1, 2. Omanyolo otaga ulike ngiini kutya ohole oya simana?

MOMAUKWATYA agehe gaJehova, ohole oyo ya simanenena. (1 Johannes 4:16) Jesus Kristus, ngoka oye a shitwa tango, okwa kala naHe uule woomvula omabiliyona megulu, nokwa mono kutya He omunahole. (Aakolossa 1:15) Jesus okwa kala wo hu ulike ohole monkalamwenyo ye ayihe, sho e li megulu naasho a li kombanda yevi. Onkee otu shi shi kutya Jehova naJesus otaya ka kala aluhe taya pangele nohole.   

² Sho Jesus a pulwa kutya oshipango oshinene oshini, okwa ti: “‘Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe.’ Shika osho oshipango oshinene noshotango. Oshitiyali shi thike pusho osho shika: ‘Hola mukweni ngaashi ngoye wi ihole mwene.’” — Mateus 22:37-39.

3. ‘Ooyakwetu’ oolye?

 ³ Osha simana tu ulukile aantu ayehe ohole. Jesus okwa ti kutya otu na okukala tu hole Jehova nosho wo aantu ooyakwetu. Ihe ‘ooyakwetu’ oolye? Ngele owu li mondjokana, nena mukweni omusamane nenge omukulukadhi gwoye. Aamwatate naamwameme megongalo nayo ooyakwetu. Naantu mboka hatu tsakaneke uuna tatu uvitha ooyakwetu wo. Moshitopolwa shika, otatu ki ilongeni nkene tu na okuulukila ooyakwetu ohole.

4. Omolwashike aaihokani taya vulu oku shi enditha nawa mondjokana, nonando inaya gwanenena?

⁴ Jehova sho a shiti Adam naEva, okwe ya tula kumwe. Ndjoka oyo ya li ondjokana yotango. Kalunga okwa li a hala ya kale ya nyanyukwa mondjokana yawo nokwa li a hala yu udhithe evi. (Genesis 1:27, 28) Ihe konima sho inaaya vulika kuJehova, ondjokana yawo oya yonuka. Kungeyi atuhe otwa thigulula uulunde neso. (Aaroma 5:12) Nando ongaaka, aaihokani otaya vulu oku shi enditha nawa mondjokana. Jehova, Omutoti gwondjokana, okwa gandja omayele ga simana ngoka ge li mOmbiimbeli kaasamane naakulukadhi. — Lesha 2 Timoteus 3:16, 17.

5. Ohole oya simana shi thike peni mondjokana?

⁵ Ombiimbeli otayi holola kutya opo aantu ya kale ya nyanyukilwathana, oye na okukala ye holathane. Shika oshi na okuningwa, unene tuu mondjokana. Omuyapostoli Paulus okwa popi kombinga yohole yashili a ti: “Ohole ohayi idhidhimikile ayihe noyi na olukeno. Ohole ihayi si efupa, ihayi tuwalala. Ohole ihayi holoka nayi, ihayi kongo shayo yene, ihayi ningi omwenyo omwiinayi, ohole ihayi dhimbulukwa uuwinayi ye u ningilwa. Ohole ihayi nyanyukilwa uugoyoki, ihe ohayi nyanyukilwa oshili. Ohole ihayi tonyala, ihe otayi itaale, tayi tegamene e tayi idhidhimike sigo okehulilo. Ohole itayi hulu po.” (1 Aakorinto 13:4-8) Ngele otwa kala hatu ipula noohapu dhaPaulus e tatu vulika kudho, otatu ka kala twa nyanyukwa mondjokana.   

6, 7. (a) Ombiimbeli otayi ti ngiini kombinga yuukwamutse? (b) Omusamane Omukriste oku na okukala ngiini nomukulukadhi gwe?

⁶ Jehova oye a tokola kutya olye e na okukala omutse gwegumbo. Paulus okwe shi yelitha ngeyi: “Onda hala, mu kale mwa tseya kutya Kristus oye omutse gwomulumentu kehe, omulumentu oye omutse gwomukadhi, naKalunga oye omutse gwaKristus.” (1 Aakorinto 11:3) Ihe Jehova okwa tegelela aasamane ya kale haya kwatele komeho nohole, ihe hanonyanya. Jehova naye osho ha ningi. Oku na olukeno, ye ki ihole mwene. Nomolwaashono Jesus a simaneka He, nokwa hala okupangelwa kuye. Jesus okwa ti nokuli: “Ngame ondi hole Tate.” (Johannes 14:31) Ngele ando Jehova okwa li e na  onyanya, ando Jesus hasho e mu uvitile ngaaka.   

⁷ Nonando omusamane oye omutse gwomukulukadhi gwe, Ombiimbeli otayi ti oku na okukala e mu simaneka. (1 Petrus 3:7) Omusamane ongiini ta vulu oku shi ninga? Ongele ta pulakene koompumbwe dhomukulukadhi nokusimaneka shoka ta ningi. Ombiimbeli otayi ti: “Aalumentu, holeni aakiintu yeni, naanaa ngashika Kristus e hole egongalo lye nokwi igandja meso omolwalyo.” (Aaefeso 5:25) Eeno, Jesus okwa gandja omwenyo gwe, omolwaalanduli ye. Omusamane naye ngele oku na ohole ngaashi Jesus, otashi ka kala oshipu komukulukadhi gwe a kale e mu hole nokwe mu simaneka, nota ka simaneka wo omatokolo ge. — Lesha Titus 2:3-5.

8. Otu na okukala tu uvitile ngiini ooitaali ooyakwetu?

⁸ Aantu omamiliyona ngashingeyi, ohaya longele Jehova noya ninga aamwayinathana. Otu na okukala tu ya uvitile ngiini? Ombiimbeli otayi ti: “Natu ningileni kehe gumwe uuwanawa, ihe unene tuu mboka tu li nayo meitaalo limwe.” (Aagalati 6:10; lesha Aaroma 12:10.) Omuyapostoli Petrus  okwa nyola kutya, molwaashoka ohatu “vulika koshili” otu na okukala tu ‘hole ooitaali ooyakwetu’ shili. Petrus okwa lombwele wo Aakriste ooyakwawo a ti: “Komeho gaayihe holathaneni nomwenyo aguhe.” — 1 Petrus 1:22; 4:8.

9, 10. Omolwashike aapiya yaKalunga ya hangana?

⁹ Ehangano lyetu inali fa omahangano omakwawo muuyuni. Omolwashike? Oshoka otu holathane shili tashi zi komutima. Noshikwawo sha simanenena, Jehova ohe tu kwatha nombepo ye ondjapuki, ndjoka yi na oonkondo itaadhi vulu okuyelekwa, oshoka otu mu hole nohatu vulika koompango dhe. Ombepo yaKalunga ohayi tu kwathele tu kale twa hangana shili muuyuni awuhe ngaashi aamwayinathana. — Lesha 1 Johannes 4:20, 21.

¹⁰ Omuyapostoli Paulus okwa tsu omuthindo esimano lyokukala tu na ohole mokati ketu, sho a nyola a ti: “Onkee ano kaleni mu na olukeno, ohenda, eifupipiko, ombili neidhidhimiko. Kwathathaneni, dhiminathanii po oondjo ethimbo kehe, uuna pe na ngoka a ningathana namukwawo. Dhiminathanii po oondjo naanaa, ngashika Omuwa e mu dhimine po. Kumbika ayihe gwedhii ko ohole, oshoka ohole oyo epaya tali vulu okumangela iinima ayihe kumwe.” (Aakolossa 3:12-14) Inatu pandula tuu sho tu na ohole ndjoka oyo “epaya tali vulu okumangela iinima ayihe kumwe,” kutya nduno otwa za meputuko lini!

11. Ehangano lyaKalunga ohali imonikila mo ngiini?

¹¹ Ohole yashili nuukumwe mboka wu li mokati kaapiya yaJehova, otayi holola kutya yo oye li melongelokalunga lyashili. Jesus okwa ti: “Ngele omu holathane, nena aantu ayehe otaa ka dhimbulula kutya one aalongwa yandje.” (Johannes 13:34, 35) Omuyapostoli Johannes okwa nyola wo: “Eyooloko pokati kaana yaKalunga naana yomuhindadhi opo li li mpa: Shaa ngoka itaa longo shoka shu uka nenge kee hole mukwawo, oye ke shi omuna gwaKalunga. Oshoka elaka ndyoka twe li uvu okuza ketameko olyo ndika: otse otu na okuholathana.” (1 Johannes 3:10, 11) Ohole nuukumwe otayi holola kutya Oonzapo dhaJehova odho aalanduli yaJesus yashili, mboka Kalunga ta longitha yu uvithe onkundana ombwanawa yUukwaniilwa kombanda yevi alihe. — Mateus 24:14.

12, 13. “Engathithi lyaantu” nena ohali kala tali longo shike, nolya tegelela okuningilwa shike masiku?

¹² Nena aapiya oyendji yaJehova, iilyo  ‘yengathithi lyaantu,’ mboka ya za miitopolwa oyindji muuyuni, otaya ambidhidha Uukwaniilwa waKalunga. Ombiimbeli otayi ti: “Aantu mbaka oomboka ya piti momahepeko ngoka omanene. Oyo oya yogo oonguwo dhawo noye dhi yelitha nombinzi yOnzigona.” — Ehololo 7:9, 14, 15.

¹³ Masiku Kalunga otaka hanagula po uuyuni mbuka wu udha uukolokoshi pethimbo ‘lyuudhigu uunene.’ (Mateus 24:21; lesha Jeremia 25:32, 33.) Ihe Jehova ota ka gamena aapiya ye noku ya fala muuyuni uupe, oshoka oku ya hole. Ngaashi naanaa u uvanekele konyala oomvula 2 000 dha ka pita, “ota ka theta omahodhi agehe momeho gawo. Oko noitaku ka kala we eso, oluhodhi, eliko [elilo] nenge uuwehame.” Mbela owa tegelela ngaa nomwenyo aguhe oku ka kala mOparadisa moka itaamu ka kala uukolokoshi, okumona iihuna neso? — Ehololo 21:4.

14. Ongundu yaantu mboka ya gongelwa oyi thike peni?

¹⁴ Sho omasiku gahugunina ga tamekele mo 1914, kombanda yevi okwa li aapiya yaKalunga aashona yowala. Kekwatho lyombepo ondjapuki yaKalunga, okangundu hoka kaagwayekwa oku uvitha onkundana ombwanawa yUukwaniilwa nonando kasha li oshipu. Oya li taya inyengithwa kohole yawo yokuhola aantu ooyakwawo. Oshizemo? Ngashingeyi opu na ongundu onene yaantu mboka ye na etegameno lyokukala nomwenyo kombanda yevi. Aantu mboka otayi ihilile po 8 000 000, ye li momagongalo ge vulithe 115 400, kongonga yevi alihe. Omwaalu ngoka otagu tsikile okwiindjipala. Pashiholelwa, momumvo 2014 omwa ninginithwa aantu 275 500. Shoka otashi ti, moshiwike kehe omwa ninginithwa konyala aantu 5 300.

15. Onkundana ombwanawa ohayi thiki ngiini kaantu ngashingeyi?

¹⁵ Otashi kumitha okumona nkene aantu oyendji yu uva onkundana ombwanawa yUukwaniilwa. Iinyanyangidhwa yetu ngashingeyi oyi li momalaka ga konda po 700. Oshifo shoka hashi leshwa kaantu oyendji muuyuni, Oshungolangelo. Omwedhi kehe ohapu nyanyangidhwa iifo ya konda 52 000 000, momalaka 247. Omanga embo, Omalongo gashili gOmbiimbeli ogeni naanaa? ndyoka hali tu kwathele tu konakone Ombiimbeli naantu, olya tolokwa momalaka ge vulithe 250. Sigo oompaka omwaalu gwembo ndyoka ogwa konda 200 000 000.

16. Omolwashike ehangano lyaJehova tali tamunuka mo?

¹⁶ Ehangano lyetu otali tamunuka mo, oshoka otwi itaala muKalunga notwa taamba ko Ombiimbeli yi li oohapu dhe dha nwethwa mo. (1 Aatessalonika 2:13) Jehova ote tu yambeke natango, nonando Satana oku tu tonde note tu pataneke. — 2 Aakorinto 4:4.

17, 18. Jehova okwa hala tu kale tu uvitile ngiini mboka ihaaye mu longele?

¹⁷ Haantu ayehe haya taamba ko etumwalaka ndyoka hatu uvitha. Yamwe ohaye li pulakene, omanga yalwe ye li tonde. Jehova okwa hala tu kale tu uvitile ngiini  mboka ihaaye mu longele? Kutya nduno aantu otaya pulakene nenge itaya pulakene, ohatu landula aluhe omayele gOmbiimbeli. Otayi ti: “Oohapu dheni nadhi kale aluhe oombwanawa notadhi hokitha omuntu oku mu pulakena. Kambadhaleni, mu kale aluhe mu shi, nkene mu na okuyamukula aantu.” (Aakolossa 4:6) Uuna tatu popile eitaalo lyetu, otwa hala oku shi ninga ‘nombili nonesimaneko,’ oshoka otu hole aantu ooyakwetu. — 1 Petrus 3:15,16.

¹⁸ Nokuli nonando aantu oya geye sho inaaya hala etumwalaka lyetu, ohatu yu ulukile ohole ngaashi Jesus e shi ningile. Jesus “ina tuka mboka ye mu tuku; naasho a hepekwa, ina sa ondjahi.” Pehala lyaashono okwa li i inekela muJehova. (1 Petrus 2:23) Otu na okukala aluhe aaishonopeki nokutula miilonga omayele taga landula: “Ngoka te mu ningile uuwinayi nenge te mu thingi, inamu mu thinga. Ihe mu shunithileni elaleko nuuyamba.” — 1 Petrus 3:8, 9.

19. Otu na okukala ngiini naatondi yetu?

¹⁹ Eishonopeko ohali tu kwathele tu tule miilonga ekotampango limwe lya simana ndjoka Jesus a popi. Okwa ti: “One mu uvu kwa tiwa: ‘Hola mukweni, tonda omutondi gwoye.’ Ihe ngame otandi mu lombwele: Holeni aatondi yeni, galikaneneni aahepeki yeni, opo mu ninge aana yaHo yeni yomegulu. Oshoka etango lye ohe li pitithile aawinayi naawanawa, nomvula ye ohe yi lokithile aayuuki naalunde.” (Mateus 5:43-45) Tseni aapiya yaKalunga, otu na okukala tu hole aatondi yetu, kutya nduno oye tu ninge nayi.

20. Otu shi shi ngiini kutya kevi alihe otaku ka kala aantu mboka ye hole Jehova naantu ooyakwawo? (Tala kethano lyopetameko.)

²⁰ Otu na okuulika aluhe kutya otu hole Jehova naantu ooyakwetu. Nonando ohaye tu pataneke nokaye hole etumwalaka lyetu, ohatu ya kwatha uuna ye na ompumbwe. Omuyapostoli Paulus okwa nyola a ti: “Inamu kala mu na ongunga yomuntu, kakele kongunga yokuholathana. Oshoka ngoka e hole mukwawo, oye okwa gwanitha ompango ayihe. Iipango oyo mbika: ‘Ino hondela, Ino dhipaga, Ino yaka, Ino haluka;’ iipango mbika ayihe niikwawo ya gwedhwa ko, oya kwatelelwa moshipango shika: ‘Hola mukweni, ngaashi ngoye wi ihole mwene.’ Oshoka ngoka e hole mukwawo, ita vulu oku mu ningila uuwinayi. Onkee ano ohole oyo egwanitho lyompango ayihe.” (Aaroma 13:8-10) Aapiya yaKalunga oye hole shili aantu ooyakwawo, nonando oye li muuyuni mbuka wa topoka, wu na omiyonena nowa kolokosha. (1 Johannes 5:19) Ohole otayi ka udha evi alihe, konima ngele Jehova a hanagula po Satana, oondemoni nuuyuni mbuka wa kolokosha. Itashi ka kala tuu eyambeko enene sho kevi alihe taku ka kala aantu mboka ye hole Jehova naantu ooyakwawo!