AANTU mboka ya li ko oomvula 200 dha ka pita, kaya li hayi itaale owala kehe oshinima sha nyolwa miifokundaneki. Natse itatu vulu okwiitaala kehe oshinima shi li kointaneta. Oku na uuyelele owundji noshipu oku wu mona. Owundji owoshili, noto vulu oku wu longitha noinawu nika oshiponga. Ihe wumwe owiifundja, kawu na oshilonga nowa nika oshiponga. Onkene, otu na okuhogolola nuukeka shoka tatu lesha. Yamwe mboka opo ya tameke okulongitha ointaneta, otashi vulika ya dhiladhile kutya kehe ehokololo li li ko, nenge taya tuminwa moe-mail kookuume kawo olyoshili. Otashi vulika yi itaale ehokololo lyontumba, nonando otali limbilike. Ihe Ombiimbeli otayi tu londodha tayi ti: “Omuntu gwanathangwa oti itaale shaa ohapu, ihe onkotoki ota ndhindhilike oonkatu dhe.” —  Omayeletumbulo 14:15.

Omuntu ngoka ihaa itaale kehe shimwe tu uvu, okwa kotoka. Ngele otu na oondunge, ohatu kala twa kotoka nohatu itaale owala iinima mbyoka tu shi kutya oyoshili. Itatu ka fundjalekwa nenge tu itaale omahokololo giifundja ngoka hatu mono kointaneta, nonando oga kale ge li apuhe. Oshike tashi ke ku kwathela wu yoolole? Shotango, ipula to ti: ‘Ehokololo ndino olya zi ngaa kepandja li shi okwiinekelwa? Nenge olya zi kepandja hoka haku vulu okunyolwa kukehe omuntu nenge nokuli kaaku shiwike hoka lya zi? Mbela opu na epandja lyokointaneta li shi kwiinekelwa ndyoka tali popi kutya ehokololo ndyoka olyiifundja?’ * Ngele osho, ino kala “omugoya,” longitha oondunge. (Omayeletumbulo 7:7) Ngele ehokololo otali limbilike, otashi vulika kaali shi lyoshili. Ngele owa lesha ehokololo ewinayi kombinga yomuntu gwontumba, dhiladhila kutya olye tashi vulika a hala ehokololo ndyoka li taandele nomolwashike.

Aantu yamwe otashi vulika ya tumine ayehe mboka ye na mokompiuta yawo ehokololo lyontumba ndyoka ya tuminwa. Ihe inaya tala ngele olyoshili nenge olyiifundja nenge ya dhiladhile kuushadha mboka  tali eta. Otashi vulika ye shi ninge, oshoka oya hala okuhokiwa nenge yu ulike kutya oyo ye shi uvu tango. (2 Samuel 13:28-33) Omuntu omunandunge oha dhiladhila tango kutya ehokololo otali uvitha lye nayi, manga inee li tuma. Pashiholelwa, otashi vulika li shekithe edhina lyomuntu nenge lyehangano lyontumba.

Omuntu ngoka ta tumu ehokololo otashi vulika inee li konakona ngele olyoshili, oshoka okuwete tashi mu pula ethimbo. Oha etha mboka ta tumine, oyo ye li konakone yoyene. Ihe oha dhimbwa kutya nayo kaye na ethimbo. (Aaefeso 5:15, 16) Onkene, pehala lyokutumina aantu omahokololo kaatu shi ngele ogoshili, natu kale nale twa tokola kutya: “Ngele ehokololo onde li limbililwa, nandi li dhime mo.”

Ipula to ti: ‘Mbela ohandi tumine aantu aluhe omatumwalaka ngoka nda tuminwa? Mbela opu na ethimbo limwe nda gandjele ombili kaantu, molwaashoka nde ya tumine uuyelele wa puka nenge wiifundja? Mbela opu na omuntu a pulile ndje kaandi mu tumine we omatumwalaka?’ Dhimbulukwa kutya yakweni sho ye na ooe-mail dhawo, nayo otaya vulu okuya kointaneta ye ki ikongele uuyelele mboka ya hala, inaya pumbwa wu shi ninge. Inaya hala okutuminwa omatumwalaka ogendjigendji giiyolitha, uuvidio nenge omathano. Kashi li pandunge okutumina aantu iipopiwa mbyoka ya kwatwa nenge ya nyolwa. * Dhimbulukwa kutya omuntu ngele okwa ningi omapekapeko ge mwene, ta lesha oovelise dhOmbiimbeli nenge i ilongekidhile eyamukulo lye mwene, ohashi mu kwathele, shi vulithe ngele uuyelele okwe wu tuminwa.

Ngele owa mono ehokololo lyiifundja kombinga yehangano lyaJehova kointaneta, owu na okuninga ngiini? Ino li itaala! Itashi ka kala shi li pandunge wu li tumine yakweni, wu ya pule kutya yo otaye li tile ngiini, oshoka shoka otashi taandeleke owala ehokololo ndyoka. Kointaneta ngele owa mono ko ehokololo ndjoka tali ku limbilike, galikana Jehova e ku pe uunongo. Popya wo naamwatate mboka ya koka pambepo. (Jakob 1:5, 6; Judas 22, 23) Katu na okukala twa kumwa, uuna tatu lundilwa. Aantu oya li wo ya lundile Jesus. Okwe tu londodha kutya aatondi yetu otaye ke tu tidhagana ‘notaye ke tu popila muuwinayi auhe nokufundja omolwe.’ (Mateus 5:11; 11:19; Johannes 10:19-21) Ano ngele owa longitha nawa oondunge nomadhiladhilo goye, oto ke shi mona mo  nuupu kutya omuntu ota popi iifundja nenge ota kambadhala okupukitha aantu. —  Omayeletumbulo 2:10-16.

Otu na wo okukotoka kaatu popye iinima yaamwatate nenge iimoniwa mbyoka tu uva. Ihashi ulike ohole nosha puka okupopya kombinga yiinima yontumba, nonando oyoshili. (Mateus 7:12) Pashiholelwa, itashi ulike ohole, noitashi tsu omukumo okutuma omahokololo omawinayi kombinga yayakwetu. (2 Aatessalonika 3:11; 1 Timoteus 5:13) Uuyelele wumwe otashi vulika wu kale oshiholekwa. Otashi vulika omuntu inaa hala oku wu holola manga, oshoka okwa hala oku wu holola pethimbo lyo opala. Onkee ano, otu na okweetha omuntu a tokole nkene a hala oku wu holola, oshoka mboka uuthemba we. Nokuli ngele otwe wu holola ethimbo inaali adha, otashi vulika tu ku uvithe aantu oyendji nayi.

Omahokololo ogendji, kutya nduno ogoshili nenge ogiifundja, oge na oshilonga nenge kage na, ga nika oshiponga nenge inaaga nika oshiponga, ngashingeyi ohaga taandele meendelelo. Nando etumwalaka owe li tumine owala omuntu gumwe, ota vulu oku li tumina aantu kongonga yevi alihe muule woosekonde. Onkee ano, kambadhala waaha tumine aantu ayehe mboka wu shi uuyelele wontumba, inoo wu konakona nawa. Nonando ohole “otayi itaale” iinima ayihe, yo ihayi limbililwa, katu na okukala omagoya e tatu itaale ehokololo kehe tali nywitha omakutsi. (1 Aakorinto 13:7) Nokatu na nando okwiitaala iifundja nenge omahokololo ngoka tage tu hwahwameke tu kale tu tonde ehangano lyaJehova nenge aamwatate mboka tu hole. Dhimbulukwa kutya mboka haya toto omahokololo ngoka nohaye ga taandelitha, otaya nyanyudha Satana Ondiyapoli, ‘he yiifundja ayihe.’ (Johannes 8:44) Natu kale ano aanandunge, hatu dhiladhila aluhe nawa nkene tu na okulongitha ondumba yuuyelele mboka hatu mono esiku kehe. Ombiimbeli otayi ti: “Aantu yanathangwa otaa likola uugoya u ninge uuthiga wawo, ihe aanandunge otaa shanipikwa nuunongo.”