ONDJOKONONA
Osho nda panga ombili naKalunga nosho wo nameme
ESIKU LIMWE meme okwa pula ndje a ti: “Omolwashike inoo halela okugalikana aakulu yonale? Ino tseya kutya omolwayo wu na omwenyo? Tashi ti ino hala nando oku ya ulukila kutya owe ya pandula? Owu ke ekelehi ngaa omithigululwakalo dha za nalenale? Ngele ino hala okusimaneka aakulu yonale, owa fa to ti kutya elongelokalunga lyetu olya nika uugoya.” Meme okwa tameke ta lili, sho a popi oohapu ndhoka.
Oshinima shika osha tamekele ngaa konima yoomwedhi dhontumba okuza sho Oonzapo dhaJehova dha pula meme dhi mu longe Ombiimbeli. Shaashi ye ka li a hala oku ya uvitha nayi, okwa ti ongaye naya longe. Ihe mokweendela ko kwethimbo ka li e shi panda, oshoka okwa mono itaandi vulika we kuye. Eeno, kanda li tandi vulu okuvulika kuye pompito ndjika, oshoka onda li nda hala okunyanyudha Jehova. Kasha li oshipu, ihe Jehova okwa kwatha ndje.
TANDI ILONGO KOMBINGA YAJEHOVA
Meme natate oyomeitaalo lyAabuddha, ngaashi aantu oyendji moJapani. Ihe sho nda longwa Ombiimbeli uule woomwedhi mbali, onda li ndi itaala kutya Ombiimbeli otayi popi oshili. Sho nda tseya kutya ondi na Tate gwomegulu, onda li nda hala oku mu tseya nawa. Petameko tse nameme otwa li tu hole okupopya kombinga yaashoka tandi ilongo. Onda tameke handi yi kokugongala mOsoondaha kehe. Sho nde ende tandi tseya Ombiimbeli, onde mu lombwele kutya inandi hala we okukala handi dhana iituthi yOshibuddha. Sho nde shi mu lombwele, okwa li moonyandi. Okwa ti: “Okukala nomuntu mezimo lyetu kee hole aakulu yonale, ohoni onene.” Okwa ti wo ina hala we okumona ndje tandi konakona Ombiimbeli nenge tandi ka gongala nOonzapo. Kanda li nda tegelela a lombwele ndje oohapu dha tya ngaaka. Okwa li owala a fa haaye.
Tate naye okwa li a gama kumeme. Ondi ilongele mAaefeso ontopolwa 6 kutya Jehova okwa hala ndi vulike kaakuluntu yandje. Onda li nda hala megumbo mu kale ishewe ombili, nonda li tandi dhiladhila kutya ngele onda vulika kwaashoka taya ti nayo otaya ka pulakena ndje. Shaashi pethimbo mpoka onda li tandi ilongekidhile ekonakono, onda tokola ndi vulike kuyo uule woomwedhi ndatu. Ihe onda uvanekele Jehova kutya otandi ka tameka okuya kokugongala konima yoomwedhi ndhoka.
Oshinima shoka kanda li nde shi tala nawa, omolwomatompelo gaali. Lyotango, onda li ndi shi konima yoomwedhi ndatu otandi ka kala natango nda halelela okulongela Jehova. Ihe pehala lyaashono, ekwatathano lyandje naye olya nkundipala nziya. Etiyali, meme natate oya
kambadhala noonkondo ye ethithe ndje po okulongela Jehova.EKWATHO SHO TANDI PATANEKWA
KOshinyanga shUukwaniilwa onda tsakanene ko nOonzapo odhindji, ndhoka dha li tadhi patanekwa kuyaandjawo. Odha tsu ndje omukumo kutya Jehova ota ka koleka ndje. (Mateus 10:34-37) Oya ti ngele onda dhiginine, aantu yaandjetu otashi vulika nayo ya tseye Jehova. Onda li nda hala okwiinekela Jehova, onkee onda tameke handi mu galikana nomutima aguhe.
Meme natate oya li ya pataneke ndje momikalo dhi ili nodhi ili. Pashiholelwa, meme okwa li a pula ndje ndi ethe po okukonakona Ombiimbeli nokwa kambadhala okutompa ndje. Olundji onda li owala handi kala nda mwena. Shaa nda ti ko sha, otwa li hatu iyadha tatu nyenyeta, oshoka kehe gumwe ota kambadhala okutompa mukwawo kutya ye oye e li mondjila. Ngashingeyi onda ndhindhilika kutya ando onda talele kunkene meme u uvite nokusimaneka eitaalo lye, ando iinima inayi ke enda nga. Oya tameke haya pendje iilonga oyindji megumbo. Omathimbo gamwe, oya li haya patele ndje pondje nenge ya pange ndje iikulya.
Meme okwa pula nokuli aantu yalwe ye mu kwathele ya popye nangame, pamwe tandi uvu ko. Okwa pula omulongi gwandje, ihe inashi kwatha sha. Okwa fala ndje wo komukuluntu gwiilonga yawo a tompe ndje kutya omaitaalo agehe kage na shilonga. Okwa dhengele wo aakwanezimo, te ya pula ta lili, ye mu kwathele. Shika osha yemateke ndje noonkondo. Ihe aluhe kokugongala, aakuluntugongalo oya li haya dhimbulutha ndje kutya sho meme ta popi naantu kombinga yoshinima shika, ote yu uvithile.
Aakuluntu yandje oya li ya hala ndi ye kouniveesiti, opo ndi vule oku ka mona iilonga hayi futu nawa. Oshinima shika katwa li hatu vulu oku
shi popya twa ngungumana, onkee onde ya nyolele oontumwafo ndi ya yelithile omalalakano gandje. Tate okwa geye noonkondo e ta lombwele ndje ta ti: “Ngele oto dhiladhila kutya oto vulu okwiimonena iilonga, ongula ndji tayi pi ontaku kala we yi mona, ngele hasho oto zi mo megumbo mu.” Onda pula Jehova megalikano a kwathele ndje. Ongula sho kwa shi, manga tandi uvitha, aamwameme yaali oya pula ndje ndi ninge omulongi gwoyana. Tate ka li e shi nyanyukilwa nokwa tameke ihaa popi nangame. Meme okwa ti kutya ando nda ningile ombotsotso pehala lyokuninga Onzapo, shila ando hwepo.Jehova okwa kwathele ndje ndi kale ndi na omadhiladhilo ga yela nondi tseye shoka ndi na okuninga
Omathimbo gamwe onda li handi ipula ngele Jehova okwa hala ngaa ndi kondjithe aavali yandje unene, ngaashi nda li tandi shi ningi. Onda galikana Jehova nokudhiladhila muule kombinga yaashoka Ombiimbeli tayi ti, shi na ko nasha nohole ye. Shika osha kwathele ndje kaandi kale nda limbililwa nondi uve ko kutya aakuluntu yandje otaya pataneke ndje, oshoka oye na oshimpwiyu nangame. Jehova okwa kwathele ndje ndi kale ndi na omadhiladhilo ga yela nondi tseye shoka ndi na okuninga. Mpoka ngaa pu thike okuya kwandje momomapya, opo ngaa pu thike tandi yi nyanyukilwa. Uukokolindjila owo wa li elalakano lyandje.
NDA NINGI OMUKOKOLINDJILA
Sho aamwameme yamwe yu uvu kutya onda hala okukokola ondjila, oya lombwele ndje kutya nandi tegelele manga aavali yandje ya fululuke. Onda galikana Jehova a pe ndje uunongo. Onda ningi wo omapekapeko ndi mone etompelo kutya omolwashike nda hala okukokola ondjila, nonda pula wo omayele kaamwatate naamwameme mboka ya pyokoka. Opo ihe onda tokola ndi shi ninge oshoka onda hala okunyanyudha Jehova. Onde shi mono mo kutya nonando ondi tegelele ya fululuke, otaya ka tsikila owala okupataneka ndje.
Onda tameke okukokola ondjila momvula yandje yahugunina mosikola. Konima sho nda kokola ondjila uule wethimbo lyontumba, onda li nda hala oku ka uvitha hoka ku na ompumbwe onene. Ihe tate nameme kaya li ya hala ndi ze mo megumbo. Onkee onda tegelele nasigo nda gwanitha oomvula 20. Ondi indile oshitayimbelewa shi pe ndje oshinakugwanithwa popepi naakwanezimo yandje mboka ye li muumbugantu waJapani, opo meme a kale kee na omaipulo ogendji.
Sho ndi ipyakidhila niilonga mbyoka nda pewa, onda li nda nyanyukwa okumona mboka handi konakona nayo Ombiimbeli taya ninginithwa. Onda tameke okwiilonga Oshiingilisa, oshoka onda li nda hala okuninga oshindji muukalele. Konima sho nda mono nkene aakokolindjila yi ikalekelwa yaali aalaadhi megongalo lyetu nankene haya kwathele yalwe, nangame onda li wo nda hala ndi ninge omukokolindjila i ikalekelwa. Muule wethimbo ndyoka, meme okwa kwatwa kuuvu iikando iyali te ehamenene, niikando mbyoka onda galukile kegumbo, opo ndi mu kwathele. Shika osha li she mu kumitha nokwa tameke okupanga ombili nangame.
OMAYAMBEKO NGOKA NDA MONA OKUZA KUJEHOVA
Konima yoomvula heyali, Atsushi, gumwe gwomaakokolindjila yi ikalekelwa mboka nda popi metetekelo, okwa nyolele ndje ontumwafo. Okwa li a hala okuhokana nokwa pula ndje nkene ndi mu uvitile. Inandi ipula nando onale naye nokanda li nde shi dhiladhila kutya okwa hala ndje. Konima yomwedhi, onde mu galulile kutya onda hala ndi mu tseye nawa manga. Otwe shi mono mo kutya atuhe otu na omalalakano ga faathana. Otwa li twa hala okutsikila niilonga yethimbo lyu udha notwa li tu na ehalo lyokutaamba ko oshinakugwanithwa kehe tatu pewa. Lwanima, otwa hokana. Onda li nda nyanyukwa okumona meme natate nosho wo aakwanezimo ye ya kohango yetu.
Nepal
Okuza mpono, manga tu li muukokolindjila wondjigilile, Atsushi okwa ningwa omupeha
gwomutonatelishikandjo. Lwanima, otwa ningi aakokolindjila yi ikalekelwa nokonima otwa yi miilonga yuutonatelishikandjo. Sho twa mana okutalela po omagongalo agehe moshikandjo shetu oshikando shotango, otwa yakula ongodhi ya zi koshitayimbelewa. Otwa pulwa ngele otatu vulu tu ka longele koNepal.Ondi ilongo oshindji kombinga yaJehova sho tandi mu longele miilongo yi ili noyi ili
Onda li tandi ipula nkene aavali yandje taya ka kala yu uvite, ngele otwa tembukile kokule nayo. Onde ya dhengele ongodhi ndi ya lombwele. Tate okwa ti: “Otamu yi kehala ewanawa.” Ngoshiwike sha yi, okwa li a pewa embo tali popi oshilongo Nepal. Okwa li nokuli ta dhiladhila oku ka talela po koshilongo hoka.
Otwa li twa nyanyukwa okulonga naantu yomoNepal, oshoka oye na ombili. Konima yethimbo, Bangladesh nasho osha gwedhwa koshikandjo shetu. Nonando oshilongo shika oshi li popepi naNepal, aantu yako oye na onkalo yi ili. Otwa li hatu adha mo aantu yi ili noyi ili sho tatu uvitha. Konima yoomvula ntano, otwa shunwa koJapani, hoka tatu nyanyukilwa natango iilonga yuutonatelishikandjo.
Ondi ilonga oshindji kombinga yaJehova sho tandi longo moJapani, Nepal nomoBangladesh. Aantu miilongo mbyoka oye na omithigululwakalo, eputuko nomikalondjigilile dha yoolokathana. Ishewe, kehe omuntu okwi ili. Ihe onda mona nkene Jehova he ya sile oshimpwiyu pauhandimwe nokwe ya taamba ko, he ya kwatha noku ya yambeka.
Ondi na omatompelo ogendji okupandula Jehova. Okwa pe ndje ompito yoku mu tseya noku mu longela. Okwa pa ndje wo omusamane e li nawa nomulaadhi mokulongela Kalunga. Kalunga okwa kwathela ndje ndi ninge omatokolo gomondjila. Ngashingeyi ondi na ekwatathano ewanawa naye nosho wo naavali yandje. Otandi pandula Jehova sho a kwatha ndje ndi pange ishewe uukuume nameme. Kandi na we iitya nomatumbulo okupandula Kalunga, sho a kwatha ndje ndi kale ndi na ombili naye nosho wo nameme.
Ohatu nyanyukilwa iilonga yuutonatelishikandjo