Aatseyinawa yomadhiladhilo gaantu oya ti kutya aantu inaya pumbwa owala iinima yopalutu, ihe oya pumbwa wo iinima yopambepo, opo ya kale ya nyanyukwa shili. Otu wete kutya aantu ohaya kala ya hala okwaadha elalakano lyontumba nenge ya longele gumwe ngoka e ya vule nenge ya kwathele yalwe. Opo ya gwanithe po ompumbwe ndjika, yamwe ohaya longitha ethimbo lyawo okukonakona uunshitwe, okuninga iinima yopaungomba, okudhana omusika nosho tuu. Ihe nonando ongaaka, oyendji ihaya mono naanaa enyanyu miinima mbika.

Itashi kumitha aaleshi yOmbiimbeli sho aantu ye na ehalo lyiinima yopambepo. Oontopolwa dhotango dhaGenesis otadhi popi kutya konima sho Kalunga a shiti aaihokani yotango okwa li ha popi nayo aluhe, oshoka okwa li a hala ya kale ye na ekwatathano lyopothingo naye. (Genesis 3:8-10) Kalunga ina shita aantu ya kale ya manguluka ko kuye, ihe oya kale nekwatathano naye. Ombiimbeli otayi popi lwiikando kombinga yoshinima shika.

Pashiholelwa, Jesus okwa ti: “Aanelago oomboka yu uvite oyo oohepele koomwenyo” nenge ye shi ompumbwe yawo yopambepo. (Mateus 5:3) Oohapu ndhika otadhi ti kutya opo tu kale twa nyanyukwa notwa gwanenwa, otwa pumbwa okugwanitha po ompumbwe yetu yopambepo. Ngiini? Jesus ota ti: “Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.” (Mateus 4:4) Omomikalo dhini oohapu dhaKalunga, sha hala okutya, omadhiladhilo gaKalunga newiliko lye ndyoka tali adhika mOmbiimbeli tali vulu oku tu nyanyudha noku tu kaleka tu na onkalamwenyo tayi ti sha? Natu tale komikalo ndatu dha simana.

Kunena oku na aatseyinawa naanawino mboka ya hala okugandja omayele kombinga yomakwatathano, yohole, yonkalamwenyo yomegumbo, yokukandula po okwaauvathana, yankene to vulu okukala wa nyanyukwa nokuli noyelalakano lyonkalamwenyo. Ihe mbela olye a pyokoka mokugandja omayele newiliko ewanawa noli li pandjele miinima ayihe mbika kee shi owala Jehova Kalunga, Omushiti gwetu?

Oku shi thaneka: Ngele owa landa oshilongitho oshipe, ngaashi ethano nenge okompiuta, owa  tegelela yi kale yi na okambo hoka ke na uuyelele nkene wu na oku shi longitha. Ombiimbeli otayi vulu okufaathanithwa nokambo hoka. Oyi li okambo kopathaneko konkalamwenyo yaantu hoka Kalunga, omunyoli gwako, e tu pa tu ka longithe. “Okambo” haka otaka yelitha kutya otwa shitwa nelalakano lyashike nonkene tu na okwiihumbata, opo onkalamwenyo yetu yi kale yi li nawa.

Ngaashi okambo kehe hoka haka gandja uuyelele, Ombiimbeli otayi londodha aantu kaaya ninge sha shoka tashi vulu okuyona po onkalamwenyo yawo. Yalwe otashi vulika ye tu pe omayele nenge omukalo gwokuninga oshinima ngoka tashi vulika tagu monika gwa fa omupu, ihe mbela kashi li pandunge okudhiladhila kutya otashi ke tu endela nawa notatu ka yanda omaupyakadhi ngele otwa landula ewiliko lyOmushiti?

Nonando Jehova Kalunga ohe tu wilike nohe tu longo, ihe tu thiminike. Pehala lyaashono, molwaashoka oku tu hole nokwa hala oku tu kwathela ote tu shilipaleke ta ti: “Ongame OMUWA Kalunga koye, ngoka tii ku longele shoka she ku opalela noku ku ulukila ondjila u na okweenda nayo. Ando to pulakene shili iipango yandje, andola omayambeko otage ku kungulukile ga fa omulonga tagu tondoka omeya, nuuyuuki otau tookele kungoye wa fa omakuthikuthi gomefuta.” (Jesaja 48:17, 18) Oku shi popya paufupi, ngele otwa pulakene ewiliko lyaKalunga otatu ka kala nonkalamwenyo yi li nawa. Nenge tu tye, opo tu kale nonkalamwenyo yi li nawa, otwa pumbwa Kalunga.

Yamwe oyu uvite kutya inaya pumbwa Kalunga omolwiinima iiwinayi mbyoka haya mono tayi ningwa monkalamwenyo mbyoka itaayi ulike kutya oku na Kalunga omunahole. Pashiholelwa, otashi vulika ya pule taya ti: ‘Omolwashike aantu mboka haya longo uuwanawa haya mono iihuna?’ ‘Omolwashike uuhanona kaawu na ondjo hawu valwa uulema?’ ‘Omolwashike monkalamwenyo mu na okwaanuuyuuki?’ Omapulo ngoka oga kwata miiti shili, nongele otwa mono omayamukulo taga ti sha otaga vulu okunwetha mo noonkondo onkalamwenyo yetu. Ihe pehala lyokupa Kalunga ombedhi meendelelo omolwuupyakadhi mboka, natu tale nkene Oohapu dhaKalunga, Ombiimbeli, tadhi vulu oku tu pa uuyelele moshinima shika.

Montopolwa ontitatu yaGenesis omu na ehokololo kombinga yaSatana ngoka a li i ifetha eyoka nokukambadhala a pukithe aaihokani yotango kaaya vulike koshipango shaJehova Kalunga shokwaalya komuti gwokutseya uuwanawa nuuwinayi. Satana okwa lombwele Eva a ti: “Itamu si shili. Oshoka Kalunga okwa tseya kutya uuna tamu li ko, omeho geni otaga tonata, one notamu fe Kalunga mokutseya uuwanawa nuuwinayi.” —  Genesis 2:16, 17; 3:4, 5.

Sho a popi oohapu ndhoka, Satana ina tya owala kutya Kalunga omufundja, ihe okwa ti wo kutya omukalo gwaKalunga gwokupangela kagu li pauyuuki. Ondiapoli oya li tayi ti kutya ngele aantu oya pulakene kuyo, iinima otayi ke ye endela nawa. Ompata ndjoka oya li tayi vulu okukandulwa ngiini? Jehova okwe etha pu pite ethimbo, opo ayehe ya vule okumona ngele omalundilo ngoka ogoshili ngaa nenge  ogiifundja. Kalunga okwa li a pe Satana naantu ye ompito opo yu ulike ngele aantu otaya vulu ngaa okukala nonkalamwenyo yi li nawa kaapu na ewiliko lyaKalunga.

Ngoye oto ti ngiini, mbela Satana okwa li e li mondjila? Mbela aantu otaya vulu okukala nonkalamwenyo yi li nawa kaapu na ewiliko lyaKalunga? Okumona iihuna, okwaanuuyuuki, omikithi, eso nosho wo omiyonena, okwaanomikalo, iita, omadhipago gopamihoko niihuna yilwe, mbyoka ya kala tayi hepeke aantu uule woomvula omathele, otayi ulike kutya oonkambadhala dhaantu dhokwiipangela yo yene kaaye na ewiliko lyaKalunga odha ponya. Pehala lyokupa Kalunga uusama kutya oye he etele aantu omaupyakadhi, Ombiimbeli otayi ti: ‘Omuntu ota dhiladhilile mukwawo oshiponga’ nenge ta pangele mukwawo nonyanya. —  Omuuvithi 8:9.

Shika itashi ulike tuu sha yela kutya otwa pumbwa okugalukila kuKalunga, hamolwaashoka owala twa pumbwa omayamukulo komapulo ngoka hatu ipula nago, ihe otwe mu pumbwa wo a kandule po omaupyakadhi getu! Kalunga ota ka ninga po shike?

Aantu oya kala nale ya hala okumangululwa ko kuuwehame, kuukulupe nokeso. Oya longitha ethimbo olindji, oonkondo niiniwe yawo ya konge emanguluko ndyoka, ihe inaye li mona. Yamwe oya li yi itaala kutya ngele oya li iinima yontumba, ya nu omeya gontumba nenge ya kala pehala lyontumba, itaya kulupa. Oshinima shika osha yemateka oyendji sho inaashi gwanithwa po.

Kalunga okwa halela aantu onkalamwenyo ombwanawa noyenyanyu. Shoka osho a li e na momadhiladhilo sho a shiti aantu, noine shi dhimbwa. (Genesis 1:27, 28; Jesaja 45:18) Jehova Kalunga ote tu shilipaleke kutya kehe shoka u uvaneka otashi ka gwanithwa. (Jesaja 55:10, 11) Ombiimbeli otayi popi kombinga yeuvaneko lyaKalunga lyokweeta Oparadisa ndjoka aantu yaali yotango ya kanitha. Membo lyahugunina lyOmbiimbeli, otatu adha mo oohapu ndhika: “Oye [Jehova Kalunga] ota ka theta omahodhi agehe momeho gawo. Oko noitaku ka kala we eso, oluhodhi, [elilo] nenge uuwehame. Oshoka iikulu oya hula po.” (Ehololo 21:4) Kalunga ote ke eta ngiini oonkalo ndhika oombwanawa kombanda yevi, notatu vulu ngiini okumona uuwanawa meuvaneko ndika?

Jesus Kristus, Omwana gwaKalunga, okwa li a longo aalanduli ye ya galikane ehalo lyaKalunga li gwanithwe. Aantu oyendji oye shi egalikano ndyoka yamwe haye li ithana Egalikano lyOmuwa, nohaye li endulula olundji. Ohali ti: “Tate yetu, ngu u li megulu: Edhina lyoye nali yapulwe, Oshilongo shoye nashi ye, Ehalo lyoye nali gwanithwe kombanda yevi wo ngaashi megulu.” (Mateus 6:9, 10) Oshilongo nenge Uukwaniilwa owo Jehova Kalunga ta ka longitha okukandula po omaupyakadhi ngoka ge etithwa komapangelo gopantu nokweeta po uuyuni uupe mboka u uvaneka moka tamu ka kala uuyuuki. * (Daniel 2:44;  2 Petrus 3:13) Otu na okuninga shike opo tu mone uuwanawa meuvaneko lyaKalunga?

Jesus Kristus okwa li a popi kombinga yoonkatu oompu ndhoka tu na okulandula, sho a ti: “Mboka ye ku tseya, Kalunga awike kashili, noya tseya wo Jesus Kristus, ngoka we mu tumu, oyo mboka ye na omwenyo gwaaluhe.” (Johannes 17:3) Onkee ano, kekwatho lyaKalunga otatu vulu okukala nonkalamwenyo yaa na ehulilo muuyuni uupe mboka tu uvanekelwa. Euvaneko ndika otali vulu oku ku kwathela wu zimine kutya, eeno, otwa pumbwa Kalunga.

Oomvula omayovi gaali dha pita, omuyapostoli Paulus okwa li a popi poshigongi shaAreopagi muAtena kombinga yaKalunga a ti: “Oye mwene ha pe aantu ayehe omwenyo nomufudho niinima ayihe. Ngaashi gumwe a tile: ‘Muye tse otu na omwenyo, tatu inyenge notu li po.’ Ngaashi wo yamwe yomaatoti yiitewo yeni [ya] tumbula taa ti: ‘Natse wo aana yaKalunga.’” — Iilonga 17:25, 28.

Shoka omuyapostoli Paulus a li a lombwele Aayatena oshoshili natango. Omushiti gwetu ohe tu pe ombepo ndjoka hatu fudhile mo, iikulya mbyoka hatu li nomeya ngoka hatu nu. Andola Jehova ka li he tu pe iinima iiwanawa mbyoka tu na, andola katu na omwenyo. Ihe omolwashike Kalunga ta tsikile okupa aantu ayehe iinima iiwanawa, nonando yamwe kaye na naye? Paulus okwa ti kutya “Kalunga okwa hala, aantu ya kale taye mu kongo, pamwe taye mu mono mokupampadhala kwawo. Ihe Kalunga ke li kokule nomuntu nando ogumwe.” —  Iilonga 17:27.

Mbela owa hala okutseya Kalunga nawa, nenge ano, okutseya nawa omalalakano ge nankene to vulu okukala nonkalamwenyo ombwanawa ngashingeyi nosigo aluhe? Ngele osho, otatu ku indile wu popye nomuntu ngoka e ku pe oshifo shika nenge wu kwatathane naanyanyangidhi yasho. Otaya ka kala ya halelela oku ku kwathela. ▪