Ombiimbeli otayi ti: “Omuwa Kalunga okwa langeke omuntu meyana lyaEden, opo e li longe ye e li keelele. Okwa ti kuye: ‘Lya komuti kehe meyana, kakele komuti gwokutseya uuwanawa nuuwinayi. Iiyimati yomuti ngoka ino yi lya; ngele oto shi ningi, oto si shili.’” — Genesis 2:15-17.

Kalunga okwa tula omulumentu gwotango, Adam, moshikunino shaEden. Okwe shi udhitha iiyamakuti niimeno oyindjiyindji iiwanawa. Omwa li omiti hadhi imi iiyimati mbyoka Adam a li a manguluka okulya ko kudho. Ihe Jehova Kalunga okwa li e mu londodha kaa lye komuti gumwe. Okwa li e mu lombwele sha yela kutya ngele okwe shi ningi, ota ka sa.

Mbela Adam okwa li u uvite ko oshinima shono? Mbela okwa li e shi kutya eso oshike? Eeno, okwa li ha mono iinamwenyo ya sa. Ngele Adam okwa li a shitwa a ka se konima, ando elondodho lyaKalunga olya kala itaali ti sha naanaa. Ihe Adam okwa li e shi dhimbulula kutya ando okwa vulikile kuKalunga mokwaalya komuti ngoka, andola ina sa, ando okwa kala nomwenyo sigo aluhe.   

Yamwe oyi itaala kutya omuti ogwa li tagu thaneke okuya momilalo, ihe shoka hasho. Jehova okwa li a hala Adam nomukadhi, Eva, ya ‘vale aanona, noyi indjipale,’ yo ‘yu udhithe evi alihe noku li tula mepangelo lyawo.’ (Genesis 1:28) Onkee ano, omuti ngoka ogwa li gwolela. Jehova okwe gu ithana, “omuti gwokutseya uuwanawa nuuwinayi,” molwaashono ogwa li gulile po uuthemba we wokutokola kutya oshike oshiwanawa naashoka oshiwinayi kaantu. Ando Adam okwa li inaa lya oshiyimati shomuti ngoka, ando ina vulika owala. Andola okuulike wo olupandu lwe komushiti gwe ngoka a li e mu laleka nuuyamba.

Ombiimbeli otayi ti: “[Kalunga] okwa lombwele omulumentu [Adam] a ti: ‘Molwashoka . . . owa li komuti nde gu indike. . . . Ou na okulonga nuudhigu nokupusha, opo evi li ku pe sha, sigo to ka shuna mevi moka wa kuthwa mo. Owa kuthilwe mevi nou na okushuna mevi.’” — Genesis 3:17, 19.

Adam okwa li komuti ngoka a li i indikwa. Onkatu ndjoka yokwaavulika oya li ya kwata miiti lela. Oya li uunashipotha, ondhino yo yeneyene yiinima ayihe iiwanawa mbyoka Jehova e mu ningila. Sho a li komuti ngoka, Adam okwe ekelehi Jehova. Okwa hogolola ondiipangela, ndjoka ya li ye mu etele iilanduliko yi nikitha oluhodhi.

Ngaashi Jehova a hunganekele, Adam osho ngaa a ka sa shili. Kalunga okwa li u umbu Adam ‘montsi yevi’ nokwa li e mu lombwele kutya okwa li ‘ta ka shuna mevi.’ Adam ka li a tsikile nokukala nomwenyo molupe lulwe nenge kehala lilwe lyontumba. Sho a si, okwa kala kee na omwenyo ngaashi ontsi moka a kuthilwe. — Genesis 2:7; Omuuvithi 9:5, 10.

Ombiimbeli otayi ti: “Uulunde owe etwa muuyuni komuntu gumwe, nuulunde we owe etelele eso. Onkee ano eso olya taandele maantu ayehe, oshoka ayehe oya yono.” — Aaroma 5:12.

Okwaavulika kwaAdam nenge uulunde we owe etelela iilanduliko ya kwata miiti. Sho Adam a yono, ini ikanithila owala okukalamwenyo kwoomvula 70 nenge 80, ihe netegameno lyokukala nomweyo sigo aluhe. Oshikwawo, sho Adam a yono, okwa kanitha egwaneneno nokwa taambekidha okwaagwanenena koluvalo lwe aluhe.

Atuhe otu li oluvalo lwaAdam. Otwa thigulula uulunde kuye, mboka tse itatu vulu okuninga po sha. Uulunde mboka owo hawu tu ningitha tu yone, nolwahugunina ohawu tu etele eso. Paulus okwa yelitha nawa onkalo yetu ndjoka sho a nyola a ti: ‘Onda landithwa po ndi kale omupika guulunde. Ongame omuntu omukweyi! Olye ta mangulula ndje molutu nduka talu etele ndje eso?’ Paulus okwa yamukula epulo lye mwene a ti: “Kalunga na hambelelwe omolwaJesus Kristus, Omuwa gwetu!” — Aaroma 7:14, 24, 25.

Ombiimbeli otayi ti: “Kalunga okwa tumu Omwana, a ninge Omukulili guuyuni.” — 1 Johannes 4:14.

 Jehova Kalunga okwa ninga elongekidho li na ko nasha nokukandula po iizemo yuulunde noku tu mangulula megeelo lyeso lyaaluhe. Ngiini mbela? Okwa li a tumu omwana omuholike okuza megulu, opo a valwe e li omuntu a gwanenena ngaashi Adam. Ihe, Jesus “ina yona nando” ngaashi Adam. (1 Petrus 2:22) Molwaashoka okwa li a gwanenena, ka li a kwatelwa mo megeelo lyeso nokwa li ta vulu okukala nomwenyo sigo aluhe e li omuntu a gwanenena.

Onkee ano, pehala lyaashono, Jehova okwa li e etha Jesus a dhipagwe kaatondi ye. Konima yomasiku gatatu, Jehova okwe mu yumudha e li oshishitwa shopambepo. Konima okwa shuna megulu moka a gandja kuKalunga ongushu yomwenyo gwe gwa gwanenena, yi futile po shoka Adam i ikanithile nosho wo oluvalo lwe. Jehova okwa li a taamba ko eyambo ndyoka, nokwe shi ningi tashi wapa, opo mboka ye na eitaalo muJesus ya mone omwenyo gwaaluhe. — Aaroma 3:23, 24; 1 Johannes 2:2.

Kungeyi, Jesus okwa futile po shoka sha li sha kanithwa kuAdam. Okwa si omolwetu tu vule oku ka mona omwenyo gwaaluhe. Ombiimbeli otayi ti: ‘Omolwuuwehame wokusa, okesilohenda lyaKalunga Jesus a makele eso omolwaayehe.’ — Aahebeli 2:9, OB-1954.

Elongekidho ndika otali holola oshindji kombinga yaJehova. Omolwuuyuuki we wa dhenga mbanda, aantu inaaya gwanenena itaya vulu okwiikulila yo yene. Onkee ano, ohole nohenda ye oya li ye mu inyengitha a gwanithe po iitegelelwa ye mwene mbyoka ye mu pula oshindji mokugandja Omwana, opo a gandje iikulila. — Aaroma 5:6-8.

Ombiimbeli otayi ti: “Kristus okwa yumudhwa kuusi. [Omutango gwaamboka ya kotha mo. (OB-1954)] Oshoka ngaashi eso lye ya muuyuni omolwomuntu gumwe, osho neyumuko wo otali ningwa omolwomuntu gumwe. Oshoka ngaashi aantu ayehe ye na okusa [omolwuukumwe] wawo naAdam, osho wo aantu ayehe otaa ka yumudhwa omolwuukumwe wawo naKristus.” — 1 Aakorinto 15:20-22.

Jesus oko a li shili, nokwa sile. Uumbangi wuni tawu ulike kutya okwa li a yumudhwa? Uushili wumwe wa kola owo mboka kutya Jesus sho a yumudhwa okwa li i ihololele aantu oyendji poompito dha yoolokathana nopomahala gi ili nogi ili. Oshikando shimwe, okwa li i ihololele aantu ye vulithe 500. Omuyapostoli Paulus montumwafo ndjoka a li a nyolele Aakorinto okwa popi kombinga yaashoka. Okwa ti kutya yamwe yomuyo oya li natango ye na omwenyo, tu ulike kutya otaya vulu okugandja uumbangi shi ikolelela kwaashoka ya mona noyu uva. — 1 Aakorinto 15:3-8.

Sho Paulus a nyola kutya Kristus oye “omutango” gwaamboka ya yumudhwa, okwa li tu ulike kutya yalwe oya li wo taya ka yumudhwa. Jesus mwene okwa ti kutya ethimbo otali ke ya uuna “ayehe mboka ye li moombila” ‘taa ka za mo.’ — Johannes 5:28, 29.

Ombiimbeli otayi ti: “Osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” — Johannes 3:16.

 Omambo gopetameko gOmbiimbeli otaga popi kombinga yethimbo ndyoka eso lya tameke nankene Oparadisa ya kana. Omambo gahugunina otage tu lombwele kutya uunake eso tali ka hanagulwa po nosho wo kutya Kalunga ote ke etulula Oparadisa kombanda yevi. Opo nduno, aantu otaya ka kala ya nyanyukwa monkalamwenyo sigo aluhe. Ehololo 21:4 otali ti: “Oko noitaku ka kala we eso.” Opo tu tse omuthindo uushili weuvaneko ndyoka, ovelise ontano otayi ti: ‘Oohapu ndhika, odhoshili nodhi shi okwiinekelwa.’ Shoka Jehova u uvaneka, ota vulu lela oku shi ninga.

Mbela owi itaala ngaa kutya ‘oohapu ndhika, odhoshili nodhi shi okwiinekelwa’? Ngele osho, ilonga oshindji kombinga yaJesus Kristus nokukala wu na eitaalo muye. Ngele owe shi ningi, oto ka kala wa hokiwa kuJehova. Ito ka mona owala omalaleko nuuyamba ngashingeyi, ihe monakuyiwa oto ka mona omwenyo gwaaluhe mOparadisa kombanda yevi. Ombiimbeli otayi ti: ‘Itaku ka kala we eso, oluhodhi, elilo nenge uuwehame.’