Ombiimbeli oya hunganeka kutya Satana ote ke tu hepeka, opo kaatu ye komeho niilonga yetu yokuuvitha. (Joh 15:20; Eh 12:17) Ongiini tatu vulu okukwathela Aakriste ooyakwetu, mboka taya hepekwa miilonga yilwe? Otatu vulu oku ya galikanena. Ombiimbeli otayi ti: “Egalikano lyomuyuuki oli na oonkondo okuninga sha.” —  Jak 5:16.

Oshike tatu vulu okupopya momagalikano getu? Otatu vulu okupula Jehova a pe aamwatate naamwameme uulaadhi noku ya kwathele kaaya kale ya tila. (Jes 41:10-13) Otatu vulu wo okugalikana, aakwanepangelo kaaya kale ye li ompinge niilonga yetu yokuuvitha, “opo tu kale nokukala kwa ngungumana nokwombili.” —  1Tim 2:1, 2.

Sho Paulus naPetrus ya li taya hepekwa, Aakriste mboka ya li ko omimvo 2 000 nasha dha ka pita, oya li ye ya galikanene, taye ya tumbula kondandalunde. (Iil 12:5; Rom 15:30, 31) Onkee ano, nonando katu shi omadhina agehe gaamwatate naamwameme mboka taya hepekwa kunena, otatu vulu okutumbula omagongalo gawo, iilongo nenge iitopolwa yawo.