1, 2. Omolwashike Jesus a li e hole Marta, ihe Marta okwa li a ningi epuko lini ndyoka ta li ulike kutya ina gwanenena?

UUNA to dhiladhila kombinga yaMarta, omumwayina gwaLasarus, oho dhiladhila kutya ye omuntu a tya ngiini? Ombiimbeli otayi ulike kutya Marta okwa li kuume kaJesus kopothingo notayi ti wo kutya Jesus okwa li e mu hole. Ihe Marta haye owala omukiintu a li e holike nokwa simanekwa kuJesus. Pashiholelwa, Maria, omumwayina gwaMarta, naye okwa li kuume kaJesus kopothingo. Jesus okwa li wo e hole yina, Maria. (Johannes 11:5; 19:25-27) Omolwashike nduno Jesus a li e hole Marta?

² Jesus okwa li e hole Marta, molwaashoka Marta okwa li e na ohenda, e hole okugandja noha longo nuudhiginini. Ihe shoka Jesus a li e hole unene, osho eitaalo lye lya kola. Marta okwa li i itaala iinima ayihe mbyoka Jesus a longo noka li e na omalimbililo kutya Jesus oye Mesiasa omuuvanekwa. (Johannes 11:21-27) Ihe nonando ongawo, Marta ka li a gwanenena. Okwa li ha ningi omapuko, ngaashi owala natse hatu ga ningi.  Pashiholelwa, esiku limwe sho Jesus a li te ya talele po, Marta okwa li a geele omumwayinakadhona, Maria, nokwa lombwele Jesus e mu pukulule ta ti: “Omuwa, ku na ko nasha nangame, omumwameme sho e etha ndje, ndi yakule awike? Mu lombwela, e ye, a kwathe ndje.” (Lesha Lukas 10:38-42.) Omolwashike Marta a tile ngawo, notatu ilongo ko shike keyamukulo ndyoka Jesus e mu pe?

3, 4. Maria okwa li a ningi shike shoka Jesus a li a panda, naMarta okwi ilonga ko shike? (Tala kethano lyopetameko.)

³ Jesus okwa li a pandula, sho Marta naMaria ye mu hiya kaandjawo. Okwa li a hala a longithe ompito ndjoka, opo e ya longe oshili ya simana. Maria okwa kuutumba nziya puJesus, “nokwa pulakene oohapu dhe.” Maria okwa li a hala okwiilonga oshindji kOmulongi Omunene. Marta naye okwa li ta vulu okuhogolola a pulakene kuJesus. Jesus okwa li te ke mu pandula lela, ando okwe ethele po iilonga ye, e ta pulakene kuye.

⁴ Ihe Marta okwa li e na iimpwiyu oyindji. Okwa li i ipyakidhila nokulongekidha iikulya nokwa li ta ningi iinima yilwe oyindji, opo Jesus a nyanyukilwe oondya ndhoka dhi ikalekelwa. Sho Marta a mono kutya Maria i te mu kwathele, okwa geye e ta tameke okunyenyetela Jesus. Jesus okwa li e shi shi kutya Marta okwa li ta kambadhala okuninga iinima oyindji unene, onkene okwe mu lombwele nombili ta ti: “Marta, Marta, ou na iimpwiyu oyindji nowa piyagana.” Okwe mu lombwele wo kutya ina pumbwa okulongekidha iikulya oyindji, ihe niikulya iishona, oya gwana owala. Opo nduno, Jesus okwa pandula Maria sho a pulakene kuye. Okwa ti: “Maria okwi ihogololele ombinga ombwanawa itee yi kuthwa nando okulye.” Otashi vulika Maria a li a dhimbwa iikulya mbyoka a lile esiku ndyoka, ihe kapu na siku a dhimbwe iinima mbyoka i ilongo kuJesus, naasho Jesus e mu pandula. Konima yoomvula dhi vulithe 60, omuyapostoli Johannes okwa nyola a ti: ‘Jesus okwa li e hole Marta naMaria.’ (Johannes 11:5) Oohapu ndhoka otadhi holola kutya Marta okwa taamba ko epukululo lye e ta tsikile okulongela Jehova nuudhiginini onkalamwenyo ye ayihe.

5. Omolwashike oshidhigu kunena, okukala twi itula miinima mbyoka ya simana shi vulithe nale, notatu ka yamukula epulo lini?

⁵ Otu wete kutya pethimbo lyetu, opu na iinima oyindji mbyoka tayi vulu oku tu ningitha kaatu longele Jehova twi itula mo, shi vulithe pethimbo lyOmbiimbeli. Oshungolangelo yo 15 Septemba 1958, oya londodhele ooitaali kaaya ethe iinima iipe yi ya imbe ya longele Jehova. Pethimbo mpoka, konyala kehe esiku opwa li oshinima oshipe. Iinima ngaashi iifo, oradio, oomuvi notiivii oya li apuhe. Oshungolangelo oya ti wo kutya sho tatu ende tu uka pehulilo lyuuyuni mbuka, “iimpwiyu otayi ka kala oyindji shi vulithe nale.” Kunena, oku na iinima oyindji mbyoka tayi vulu oku tu piyaganeka shi vulithe nale. Oshike tatu vulu okuninga po, opo tu kale ngaashi Maria e tatu kala twi itula mokulongela Jehova?

6. Oshigwana shaJehova osha kala ngiini tashi longitha uuteknolohi?

⁶ Oshigwana shaJehova osha kala tashi longitha uuteknolohi, opo shi uvithe onkundana ombwanawa. Pashiholelwa, manga Iita yoTango yUuyuni inaayi tameka nopethimbo tayi luwa, aapiya yaJehova oya li yu ulike oshinyandwa sho-Photo-Drama of Creation. Oya longitha uuthano nuumuvi uufupi,  wu na omalwaala nomawi, opo yu uvithile aantu omamiliyona miilongo oyindji. Pehulilo lyoshinyandwa opwa ulikwa nkene taku ke ya ethimbo lyombili, uuna Jesus Kristus ta ka pangela kombanda yevi. Konima yethimbo, aapiya yaJehova oya ka longitha oradio, opo ya taandelithe etumwalaka lyUukwaniilwa kaantu omamiliyona muuyuni awuhe. Kunena, ohatu longitha ookompiuta nointaneta, opo tu adhe aantu kehe mpoka taya adhika, nokuli nokomahala gokokule.

7. (a) Omolwashike sha nika oshiponga okukala twa pwila miinima yomuuyuni? (b) Oshike tu na okukala twa kotokela? (Tala enyolo lyopevi.)

⁷ Ombiimbeli otayi tu londodha kaatu kale twa pwila miinima yomuuyuni. Shika osha kwatela mo okulongitha ethimbo olindji miinima mbyoka yi li muuyuni. (Lesha 1 Aakorinto 7:29-31.) Iinima yimwe yomuyo inayi puka, ihe otayi vulu okuhepitha ethimbo lyetu olindji. Pashiholelwa, ohatu nyanyukilwa iinima mbyoka tu hole, okulesha omambo, okutala otiivii, okuya komahala gontumba, okulanda iinima nokumona ontseyo oyindji kombinga yiikwaelektronika opo ya kondo niinima yilwe. Aantu oyendji oye hole okukwatathana kointaneta, okutuma omatumwalaka nooe-mail, nenge okutala oonkundana nenge iizemo yomaudhano. Ihe yimwe yomuyo ohayi piki aantu ya kale aluhe ya hala oku yi ninga. * (Omuuvithi 3:1, 6) Ngele otwa longitha ethimbo lyetu olindji miinima mbyoka kaayi na oshilonga, otashi vulika itaatu ka kala twi itula mo moshinima shoka sha simanenena, ano okulongela Jehova. —  Lesha Aaefeso 5:15-17.

8. Omolwashike sha simana kaatu kale tu hole iinima yomuuyuni?

⁸ Satana oha ningi ngaashi ta vulu, opo e tu yule, tu kale tu hole iinima yomuuyuni, tse tatu kala inaatu itula mokulongela Jehova. Satana okwe shi ningile nale methelemumvo lyotango, nokunena ote shi ningi unene shi vulithe nale. (2 Timoteus 4:10) Onkee ano,  otu na aluhe okwiikonakona, tu tale kutya iinima yomuuyuni otwe yi tala ko ngiini, e tatu ningi omalunduluko mpoka ga pumbiwa. Ombiimbeli otayi tu lombwele kutya inatu kala tu hole iinima ayihe yomuuyuni. Pehala lyaashono, otu na okukaleka ohole yetu yokuhola Jehova ya kola. Ngele otwe shi ningi, otashi ke tu ningila oshipu okuvulika kuJehova nokukala popepi naye. —  1 Johannes 2:15-17.

9. Jesus okwa li a longo aalongwa ye ya gandje eitulomo kushike, nokwe ya tulile po oshiholelwa shini?

⁹ Jesus okwa li a longo Marta nombili kutya ina kala e na iimpwiyu oyindji. Okwa longo wo aalongwa ye oshiilongomwa sha faathana. Okwe ya ladhipike yi itule mokulongela Jehova nomUukwaniilwa we. (Lesha Mateus 6:22, 33.) Jesus okwe tu tulila po oshiholelwa sha dhenga mbanda. Ina kala i indumbila iinima oyindji noka li nokuli e na egumbo nenge epya. —  Lukas 9:58; 19:33-35.

10. Jesus okwe tu tulila po oshiholelwa shini oshiwanawa?

¹⁰ Jesus ka li e etha nando osha shi ye moshipala iilonga ye yokuuvitha. Pashiholelwa, konima owala sho opo a tameke okuuvitha, ongundu yaantu muKapernaum oya li ya hala Jesus a kale pamwe nayo moshilando shawo. Jesus okwa ningi po shike? Okwa kala i itula miilonga ye. Okwe ya lombwele a ti: “Elaka etoye lyOshilongo shaKalunga ondi na oku li uvitha wo miilando yilwe, oshoka osho naanaa shika Kalunga a tumu ndje, ndi shi ninge.” (Lukas 4:42-44) Jesus okwa li e ende iinano iile, opo a ka uvithe onkundana ombwanawa nokulonga aantu oyendji ngaashi tashi vulika. Okwa li a gwanenena, ihe naye okwa li ha kala a loloka nokwa li ha kala a pumbwa okuvululukwa, oshoka okwa li ha longo nuudhiginini. —  Lukas 8:23; Johannes 4:6.

11. Jesus okwa ningi ngiini sho omulumentu gumwe e mu pula a kandule po omukundu maandjawo? Jesus okwa longo aalongwa ye oshinima shini sha simana?

¹¹ Konima sho Jesus a li ta longo aalongwa ye oshinima sha simana, omulumentu gumwe okwe mu yi melaka ta ti: “Muhongi, lombwela omumwameme omukuluntu, tu topolelathane uuthiga weliko lyatate.” Jesus ka li a kambadhala okukandula po uupyakadhi womulumentu ngoka. Ine etha nando e mu piyaganeke, pehala lyaashono okwa tsikile okulonga aalongwa ye. Okwa longitha ompito ndjoka, e ya longe kutya ngele oya kala yi itula mokwiikongela iinima oyindji, otashi vulika kaaya kale we yi itula mokulongela Jehova. —  Lukas 12:13-15.

12, 13. (a) Jesus okwa li a ningi shike shoka sha kumitha Aagreka yamwe muJerusalem? (b) Jesus okwa ti ngiini sho Filippus e mu pula a ka popye nAagreka mbeyaka?

¹² Omasiku gaJesus gahugunina kombanda yevi oga li omadhigu noonkondo. (Mateus 26:38; Johannes 12:27) Okwa li e shi kutya ota ka hepekwa nonyanya nota ka dhipagwa. Okwa li wo e shi kutya oku na iilonga oyindji e na oku yi gwanitha po, manga inaa sa. Pashiholelwa, mOsoondaha, 9 Nisan, Jesus  okwa yi muJerusalem a londa kokasino. Ongundu yaantu oye mu taamba ko a ninge Omukwaniilwa gwawo. (Lukas 19:38) Esiku lya landula ko, Jesus okwa li a tidha mo aalumentu aanalwiho motempeli, kee na nando uumbanda washa. Aalumentu mboka oya li taya yugu aantu, oshoka oya li taya pula iimaliwa oyindji unene. —  Lukas 19:45, 46.

¹³ Aagreka yamwe mboka ya li ye ya kuJerusalem ya dhane oshituthi shopaasa, oya mono shoka Jesus a ningi noya li ye shi kuminwa. Onkene, oya pula omuyapostoli Filippus, ngele otaya vulu okupopya naJesus. Ihe Jesus ka li ta kongo aantu yoku mu ambidhidha noku mu gamena kaatondi ye. Okwa li e shi shoka sha simanenena. Okwa kala i itula mokulonga shoka Jehova a hala a longe, opo a gandje po omwenyo gwe gu ninge eyambo. Onkene, okwa dhimbulukitha aalongwa ye kutya oku li pokudhipagwa, naayehe mboka taye mu landula oye na wo okukala ye na ehalo lyokuyamba po oomwenyo dhawo. Okwa ti: “Oongoka e hole omwenyo gwe, ote gu kanitha, ihe ngoka ta tondo omwenyo gwe muuyuni mbuka, ote gu hupithile momwenyo gwaaluhe.” Jesus oku uvanekele wo aalanduli ye kutya ‘He ote ke ya simaneka’ note ke ya pa omwenyo gwaaluhe. Filippus otashi vulika a ka lombwela Aagreka mbeyaka etumwalaka ndyoka tali tsu omukumo. —  Johannes 12:20-26.

14. Nonando Jesus okwa li a pititha komeho iilonga yokuuvitha monkalamwenyo ye, okwa li ha kongo ethimbo lyokuninga wo shike?

¹⁴ Oshilonga shaJesus sha simanenena sho a li kombanda yevi, osha li okuuvitha onkundana ombwanawa. Nonando okwa kala i itula mokuuvitha, ka li owala aluhe ta dhiladhila iilonga. Pashiholelwa, okwa li a yi kohango yimwe hoka a shitukitha omeya ga ninge omaviinu omatoye. (Johannes 2:2, 6-10) Iikando iyali, okwa ka lya pamwe nookuume ke nosho wo nayalwe mboka ya li ya hokwa onkundana ombwanawa. (Lukas 5:29; Johannes 12:2) Shoka sha simanenena, Jesus okwa li ha kala e na aluhe ethimbo lyokugalikana, lyokutedhatedha nolyokuthuwa po. —  Mateus 14:23; Markus 1:35; 6:31, 32.

15. Omuyapostoli Paulus okwa ti kutya Aakriste oya pumbwa shike, nokwe tu tulile po oshiholelwa shini oshiwanawa?

¹⁵ Omuyapostoli Paulus okwa ti kutya Aakriste oya fa aantu taya matuka oshinano oshile methigathano. Opo ya adhe kethikilo, oya pumbwa okweekelahi kehe shoka tashi ya kata nenge tashi ya yi moshipala. (Lesha Aahebeli 12:1.) Paulus okwe tu tulila po oshiholelwa oshiwanawa. Okwa li ta vulu okukala omuwiliki gwelongelokalunga lyOshijuda omuyamba nokwa tseyika nawa apuhe. Ihe okweetha po eithano lye e ta kala i itula ‘miinima mbyoka yi na oshilonga.’ Okwa longo nuudhiginini miilonga yokuuvitha nokwa yi komahala ogendji ngaashi kuSiria, kuAsia eshona, kuMakedonia nokuJudea. Paulus okwa kala a tegelela nondjuulukwe ondjambi yomwenyo gwaaluhe megulu. Okwa ti: “Otandi dhimbwa shoka shi li konima notandi ningi ashihe shoka tandi vulu, opo ndi adhe  shoka shi li komeho gandje. Onkee otandi matuka ndu ukilila kethikilo, opo ndi ka likole ondjambi yesindano.” (Aafilippi 1:10; 3:8, 13, 14) Paulus ka li a hokana, naashoka oshe mu kwathele, opo a ‘kale mOmuwa kee na epiyagano.’ —  1 Aakorinto 7:32-35, OB-1954.

16, 17. Ongiini tatu vulu okulandula oshiholelwa shaPaulus, kutya nee otu li mondjokana nenge ka tu mo? Omumwatate Mark nomukadhi Claire, oya li ya landula ngiini oshiholelwa shaPaulus?

¹⁶ Ngaashi Paulus, aapiya yamwe yaJehova yonena, oya hogolola kaaya ye mondjokana, opo ya vule okulonga oshindji miilonga yaJehova. (Mateus 19:11, 12) Mboka kaaye li mondjokana olundji ohaya kala niinakugwanithwa iishona ye vulithe mboka ye li mondjokana. Ihe kutya nduno omo tu li nenge ka tu mo, atuheni natu “etheni kehe shoka sha hala oku tu kata,” opo tu longele Jehova neitulomo. Otashi vulika tu na okweetha po iinima mbyoka tu hole aluhe okuninga, opo kaatu hepithe ethimbo lyetu, tse tu vule okulongela Jehova shi vulithe nale.

¹⁷ Pashiholelwa, omumwatate Mark nomukadhi Claire, mboka ya putukila moWales, oya tamekele okukokola ondjila konima sho ya mana osikola. Sho ya hokana, oya tsikile natango nuukokolindjila. Ihe oya li ya hala okulonga oshindji. Mark ota ti: “Otwe etha po iinima mbyoka tayi tu imbi tu longe oshindji, ngaashi egumbo lyetu ndyoka li na oondunda ndatu dhokulala niilonga yetu yetatasiku, opo tu ka kwathele miilonga yokutunga muuyuni awuhe.” Uule woomvula 20, oya kala taya kwathele okutunga Iinyanga yUukwaniilwa miitopolwa oyindji yaAfrika. Omathimbo gamwe, oya li ye na iimaliwa iishona, ihe Jehova okwa kala aluhe te ya sile oshimpwiyu. Claire ota ti: “Ohashi tu etele enyanyu enene, sho tatu longele Jehova esiku kehe. Otwa panga uukuume naantu oyendji nokatu na shoka twa pumbwa. Shoka twa yamba po itashi vulu nando okuyelekwa nenyanyu ndyoka hali zi mokulongela Jehova ethimbo lyu udha.” Oyendji mboka ye li miilonga yethimbo lyu udha nayo osho yu uvite ngawo. *

18. Otu na okwiipula omapulo geni?

¹⁸ Mbela owu uvite kutya oto vulu okukala wu na uulaadhi shi vulithe shito, sho to longele Jehova? Owu na iimpwiyu oyindji mbyoka tayi ku imbi kuu kale wi itula miinima mbyoka yi na oshilonga? Ngele osho, mbela oshike to vulu okuninga po? Oto vulu okuhwepopaleka okulesha kwoye nekonakonombiimbeli lyoye. Oshitopolwa tashi landula otashi ke tu yelithila nkene tatu vulu oku shi ninga.