana omikalo ne, moka Jehova he tu ulukile ohole ye. Moshitopolwa tashi landula otatu ka kundathana omikalo ne, moka tatu vulu okuulukila Jehova ohole yetu.

5. Kalunga oha pe aantu ayehe shike?

⁵ Sho omuyapostoli Paulus a li muAtena shaGreka, okwa mono kutya omu udha iimenka, naantu oya li yi itaala kutya ookalunga kawo oyo taye ya pe omwenyo. Onkene, okwe ya lombwele kombinga ‘yaKalunga ngoka a shiti uuyuni niinima ayihe yi li mo.’ Okwa ti kutya Kalunga “oye mwene ha pe aantu ayehe omwenyo nomufudho niinima ayihe” nosho wo kutya “muye tse otu na omwenyo, tatu inyenge notu li po.” (Iilonga 17:24, 25, 28) Jehova oye e tu pe iinima ayihe mbyoka twa pumbwa, opo tu kale nomwenyo notu nyanyukilwe onkalamwenyo. Dhiladhila owala kiinima yimwe mbyoka e tu pa, omolwohole ye.   

6. Tate Jehova okwe tu pa egumbo lya tya ngiini? (Tala kethano lyopetameko.)

⁶ Pashiholelwa, Tate Jehova okwe tu longekidhile egumbo ewanawa. (Episalomi 115:15, 16) Evi olya yooloka ko koopulaneta adhihe. Aanongononi oya konakona ewangandjo e taya mono kutya omu na oopulaneta dhilwe odhindji. Ihe inaya mona natango opulaneta yimwe hoka ku na iinima ayihe mbyoka aantu ya pumbiwa, opo ya kale nomwenyo. Jehova i ne tu pa owala shoka twa pumbwa, opo tu kale nomwenyo. Ihe okwe tu shitila wo evi ewanawa, tali vulu okukalwa noli na egameno, opo tu vule okunyanyukilwa onkalamwenyo. (Jesaja 45:18) Ngele tatu dhiladhila kegumbo lyetu ndyoka Tate Jehova e tu pa, ohatu  kala tu uvite kutya oku tu hole shili. —  Lesha Job 38:4, 7; Episalomi 8:3-5.

7. Omukalo moka Jehova e tu shita otagu ulike ngiini kutya oku tu hole shili?

⁷ Omukalo gulwe moka Jehova e tu ulukila ohole ye, oosho e tu shita momukalo moka tatu vulu oku mu holela. (Genesis 1:27) Shika osha hala okutya otatu vulu okumona kutya oku tu hole, natse otatu vulu oku mu ulukila kutya otu mu hole wo. Oku shi shi nawa kutya shoka osho hashi tu nyanyudha unene. Aanona ohaya kala ya nyanyukwa unene, uuna ye shi kutya aavali yawo oye ya hole. Dhimbulukwa kutya Jesus okwe tu longa kutya otatu ka kala twa nyanyukwa, uuna tu na ekwatathano ewanawa naTate yetu, Jehova. (Mateus 5:3) Jehova oye “he tu pe iinima ayihe” mbyoka hatu nyanyukilwa. Ano osha yela kutya oku hole lela okugandja noku tu hole noonkondo. —  1 Timoteus 6:17; Episalomi 145:16.   

8. Omolwashike twa hala Tate Jehova e tu longe?

⁸ Ootate oye hole oyana noihaya kala ya hala oyana ya pukithwe nenge ya fundjalekwe. Ihe aavali oyendji kunena inaya hala okulandula omithikampango dhOmbiimbeli dhaashoka sha puka naashoka shi li mondjila. Onkee ano, itaya vulu okuwilika nawa oyana, shoka hashi e ta eyeme nevundakano. (Omayeletumbulo 14:12) Ihe Tate Jehova oha wilike oyana momukalo gwa dhenga mbanda, oshoka “Kalunga omudhiginini.” (Episalomi 31:5) Oha nyanyukilwa oku tu longa oshili kombinga ye nankene tu na oku mu longela. Ohe tu ulukile wo onkalamwenyo ndjoka ya dhenga mbanda. (Lesha Episalomi 43:3.) Jehova okwe tu longa shike, shoka tashi ulike kutya oku tu hole unene?

9, 10. (a) Omolwashike Tate Jehova e tu lombwele kombinga ye mwene? (b) Ote tu longo shike kombinga yelalakano lye?

⁹ Shotango, Tate Jehova ote tu lombwele kombinga ye. Okwa hala tu mu tseye. (Jakob 4:8) Nomolwaashono e tu lombwela edhina lye. MOmbiimbeli edhina lye olyo li li mo lwiikando oyindji, li vulithe omadhina agehe. Okwe tu lombwela wo kutya ye Omuntu a tya ngiini. Uuna tatu tala kiinima mbyoka a shita, otayi tu longo kutya ye omunankondo nomunandunge. (Aaroma 1:20) Nuuna tatu lesha Ombiimbeli, ohayi tu longo kutya ke na okatongo nosho wo kutya oku tu hole noonkondo. Sho tatu ende tatu mu tseya nawa, otatu ka panga uukuume wopothingo naye.

¹⁰ Tate Jehova ohe tu longo wo kombinga yomalalakano ge. Ohe tu lombwele kutya tse iilyo yegumbo lye. Ohe tu yelithile wo nkene a hala tu kale, opo tu longe muukumwe nomombili, pamwe niilyo yilwe yegumbo lye. Ombiimbeli otayi holola kutya Tate Kalunga ine tu shita tu kale hatu tokola kutse yene shoka shi li mondjila naashoka sha puka. (Jeremia 10:23) Jehova oye e shi shoka tashi tu opalele. Notatu vulu owala okukala nonkalamwenyo tayi ti sha noyi na ombili, ngele otatu vulika kuye. Iinima ayihe mbika ya simana okwe yi tu longo, oshoka oku tu hole.

11. Tate yetu omunahole, okwe tu lombwela shike kombinga yonakuyiwa?

¹¹ Omusamane omunahole oha kala ti ipula nonakuyiwa yoyana. Okwa hala ya kale nonkalamwenyo tayi ti sha. Mupyamunene, aantu oyendji nena ohaya kala tayi ipula unene kombinga yonakuyiwa yawo, nohayi ihepeke niinima mbyoka kaayi na oshilonga. (Episalomi 90:10) Inatu nyanyukwa tuu sho Tate yetu, Jehova, e tu uvanekela onakuyiwa ombwanawa nokwe tu longa tu kale nonkalamwenyo tayi ti sha ngashingeyi!

12. Tate Jehova okwa li a kambadhala ngiini okukwathela Kain osho wo Baruk?

¹² Sho Tate Jehova a mono kutya Kain oku li pokuninga oshinima oshiwinayi,  okwa kambadhala oku mu kwathela. Okwe mu pula a ti: “Omolwashike wa geya? Oshike wa sizimaneka oshipala? Ngele to longo uuwanawa, nena oshipala shoye oshi li nawa.” (Genesis 4:6, 7) Kain okwa tindi ekwatho lyaJehova, naashika oshe mu etele uupyakadhi. (Genesis 4:11-13) Pompito ishewe yilwe, Tate Jehova okwa dhimbulula kutya Baruk oku na iikala mbyoka tayi mu ningitha a kale a loloka nokwa teka omukumo. Okwe mu lombwele kutya okwa pumbwa okulundulula omadhiladhilo ge, oshoka oga puka. Baruk okwa pulakene komayele gaJehova e tashi hupitha omwenyo gwe. —  Jeremia 45:2-5.

13. Aapiya yaJehova aadhiginini oyi ilongo mo shike muudhigu moka ya piti?

¹³ Tate Jehova ohe tu wilike nohe tu ganda, oshoka oku tu hole. Ihe tu pukulula owala uuna sha pumbiwa, ihe ohe tu dheula wo. (Aahebeli 12:6) MOmbiimbeli omu na aapiya yaJehova oyendji aadhiginini, mboka a dheula, opo e ya kwathele ya ninge aantu aawanawa. Pashiholelwa, aantu ngaashi Josef, Moses, naDavid oya piti moonkalo oondhigu noonkondo. Ihe sho ya li moonkalo ndhoka, Tate Jehova okwa li pamwe nayo. Shoka yi ilongo sho taya piti mudho, oshe ke ya kwathela sho ya ka gwedhelwa ko kiinakugwanithwa yawo. Uuna tatu lesha mOmbiimbeli nkene Jehova he tu kwathele nohe tu dheula, otatu kala tu uvite kutya oku tu hole shili. —  Lesha Omayeletumbulo 3:11, 12.

14. Tate Jehova ohe tu ulukile ngiini kutya oku tu hole, uuna twa gwile mepuko?

¹⁴ Tate Jehova oha tsikile oku tu ulukila ohole, nonando otwa gwila mepuko. Ngele otwa pulakene sho te tu ganda e tatu itedhulula, ‘ote tu kuthile po’ thiluthilu. (Jesaja 55:7) Shika otashi tu longo shike kombinga yaTate Jehova? Oohapu ndhoka David a nyola kombinga yankene Jehova ha dhimine po, otadhi tu longo kutya oye Tate omunahenda. David okwa nyola: “Oye ta dhimi po oondjo dhandje nota aludha uuvu wandje auhe. Oye ta hupitha ndje meso nota landula ndje nesilohenda nontalanteni ye. Ngaashi uuzilo u li kokule nuuninginino, osho ta kaleke kokule natse oondjo dhetu.” (Episalomi 103:3, 4, 12) Tate Jehova ohe tu ganda nohe tu wilike momikalo dhi ili nodhi ili. Mbela oho ningi ngaa omalunduluko ngele okwe ku ganda? Dhimbulukwa aluhe kutya ohe shi ningi, oshoka oku ku hole. —  Episalomi 30:5.

15. Tate Jehova ohe tu ulukile ishewe ngiini kutya oku tu hole?

¹⁵ Omusamane omunahole oha gamene aanegumbo lye kiiponga. Shoka osho wo Tate yetu, Jehova, he tu ningile. Omupisalomi okwa nyola ngeyi kombinga ye: “Ota gamene aantu ye note ya hupitha miikaha yaakolokoshi.” (Episalomi 97:10) Tate Jehova ohe endelele okugamena aapiya ye, oshoka okwe ya lenga. Shika otashi vulu okuyelekanithwa nomuntu te endelele a shige omeho ge koshiponga, oshoka oge na oshilonga kuye. —  Lesha Sakaria 2:8.

16, 17. Tate Jehova okwa li ha gamene ngiini aantu ye nale, nohe shi ningi ngiini pethimbo lyetu?

 ¹⁶ Nale Jehova okwa li ha gamene aapiya ye moku ya tumina aayengeli. Shoka osho ha ningi sigo onena. (Episalomi 91:11) Omuyengeli gumwe okwa dhipaga aakwiita Aayassur 185 000 muusiku wumwe awuke, e ta hupitha oshigwana shaKalunga. (2 Aakwaniilwa 19:35) Pethimbo lyaayapostoli, aayengeli oya li ya pititha Petrus, Paulus nayalwe mondholongo. (Iilonga 5:18-20; 12:6-11) Moomvula opo dha zi ko, moshilongo shimwe shaAfrika omwa li mu na iita ya yaga kegonga. Oshilongo osha li sha vundakana omolwolugodhi, uufuthi, ekwatonkonga nomadhipago. Nonando kapu na nando omwiitaali gumwe a kanitha omwenyo gwe, oyendji oya li ya kanitha iiniwe yawo ayihe. Ashike oya li yu uvite kutya Tate Jehova oku ya hole, note ya sile oshimpwiyu. Oya li natango ya nyanyukwa. Sho ya pulwa kugumwe ngoka a zi koombelewa dhetu oonene kutya oye li po ngiini, oya ti: “Ayihe otayi ende nawa omolwaJehova.”

¹⁷ Opu na aapiya yamwe yaJehova, ngaashi Stefanus osho wo yalwe, mboka ya dhipagwa, omolwuudhiginini wawo. Omathimbo gamwe, shika Jehova ohe shi pitike. Ihe oha londodha oshigwana she ashihe moku shi tseyithila nkene Satana ha kambadhala oku shi kotokela, opo e shi gamene. (Aaefeso 6:10-12) Omalondodho ngoka otaga adhika mOmbiimbeli nomiinyanyangidhwa mbyoka hayi zi kehangano lyaJehova. Pashiholelwa, ohatu longwa tu kale twa kotokela ointaneta nohole yomaliko. Ohayi tu londodha wo ngele tashi ya poomuvi, omambo nomaudhano ga nyata nenge ge na omiyonena. Osha yela kutya Tate Jehova oku tu hole nokwa hala e tu gamene.

18. Owu uvite ngiini, sho Tate Jehova e ku hole?

¹⁸ Sho Moses a dhiladhila koomvula ndhoka a kala ta longele Jehova, okwa li i itaala kutya Jehova oku mu hole. Moses okwa ti: “Ongula kehe tu ulukila esilohenda lyoye, opo tu imbe nenyanyu omasiku getu agehe.” (Episalomi 90:14) Otwa lalekwa nuuyamba, sho tu uvite ko notu uvite ohole yaJehova ndjoka e tu hole nayo. Kawu shi tuu uuthembahenda uunene, sho e tu hole! Otu uvite ngaashi omuyapostoli Johannes a li u uvite, ngoka a ti: “Taleni ohole mpoka yi thike, Tate sho e tu hole!” —  1 Johannes 3:1.