1. Jesus okwa tulile po aalanduli ye oshiholelwa shini, noya li yi inyenge ngiini? (Tala ethano lyokombanda.)

JESUS okwa li e na etaloko ewanawa lyuukalele we kombanda yevi, nokwa hala wo aalanduli ye ya kale ye li na. (Joh. 4:35, 36) Sho Jesus a li pamwe naalongwa ye, oya li haya uvitha nehwamo. (Luk. 10:1, 5-11, 17) Ihe sho Jesus a kwatwa po, uule wokathimbo aalongwa ye oya kanitha ehalo lyawo lyokuuvitha. (Joh. 16:32) Konima sho a yumuka, okwe ya ladhipike ya gandje eitulomo kokuuvitha. Naasho a yi megulu, oya kala taya uvitha nuulaadhi, shoka nokuli sha ningitha aatondi yawo ya nyenyete, taya ti: ‘Taleni ihe shoka mwa ningi. Jerusalem ashihe omwe shi udhitha elongo lyeni.’ — Iil. 5:28.

2. Jehova okwa laleke nuuyamba ngiini iilonga yokuuvitha?

² Jesus okwa li a wilike Aakriste yopetameko sho taya uvitha, na Jehova okwe ya yambeke, oshoka aantu oyendji oya li ya taamba ko etumwalaka lyawo. Pashiholelwa, poPentekoste yomo 33 E.N., aantu 3 000 oya li ya ninginithwa. (Iil. 2:41) Okuza mpono omwaalu gwaalongwa ogwa tsikile okwiindjipala noonkondo. (Iil. 6:7) Shimwe ishewe, Jesus okwa li a hunganeke kutya iilonga yokuuvitha otayi ka tamunuka mo momasiku gahugunina. — Joh. 14:12; Iil. 1:8.

3-4. Omolwashike okuuvitha haku kala okudhigu miitopolwa yimwe, noshike tatu ka kundathana moshitopolwa shika?

³ Atuheni ohatu kambadhala okukala tu na etaloko ewanawa kombinga yuukalele. Miitopolwa yimwe ohashi kala oshipu oku shi ninga. Omolwashike mbela? Omolwaashoka aantu oyendji miitopolwa moka ohaya kala ya halelela okukonakona Ombiimbeli, nohaya kala nokuli ya tegelela pu monike Onzapo ndjoka tayi vulu okukonakona nayo. Ihe miitopolwa yimwe ohashi kala oshidhigu okuuvitha, oshoka aantu ihaya adhika mo naanaa momagumbo, naamboka haya adhika mo olundji ihaya kala ye na ohokwe metumwalaka lyOmbiimbeli.

 ⁴ Ngele oho zi moshitopolwa sha tya ngawo, omaetopo ngoka tatu ka kundathana moshitopolwa shika otaga vulu oku ku kwathela. Otatu ka tala shoka yamwe ya ninga, opo ya vule okuuvithila aantu oyendji miitopolwa yawo. Otatu ka kundathana wo kutya omolwashike tatu vulu okukala tu na etaloko ewanawa kombinga yuukalele wetu kutya nduno aantu ohaya pulakene ketumwalaka lyetu nenge hasho.

5. Omashongo geni Oonzapo odhindji hadhi tsakaneke muukalele?

⁵ Oonzapo odhindji ohadhi shi mono oshidhigu noonkondo okwaadha aantu momagumbo. Aauvithi yamwe ohaya zi miitopolwa moka mu na omatungo ihaamu yiwa nuupu. Aakeeleli yopomiyelo dhomatungo ngoka ihaye ethele mo omuntu ngele ina pewa epitikilo kugumwe gwomaantu mboka haya zi metungo ndyoka. Aauvithi yalwe ohaya vulu okulonga egumbo negumbo kaapu na shoka tashi ya imbi, ihe olundji ihaya adha mo aantu momagumbo. Yo aauvithi yalwe ohayu uvitha miitopolwa yokomikunda, hoka ku na owala aantu aashona. Aauvithi mboka ohashi vulika ye ende ondjila onde noonkondo opo ye ku uvithile omuntu gumwe awike, ngoka tashi vulika nokuli kaaye mu adhe mo megumbo. Ngele ohatu tsakaneke omashongo ga fa ngoka, inatu sholola. Oshike tatu vulu okuninga, opo tu vule okuungaunga nomashongo ngoka, nokukala hatu uvithile aantu oyendji muukalele?

6. Aauvithi oya faathana ngiini naayuli yoohi?

⁶ Jesus okwa yelekanitha iilonga yokuuvitha niilonga yokuyula oohi. (Mark. 1:17) Aayuli yoohi yamwe otashi vulika ya ninge omasiku inaaya yula nando ohi yimwe. Nonando ongawo ihaya sholola, ihe ohaya lundulula owala omukalo gwawo gwokuyula oohi. Ohaya lundulula ethimbo ndyoka haya ka yula oohi, ehala, nenge omukalo moka haye dhi yulu. Natse otatu vulu okukala hatu ningi sha faathana muukalele. Natu taleni komaetopo taga landula.

7. Otatu ka mona iizemo yini, ngele otwa kambadhala okuuvitha pomathimbo ga yoolokathana?

⁷ Kambadhala okuya kaantu pomathimbo ga yoolokathana. Otatu ka uvithila aantu oyendji, ngele otwa kala hatu shi ningi pethimbo ndyoka haya kala momagumbo. Nonando aantu olundji ihaya kala mo momagumbo, oye na ngaa ethimbo ndyoka haya galukile mo! Aamwatate naamwameme oyendji ohaya mono shi li hwepo okuuvitha pethimbo lyomutenya nenge kongulohi, oshoka aantu oyendji omo haya kala momagumbo. Shimwe ishewe, pethimbo ndyono aanegumbo ohaya kala ya manguluka nohaya kala ye na ehalo lyokupulakena. Otashi vulika wo shoka sha popiwa komukuluntugongalo gwedhina David shi ku kwathele. Okwa ti kutya konima ngele ya mana okuuvitha moshitopolwa shontumba, ye naangoka taya longo pamwe naye ohaya shuna komagumbo ngoka ya li inaaya adha mo aantu. Okwa ti: “Olundji uuna twa shuna komagumbo ngoka oshikando oshitiyali, aantu omo hatu ya adha.” *

8. Ongiini tatu vulu okutula miilonga Omuuvithi 11:6 muukalele?

⁸ Katu na okusholola. Shoka osho tatu ilongo menyolo lyenenedhiladhilo lyoshitopolwa shika. (Lesha Omuuvithi 11:6.) Omumwatate David ngoka a popiwa metetekelo, ka li a sholola. Sho a kala ha yi kegumbo limwe lwiikando ihe iha adha mo omuntu, oshikando shimwe sho a yi ko omunegumbo omo e mu adha. Omulumentu ngoka a adha mo okwa li e na ohokwe metumwalaka lyOmbiimbeli, nokwe mu lombwele a ti: “Megumbo muka onda ninga mo oomvula hetatu, ihe inandi mona nando onale Onzapo yaJehova ye ya paandjetu.” Omumwatate David okwa ti: “Onda mona kutya lwanima uuna megumbo  lyontumba wa ka adha mo aantu, olundji ohaya ulike ohokwe metumwalaka lyetu.”

9. Oonzapo dhimwe odha ningi po shike, opo dhi vule okuuvithila aantu mboka ihaaya monika nuupu?

⁹ Kambadhala okuuvithila moshitopolwa shilwe. Aauvithi yamwe ohaya lundulula oshitopolwa moka haya uvithile, opo ya mone aantu mboka hashi kala oshidhigu oku ya adha mo momagumbo. Pashiholelwa, okuuvitha momapandaanda nosho wo okulongitha okatemba kiileshomwa odhi li omikalo dhimwe hadhi shi pondola mokugandja uunzapo kaantu mboka haya kala momatungo omanene, moka okuuvitha egumbo negumbo inaaku pitikwa. Shoka ohashi ya pe ompito ya popye nayo oshipala noshipala. Shimwe ishewe, aauvithi oyendji oye shi mona kutya aantu oye hole unene okupopiwa nayo nenge okutaamba ko iileshomwa uuna ye li mooparka, pomatala nosho wo miitopolwa yoongeshefa. Omumwatate Floiran, ngoka e li omutonatelishikandjo moBolivia, okwa ti: “Ohatu yi komatala nokomahala goongeshefa pokati ko 1 no 3 yokomatango, oshoka ethimbo ndyoka aalandithi ihaya kala yi ipyakidhila unene. Olundji ohatu ningi oonkundathana oombwanawa nayo nohatu tameke nokuli omakonakonombiimbeli nayo.”

10. Omikalo dhini to vulu wo okukala ho longitha wu uvithile aantu?

¹⁰ Uvithila aantu momikalo dha yoolokathana. Natu tye ando owa kala to kambadhala lwiikando okuuvithila omuntu gwontumba. Kegumbo lye oho yi ko omathimbo ga yoolokathana, ihe iho mu adha mo. Mbela opu na omikalo dhimwe to vulu okulongitha, opo wu kwatathane naye? Omumwameme Katarína, ota ti: “Aantu mboka ihaandi adha mo momagumbo ohandi ya nyolele oontumwafo, tandi ya lombwele shoka nda li nda hala okukundathana nayo.” Oshike tatu ilongo moshimoniwa shoka? Otwa pumbwa okukambadhala okulongitha omikalo dha yoolokathana,  opo tu uvithile kehe gumwe moshitopolwa shetu.

11. Omolwashike aantu yamwe kaaye hole okupulakena ketumwalaka lyetu?

¹¹ Aantu yamwe kaye hole etumwalaka lyetu. Kaye wete sha pumbiwa okutseya Kalunga nenge Ombiimbeli. Inayi itaala muKalunga, omolwokumona iihuna kwaantu hoka ku li apuhe muuyuni. Kaye hole Ombiimbeli, molwaashoka ohaya kala ye wete uufudhime waakwatelikomeho yomalongelokalunga mboka haya ti kutya ohaya vulika kOmbiimbeli, ihe ohaya ningi iinima oyindji iiwinayi mbyoka kaayi li pamanyolo. Yalwe ohaya kala yi ipyakidhila uunene niilonga yawo, nomaukwanegumbo gawo nenge nomaupyakadhi gawo gopaumwene, nokaye wete kutya Ombiimbeli otayi vulu oku ya kwathela. Ongiini tatu vulu okutsikila okukala twa nyanyukwa, nonando omathimbo gamwe mboka hatu uvithile ihaya kala ya tala ko etumwalaka lyetu oli na oshilonga?

12. Aafilippi 2:4 otaya vulu ngiini oku tu kwathela uuna tu li muukalele?

¹² Ulika kutya owu na ko nasha naantu mboka ho uvithile. Aantu oyendji mboka petameko haya kala inaaya hala okupulakena ketumwalaka lyetu, konima yethimbo ohaye ki inyenga nawa, uuna ya mono kutya otu na ko nasha nayo shili. (Lesha Aafilippi 2:4.) Pashiholelwa, David, ngoka a popiwa metetekelo, okwa ti: “Ngele omuntu okwa ti kutya ke na ohokwe metumwalaka lyetu, ohandi tula Ombiimbeli nenge iileshomwa yandje moondjato, e tandi mu pula tandi ti: ‘Onda hala okuuva ko kutya omolwashike.’” Aantu ohaye shi mono mo mbala ngele omuntu oku na ko ngaa nasha nayo shili. Otashi vulika shoka twa kundathana nayo ye shi dhimbwe, ihe otashi vulika kaaya dhimbwe nkene ya li yu uvite sho tu ulike kutya otu na ko nasha nayo. Nokuli nuuna omunegumbo itee tu pitike tu popye naye kombinga yetumwalaka ndyoka tu na, otatu vulu okuulika kutya otu na ko nasha naye, okupitila meihumbato lyetu.

13. Ongiini tatu vulu okutungila oonkundathana dhetu kwaashoka omunegumbo e na ohokwe musho?

¹³ Ohatu ulike kutya otu na ko nasha naantu, uuna hatu tungile oonkundathana dhetu nayo kwaashoka ye na ohokwe musho. Pashiholelwa, mbela otu wete sha shoka tashi ulike kutya omunegumbo ngoka tatu uvithile oku na aanona? Aavali otashi vulika ya kale ye na ohokwe momayele gOmbiimbeli kombinga yokuputudha aanona nenge kombinga yankene uukwanegumbo wawo tawu vulu okukala wa nyanyukwa. Mbela otu wete kutya pomiyelo dhawo opu na omakumba ogendji? Otashi vulika tu popye naye kombinga yomiyonena ndhoka tadhi longwa kaantu apuhe muuyuni kunena, shoka tashi ka ningitha omunegumbo a kale a hala okupulakena kombinga yankene masiku iinima ayihe ya tya ngaaka tayi ka hulithwa po sigo aluhe. Kehe ethimbo to uvithile aantu mboka ye na ehalo lyokupulakena  ketumwalaka lyetu, kambadhala aluhe oku ya kwathela ya mone nkene omayele gOmbiimbeli taga vulu oku ya kwathela. Omumwameme Katarína, ngoka a popiwa metetekelo, okwa ti: “Ohandi dhiladhila aluhe kombinga yankene oshili yOmbiimbeli ya kwathela ndje.” Shoka ohashi mu kwathele u uvithe momukalo ngoka tagu ulike kutya okwa tompwa kwaashoka ta popi, naantu mboka hu uvithile ohaya kale ye shi wete.

14. Shi ikolelela kOmayeletumbulo 27:17, ongiini mboka tayu uvitha pamwe taya vulu okukwathelathana?

¹⁴ Mona uuwanawa mekwatho lyayalwe. Methelemumvo lyotango, Paulus okwa li a longo Timoteus nkene e na okuuvitha nokulonga aantu, nokwa li e mu ladhipike a longithe omikalo ndhoka a kwathele yalwe. (1 Kor. 4:17) Ngaashi Timoteus, natse otatu vulu okwiilonga sha kowino yayalwe megongalo. (Lesha Omayeletumbulo 27:17.) Natu taleni koshiholelwa shomumwatate gwedhina Shawn. Shawn okwa kala uule wethimbo ta kokola ondjila moshitopolwa shokuushayi, hoka aantu oyendji ya li yu uvitile ombili elongelokalunga lyawo. Mbela oshike sha li she mu kwathele a kale a nyanyukwa? Okwa ti: “Uuna tashi wapa, onda li handi yi muukalele nagumwe. Otwa li hatu longitha ethimbo ndyoka tatu ende okuya kegumbo limwe okukwathelathana mokuhwepopaleka omukalo gwetu gwokulonga aantu. Pashiholelwa, otwa li hatu kundathana kutya otwe shi enditha ngiini pegumbo lya tetekele. Opo nduno ohatu kundathana nkene tatu vulu oku ke shi enditha nawa ngele otwa ka tsakaneka onkalo ya faathana.”

15. Ngele tashi ya kiilonga yokuuvitha, omolwashike egalikano lya simana?

¹⁵ Galikana Jehova e ku kwathele. Pula ewiliko kuJehova kehe ethimbo wu li muukalele. Otwa pumbwa ombepo ye ondjapuki, opo tu pondole mukehe shoka tatu ningi. (Eps. 127:1; Luk. 11:13) Uuna to pula Jehova megalikano e ku kwathele, kala ho popi iinima kondandalunde. Pashiholelwa, mu pula e ku kwathele wu mone aantu mboka ye na omitima omiwanawa noye na ehalo lyokupulakena. Opo nduno katuka metsokumwe negalikano lyoye, mokuuvithila kehe gumwe to tsakaneke.

16. Omolwashike twa pumbwa okukala hatu konakona Ombiimbeli paumwene, opo tu pondole muukalele?

¹⁶ Konga ethimbo lyokukonakona paumwene. Oohapu dhaKalunga otadhi ti: ‘Tseyeni shoka oshiwanawa kuKalunga, she mu opalela nosha gwana.’ (Rom. 12:2) Okukonakona Ombiimbeli paumwene ohaku tu kwathele tu tseye Kalunga nawanawa. Opo nduno uuna tatu popi nayalwe kombinga ye, otaya ka ndhindhilika kutya otwa tompwa kwaashoka tatu ya lombwele. Katarína, ngoka a popiwa metetekelo, okwa ti: “Omimvo dha ka pita, onda mono kutya onda pumbwa okukoleka eitaalo lyandje kombinga yomalongo gamwe gOmbiimbeli gopetameko. Onkene onda konakona uuyelele mboka tawu popi kutya oku na Omushiti, kutya Ombiimbeli oyi li shili Oohapu dhaKalunga nonokutya kunena Kalunga oku na ehangano ndyoka li mu lile po.” Katarína okwa ti kutya okukonakona kwe Ombiimbeli paumwene okwa koleke eitaalo lye nokwe mu etela enyanyu muukalele.

17. Omolwashike Jesus a tsikile okukala e na etaloko ewanawa kombinga yuukalele we?

¹⁷ Jesus okwa tsikile okukala netaloko ewanawa kombinga yuukalele we, nokwa tsikile okuuvitha nonando aantu yamwe kaya li ya hala okupulakena ketumwalaka lye. Omolwashike mbela? Okwa li e shi kutya aantu oya pumbwa okutseya oshili, nokwa li a hala okukwathela oyendji ngaashi tashi vulika ya taambe ko etumwalaka lyUukwaniilwa. Okwa li wo e shi kutya aantu yamwe mboka petameko ya li inaaya hala okupulakena ketumwalaka lye, konima yethimbo otashi vulika ya ka pulakene. Natu taleni shoka sha li sha ningwa po maandjawo. Jesus okwa kala tu uvitha uule womimvo ndatu netata, ihe kapu na nando ogumwe gwomaamwayina a li a ningi omulongwa gwe. (Joh. 7:5) Ihe konima yokuyumuka kwe, aamwayina oya ningi Aakriste. — Iil. 1:14.

18. Omolwashike tu na okutsikila okuuvitha?

 ¹⁸ Katu shi kutya oolye taya ka taamba ko etumwalaka yOmbiimbeli ndyoka hatu uvitha. Aantu yamwe ohashi ya pula ethimbo opo ye li taambe ko. Nokuli naamboka ihaaya kala ya hala okupulakena kutse, ohaya kala ye wete eihumbato lyetu nosho wo etaloko lyetu ewanawa, lwanima shoka tashi vulika shi ke ya ningithe ya tameke ‘okuhambelela Kalunga.’ — 1 Pet. 2:12.

19. Aakorinto yotango 3:6, 7 otaye tu longo shike shi na ko nasha niilonga yetu yokuuvitha?

¹⁹ Sho tatu kunu nokutekela, katu na okudhimbwa kutya Kalunga oye ha kokeke. (Lesha 1 Aakorinto 3:6, 7.) Omumwatate Getahun, ngoka ha longele moEtiopia, okwa ti: “Uule womimvo dhi vulithe 20, onda kala tandi uvithile moshitopolwa moka ihaamu uvithilwa olundji. Ihe ngashingeyi otu li mo aauvithi 14. Aauvithi omulongo nayatatu oya ninginithwa, mwa kwatelwa nekulu lyandje naanona yetu yatatu. Konyala pokugongala kwetu ohatu kala po tu li 32 lwaampono.” Getahun okwa nyanyukwa sho ta tsikile okuuvitha manga a tegelela neidhidhimiko Jehova a hilile aanamitima omiwanawa kEhangano lye! — Joh. 6:44.

20. Omomikalo dhini twa fa aantu mboka haya hupitha oomwenyo?

²⁰ Jehova aantu ayehe okwe ya tala ko ye ondilo momeho ge. Okwe tu pa uuthembahenda wokulonga pamwe nOmwana, mokunanena aantu Kuye okuza miigwana ayihe manga uuyuni mbuka inaawu hulithwa po. (Hag. 2:7) Iilonga yetu yokuuvitha otayi vulu okuyelekanithwa niilonga mbyoka hayi longwa kaantu mboka haya hupitha oomwenyo dhaantu. Otwa fa aantu mboka haya tumwa ya ka hupithe aantu mboka ye li momina ya mbonyokela mo. Nonando aantu owala aashona tashi vulika ya adhike ye na omwenyo, iilonga mbyoka tayi longwa kwaayehe mboka taye ya hupitha oya simana. Osha faathana, ngele tashi ya kiilonga yetu yokuuvitha. Katu shi kutya aantu yangapi taya ka hupithwa okuza muuyuni waSatana. Ihe Jehova ota vulu okulongitha gumwe gwomutse opo e ya kwathele. Andreas, ngoka ha zi moBolivia, okwa ti: “Ohashi pula oonkambadhala dhaantu oyendji, opo omuntu i ilonge oshili yOmbiimbeli, e ta ninginithwa.” Atuheni natu kale tu na etaloko lya fa ndyoka kombinga yiilonga yetu yokuuvitha. Ngele otwe shi ningi, Jehova ote ke tu yambeka, notatu ka nyanyukilwa uukalele wetu.