Eric: Ngame mwene kandi shi naanaa omukwangeleki. Onkee ondi wete kutya katu na odhindji okupopya.

Brian: Tangi sho wa lombwele ndje. Shitiwa, edhina lyandje oBrian. Lyoye?

Eric: OEric.

Brian: Oshiwanawa oku ku tseya, Eric.

Eric: Nangame wo.

Brian: Nandi ku pule, mbela owa putukila muukwanegumbo wu hole iinima yopangeleki?

Eric: Eeno. Ihe sho nda zi mo megumbo nda yi kokolidji, inandi kala we handi yi kongeleka.

Brian: OK. Owa li to ilongele shike kokolidji?

Eric: O-social studies no-history (ondjokonona). Onda kala aluhe ndi hole iinima yopandjokonona, olweendo ngaa lwomuntu kombanda yevi.

Brian: Ondjokonona ohayi vulu okukala ohokithi. Ngaashi tashi vulika wu shi shi, Ombiimbeli oyi li embo lyondjokonona. Owa li ngaa ho ningi omapekapeko goye nomOmbiimbeli?

Eric: Hanaanaa. Ondi shi shi kutya oyi li embo ewanawa, ihe kandi na esiku lela nda dhiladhilile kutya Ombiimbeli oyi li embo lyopandjokonona.

Brian: Ngoye mwene owa fa wu hole okupulakena komadhiladhilo gayalwe. Ngele owu na ominute dhontumba, onda hala oku ku ulukila iiholelwa yontumba yi li mOmbiimbeli yi na ko nasha nondjokonona yi li paushili.

Eric: Eewa. Ihe kandi na sha nee Ombiimbeli.

Brian: Kashi na mbudhi. Otandi vulu oku ku ulukila muyandje. Oshiholelwa shotango oshi li mOndjalulo yotango ontopolwa 29 ovelise 26 no-27. Oovelise ndhoka otadhi ti: “David yaIsai okwa lele Israel omimvo omilongo ne. Okwa lele muHebron omimvo heyali nomuJerusalem omimvo omilongo ndatu nandatu.”

Eric: Ongiini shoka shi li oshiholelwa shondjokonona yi li paushili?

Brian: Oshi li ngeyi kutya, aagandji yuusama yamwe ohaya ti kutya omukwaniilwa David ka li ko.

Eric: Oshili? Omolwashike ye na okukala ya limbililwa ngele oko a li?

Brian: Opwa li owala uunzapo uushona kaawu shi womOmbiimbeli mboka tawu ulike kutya omuntu a li ko shili. Ihe mo-1993, ongundu yaalafululi oya li yi itsu emanya lyonale lya nyolwa oohapu ndhoka tadhi tolokwa taku ti “Egumbo lyaDavid.”

Eric: Oshihokithi shili.

Brian: Omuntu gulwe gwomOmbiimbeli ngoka aantu ya limbililwa ngele oko ngaa a li shili, oPontius Pilatus, omuleli ngoka a li ko pethimbo lyaJesus. Okwa popiwa muLukas ontopolwa onti-3 ovelise yo-1, gumwe gwomaapangeli yalwe oyendji yopethimbo mpoka.

Eric: Eeno, ondi shi wete. Otayi ti kutya “Pontius Pilatus okwa li omuleli gwaJuda, naHerodes omuleli gwaGalilea.”

Brian: Osho naanaa. Muule woomvula, aalongwantu yamwe oya kala ye na omalimbililo ngele Pontius Pilatus oko ngaa a li shili. Opo nduno, konima yoomvula 50 lwaampono dha ka pita, kUuzilo woPokati okwa li kwi itsuwa emanya lya takelwa edhina lye.

 Eric: Hmm. Inandi uva nando onale uuyelele mboka.

Brian: Onda nyanyukwa sho tandi wu kundathana nangoye.

Eric: Okupopya oshili ne, onda kala aluhe nda simaneka embo ndyoka Ombiimbeli, ihe kandi na nando esiku nda kalele ndi uvite kutya oyi na uuwanawa washa pethimbo lyetu. Otashi vulika mu na ondjokonona yi li paushili, ihe kandi wete ngele oyi na oshilonga.

Brian: Aantu oyendji otaya tsu kumwe noohapu ndhoka. Ihe ngame hasho ndi itaala shoka. Nandi ku lombwele kutya omolwashike: Ompumbwe yaantu ya simanenena inayi lunduluka okuza petameko. Pashiholelwa, otwa kala aluhe twa pumbwa iikulya, iizalomwa nolukalwa. Otwa kala aluhe tu uvite tu na ompumbwe yokupopya nayalwe nokukala tu na omaukwanegumbo ge na ombili. Mbela kashi shi shoshili kutya atuheni otwa lenga iinima mbyoka?

Eric: Oshoshili.

Brian: Ombiimbeli otayi vulu oku tu kwathela miinima ayihe mbyoka. Otatu vulu oku li ithana kutya embo ekulu ihe oli li pethimbo.

Eric: Owa hala okutya ngiini?

Brian: Nandi shi popye nge: MOmbiimbeli omu na omakotampango ga simanenena ngoka taga longo nokunena ngaashi owala ga li pethimbo ga nyolwa oomvula omathele dha ka pita.

Eric: OK. Miinima yini?

Brian: Uuna tashi ya miinima ngaashi okukala netaloko lyiimaliwa li li pandjele nenge li na ko nasha nombili yuukwanegumbo nenge nokukala kuume omwaanawa, omakotampango gOmbiimbeli otaga vulu oku ku wilika. Embo ndika olya fa okawalita hoka take ku wilike. Pashiholelwa, mbela ito tsu kumwe nangame kutya momasiku ngaka kashi shi oshipu okukala omusamane nosho wo omutse gwuukwanegumbo te shi pondola?

Eric: Eeno, otandi tsu kumwe nangoye lela. Ngame nomukulukadhi gwandje otwa kala mondjokana uule womvula, nokashi shi aluhe oshipu okutsa kumwe.

Brian: Osho nduno sho. Ihe mOmbiimbeli omu na omakotampango omapu taga longo. Opo tu mone oshiholelwa oshiwanawa, natu dhiladhile kAaefeso ontopolwa 5. Natu leshe ovelise 22, 23, no-28. Ngele otashi wapa, oto vulu okulesha oovelise ndhoka.

Eric: Eewa. Otadhi ti: “Aakiintu, vulikeni kaalumentu yeni, ngaashi hamu vulika kOmuwa. Oshoka omulumentu oku na epitikilo okupangela omukiintu gwe, naanaa ngashika Kristus e na epitikilo okupangela egongalo lye. Nokuli Kristus ye mwene oye Omuhupithi gwegongalo lye, nokutya olutu lwe.” Omanga ovelise 28 otayi ti: “Ano aalumentu oye na okuhola aakiintu yawo, naanaa ngashika ye hole omalutu gawo yene.”

Brian: Osho naanaa. Tangi. Mbela kashi shi shoshili kutya ngele aaihokani ayehe oya kambadhala okutula miilonga omayele ngoka omapu, onkalamwenyo muukwanegumbo itayi ka hwepopala?

Eric: Eeno ondi wete kutya osho. Ihe shoka oshipu okupopya mokana.

Brian: Eeno shili, kapu na omuntu a gwanenena. Nokuli, montopolwa omo tuu mono omu na ovelise tayi tu ladhipike tu kale tu na ondjele. * Mekwatathano kehe ondjele oya pumbiwa nosho wo okutifuka. Ngame nomukulukadhi gwandje otwa mona kutya Ombiimbeli otayi vulu oku tu kwathela tu kale tu na ondjele ndjoka.

Eric: Osha yela sho.

Brian: Oonzapo dhaJehova odhi na epandja kOintaneta ndyoka li na uuyelele uuwanawa kombinga yondjokana nosho wo yonkalamwenyo yuukwanegumbo. Ngele owu na ominute dhontumba, otandi vulu oku ku ulukila shoka shi li ko.

Eric: Eewa. Ondi na ngaa uumunute.

Brian: Onawa shili. Ondjukithi yepandja ndyoka oyo www.pr418.com/ng. Tala kepandja lyotango.

Eric: Onda hokwa omathano ngoka ge li ko shili.

Brian: Ngoka omathano giilonga yuukalele mbyoka hatu longo muuyuni awuhe. Mpaka opu na okakoloma ka nyolwa “Iileshomwa.” Kohi yokakoloma hoka oto adha ko iifo iipe nosho wo iileshomwa yilwe mbyoka hayi kala yi na iitopolwa ya yoolokathana mwa kwatelwa nonkalamwenyo yuukwanegumbo. Pashiholelwa, natu tale kokambo Onkundana ombwanawa ya za kuKalunga. Shimwe shomiileshwa mokambo muka oshi na oshipalanyolo “Ongiini tamu vulu okukala mwa nyanyukwa maandjeni?”

 Eric: Shoka oshikundathanwa oshihokithi. Onda hala okumona eyamukulo!

Brian: Moshileshwa shika omu na iinima oyindji mbyoka tayi vulu oku ku kwathela wu nyanyukilwe ondjokana yoye. Tala kwaashoka okatendo haka ke li kohi yepulo eti-2 taka ti. Ngele otashi wapa, oto vulu okulesha omatumbulo gaali gahugunina, Eric?

Eric: Eewa. Otaga ti: “Omusamane nomukulukadhi oye na okukala ye holathane noya simanekathana. Molwaashoka omusamane nomukulukadhi ayehe inaya gwanenena, oye na okwiilonga okudhiminathana po opo ya kale ya nyanyukwa mondjokana yawo.” Hmm, otandi tsu kumwe nasho.

Brian: Tangi kokulesha. Aaefeso 5:33 yamwe yomoovelise dhOmbiimbeli ndhoka dha popiwa mpaka. Ondi na Ombiimbeli yandje, tu kwathela wu leshe enyolo ndika.

Eric: Otayi ti: “Omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.”

Brian: Owa ndhindhilika ngaa kutya omuthindo ogu ukithwa kokugandja shoka kehe gumwe a tegelela a pewe?

Eric: Kandi uvite ko nawa kaa.

Brian: Mbela kashi shi shoshili kutya omulumentu okwa hala okukala a simanekwa komukulukadhi gwe nosho wo kutya omukulukadhi okwa hala okushilipalekwa komusamane gwe kutya oku mu hole shili?

Eric: Eeno, otandi tsu kumwe nasho.

Brian: Ngele omusamane oha kongo olundji omikalo u ulukile omukulukadhi gwe kutya oku mu hole, otashi ka kala oshipu komukulukadhi a kale e mu simaneka.

Eric: Osho naanaa.

Brian: Nonando ovelise ndjoka twa lesha mOmbiimbeli oya li ya nyolwa pwa pita oomvula tadhi ihilile po-2 000, otayi kundathana ompumbwe yaayehe ye li mondjokana notayi gandja omayele ngoka, ngele ga tulwa miilonga taga longo shili.

Eric: Ondi na okuzimina kutya mOmbiimbeli omu na oshindji shi vulithe pwaashi nda li tandi dhiladhila.

Brian: Onda nyanyukwa oku shi uva, Eric. Onda hala tu tsakanene ishewe mpaka ngame ndi uve kutya oto ti ngiini kepulo eti-3, “Mbela ngele omu wete ondjokana yeni itaayi ende nawa, omu na okutopoka?” ndyoka li li moshileshwa sha faathana kepandja lyetu lyokOintaneta. *

Eric: Eewa. Ngame nomukulukadhi gwandje otatu ke yi tala pamwe.