Aaleshi taya pula . . .

Mbela Aakriste ayehe aadhiginini ohaya yi megulu?

▪ Aantu oyendji oya lesha oohapu dhaJesus tadhi hekeleke ndhoka tadhi ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Mbela Jesus okwa li a hala okutya aalongeli ayehe aadhiginini yaHe, Jehova Kalunga, otaya yi megulu opo ya vule oku ka kala nomwenyo gwaaluhe ya nyanyukwa shili?

Tala oohapu dhaJesus ndhoka tadhi ningitha omuntu a dhiladhile muule tadhi ti: “Kape nando ogumwe a yile megulu kakele kOmuna gwOmuntu, ngoka a zi megulu.” (Johannes 3:13) Shika osha hala okutya aalongelikalunga aadhiginini yopethimbo lyonale, ngaashi Noowa, Abraham, Moses nosho wo David, inaya ya megulu. (Iilonga 2:34) Ngele inaya ya megulu, openi nduno ya ya? Oku shi popya paufupi, aapiya yaKalunga aadhiginini yonale oye li moombila, ya kotha, kaaye shi sha, ya tegelela eyumuko.—Omuuvithi 9:5, 6; Iilonga 24:15.

Jesus oye a li a popi tango kutya yamwe otaya ka kala nomwenyo megulu konima yokusa kwawo. Okwa li a lombwele aayapostoli ye kutya ote ke ya longekidhila ehala megulu. (Johannes 14:2, 3) Shika osha li oshinima oshipe koshigwana shaKalunga. Konima yaashoka, omuyapostoli Paulus okwa yelitha kutya konima yeso lyaJesus naasho a yumuka e tayi megulu, okwa li e ‘egululile aalongwa ye osheelo oshipe shi na omwenyo,’ sha hala kutya, ondjila moka inaamu endwa nando onale kaantu yalwe.—Aahebeli 10:19, 20.

Mbela shika osha hala okutya uuna shika sha ningwa aadhiginini ayehe otaya yi megulu? Aawe, mboka taya yumudhilwa omwenyo gwomegulu otaya yi mo owala molwaashoka oye na oshinakugwanithwa shi ikalekelwa shoka taya ka gwanitha po. Jesus sho a li pamwe naalongwa ye ongulohi ye yahugunina, okwa li e ya lombwele kutya otaya ka ‘kuutumba kiipangelapundi ya pangule’ mUukwaniilwa we womegulu. Onkee ano, oya li taya ka kala ye na oshinakugwanithwa shokupangela pamwe naJesus.—Lukas 22:28-30.

Kakele kaayapostoli, aantu yalwe otaya ka pewa wo oshinakugwanithwa shintuntula. Omuyapostoli Johannes okwa li a mono Jesus memoniko e li pamwe nongundu yaamboka ya yumudhilwa okuya megulu nokwa ti kutya ‘otaya ka pangela kombanda yevi ye li aakwaniilwa naasaaseri.’ (Ehololo 3:21; 5:10, KB) Mbela oya li yangapi? Ngaashi shi li mepangelo kehe, omwaalu owala gwaantu yontumba hagu pangele. Ano osho wo tashi ka kala shi na ko nasha nUukwaniilwa mbuka womegulu. Jesus, Onzigona yaKalunga ota pangele pamwe naapangeli ooyakwawo 144 000 ‘mboka ya kulilwa mo maantu ooyakwawo.’—Ehololo 14:1, 4, 5.

Dhoshili, omwaalu gwaantu 144 000 omushona moku gu yelekanitha nomwaalu gwaadhiginini yopethimbo lyonale nolyongashingeyi. Ihe shika oshi shi okuuviwa ko molwaashoka aantu 144 000 mboka taya ka yumudhwa okukala nomwenyo megulu otaya ka pewa oshinakugwanithwa shokulonga iilonga iiyapuki. Natu tye ando owa hala okutunga egumbo, mbela oto ka pa aatungi omangomba ayehe yomoshitopolwa shoye iilonga? Aawe. Oto ka pumbwa owala aantu ya gwana iilonga mbyoka yi li po. Sha faathana, haadhiginini ayehe ya hogololwa kuKalunga ya kale nuuthembahenda wi ikalekelwa woku ka pangela pamwe naKristus megulu.

Epangelo ndika lyomegulu otali ka gwanitha elalakano lyaKalunga lyopetameko li na ko nasha naantu. Jesus naapangeli ooyakwawo 144 000 otaya ka tonatela iilonga mbika yokuningulula evi alihe oparadisa, moka omwaalu gwaadhiginini kaagu shiwike tagu ka kala nomwenyo sigo aluhe ya nyanyukwa shili. (Jesaja 45:18; Ehololo 21:3, 4) Otamu ka kwatelwa wo mboka ye li medhimbuluko lyaKalunga, mboka taya ka yumudhwa noye na eitaalo tali longo muJesus.—Johannes 5:28, 29.

Kehe ngoka e li omulongeli gwaJehova omudhiginini, methimbo lya pita nolyongashingeyi, ota ka pewa omagano gantuntula gomwenyo gwaaluhe. (Aaroma 6:23) Aashona owala taya ka mona omwenyo megulu omolwoshinakugwanithwa shi ikalekelwa, ihe ongundu onene otayi ka kala nomwenyo moparadisa kombanda yevi.