1, 2. Eiyuvo oshike, nomolwashike tu na okukala twa pandula sho tu li na?

JEHOVA KALUNGA sho a shiti aantu, okwe ya pe omagano gokutokola kuyo yene. Opo ya ninge omatokolo ge li mondjila, okwe ya pe eiyuvo ndyoka hali ya wilike. Eiyuvo olyo okanona komomwenyo hoka hake tu kwathele tu mone ngele oshinima shontumba osha puka nenge oshi li mondjila. Ngele otwa longitha eiyuvo lyetu nawa, otali vulu oku tu kwathela tu longe shoka oshiwanawa notu yande shoka oshiwinayi. Sho Tate Jehova e tu pe eiyuvo, otashi ulike kutya oku tu hole nokwa hala tu tompole.

² Nena aantu yamwe ohaya longo uuwanawa noye tonde uuwinayi, nonando kaye shi shoka Ombiimbeli tayi ti. (Lesha Aaroma 2:14, 15.) Omolwashike? Omolweiyuvo lyawo, ndyoka hali ya kwathele ya yande okulonga shoka oshiwinayi. Dhiladhila owala kutya onkalo muuyuni ando oya nayipala shi thike peni, ando otwa li kaatu na eiyuvo. Otashi vulika ando hatu uvu iinima iitilithi tayi ningwa shi vulithe nena. Otwa pandula noonkondo, sho Tate Jehova e tu pa eiyuvo.

3. Eiyuvo lyetu otali vulu ngiini oku tu kwathela megongalo?

 ³ Aantu oyendji ihaya dheula eiyuvo lyawo. Ihe aapiya yaJehova oya hala eiyuvo lyawo li kale tali longo nawa, oshoka otali vulu okukwathela egongalo li kale li na uukumwe. Otwa hala eiyuvo lyetu li kale tali tu dhimbulukitha shoka Ombiimbeli tayi ti kutya oshi li mondjila nenge osha puka, naashoka oshiwanawa nenge oshiwinayi. Ihe eiyuvo lyetu itali ka dheuka owala molwaashoka tu shi shoka Ombiimbeli tayi ti. Otu na okukala tu hole omisindalandu dhaKalunga notwi itaala kutya otadhi tu opalele. Paulus okwa nyola: “Elalakano lyekumagidho ndika olyo oku ya penduthila ohole tayi zi momwenyo gwa yela, meiyuvo ewanawa nomeitaalo lyashili.” (1 Timoteus 1:5) Ngele otwa dheula eiyuvo lyetu nokukala hatu wilikwa kulyo, ohole yetu yokuhola Jehova neitaalo lyetu muye otayi koko. Omukalo moka hatu longitha eiyuvo lyetu, otagu holola mpoka ekwatathano lyetu naJehova li thike, notagu ulike wo kutya otwa hala oku mu nyanyudha. Ohagu holola wo kutya tse aantu ya tya ngiini.

4. Ongiini tatu vulu okudheula eiyuvo lyetu?

⁴ Ongiini tatu vulu okudheula eiyuvo lyetu? Otu na okukala nondjigilile yokukonakona Ombiimbeli, okutedhatedha kwaashoka twa lesha nokupula Jehova e tu kwathele tu tule miilonga shoka twi ilongo. Shika otashi ti katu na owala okwiilonga oompango momutse. Pehala lyaashono, uuna tatu konakona Ombiimbeli, elalakano lyetu okutseya nawa Tate Jehova. Otwa hala okutseya kutya ye Omuntu a tya ngiini, shoka e hole naashoka kee hole. Sho tatu ende tatu mu tseya nawa, eiyuvo lyetu otali ka kala hali endelele okumona shoka a tala ko shili mondjila nenge sha puka. Ngele otwa kala hatu dheula eiyuvo lyetu, otatu ka tameka okudhiladhila ngaashi Tate Jehova.

5. Otatu ka konakona shike moshileshwa shika?

⁵ Otashi vulika twi ipule ngeyi: Eiyuvo lya dheulwa nawa otali vulu ngiini oku tu kwathela, uuna tu na okuninga omatokolo? Ongiini tu na okusimaneka omaiyuvo gAakriste ooyakwetu? Nongiini eiyuvo lyetu tali vulu oku tu inyengitha tu longe shoka shu uka? Natu ka taleni koonkalo ndatu, moka twa pumbwa eiyuvo lya dheulwa nawa: (1) epango, (2) omainyanyudho, (3) okuuvitha.

6. Omatokolo geni tu na okuninga, ngele tashi ya pepango?

⁶ Ombiimbeli otayi tu lombwele tu kale hatu yeleke, ngaashi uuna tatu nu nenge tatu li. (Omayeletumbulo 23:20; 2 Aakorinto 7:1) Ngele otwa vulika komayele ngoka ge li mOmbiimbeli, otashi vulika shi tu kwathele, opo tu kaleke po uukolele wetu. Ihe nonando ongawo, otatu kala ngaa nokweehama nokukulupa. Omatokolo geni tashi vulika tu kale twa pumbwa okuninga? Miilongo yimwe oto vulu oku ka pangwa koshipangelo, koonganga dhakashiluudhe nomomikalo dhilwe. Iitayimbelewa olundji ohayi nyolelwa oombapila kaamwatate naamwameme, taya pula ngele otaya vulu okupangwa momikalo dhi ili nodhi ili. Oyendji ohaya pula taya ti: “Omupiya gwaJehova ota vulu ngaa okuzimina a pangwe momukalo gwontumba nenge gwongandi?”

7. Ongiini tatu vulu okuninga omatokolo gomondjila, ngele tashi ya pokutulwa ombinzi?

 ⁷ Oshitayimbelewa nenge aakuluntugongalo kaye na uuthemba wokutokolela Omukriste kutya oku na okupangwa ngiini, nonando otashi vulika a pule kombinga yasho. (Aagalati 6:5) Ihe aakuluntugongalo otaya vulu oku mu lombwela shoka Jehova ta ti, opo ye mu kwathele a ninge etokolo lyomondjila. Pashiholelwa, Jehova okwe tu pa oshipango kutya inatu lya ombinzi. (Iilonga 15:29) Oshipango shika ohashi kwathele Omukriste a mone kutya ita vulu okupitika a tulwe ombinzi niitopolwa yayo iinene nenge a pangwe nomuti ngoka gwa longwa mombinzi nenge muyimwe yomiitopolwa ine iinene yombinzi. Uuyelele mbuka otawu vulu nokuli okuguma eiyuvo lye, uuna ta tokola ngele ota ka pitika a tulwe uutopolwa uushona wombinzi, mboka hawu zi miitopolwa iinene ine yombinzi. * Omayele ishewe geni ge li mOmbiimbeli, ngoka tage tu kwathele tu ninge omatokolo gomondjila, ngele tashi ya pepango?

8. Aafilippi 4:5 otaya vulu ngiini oku tu kwathela tu ninge omatokolo gomondjila, ngele tashi ya pepango?

⁸ Omayeletumbulo 14:15 otaga ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.” Muuyuni wonena, omuna omikithi dhimwe ndhoka kaadhi na epango. Onkee ano, otwa pumbwa okukala twa kotokela omikalo dhokupangwa ndhoka taku tiwa kutya otadhi vulu okwaaludha omukithi gwontumba, po pwaana uumbangi wa gwana kutya otashi wapa ngaa shili. Paulus okwa nyola a ti: “Kaleni mu na olukeno [nenge ondjele] naantu ayehe.” (Aafilippi 4:5, yelekanitha NW.) Ngele otu na ondjele otashi ke tu kwathela tu kale tatu longele Jehova neitulomo, pehala lyokukala tatu ipula unene nuukolele. Epango ngele olyo lya kala lya simana monkalamwenyo yetu, otashi vulika tu kale twi ihole tse yene. (Aafilippi 2:4) Otu shi shi kutya muuyuni mbuka waSatana, itatu vulu okukala tu na uukolele wi ihwa po. Onkee ano, otu na okusa oshimpwiyu, opo okulongela Jehova ku kale kwa simana monkalamwenyo yetu. —  Lesha Aafilippi 1:10.

9. Aaroma 14:13, 19 otaye tu kwathele ngiini, uuna tu na okutokola kombinga yepango, nongiini tashi vulika tu yone po uukumwe megongalo?

 ⁹ Omukriste ngoka e na ondjele, iha thiminikile ooyakwawo shoka ye e wete anuwa tashi ya opalele. Aanandjokana yamwe, moshilongo shontumba, oya li taya ladhipikile yalwe oopela niikulya yoludhi lwontumba, mbyoka taya ti kutya oyi na uundjolowele. Yamwe oya kwatwa ko, ihe yalwe oya tindi. Sho she ke enda nayi, aamwatate oyendji oya li ya geya noonkondo. Aanandjokana mboka oya li ye na uuthemba wokwiitokolela okulongitha omiti niikulya kehe ya hala. Ihe mbela osha li ngaa pandjele, sho ya yono po uukumwe wegongalo omolwepango? Nalenale, Aakriste yamwe muRoma, oya li ye na omataloko ga yoolokathana kutya iikulya yini yi na okuliwa nomasiku geni ge na okudhimbulukiwa. Omayele geni Paulus a gandja? Okwa ti: “Omuntu gumwe ota dhiladhila kutya esiku lyontumba olya simana li vule omakwawo, manga mukwawo ta dhiladhila kutya omasiku agehe oge thike pamwe. Kehe gumwe na kale a kola momadhiladhilo ge.” Otu na okukala twa kotoka, opo kaatu pundukithe yakwetu. —  Lesha Aaroma 14:5, 13, 15, 19, 20.

10. Omolwashike tu na okusimaneka omatokolo gooyakwetu? (Tala kethano lyopetameko.)

¹⁰ Omathimbo gamwe, ihatu kala tu uvite ko kutya omolwashike Omukriste omukwetu ta ningile etokolo lyontumba moshinima shoka she mu guma. Ihe mbela otu na okuninga po shike? Inatu endelela okupangula Omukriste a tya ngawo, nenge tu mu thiminike a ninge etokolo lilwe. Otashi vulika a pumbwa natango okudheula eiyuvo lye nenge tashi vulika eiyuvo lye ha li ehamekwa nziya. (1 Aakorinto 8:11, 12) Nenge tashi vulika eiyuvo lyetu, olyo inaali dheulwa nawa. Kehe gumwe oku na okuninga omatokolo ge mwene, ngele tashi ya pepango nokutaamba ko iilanduliko yalyo.

11, 12. Ongiini Ombiimbeli hayi tu kwathele tu hogolole omainyanyudho?

¹¹ Jehova okwe tu shita tu kale hatu mono uuwanawa momainyanyudho noku ga nyanyukilwa. Salomo okwa nyola kutya opu na ‘ethimbo lyokuyola’ “nethimbo lyokudhana.” (Omuuvithi 3:4) Ihe hamainyanyudho agehe omawanawa, taga thuwitha nenge taga vululukitha. Otu na wo okuyanda okulongitha ethimbo olindji momainyanyudho. Ongiini eiyuvo lyoye tali vulu oku ku kwathela wu hogolole omainyanyudho omawanawa, ngoka ga hokiwa kuJehova?

¹² Ombiimbeli otayi tu londodha tu yande “iilonga yuuhalu wopantu.” Iilonga mbika oya kwatela mo ‘uuholume, iipala, uukeeneidhiliko, okusimaneka iimenka nuumpulile. Okutondathana, okutamanana, okusilathana efupa, okugeelathana nokukotokelathana. Okwiitopola moongundu nomiimpaga. Uukodhi, uunkolwi nuufukedhi niinima iikwawo ya fa mbika.’ Paulus okwa nyola kutya “aantu mboka taa longo iilonga ya tya ngeyi, itaa ka thigulula Oshilongo shaKalunga.” (Aagalati 5:19-21) Onkene otu na okwi ipula: ‘Mbela eiyuvo lyandje ohali kwathele ndje ngaa ndi yande omaudhano ngoka gu  udha omiyonena, ombepo yethigathanopo, uukwamuhoko nonyanya? Mbela eiyuvo lyandje ohali londodha ndje tuu, uuna nda hala okutala omuvi yi na iinima ya nika iipala nenge tayi humitha komeho oluhondelo, uunkolwi nuumpulile?’

13. Omayele ngoka ge li 1 Timoteus 4:8 nomOmayeletumbulo 13:20 otage tu kwathele ngiini, sho tatu hogolola omainyanyudho?

¹³ Omakotampango gOmbiimbeli otaga vulu oku tu kwathela tu dheule eiyuvo lyetu, ngele tashi ya pomainyanyudho. Pashiholelwa, Ombiimbeli otayi ti kutya “eidheulo lyopalutu oli na ekwatho eshona lyowala.” (1 Timoteus 4:8) Oyendji oyu uvite kutya okuninga omadhewo pandjigilile, ohashi nyashula nohashi ya kaleke ye na uukolele. Ihe mbela opu na ngaa ombudhi kutya ohatu idheula pamwe noolye? Ongiini ngele otwa hala okukala hatu idheula tu li mongundu? Omayeletumbulo 13:20 otaga ti: “Enda pamwe naanawino, u likole owino, ihe ngoka ta kala paagoya, ota likola uuwinayi.” Osha yela kutya osha simana tu longithe eiyuvo lyetu lya dheulwa kOmbiimbeli, sho tatu hogolola omainyanyudho.

14. Aanegumbo yamwe oya tula ngiini miilonga Aaroma 14:2-4?

¹⁴ Christian naDaniela, aanandjokana mboka ye na oyanakadhona yaali. Christian ota ti: “Pelongelokalunga lyetu limwe lyuukwanegumbo, otwa li twa kundathana kombinga yomainyanyudho. Otwa mono kutya nani omainyanyudho gamwe omawanawa, ihe gamwe omawinayi. Otwa tala wo kepulo: Olye ta vulu okutalika ko kuume omuwanawa? Omumwandjekadhona gumwe okwa li ta nyenyeta kutya oha mono aagundjuka ooyakwawo yOonzapo tayi ihumbata nayi popoose. Naye oha kala u uvite a thiminikwa i ihumbate momukalo moka. Otwa kundathana naye kutya kehe omuntu oku na eiyuvo ndyoka e na okuwilikwa kulyo, opo a hogolole shoka e na okuninga naangoka te shi ningi naye.” —  Lesha Aaroma 14:2-4.

15. Ongiini Mateus 6:33 tayi vulu oku ku kwathela, uuna to hogolola omainyanyudho?

¹⁵ Oho longitha ethimbo li thike peni momainyanyudho? Mbela owa pititha ngaa komeho okugongala, omapya nekonakonombiimbeli,  nenge omainyanyudho ogo hage ya tango? Oshinipo sha simana unene kungoye? Jesus okwa ti: “Tangotango kongeni Oshilongo shaKalunga nuuyuuki we, nena mbika ayihe otamu yi gwedhelwa ko.” (Mateus 6:33) Ngele to hogolola nkene wu na okulongitha ethimbo lyoye, mbela eiyuvo lyoye ohali ku dhimbulukitha ngaa oohapu ndhoka dhaJesus?

16. Eiyuvo lyetu ohali tu ladhipike ngiini tu uvithe?

¹⁶ Eiyuvo lya dheulwa nawa ihali tu londodha owala kaatu longe shoka sha puka, ihe ohali tu inyengitha wo tu longe shoka shi li mondjila. Shimwe shomiinima mbyoka yi li mondjila ongaashi okuuvitha egumbo negumbo nenge ontukuluka. Paulus osho a li ha ningi. Okwa nyola a ti: ‘Ohandi uvitha evaangeli, oshoka ondu uvite ethiminiko, ndi shi ninge. Iihuna yowala, ngele itandi uvitha evaangeli!’ (1 Aakorinto 9:16) Ngele otwa holele Paulus, otatu kala tu na eiyuvo lya yela, oshoka otu shi shi kutya otatu longo shoka shu uka. Naasho tatu uvithile aantu, otatu ya kwathele ya kale ye na eiyuvo ewanawa. Paulus okwa ti: “Ohatu popi oshili nokwiiholola pomuntu kehe e na eiyuvo ewanawa koshipala shaKalunga.” —  2 Aakorinto 4:2.

17. Omumwameme gumwe omugundjuka okwa li a wilikwa ngiini keiyuvo lye lya dheulwa nawa kOmbiimbeli?

¹⁷ Sho Jacqueline a li e na oomvula 16, okwa li e na oshilongwa moka hayi ilongo kombinga yaantu, iinamwenyo niimeno mosikola. Moshilongwa shoka oya li haya longwa elongo lyoevolusi. Okwa popi a ti: “Eiyuvo lyandje kalya li lya pitike ndje ndi kuthe ombinga moshikundathanwa shoka, ngaashi handi kutha ombinga shito miikundathanwa yilwe. Kanda li tandi vulu okutsa kumwe nelongo lyoevolusi. Onda yi komulongi gwandje nonde mu fatululile shoka ndi itaala. Onda li nda kumwa, oshoka okwa pulakene ndje nombili nokwa pe ndje ompito, opo ndi lombwele aalongwa ooyakwetu kombinga yeshito.” Jacqueline okwa li a pepelelwa shili, sho a pulakene keiyuvo lye lya dheulwa kOmbiimbeli, nokwa etha li mu wilike. Mbela eiyuvo lyoye ohali ku inyengitha ngaa wu longe shoka shu uka?

18. Omolwashike twa hala okukala tu na eiyuvo ewanawa noli shi okwiinekelwa?

¹⁸ Atuhe otu na elalakano lyokukala nonkalamwenyo tayi wilikwa komakotampango nokomithikampango dhaJehova. Eiyuvo lyetu otali vulu oku tu kwathela tu adhe elalakano ndyoka. Uuna tatu konakona Oohapu dhaKalunga pandjigilile, tatu tedhatedha kudho notatu tula miilonga shoka twi ilonga, otatu dheula eiyuvo lyetu. Kungeyi, otatu ka kala tu na einekelo kutya omagano ngaka omawanawa, otaga vulu oku tu wilika shili monkalamwenyo yetu yopaKriste.