Okuyoolola shoka shi li mondjila naashoka sha puka
Omithikampango dhopamikalo ndhoka twa hogolola okukala metsokumwe nadho ohadhi utha ngele otatu ka kala twa nyanyukwa nenge hasho. Jehova Kalunga oshinima shono oku shi shi. Nomolwaashono a hala tu iyuthe komithikampango dhe.
Jehova okwa hala tu kale tu na ombili notwa nyanyukwa monkalamwenyo.
“Ongame Omuwa Kalunga koye, ngoka tii ku longele shoka she ku opalela noku ku ulukila ondjila u na okweenda nayo. Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tondokele kungoye wa fa omakuthikuthi gomefuta.” — Jesaja 48:17, 18.
E li Omushiti gwetu, Kalunga oku shi omukalo gwa dhenga mbanda gwankene tu na okukala monkalamwenyo. Okwa hala tu landule ewiliko lye molwaashoka oli lile po uuwanawa wetu. Uuna twa landula omalombwelo gaKalunga, itatu ka kala twa limbililwa ngele omatokolo getu otage ke tu etela ngaa uuwanawa. Otatu ka kala aluhe nokuninga omatokolo ge li mondjila, ngoka tage ke tu etela ombili nenyanyu.
Jehova ihe tu pula nando tu ninge shoka itaatu vulu okuninga.
“Oshipango shika tandi shi ku pe nena ndjika, kashi shi oshidhigu unene nenge shi li kokule nangoye.” — Deuteronomium 30:11.
Okukala metsokumwe nomithikampango dhaKalunga dhopamikalo okwa kwatela mo okulundulula nkene hatu dhiladhila nosho wo onkatu dhetu. Ihe nonando ongawo, Jehova ihe tu pula tu ningi oshindji. Komeho gaayihe, e li Omushiti gwetu, oku shi shoka tatu vulu okuninga. Sho tatu ende tatu tseya Jehova, otatu ka mona kutya “iipango ye kayi shi iidhigu kutse.” — 1 Johannes 5:3.
Jehova okwa uvaneka okukwathela mboka ya hogolola okukala metsokumwe nomithikampango dhe.
“Ongame Omuwa Kalunga koye; otandi ku tsu omukumo te ti: ‘Ino tila; otandi ku kwatha.’” — Jesaja 41:13.
Otatu vulu okukala metsokumwe nomithikampango dhaKalunga molwaashoka ote ke tu kwathela. Ota vulu oku tu kwathela okupitila mOohapu dhe, Ombiimbeli, ndjoka hayi tu tsu omukumo noku tu pa etegameno.
Aantu omamiliyona muuyuni oya mona kutya okukala metsokumwe nomithikampango dhOmbiimbeli okwa lundulula okukalamwenyo kwawo. Omolwashike itoo ilongo oshindji kombinga yomayele omawanawa ngoka Ombiimbeli tayi gandja? Oto vulu okutameka okulesha okambo ka kankamena kOmbiimbeli ke na oshipalanyolo Kala nonkalamwenyo ombwanawa sigo aluhe noto vulu oku ka tapa oshali kepandja lyetu jw.org. Oke na iileshwa tayi landula:
-
Mbela Ombiimbeli otayi vulu oku ku kwathela monkalamwenyo?
-
Ombiimbeli oye tu uvanekela etegameno ewanawa
-
Mbela shoka Ombiimbeli tayi ti, oshi shi ngaa okwiinekelwa?
Sho to ende to ningi omapekapeko mOohapu dhaKalunga, Ombiimbeli, oto ka mona kutya inadhi kwisha ‘odha kola sigo aluhe,’ nenge odhi shi okwiinekelwa. (Episalomi 111:8) Okulandula omithikampango dhaKalunga dhopamikalo ndhoka dhi li mOmbiimbeli otaku tu kwathele tu kale nonkalamwenyo ya dhenga mbanda. Ihe nonando ongawo, Jehova ihe tu thiminike tu dhi landule. (Deuteronomium 30:19, 20; Josua 24:15) Ndyoka etokolo lyomuntu kehe paumwene.
