1, 2. Omolwashike Ombiimbeli ya yelekanitha okupopya kwetu nomulilo?

MO 1871, omulilo ogwa tomeke okuti kwaWisconsin, moAmerika. Ogwa taandele mbala nogwa fike po thiluthilu omiti konyala omabiliyona gaali. Omwa sile aantu ye vulithe 1 200, shoka inaashi ningwa nando onale momapeya ngoka ga holoka moAmerika. Otashi vulika ohandje ya zi keshina tali ende mokuti, oyo ye etitha epeya. Shika otashi tu dhimbulutha ovelise mOmbiimbeli ndjoka tayi ti: “Dhiladhila, nkene ohandje yimwe tayi fike okuti.” (Jakob 3:5) Omolwashike omunyoli gwOmbiimbeli, Jakob, a ti ngeyi?

² Okwa yelitha a ti: “Nelaka olya fa omulilo.” (Jakob 3:6) “Elaka” olyo omagano getu gokupopya. Ngaashi omulilo, shoka hatu popi nasho otashi vulu okweehameka lela. Oohapu dhetu otadhi vulu okunwetha mo yalwe. Nokuli Ombiimbeli otayi tu lombwele kutya shoka tatu popi otashi vulu okweetela yalwe omwenyo nenge eso. (Omayeletumbulo 18:21) Ihe mbela shono osha hala kutya katu na nando okupopya sha, molwaashono otashi vulika tu popye oshinima sha puka? Hasho nando. Itatu vulu okukala itaatu longitha omulilo, molwaashono twa tila gu tu fike. Pehala lyaashono, otu na okukala twa kotokela omukalo moka tatu gu longitha. Pashiholelwa, otatu vulu okulongitha omulilo tu teleke, tu huhulukwe notu minikile. Momukalo gwa  faathana, ngele otwa kala twa takamitha omukalo gwetu gwokupopya, kungawo otatu simaneke Jehova nokunwetha mo yalwe. — Episalomi 19:14.

3. Iinima yini itatu tayi ke tu kwathela tu ladhipike yalwe uuna tatu popi?

³ Jehova okwe tu pe omagano gokulombwela yalwe pakana nenge tu udhike shoka tatu dhiladhila naashoka tu uvite. Ihe ongiini tatu vulu okulongitha omagano ngaka tu ladhipike yalwe? (Lesha Jakob 3:9, 10.) Otwa pumbwa okutseya kutya uunake tu na okupopya, oshike twa hala okupopya nongiini tu na oku shi popya.

4. Uunake twa pumbwa okumwena?

⁴ Ethimbo limwe oshiwanawa tu kale twa mwena. Ombiimbeli otayi ti kutya ope na “ethimbo lyokumwena.” (Omuuvithi 3:7) Pashiholelwa, ohatu kala twa mwena uuna yalwe taya popi, opo tu ulike kutya otwe ya simaneka. (Job 6:24) Natango, ihatu popi iinima yaantu yopaumwene mbyoka yalwe inaaya pumbwa okutseya. (Omayeletumbulo 20:19) Ngele gumwe e tu geyitha, natu kambadhale okukala twa ngungumana notwaa tye sha. — Aaefeso 4:26.

5. Ongiini tatu vulu okuulukila Jehova kutya otwa pandula sho e tu pe omagano gokupopya?

⁵ Ihe ope na wo ethimbo lyo opala okutya sha. (Omuuvithi 3:7) Ope na ethimbo lyokuhambelela Jehova, okuladhipika yalwe, okuholola nkene tu uvite nosho wo okulombwela yalwe shoka twa pumbwa. (Episalomi 51:15) Ngele otwa longitha omagano getu gokupopya momikalo ndhika, otatu ulukile Jehova kutya otwe mu pandula noonkondo. Kakele kaashono, ngele twa pewa omagano kukuume ketu, otatu ke ga longitha momukalo omwaanawa ngaashi tashi vulika.

6. Omolwashike sha simana okuhogolola ethimbo lyo opala okupopya?

⁶ Omolwashike sha simana okuhogolola ethimbo lyo opala okupopya? Omayeletumbulo 25:11 otayi ti: “Oohapu tadhi popiwa pethimbo lyo opala, odho iiyapula yoshingoli moshiyaha shoshisiliveli.” Iiyapula yoshingoli ohayi monika nawa, ihe ngele nokuli oya tulwa moshiyaha shoshisiliveli, kungawo we shi dhenge nee komutse. Sha faathana, otashi vulika tu kale twa hala okulombwela omuntu oshinima oshiwanawa. Ihe ngele otwa hogolola ethimbo lyo opala oku shi popya, otatu ka kwathela lela omuntu ngoka. Ongiini tatu vulu oku shi ninga?

7, 8. Aamwatate moJapani oya holele ngiini oshiholelwa shaJesus?

⁷ Ngele otwa tameke okupopya pethimbo itaali opalele, otashi vulika aantu kaaye tu uve nenge kaaya taambe ko shoka tatu popi. (Lesha Omayeletumbulo 15:23.) Pashiholelwa, muMaalitsa 2011, ekakamolyevi nosho wo otsunami oya yonagula po iilando oyindji muuzilo waJapani. Omwa sile aantu ye vulithe 15 000. Nonando Oonzapo dhaJehova odhindji odha kanitha iilyo yomaukwanegumbo nookuume, odha li dha hala okulongitha Ombiimbeli dhi kwathele yalwe mboka nayo ya li monkalo ya faathana. Ihe odha li dhi shi shi kutya oyendji yomaantu mboka Aabuddha noye shi owala kashona kombinga yOmbiimbeli. Onkee pehala lyoku ya lombwela pethimbo mpono kombinga yeyumuko, aamwatate oye ya hekeleke noku ya yelithila kutya omolwashike iinima iinyanyalithi hayi adha aantu aawanawa.

⁸ Aamwatate mboka oya holele Jesus. Jesus okwa li e shi shi kutya uunake e na okumwena, nokwa li wo e shi shi kutya uunake e na okupopya. (Johannes 18:33-37; 19:8-11)  Okwa li ha tegelele a mone ethimbo lyo opala, opo a longe aalongwa ye iinima yontumba. (Johannes 16:12) Aamwatate moJapani oya tegelele ethimbo lyo opala okulombwela aantu kombinga yeyumuko. Oomvula mbali netata konima yotsunami, oya pe aantu okafo Mbela oonakusa otaya ka yumuka ngaa ya kale nomwenyo? Oyendji oya taambele okafo hoka noya li ya hekelekwa sho ye ka lesha. Natse wo natu dhiladhile kombinga yomithigululwakalo nomaitaalo gaantu miitopolwa yetu, opo tu mone ethimbo lyo opala okupopya nayo.

9. Omoonkalo dhilwe ishewe dhini tu na okutegelela tu mone ethimbo lyo opala okupopya?

⁹ Omoonkalo dhilwe ishewe dhini tu na okutegelela tu mone ethimbo lyo opala okupopya? Natu tye ne andola omuntu okwa popi oshinima she tu yematitha. Pehala lyoku mu yamukula mbalambala nokupopya oshinima sha nika uugoya, otatu vulu okumwena nokudhiladhila kutya: ‘Mbela okwa li ngaa a hala okuuvitha ndje nayi shili? Mbela onda pumbwa ngaa shili okupopya naye kombinga yaashono a ti?’ Otashi vulika shi kale oshiwanawa okumwena. Ihe ngele ope na etompelo ewanawa wu popye naye, onawa wu tegelele sigo wa fululuka. (Lesha Omayeletumbulo 15:28.) Nenge otashi vulika tu kale twa hala okukwathela aanegumbo yaandjetu mboka inaaya tseya Jehova ye mu tseye. Inatu pumbwa okweendelela. Natu dhiladhile nawa kombinga yaashoka twa hala oku ya lombwela nokutala kutya uunake ya hala okupulakena.

10. (a) Omolwashike tu na okudhiladhila nawa shoka twa hala okupopya? (b) Omukalo guni gwokupopya twa pumbwa okuyanda?

¹⁰ Shoka tatu popi otashi vulu okuuvitha yalwe nawa nenge nayi. (Lesha Omayeletumbulo 12:18.) Aantu oyendji muuyuni waSatana ohaya longitha “iitya iilulu” mbyoka ya fa “omaholongo” nenge iikuti nosho wo “omagonga,” molwaashono oya hala okuuvitha nayi yakwawo noku ya geyitha. (Episalomi 64:3) Oyendji, omapopyo ngono oye gi ilonga okuziilila moomuvi nosho wo miinima mbyoka haya tala kotiivii. Ihe Aakriste kaye na okupopya oshinima tashi haula notashi uvitha nayi, nonando otashi popiwa momukalo omuyolithi. Sha yolwa oshiwanawa. Ihe katu na nando okuninga omashendjo nenge iiyolitha mbyoka tayi sitha omuntu ohoni nenge oku mu tuka. Ombiimbeli otayi londodha Aakriste kaaya longithe “omatukano.” Oya ti wo kutya: “Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe.” — Aaefeso 4:29, 31.

11. Oshike tashi vulu oku tu kwathela tu popye oohapu tadhi opalele?

¹¹ Jesus okwa ti kutya “shoka shu udhilila momutima, osho shoka okana take shi popi.” (Mateus 12:34) Shika otashi ti kutya iinima mbyoka hatu popi otayi holola nkene tu uvite. Ano ngele otu hole aantu notu na ko nasha  nayo shili, otatu ka popya nayo oohapu tadhi opalele. Shika otashi ke ya tunga noku ya ladhipika.

12. Oshike tashi vulu oku tu kwatha tu popye oohapu tadhi opalele?

¹² Ohashi pula oonkambadhala, opo tu popye oohapu tadhi opalele. Nonando Omukwaniilwa Salomo okwa li omunandunge, “okwa dhiladhila e ta konakona,” opo shoka a nyola shi kale mondjila noshi hokithi okulesha. (Omuuvithi 12:9, 10) Oshike tashi vulu oku tu kwatha tu tseye shoka tu na okupopya? Otu na okulesha Ombiimbeli nosho wo iinyanyangidhwa yetu, opo tu mone mo omikalo omipe dhokupopya. Otatu vulu okwiilonga eityo lyiitya mbyoka kaatu yu uvite ko. Otatu vulu wo okwiilonga kombinga yoshiholelwa shaJesus shokupopya momukalo ngoka tagu kwathele yalwe. Okwa li e shi shi shoka e na okupopya, molwaashono Jehova ‘okwe mu longo shoka e na okutya, opo a koleke mboka ya gundila po.’ (Jesaja 50:4) Osha simana wo okudhiladhila kombinga yankene oohapu dhetu tadhi ka guma yalwe. (Jakob 1:19) Otatu vulu okwiipula kutya: ‘Ngele onda ti ngeyi, mbela omuntu ota ka uva ko ngaa shoka nda hala oku mu lombwela? Otashi ke mu uvitha ngiini?’

13. Omolwashike tu na okupopya oohapu oompu okuuviwa ko?

¹³ Nale muIsraeli omwa li hamu hikwa omankuma okulombwela aantu shoka ye na okuninga. Ewi limwe olya li hali lombwele aantu ya gongale. Ewi ekwawo olya li lyokulombwela aakwiita ya ye molugodhi. Dhiladhila owala ngele ando ewi lyenkuma kalya li lya yelela nawa aakwiita shoka ye na okuninga. Ombiimbeli otayi yelekanitha ewi lyenkuma lya yela nawa noohapu ndhoka oompu okuuviwa ko. Ngele itatu yelithile nawa aantu, otashi vulika ya ngwangwane nenge yi itaale iinima kaayi li mondjila. Nonando otwa hala okupopya oohapu dha yela, otu na okukotoka kaatu popye nondhino nenge nokwaanesimaneko, twa fa kaatu na omikalo. — Lesha 1 Aakorinto 14:8, 9.

14. Oshiholelwa shini tashi holola kutya Jesus okwa li ha popi momukalo omupu okuuviwa ko?

¹⁴ MuMateus ontopolwa 5 sigo 7, omu na oshiholelwa oshiwanawa tashi holola nkene Jesus a popi oohapu oompu okuuviwa ko. Meuvitho lye ka li ta kambadhala okufuula aantu niitya iikukutu nenge inaayi pumbiwa. Ye ka li a popi oohapu ndhoka tadhi uvitha aantu nayi. Jesus okwa li ta popi iinima ya simana notayi ti sha, ihe okwe yi popi momukalo omupu okuuviwa ko. Pashiholelwa, pompito yimwe Jesus okwa li a hala okulombwela aalongwa ye kutya kaye na okukala noshimpwiyu shaashoka taya ka lya esiku kehe. Konima sho e ya lombwele kutya Jehova oha palutha oondhila, okwe ya pula a ti: “Ano hane mboka mu dhi vule?” (Mateus 6:26) Jesus okwe ya kwathele noohapu ndhika oompu yu uve ko oshinima shoka sha simana noku ya tsa omukumo.

15. Omolwashike tu na okupopya nolukeno?

¹⁵ Omukalo moka hatu popi naantu nagwo ogwa simana gwa fa shoka tatu popi. Aantu oya li ye hole okupulakena kuJesus, oshoka okwa li ha popi “oohapu oombwanawa,” dholukeno. (Lukas 4:22) Ngele otwa popi nolukeno, aantu otaya ka kala ya hala oku tu pulakena notaya ka taamba ko shoka tatu popi. (Omayeletumbulo 25:15) Ngele otwa simaneka aantu notu na ko nasha nankene yu uvite, otatu ka popya nayo nolukeno, ngaashi Jesus e shi ningile. Pashiholelwa, sho a  mono ongundu yaantu ya hala oku mu pulakena, okwa li a nyanyukwa okuuhala nayo te ya longo. (Markus 6:34) Nokuli naasho aantu ye mu tuku, ine ya shunina. — 1 Petrus 2:23.

16, 17. (a) Ongiini tu na okulandula oshiholelwa shaJesus, uuna tatu popi noyaandjetu nosho wo nookume? (Tala kethano lyopetameko.) (b) Omukulukadhi gumwe okwe shi enditha nawa ngiini, opo a popye momukalo gwolukeno?

¹⁶ Nonando otu hole aantu yaandjetu nosho wo ookuume, omathimbo gamwe otashi vulika tu ya ule nayi, oshoka otu ya shi nawa. Ngele otwe ya yi meyego, otashi vulika tu dhiladhile kutya inatu pumbwa okukala twa kotoka sho tatu popi nayo. Ihe Jesus ka li ha popi nayi nookuume ke. Sho ookuume ke yamwe ya li taya patana kutya olye gwomuyo omunene e vule ooyakwawo, okwe ya pukulula nolukeno. Okwa longitha wo oshiholelwa shokanona e ya kwathele mokudhiladhila kwawo. (Markus 9:33-37) Aakuluntugongalo otaya vulu okuholela oshiholelwa shaJesus sholukeno, uuna taya pukulula omuntu. — Aagalati 6:1.

¹⁷ Nonando omuntu okwa popi oshinima she tu geyitha, otashi ke enda nawa, ngele otwa popi nolukeno. (Omayeletumbulo 15:1) Pashiholelwa, opwa li pu na omukulukadhi ta putudha omwana, ngoka kwa li ihaa longele Jehova shili. Omumwameme gumwe megongalo, ngoka a li e mu etela ohenda, okwe mu lombwele a ti: “Mupyamunene ku shi ku putudha aanona.” Omukulukadhi ngoka okwa dhiladhila manga nawa, e ta ti: “Odhoshili kutya iinima itayi tu endele nawa omasiku ngaka, ihe ote tsikile natango oku mu longa. Otatu ka kala owala twa yelelwa thiluthilu kutya onda ndopa oku mu putudha konima yaArmagedon.” Uukuume waamwameme mbaka inawu teka, oshoka omuvali okwa kala a gundjila e ta yamukula nolukeno. Omwana oku uvu shoka a ti, e ta dhimbulula kutya nani yina oku na einekelo kutya ota vulu okulundulula. Okwe etha po okukala nookuume aawinayi, okwa ninginithwa, nokonima yoomvula okwa ka longa kObetele. Kutya nduno otatu popi naamwatate, naanegumbo lyetu nenge naayeni, oohapu dhetu nadhi kale aluhe “oombwanawa notadhi hokitha omuntu oku mu pulakena.” — Aakolossa 4:6.

18. Ongiini tatu vulu okulandula oshiholelwa shaJesus mokupopya kwetu?

¹⁸ Omagano gokupopya nokulombwela ooyakwetu shoka tatu dhiladhila naashoka tu uvite, oshinima dhingi shoka twa pewa kuJehova. Ngele otwa landula oshiholelwa shaJesus otatu ka popya pethimbo tali opalele, otatu ka kala twa kotokela shoka tatu popi notatu ka kambadhala aluhe okupopya nolukeno. Onkee ano, oohapu dhetu nadhi kale tadhi tsu yakwetu omukumo notadhi nyanyudha Jehova.