Okutameka momumvo nguka, otatu ka kala tu na ethimbo olindji lyokwiilongekidhila Edhimbuluko lyeso lyaKristus. Uuna Edhimbuluko li li mokati koshiwike, okugongala kwOnkalamwenyo yopaKriste niilonga yokuuvitha itaku ka ningwa oshiwike shoka. Uuna lya gwile mehuliloshiwike, itapu ka kala oshipopiwa nenge Ekonakono lyOshungolangelo. Mbela oto ka longitha ngaa nawa omasiku ngoka kaaku na okugongala wu ilongekidhile Edhimbuluko? Ngaashi owala sha li hashi ningwa omimvo 2 000 nasha dha ka pita, otwa pumbwa okwiilongekidhila oshiningwanima shoka shi ikalekelwa. (Luk 22:7-13; km 3/15 ep. 1) Atuheni otu na okulongekidha omitima dhetu. Ngiini mbela?

• Dhiladhila kutya omolwashike sha simana okukala pEdhimbuluko. — 1Kor 11:23-26

• Galikana nokudhiladhila kombinga yekwatathano lyoye naJehova. — 1Kor 11:27-29; 2Kor 13:5

• Lesha nokutedhatedha kiitopolwa ya kankamena kOmanyolo, mbyoka tayi popi kutya Edhimbuluko oshike. — Joh 3:16; 15:13

Aauvithi yamwe ohaya lesha nokutedhatedha kElesho lyOmbiimbeli lyEdhimbuluko ndyoka hali kala mokambo Konakona Omanyolo esiku kehe. Yalwe ohaya lesha omanyolo ngoka ge li mokampungu hoka ke li pevi. Yo yalwe ohaya leshulula iitopolwa yOshungolangelo tayi popi kombinga yEdhimbuluko nokombinga yohole ndjoka Jehova naJesus ye tu ulukila. Kehe shoka to hogolola okukonakona, nashi ku kwathele wu hedhe popepi lela naJehova nOmwana.