1, 2. (a) Aavali yamwe mboka ye na aagundjuka momagumbo ohaya kala tayi ipula nashike? (b) Aanona otaya vulu ngiini oku shi enditha nawa muugundjuka wawo?

AAVALI ohaya kala ya nyanyukwa noonkondo uuna oyana taya ninginithwa. Oyana yaBerenice ayehe yane oya ninginithwa manga inaaya gwanitha oomvula 14. Ota ti: “Atuhe otwa li twa nyanyukwa noonkondo. Otwa li twa pandula Jehova sho aanona yetu ya hala oku mu longela. Ihe otwa li wo tu shi shi kutya sho ye li mepipi lyuugundjuka, otaya ka adhika komashongo.” Ngele aamwoye aagundjuka nenge ye li pokuninga aagundjuka, otashi vulika wu kale wo twi ipula noshinima shika.

² Omutseyinawa gwonkalamwenyo yaanona ota ti kutya epipi lyuugundjuka ohashi vulika li kale edhigu kaavali nokaanona. Ashike aakuluntu kaye na okudhiladhila kutya aagundjuka yaandjawo oye na omitse dha teka nenge pamwe ya nika oshinona. Ihe pehala lyaashono, okwa ti kutya aagundjuka oye na owala omadhiladhilo ge endelela, omahalo ge na oonkondo noye hole okukala nookuume kawo. Onkene manga  aamwoye ye li aagundjuka natango, otaya vulu okupanga uukuume wopothingo naJehova, ngaashi Jesus e shi ningile sho a li omugundjuka. (Lesha Lukas 2:52.) Otaya vulu wo okuhwepopaleka okuuvitha kwawo nokukala ya hala okulongela Kalunga ya mana mo. Otaya ka vula wo okwiitokolela shoka ya hala okuninga, ngaashi okwiiyapulila Jehova nokuvulika kuye. Ihe ngoye omuvali, oshike to vulu okuninga wu longe omugundjuka gwaandjeni a kale ha longele Jehova? Oto vulu okuholela omukalo moka Jesus a longo aalongwa ye. Okwa li e ya hole, i ishonopeka noku yu uvite ko.

3. Aayapostoli oye shi mono ngiini kutya Jesus okuume kawo?

³ Jesus sho a li naayapostoli ye, ka li owala omuhona nenge mwene gwawo, ihe okwa li wo kuume kawo. (Lesha Johannes 15:15.) Pethimbo sho Ombiimbeli tayi nyolwa, aahona kaya li haya lombwele aapiya yawo omadhiladhilo gawo nenge shoka yu uvite. Ihe Jesus okwa li e hole aayapostoli ye nokwa li ha kala pamwe nayo. Okwa li he ya lombwele shoka ta dhiladhila naashoka u uvite. Okwa li wo he ya pulakene nawa uuna taye mu lombwele shoka taya dhiladhila naashoka yu uvite. (Markus 6:30-32) Oonkundathana dhawo odha koleke uukuume wawo nodha kwathele aayapostoli ya kale yi ilongekidhila oshilonga shoka taya ka longa.

4. Aavali, omu na okuninga shike mu pange uukuume naanona yeni? (Tala kethano lyopetameko.)

⁴ Nonando aamwoye oye li meutho lyoye, oto vulu wo okukala kuume kawo. Ookuume ohaya kala pamwe. Pehala lyokukala owala aluhe kiilonga nenge wi ipyakidhila niinima yilwe yopaumwene, konga wo ethimbo lya gwana wu kale naamwoye. Galikana kombinga yoshinima shoka noku shi dhiladhila nawa. Kambadhala wo okukala wu hole iinima mbyoka aamwoye ye hole, ngaashi oongalo, oomuvi nuudhano, oshoka ookuume oye hole okuninga iinima pamwe. Ilaria, ngoka ha kala moItaly, ota ti: “Aakuluntu yandje oya li ya hala okutseya oongalo ndhoka handi pulakene. Tate okwa ningi kuume kandje kopothingo nonda li handi kala nda manguluka oku mu lombwela kehe shimwe, niinima mbyoka kaayi shi iipu okupopiwa.” Aamwoye itaye ku dhini nonando owa kala kuume kawo, sho to ya kwathele ya pange uukuume naJehova. (Episalomi 25:14) Otaya ka mona kutya owu ya hole nowe ya simaneka. Otashi kala oshipu kuyo okupopya nangoye okanima kehe.

5. Oshike sha li tashi ka kwathela aalongwa yaJesus ya kale ya nyanyukwa sho taya longele Jehova?

⁵ Jesus okwa li e shi shi kutya aalongwa ye otaya ka kala ya nyanyukwa, ngele oya kala yi itula mo mokulongela Jehova nokuuvitha aluhe onkundana ombwanawa. Onkene okwe ya ladhipike yu uvithe ya mana mo, noku uvaneke kutya ote ke ya kwatha. — Mateus 28:19, 20.

6, 7. Oshike to vulu okuninga po wu ulike kutya owu hole aamwoye, sho to ya longo ya kale ye na ondjigilile yokulongela Jehova?

⁶ Osha yela kutya owa hala aamwoye ya kale popepi naJehova. Jehova naye okwa hala wu ya longe noku ya pukulula. Okwe ku pa uuthemba woku shi ninga. (Aaefeso 6:4) Onkee sa oshimpwiyu aluhe wu ya longe. Oho si oshimpwiyu aanona yoye ya ye kosikola ye ki ilonge iinima iipe, oshoka owu shi shi kutya elongo olya simana. Momukalo  gwa faathana, owa pumbwa wo okusa oshimpwiyu ya kale pokugongala, piigongi nopelongelokalunga lyuukwanegumbo. Elongo ndika olya simana, oshoka otali hupitha oomwenyo dhawo. Ano ya kwathela ya kale ye hole okwiilonga kombinga yaJehova noya mone kutya ota vulu oku ya longa ya kale nowino. (Omayeletumbulo 24:14) Ya longa wo ya kale ye na ondjigilile yokuuvitha. Landula oshiholelwa shaJesus, sho to ya kwathele ya kale ye hole okulonga aantu Oohapu dhaKalunga.

⁷ Otashi kwathele ngiini aagundjuka, ngele oya kala aluhe haya konakona Ombiimbeli, haya yi kokugongala nohaya uvitha? Erin, gwokoSouth Africa, ota ti: “Sho twa li uunona otwa li hatu kala tatu ngungutula inaatu hala ekonakonombiimbeli, okuya kokugongala nenge miilonga yomomapya. Omathimbo gamwe otwa li hatu kambadhala okuya elongelokalunga lyuukwanegumbo moshipala. Ihe aakuluntu yetu inaye shi pitika.” Okwa pandula aakuluntu ye sho ye mu kwathele a mone kutya iinima mbika oya simana. Ngashingeyi uuna inaa ya kokugongala nenge momapya oha kala a yuulukwa oku shi ninga.

8. (a) Jesus oku ulike ngiini kutya ye omwiishonopeki? (b) Eishonopeko lyaJesus olya kwathele ngiini aalongwa ye?

⁸ Nonando Jesus okwa li a gwanenena, okwa holola kutya omwiishonopeki sho a lombwele aalongwa ye kutya okwa pumbwa ekwatho lyaJehova. (Lesha Johannes 5:19.) Mbela shika oshe mu dhinitha kaalongwa ye? Aawe, oya kala ye mu inekela, sho ya mono kutya okwi inekela Jehova. Nokonima oya ka kala aaishonopeki ngaashi ye. — Iilonga 3:12, 13, 16.

9. Otashi kwathele ngiini aagundjuka, ngele oho zimine omapuko goye noho gandja ombili?

⁹ Tseni inatu gwanenena ngaashi Jesus, nohatu ningi omapuko. Onkee, kala omwiishonopeki. Kala wu shi shi kutya opu na iinima oyindji hayi ku nyenge. Kala wo ho zimine omapuko goye. (1 Johannes 1:8) Kungawo, omugundjuka ote ki ilonga okuzimina omapuko ge. Ote ke ku simaneka nokuli shi vulithe nale. Dhiladhila kwaashika: Olye to vulu okusimaneka nuupu? Mbela omuhona ngoka ha zimine omapuko ge, nenge oongoka ihaa gandja ombili? Rosemary, ngoka e na aanona yatatu, ota ti kutya ye nomusamane gwe oya li haya zimine omapuko gawo. Okwa ti: “Shoka osha ningitha aanona yetu ya kale ya manguluka oku tu lombwela uupyakadhi wawo.” Okwa gwedha ko a ti: “Otwa longo aanona yetu ya kale ye shi mpoka taya vulu okumona ekandulopo lyuupyakadhi kehe ye na. Uuna ya pumbwa ekwatho, otwa li hatu ya kwathele ya konge omayamukulo miinyolomwa yopaMbiimbeli, notwa li hatu galikana pamwe nayo.”

10. Jesus okwa holola ngiini eishonopeko lye sho a li ta lombwele aalongwa ye shoka ye na okuninga?

¹⁰ Jesus okwa li e na uuthemba wokufolomaneka aalongwa ye. Ihe molwaashoka  okwa li omwiishonopeki, okwa li ha yelitha kutya omolwashike ye na okuninga oshinima shontumba. Pashiholelwa, ka li owala a lombwele aalongwa ya konge tango Uukwaniilwa waKalunga nuuyuuki we. Okwe ya yelithile wo a ti: “Nena mbika ayihe otamu yi gwedhelwa ko.” Sho e ya lombwele kaaya pangule, okwe ya yelithile a ti: “Opo Kalunga kee mu pangule. Oshoka omukalo ngoka tamu gu pangulitha yakweni, ogwo Kalunga te ke mu pangulitha.” — Mateus 6:31–7:2.

11. Otashi kwathele ngiini aagundjuka, ngele owe ya yelithile kutya omolwashike wa ningile etokolo lyontumba?

¹¹ Konga ethimbo tali opalele wu yelithile aagundjuka yaandjeni kutya omolwashike wa ningi etokolo lyontumba nenge we ya tulile po ompango yontumba. Ngele oye shi etompelo, otaya kala ya hala okuvulika kungoye. Barry, ngoka a putudha aanona yane, ota ti: “Aagundjuka ohaya kala ye ku inekela ngele oho ya pe omatompelo.” Otaya ka mona kutya ino ninga owala etokolo molwaashoka wu na uuthemba, ihe owu na etompelo ewanawa. Dhimbulukwa wo kutya aagundjuka kaye shi we aanona aashona. Otaye ende tayi ilongo okudhiladhila kuyo yene, noya hala okuninga omatokolo kuyo yene. (Aaroma 12:1) Barry ote shi yelitha ngeyi: “Aagundjuka oya pumbwa okwiilonga okuninga omatokolo gopandunge, ye na omatompelo, pehala lyokutala owala kwaashoka yu uvite.” (Episalomi 119:34) Onkee ano ishonopeka e to ya yelithile kutya omolwashike wa ningile etokolo lyontumba. Shika otashi ke ya longa okuninga omatokolo gawo yene. Otaya ka mona wo kutya owe ya simaneka nowa koneka kutya otaya koko.

12. Molwaashoka Jesus okwa li e shi Petrus nawa, okwe mu kwathele ngiini?

¹² Jesus okwa li e shi nawa aalongwa ye nokwa li e shi ekwatho ndjoka ya pumbwa. Pashiholelwa, sho Jesus e ya lombwele kutya ota ka dhipagwa, omuyapostoli Petrus okwe mu lombwele i iyetele ohenda. Jesus okwa li e shi shi kutya omuyapostoli Petrus oku mu hole, ihe Petrus okwi inyenge momukalo gwa puka. Ongiini Jesus a kwathele Petrus nosho wo aalongwa yalwe? Tango, okwe mu pukulula. Opo ihe okwe mu yelithile shoka tashi ka ningilwa mboka inaaya hala okulonga ehalo lyaJehova, uuna she ya ningila oshidhigu. Jesus okwa ti wo kutya Jehova ota ka yambeka mboka kaayi ihole yoyene. (Mateus 16:21-27) Petrus okwi ilongo mo sha. — 1 Petrus 2:20, 21.

13, 14. (a) Oshike tashi vulu oku ku ulukila kutya omugundjuka gwaandjeni okwa pumbwa okukoleka eitaalo lye? (b) Ongiini to vulu okumona kutya ekwatho lini omumwoyemati nenge omukadhona a pumbwa?

¹³ Galikana Jehova e ku kwathele wu uve ko nawa ekwatho ndjoka omugundjuka gwaandjeni a pumbwa. (Episalomi 32:8) Otashi vulika wu wete kutya ina nyanyukwa we ngaashi nale, nenge ta popile ooitaali ooyakwawo muuwinayi, nenge tashi vulika wu wete te ku holeke sha. Ino dhiladhila kutya ota ningi sha oshiwinayi meholamo. * Ihe ino mu etha owala inoo mu kwathela, to dhiladhila kutya uupyakadhi otawu ikandula po wo wene. Otashi vulika wa pumbwa oku mu kwathela a koleke eitaalo lye.

 ¹⁴ Opo wu mone nkene wu na okukwathela omugundjuka, mu pula nesimaneko nonombili. Shika otashi vulu okuyelekwa nomuntu ta teke omeya momuthima omule. Ngele owe endelele oku ga dhuga mo, otashi vulika wu ze mo nomeya omashona gowala. Momukalo gwa faathana, ngele owa thiminike omugundjuka a yamukule omapulo goye meendelelo, ite ke ku lombwela ashihe shoka ta dhiladhila nenge u uvite. (Lesha Omayeletumbulo 20:5.) Ilaria ota dhimbulukwa sho a li omugundjuka kutya okwa li ha kala a hala okukala unene naanasikola ooyakwawo, nonando okwa li e shi kutya osha puka. Aakuluntu ye oya koneke kutya opu na sha tashi mu piyaganeke. Ilaria ota ti: “Ongulohi yimwe oya lombwele ndje kutya oye wete pu na sha shu uvitithe ndje nayi, e taya pula ndje ngele opu na uupyakadhi. Onda tameke okulila. Sho nda mwena, onde ya lombwele shoka shi li po, e tandi ya pula ekwatho. Oya papatele ndje, e taya lombwele ndje kutya onkalo oye yi uvite ko. Oyu uvanekele ndje kutya otaya ka kwathela ndje.” Aakuluntu yaIlaria oya tameke mbala oku mu kwathela a mone ookuume megongalo.

15. Omomukalo guni Jesus a li u ulike kutya oku shi nawa aalongwa ye?

¹⁵ Jesus okwa koneke uukwatya uuwanawa maalongwa ye, oshoka okwa li e ya shi nawa. Pashiholelwa, sho Natanael u uvu kutya Jesus okwa za kuNasaret, okwa ti: “MuNasaret otamu vulu tuu okuza uuwanawa washa?” (Johannes 1:46) Ando opo wa li sho Natanael ta popi oohapu ndhoka, mbela ando owa ti kutya oku na okatongo noku hole okugandja uusama nenge kee na eitaalo? Shono hasho Jesus a li ta dhiladhila. Pehala lyaashono, Jesus okwa li e wete kutya Natanael omunashili, oshoka okwa li e mu shi nawa. Okwe mu popi a ti: “Tala, Omwiisraeli gwashili, ngoka kee na nando iifundja!” (Johannes 1:47) Jesus okwa li ha mono momitima dhaantu ta kongo mo uukwatya uuwanawa.

16. Ongiini to vulu okuladhipika omugundjuka a hume komeho?

 ¹⁶ Nonando iho lesha omitima ngaashi Jesus, Jehova ota vulu oku ku kwathela wu mone uukwatya uuwanawa momumwoye. Nonando okwe ku geyitha, ino tya okwa ninga omuntu omwiinayi. Ino shi mu dhiladhilila nokuli. Pehala lyaashono, mu lombwela kutya oku na uukwatya uuwanawa nowu wete kutya okwa hala okulonga shoka shi li mondjila. Uuna wa mono te ya nawa, mu pandula. Mu pa iinakugwanithwa, ngele otashi vulika, opo wu mu kwathele a hume komeho. Jesus osho a li ha ningile aalongwa ye. Pashiholelwa, konima yomvula netata, Jesus okwa pe Natanael (ngoka hi ithanwa wo Bartolomeus) oshinakugwanithwa sha simana. Okwe mu ningi omuyapostoli. Natanael okwa gwanitha po oshilonga shoka nuudhiginini. (Lukas 6:13, 14; Iilonga 1:13, 14) Pehala lyokuningitha omugundjuka gwaandjeni a kale u uvite kutya kehe oshinima ta ningi ino shi panda, kala ho mu pandula noku mu tsa omukumo. Na kale u uvite kutya ota vulu oku ku nyanyudha nokunyanyudha Jehova, nota vulu okulongitha uunkulungu we a longele Jehova.

17, 18. Ngele ino teka omukumo sho to dheula aagundjuka yaandjeni ya longele Jehova, oto ka mona iizemo yini?

¹⁷ Paulus okwa li ha kala ti ipula aluhe nooitaali mboka a li a tala ko ya fa oyana. Okwe ya kwathele yi ilonge kombinga yaJehova, nokwa li e ya hole noonkondo. Osha li hashi mu yemateke, sho ta dhiladhila kutya otashi vulika yamwe ye ethe po okulongela Jehova. (1 Aakorinto 4:15; 2 Aakorinto 2:4) Otashi vulika nangoye ho kala twi ipula naamwoye, ngaashi omuyapostoli Paulus. Victor, ngoka a putudha aanona yatatu, ota ti: “Sho aanona yetu ya li aagundjuka, onkalo kaya li ompu. Ihe omasiku omawanawa oga li ogendji ge vule omasiku omawinayi. Jehova okwe tu kwathele tu kale tu na uukuume wopothingo naanona yetu.”

¹⁸ Aavali omu hole aanona yeni, nomolwaasho hamu ya longo nuudhiginini. Inamu teka omukumo. Dhiladhileni kenyanyu ndyoka tamu ka kala mu na, uuna aanona yeni ya tokola okwiiyapulila Kalunga noku mu longela nuudhiginini. — 3 Johannes 4.