Ilonga sha moohapu dhaKalunga

Omolwashike Kalunga e etha uukolokoshi nokumona iihuna ku kale po?

Oshitopolwa shika oshi na omapulo ngoka tashi vulika ho ipula kombinga yago noshi na omanyolo ngoka taga yamukula omapulo ngoka. Oonzapo dhaJehova otadhi ke shi nyanyukilwa okukundathana nangoye omayamukulo gomapulo ngoka.

1. Uukolokoshi owa tameke ngiini?

Uukolokoshi owa li wa tameke kombanda yevi sho Satan a li a popi iifundja yotango. Sho Satana a shitwa ka li omukolokoshi. Okwa li omuyengeli a gwanenena, ihe ka li “nando oompoka a li moshili.” (Johannes 8:44) Okwa li a kwatwa kehalo lyokulongelwa ndyoka lya li li na owala okupewa Kalunga. Satana okwa li a fundju omukiintu gwotango, Eva, nokwa li e mu hongolola a vulike kuye pehala lyokuvulika kuKalunga. Adam naye ka li a vulika kuKalunga ngaashi Eva. Etokolo ndyoka Adam a li a ningi olya li lye etitha okumona iihuna nosho wo eso.—Lesha Genesis 3:1-6, 17-19.

Sho Satana a lombwele Eva kaa vulike kuKalunga, okwa li a tukuluthile uunamapangelo waKalunga oshipotha. Aantu oyendji oya li ya landula Satana mokweekelahi Kalunga e li Omupangeli gwawo. Kungeyi, Satana okwa ningi “omupangeli guuyuni mbuka.”—Lesha Johannes 14:30; Ehololo 12:9.

2. Mbela eshito lyaKalunga kalya li lya gwanenena?

Aantu naayengeli mboka ya shitwa kuKalunga oya li ya gwanenena taya vulu okuvulika kiitegelelwa yaKalunga. (Deuteronomium 32:5) Kalunga okwe tu shita tu na emanguluko lyokuhogolola okulonga shoka oshiwanawa nenge oshiwiinayi. Emanguluko ndyoka otali tu pitike tu ulike ohole yetu kuKalunga.—Lesha Jakob 1:13-15; 1 Johannes 5:3.

3. Omolwashike Kalunga e etha okumona iihuna ku kale po?

Jehova okwa kala ti idhidhimikile uunashipotha mboka wu li ompinge nuunamapangelo we sigo ongashingeyi. Omolwashike? Opo u ulukile aantu kutya itaya vulu okwiipangela yo yene kaapu na ekwatho lye. (Jeremia 10:23) Uushili kutya aantu itaya vulu okwiipangela kuyo yene owa li wa yele mo nawa konima yoomvula 6 000. Aapangeli yopantu inaye shi pondola okuhulitha po iita, omiyonena, okwaahena uuyuuki nosho wo omikithi.—Lesha Omuuvithi 7:29; 8:9; Aaroma 9:17.

Mepingathano naashoka, mboka ya taamba ko Kalunga e li Omupangeli gwawo oyi imonena uuwanawa. (Jesaja 48:17, 18) Masiku Jehova ota ka hulitha po omapangelo agehe gopantu. Aantu owala mboka taya ambidhidha uunamapangelo waKalunga taya ka kala kombanda yevi.—Jesaja 2:3, 4; 11:9; lesha Daniel 2:44.

 4. Eidhidhimiko lyaKalunga olye tu pa ompito yashike?

Satana okwa ti kutya aantu itaya ka kala aadhiginini kuJehova. Kalunga omolweidhidhimiko lye okwa pa kehe gumwe ompito u ulike ngele okwa hala okupangelwa kuye nenge okaantu. Onkalamwenyo yetu oyo tayi utha kutya otwa gama kombinga yalye.—Lesha Job 1:8-11; Omayeletumbulo 27:11.

5. Ongiini tatu vulu okuulika kutya otatu ambidhidha uumapangelo waKalunga?

Otatu ulike kutya twa hala Kalunga a kale Omupangeli gwetu ngele otwa kala tu li melongelokalunga lyashili nokutula miilonga shoka tatu ilongo mOohapu dhe, Ombiimbeli. (Johannes 4:23) Ohatu yanda wo okukutha ombinga moopolotika nosho wo miita, ngaashi Jesus.—Lesha Johannes 17:14.

Satana oha longitha oonkondo dhe opo a humithe komeho oluhondelo nosho wo omikalo dhilwe dha nyata. Ngele otwe ekelehi iilonga ya tya ngawo, yamwe yomookuume nosho wo yomaakwanezimo otashi vulika ye tu sheke nenge ye tu pataneke. (1 Petrus 4:3, 4) Onkee ano, otu na okukala twa tokola toko kutya oshike tatu ka ninga po. Mbela otatu ka kala ngaa nokweendathana naantu mboka ye hole Kalunga? Mbela otatu ka vulika ngaa koompango dhe dhopandunge nodhopahole? Ngele otwa ningi ngaaka, otatu ku ulika kutya Satana okwa popya iifundja sho a popi kutya kapu na gumwe ta ka kala omudhiginini kuKalunga.—Lesha 1 Aakorinto 6:9, 10; 15:33.

Opo wu mone uuyelele wa gwedhwa po, tala ontopolwa 3 yembo ndyoka lyu ulikwa mpoka Omalongo gashili gOmbiimbeli ogeni naanaa?, lya nyanyangidhwa kOonzapo dhaJehova.

[Ethano pepandja 16]

Adam okwa ningi ehogololo kaali li pandunge

[Ethano pepandja 17]

Omatokolo getu otage ku ulika kutya otwa hala Kalunga a kale Omupangeli gwetu nenge hasho