SHO nda ningi oomvula omugoyi, inandi koka we momuthika. Ngashingeyi ondi na oomvula 43, ihe omuthika gwandje ogu li owala pometa yimwe. Sho aavali yandje ya mono kutya opo owala tandi kala ndi thike mpoka, oya ladhipike ndje ndi kale ndi ipyakidhila, opo kaandi kale unene tandi ipula nagwo. Onda tameke okulanditha iiyimati komeho yegumbo. Onda li handi opaleke po nawa naantu oyendji oya kala haye ya okulanda ndje.

Ihe nonando onda kala ndi ipyakidhila, shoka inashi kandula po omukundu. Natango onda li owala omufupi. Onda li handi nyengwa okuninga niinima mbyoka ya fa iipu, ngaashi okukutha oshinima moolaka mositola. Iinima ayihe oya li owala ya fa ya nuninwa aantu mboka ye vule ndje lwaali momuthika. Onda li handi kala nda tula omutse kepepe. Sho nda ningi oomvula 14, onkalo oya lunduluka.

Esiku limwe, aakulukadhi yaali oya landa iiyimati e taya pula ya longe ndje Ombiimbeli. Oya li Oonzapo dhaJehova. Konima, onda ka mona kutya shoka sha simanenena, hamuthika gwandje, ihe okutseya Jehova nelalakano lye. Shoka osha kwathele ndje lela. Ondi hole noonkondo Episalomi 73:28. Oshintoko shotango shovelise ndjoka otashi ti: “Osho opalela ndje okukala popepi naKalunga.”

Onkalamwenyo yandje oya lunduluka, sho twa tembuka mo ombaadhilila moCôte d’Ivoire e tatu yi koBurkina Faso. Hwiya twa zi, aantu ayehe oya li yi igilila handi landitha iiyimati. Ihe molukanda olupe, aantu kaya li ye shi ndje. Oyendji oya li haya kala nokuli ya kuminwa ndje, noya li haya kala owala ongame ya tala. Shika osha ningitha ndje ndi kale megumbo uule wiiwike. Onda nyolele koshitayimbelewa shOonzapo dhaJehova, ya tumine ndje omuntu a tsikile okukonakona Ombiimbeli nangame, oshoka onda dhimbulukwa nkene okuhedha popepi naJehova kwa kwathela ndje noonkondo. Oya tumine ndje omumwameme Nani, ngoka a li omutumwa. Okwe ya okutalela ndje po nokapakapaka ke. Okwa li lela omuntu to opalele.

Oondjila dhetu kadhi na oteya, onkene iiyenditho oya li hayi heleya. Pethimbo lyomvula, oondjila odha li hadhi kala dhi na enono. Nani okwa li ha gu ko kokapakapaka ke olundji, sho teya okukonakona nangame, ihe ina sholola. Esiku limwe okwa pula ndje tu ye naye kokugongala. Onda li ndi shi kutya ngele onda zi mo megumbo, aantu otaya ka kala ya manena ndje mo omeho. Osha li wo tashi ka kala uupyakadhi uunene, ngele onda londo kokapakapaka, oshoka ondjundo yandje otayi shi ningitha oshidhigu, opo Nani a tanaune okapakapaka ke. Ihe onda zimine tu ye, oshoka onda dhimbulukwa oshintoko oshitiyali shEpisalomi ndyoka ndi hole: “Omuwa Omupangeliawike onde mu ningi egameno lyandje.”

 Omathimbo gamwe tse naNani otwa li hatu gwile momanono, sho tatu yi kokugongala. Ihe katwa li tu na ko nasha, oshoka otwa li tu hole ko. Aantu pOshinyanga shUukwaniilwa oya li hayu ulukile ndje ohole, hangaashi aantu yomoshitopolwa shetu, mboka ya li haya kala taya simonona ndje owala. Konima yoomwedhi omugoyi, onda ninginithwa.

Oshintoko oshititatu shEpisalomi ndyoka ndi hole otashi ti: “Niilonga ye ayihe otandi ke yi hokolola.” Onda li ndi shi kutya okuya muukalele otaku ka kala eshongo enene kungame. Otandi dhimbulukwa natango oshikando shotango ndu uvitha egumbo negumbo. Aantu oya li owala ya tala ndje, okuza kokanona sigo okomukuluntu. Oya li haya kala ya landula ndje, taya sheke ndje, sho tandi ende. Onda li ndu uvite nayi noonkondo. Ihe shoka sha kwathele ndje ndi idhidhimike, okudhimbulukwa kutya nayo oya pumbwa Oparadisa ngaashi ngame.

Onda landa okambasikela komagulu gatatu haka hingwa noonyala, opo ndi kale handi inyenganyenga nuupu muukalele. Uuna tu uka pokamulondo, ngoka tandi longo naye okwa li hu undula ndje sigo okombanda yokamulondo. Ihe uuna tatu zi ko tu uka mesilu, okwa li ha nukile kokambasikela, e tatu gulumuka ka ko. Nonando petameko okuya muukalele okwa li okudhigu, uukalele owa nyanyudha ndje unene. Shika oshi inyengitha ndje ndi ninge omukokolindjila, mo 1998.

Onda konakona Ombiimbeli naantu oyendji. Yane yomuyo oya ninginithwa. Kakele kaamboka, omumwamemekadhona gumwe naye okwa taamba ko oshili. Oshinima shimwe shoka hashi tsu ndje omukumo, okuuva ehumokomeho ndyoka tali ningwa kuyalwe. Esiku limwe, sho nda li tandi ehama omalaria, onda mono ombilive ya za koCôte d’Ivoire. Oya li tayi hokolola kombinga yomumati ngoka a li hayi kounivesiti moBurkina Faso, ngoka nda tamekele ekonakonombiimbeli naye posheelo shegumbo lyawo. Omumati ngoka onde mu gandja po komumwatate gumwe. Ihe konima yethimbo, omumati okwa tembukile koCôte d’Ivoire. Ombilive oya nyanyudha ndje, oshoka oya popi kutya okwa ninga omuuvithi inaa ninginithwa.

Mbela ohandi hupu ngiini? Ehangano ndyoka hali kwathele aanuulema, olya pe ndje ompito yokwiilonga okuhondja. Omulongi gwandje okwa ndhindhilike kutya ohandi longo nuudhiginini, e ta ti: “Otwa hala tu ku longe nkene oothewa hadhi ningwa.” Oya longo ndje okuninga oothewa dhokuyoga iizalomwa nodho ku opalekitha momagumbo, handi shi ningile pegumbo. Aantu oyendji oye hole okulanda oothewa dhandje nohaya tseyithile yalwe ye ye ya lande. Ohandi longitha okapakapaka kandje komagulu gatatu, opo ndi fale oothewa ndhoka dha mbesitelwa.

Shinikitha oluhodhi, onde etha po uukokolindjila mo 2004, omolwombunda yandje ndjoka hayi ehama noonkondo. Ihe natango ihandi pu mo muukalele.

Aantu oyendji ohaya ti oye shile ndje enyanyu lyandje, oshoka ohandi kala aluhe tandi imemeha. Ondi na omatompelo ogendji gokukala nda nyanyukwa, oshoka okuhedha popepi naJehova, okwa kwathela ndje noonkondo. —  Nakuhokolola: Sarah Maiga.