Oshiningwanima shoka oshitilithi osha lundulula onkalamwenyo yandje, molwaashoka okuza ethimbo ndjoka onda tameke okukonga Omushiti. Ihe manga inaandi hokolola shoka sha ningwa po ongulohi ndjoka, nandi mu kuthile ko kombinga yaashoka nda li nda ningilwa manga nda li okanona, shoka sha ningitha ndje ndi kale nda hala okwiilonga kombinga yaKalunga.

Onda valwa mo 1937, moGuesnain, ondoolopa yi na oomina, ndjoka yi li kuumbangalantu waFulaanisa. Tate okwa li ha longo momina yomakala, nokwa longo ndje nkene okulonga nuudhiginini kwa simana. Onda li wo ndi na etaloko lya fa lyatate li na ko nasha nokwaanuuyuuki. Molwaashoka okwa li e tonde okwaanuuyuuki, okwa li ha popile aaniilonga yomoomina mboka ya li haya longo moonkalo dha nika oshiponga. Okwa li a ningi oshilyo shomahangano guuthemba waantu nokwa li hayi momakanka nelalakano lyokuhwepopaleka onkalo yawo. Okwa li wo e tonde uufudhime waasita yomoshitopolwa shetu. Oyendji yomuyo oya li ye na onkalamwenyo yuuzeko, ihe nonando ongawo, oya li haya hehela iimaliwa niikulya kaalongi yomoomina mboka ya li taya hupu  shokadhila. Molwaashoka tate okwa li e tonde noonkondo iikala yaasita, ka li a longo ndje sha kombinga yelongelokalunga. Ka li nokuli ha popi nangame kombinga yaKalunga.

Sho nda koko, nangame onda tameke okukala ndi tonde okwaanuuyuuki. Pashiholelwa, kanda li handi kala ndu uvite ombili sho aantu yamwe ya li kaaye hole mboka ya za kondje yoshilongo shetu. Onda li handi dhana etanga naanona yoontauki nonda li ndi hole okukala nayo. Kakele kaashono, meme ka li Omufulaanisa, ihe Omupolanda. Onda li nda hala aantu yomihoko dha yoolokathana ya kale ye na uukumwe noya talike ko ye thike pamwe.

Mo 1957, epangelo olya pula ndje ndi ye muukwiita. Nomolwaashono nde ki iyadha moondundu dhaAlgeria, ongulohi ndjoka nda popi metetekelo. Konima sho ndi igidha Kalunga a kwathele ndje, onda li nda tegelela andola ndi taalele omukwiita gwetanga lyaatondi yetu, ihe nani shoka nda li nda tila osha li owala okasino komokuti. Sho nde ka mono, onda li ndu uvite nda pepelelwa! Nonando ongawo, oshiningwanima shoka nosho wo iita oya ningitha ndje ndi dhiladhile muule kombinga yeityo lyonkalamwenyo. Ondi ipula te ti: Omolwashike tu li kombanda yevi? Mbela Kalunga oku na ko ngaa nasha natse? Opu na ngaa esiku napu ka kale ombili tayi kalelele?

Esiku limwe manga nda li nda ka talela po aavali yandje mefudho, onda tsakanene nagumwe gwomOonzapo dhaJehova. Okwa pe ndje Ombiimbeli yOshifulaanisa, hayi ithanwa La Sainte ndjoka ya tolokwa kongeleka yaKatoolika, nonda tameke oku yi lesha sho nda ka shuna koAlgeria. Shoka sha popiwa mEhololo 21:3, 4 osha li sha gumu ndje noonkondo. Enyolo ndyoka otali ti: “Egumbo lyaKalunga oli li paantu! . . . Oye ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame.” * Oohapu ndhoka odha li dha kumitha ndje. Onda li tandi ipula tandi ti: ‘Mbela oohapu ndhika odho shili ngaa?’ Pethimbo ndyoka, kanda li ndi shi oshindji kombinga yaKalunga nosho wo Ombiimbeli.

Konima sho nda zi mo metangakwiita mo 1959, onda tsakanene nOnzapo yedhina, noya longo ndje oshindji kombinga yoshili yOmbiimbeli. Pashiholelwa, François oku ulukile ndje mOmbiimbeli kutya edhina lyaKalunga oJehova. (Eps. 83:18, NW) Okwa yelithile ndje wo kutya Jehova ota ka shilipaleka kutya uuyuuki otawu longwa kombanda yevi, ota ka ninga evi oparadisa, nota ka gwanitha po shoka sha popiwa mEhololo 21:3, 4.

Shoka ndi ilongo osha li tashi ti sha nosha li sha guma ndje komutima. Ashike onda li wo nda geela noonkondo aasita yoongeleka nonda li nda hala oku ya nyenyetela, omolwiinima mbyoka haya longo kaayi li mOmbiimbeli. Ihe natango onda li handi dhiladhila ngaashi tate, nokanda li ndi na eidhidhimiko. Onda li nda hala oku ya katukila onkatu nziya!

François nosho wo kuume kandje gulwe Onzapo, oya li ya kwathele ndje ndi loteke ondjahi yandje. Oya yelithile ndje kutya iilonga yetu tu li Aakriste kayi shi okupangula, ihe okuuvithila aantu onkundana ombwanawa yUukwaniilwa waKalunga, opo ya kale ye na etegameno. Jesus iilonga mbyoka oyo a li ha longo, mbyoka wo a pe aalanduli ye. (Mat. 24:14; Luk. 4:43) Onda li wo ndi na okwiilonga okupopya naantu nombili nonondjaalela, kashi na nduno mbudhi kutya oyeitaalo lini. Ombiimbeli oya ti: “Omumati gwOmuwa ita pumbwa okutamanana. Oye oku na  okukala . . . e na olukeno naayehe.” — 2 Tim. 2:24.

Onda ningi omalunduluko ngoka ga pumbiwa, nonda ninginithwa mo 1959 poshigongi shopashikandjo. Poshigongi shoka onda tsakanene po omumwameme gwedhina Angèle, nonda li nde mu hokwa. Onda tameke okukala handi ka talela po egongalo lyawo, notwa ka hokana mo 1960. Angèle omukulukadhi gwomwenyo omwaanawa, e na omikalo nokuli omagano ge na ondilo ga za kuJehova. — Omayel. 19:14.

Momukokomoko gwomimvo, ondi ilongo iiyilongomwa ya simana kaamwatate aanandunge noye na owino. Shotango osho shino kutya: Opo tu pondole moshinakugwanithwa kehe shoka tashi monika sha fa oshidhigu, otu na okukala aayifupipiki nokutula miilonga omayele gopandunge ngoka ge li mOmayeletumbulo 15:22, ngoka taga ti: ‘Omadhiladhilo otaga tompola sha mpoka pe na aagandjindunge oyendji.’

Mo 1964, onda li nda mono uushili woohapu ndhoka. Momumvo ngoka, onda langekwa po ndi li omutonatelishikandjo, nonda tameke okutalela po omagongalo, opo ndi tse omukumo nokutunga ooitaali ooyakwetu. Pethimbo mpoka, onda li owala ndi na omimvo 27, nokanda li lela ndi na owino. Onkee, onda li handi ningi omapuko. Ihe onda kambadhala okwiilonga sha komapuko gandje. Kakele kaashono, ondi ilongo iiyilongomwa oyindji ya simana ‘kaagandjindunge’ mboka ya pyokoka noye na owino.

Pashiholelwa, ote dhimbulukwa kutya esiku limwe sho nda talele po egongalo limwe ndjoka li li moParis, omumwatate gumwe okwa lombwele ndje kutya okwa hala tu ka popye po. Onda ti, “oshi li nawa.”

Okwa pula ndje a ti, “Louis, ndohotola oha ka talela po oolye?”

Onda ti, “Oomboka taye ehama.”

Okwa ti: “Osho lela. Ihe onda ndhindhilika kutya oho kala ethimbo olindji naamboka ya kola pambepo, ngaashi omuunganeki gwolutu lwaakuluntugongalo. Megongalo lyetu omu na aamwatate naamwameme oyendji mboka ya teka omukumo, aape nenge ye na oohoni. Otaye ke shi pandula lela ngele owa kala ho kutha ethimbo wu kale nayo, nenge wu ye kaandjawo mu ka lye pamwe nayo.”

Onda li nda pandula noonkondo omayele omawanawa gomumwatate ngoka. Ohole ye yokuhola oonzi dhaJehova oya li ya gumu ndje komutima. Nonando kasha li oshipu okuzimina kutya oku li mondjila, onda tula nziya miilonga omayele ge. Otandi pandula Jehova omolwaamwatate ya tya ngaaka.

Mo 1969 nosho wo mo 1973, onda li nda langekwa po ndi tonatele Oshikondo shIikulya piigongi yopaigwana  iyali, mbyoka ya ningilwa moColombes, moParis. Poshigongi shomo 1973, otwa li tu na okulongekidha iikulya tayi gwana aantu 60 000 lwaampono, omasiku agehe gatano. Kanda li ndi shi ngele otatu ke shi vula ngaa. Ihe ngaashi shito, opo ndi pondole onda li ndi na okutula miilonga Omayeletumbulo 15:22, ano okupula omayele kuyalwe. Onda pula omayele kaamwatate mboka ya kola pambepo noye na owino kombinga yiikulya. Yamwe yomuyo oya li haya longo miihilahite, yamwe ohaya kunu iikwamboga, yamwe aateleki nayamwe ohaya landa iipumbiwa. Sho twi imanga kumwe, otwa gwanitha po oshilonga shoka sha li tashi monika oshidhigu.

Mo 1973, ngame nanekulu lyandje otwa li twa hiywa koBetel moFulaanisa. Oshinakugwanithwa shoka nda li nda pewa tango moBetel nasho kasha li oshipu. Onda li ndi na okukonga po omikalo nkene tu na okutumina aamwatate yokoKamerun moAfrika iileshomwa, oshilongo moka iilonga yetu ya li yi indikwa pokati komumvo 1970 no 1993. Natango, kanda li ndi shi kutya nandi shi ende ngiini. Omumwatate ngoka a li ta kwatele komeho iilonga yetu moFulaanisa okwe shi ndhindhilike, onkee okwa ladhipike ndje a ti: “Aamwatate moKamerun oye li mompumbwe onene yiikulya yopambepo. Otwa pumbwa oku ya sila oshimpwiyu!” Shoka osho twa ningi.

Olundji onda li handi yi kiishiindalongo naKamerun, oko tu ka tsakanene naakuluntugongalo yokoKamerun. Aamwatete mboka aalaadhi naanandunge oya kwathele ndje ndi ninge omalongekidho ngoka ga pumbiwa, opo tu kale hatu tumu pandjigilile iileshomwa koKamerun. Jehova okwa laleke nuuyamba oonkambadhala dhetu. Uule womimvo 20, aapiya yaJehova yomoKamerun oya kala haya mono Oshungolangelo yomwedhi kehe nosho wo oshileshomwa shedhina Our Kingdom Service.

Okuza owala sho twa tameke okweendelathana naAngèle, onda mono kutya oku na ekwatathano lyopothingo naJehova. Shono onde ke shi imonena wo sho twa hokana. Pashiholelwa, ongulohi yesiku ndyoka twa hokana okwa pula ndje ndi galikane kuJehova kombinga yelalakano lyetu lyoku mu longela  tu li aaihokani miilonga yethimbo lyuudha. Jehova okwa yamukula egalikano ndyoka.

Angèle okwa kwathele wo ndje ndi kale ndi inekela thiluthilu muJehova. Pashiholelwa, sho twa hiywa tu ka longe kObetel mo 1973, onda li te kakadhala molwaashoka onda li ndi hole iilonga yuutonatelishikandjo. Ihe Angèle okwa li a dhimbulukitha ndje kutya otwi iyapulila Jehova, notu na okuninga kehe shimwe shoka ehangano lye tali tu pula tu ninge. (Heb. 13:17) Onda tsu kumwe naye! Onkee, otwa yi kObetel. Owino, oondunge nosho wo uupambepo wa kola womukulukadhi gwandje, oya koleke ekwatathano lyetu tu li aaihokani noye tu kwathele tu ninge omatokolo gopandunge.

Ngashingeyi sho twa kulupa, natongo omukulukadhi gwandje omuholike Angèle, ota tsikile okuyambidhidha ndje. Pashiholelwa, otwa li tu na okuninga oonkambadhala dha mana mo twi ilonge nawa Oshiingilisa, opo tu vule okuya koosikola dhehangano, ndhoka odhindji dhomudho hadhi ningwa mOshiingilisa. Shoka osha li sha kwatela mo okutembukila kegongalo lyOshiingilisa, nonando otwa li mepipi lyomimvo 70 nasha. Kasha li oshipu kungaye okwiilonga elaka lilwe, molwaashoka onda li ndi na iinakugwanithwa oyindji, oshoka onda li oshilyo shOkomitiye yOshitayimbelewa shaFulaanisa. Nando ongawo, ngame naAngèle otwa kala tatu ambidhidhathana. Ngashingeyi otu na omimvo 80 nasha, nohatu ilongekidha natango okugongala mOshiingilisa nomOshifulaanisa. Ohatu ningi wo oonkambadhala tu kuthe ombinga pokugongala nosho wo miilonga yokuuvitha pamwe negongalo lyetu. Jehova okwa laleka nuuyamba oonkambadhala dhetu dhokwiilonga Oshiingilisa.

Elalekonuuyamba limwe endhindhilikwedhi oondyoka twa li twa mono mo 2017. Ngame naAngèle otwa li twa hiywa kOsikola yOkudheula Iilyo yOokomitiye dhIitayimbelewa naakulukadhi yawo, ndjoka ya ningilwa ko-Watchtower Educational Center, moPatterson, moNew York.

Jehova oku li shili Omulongi gwetu Omunenenene. (Jes. 30:20) Onkee, itashi kumitha sho aapiya ye, kutya nduno aakokele nenge aagundjuka, ohaya mono elongo lya dhenga mbanda. (Deut. 4:5-8) Onda mono kutya aagundjuka mboka haya pulakene kuJehova nosho wo kaamwatate naamwameme mboka ye na owino, ohaya ningi omatokolo gopandunge nohaya longele Jehova nuudhiginini. Omayeletumbulo 9:9, otage tu dhimbulukitha taga ti: “Longa omunandunge, noondunge dhe otadhi koko natango; nongeka omuyuuki, noti indjipalitha uunongo we.”

Omathimbo gamwe ohandi dhiladhila uusiku mbwiyaka kwa li kwa luudha, sho nda li moondundu dhaAlgeria, omimvo 60 dha ka pita. Uusiku mboka, kanda li ndi shi ngele esiku limwe onkalamwenyo yandje otayi ka kala yi nyanyudha. Ondi ilongo lela oshindji kuyalwe. Jehova okwe tu pa onkalamwenyo ya dhenga mbanda notayi mbilipaleke. Onkee, otwa tokola toko tu tsikile okulongwa kuTate yetu gwomegulu nosho wo kaapiya ye mboka ye na owino oyindji noye mu hole.