Natu tye ando oho kala muGalilea pethimbo lyaJesus. Owa yi kuJerusalem wu ka dhane Oshituthi shomatsali. Oshilando oshu udha aalongelikalunga ooyakweni ya za kiilongo yokokule. Owa hala ando okugandja omayambo goye kuJehova. Owa kutha oshikombo shoye sha mangwa nongodhi, e to ende momapandaanda goshilando moka mu udha aantu, wu uka kotempeli. Sho wa thiki, otempeli oyu udha aantu mboka nayo ya hala okugandja omayambo gawo. Hugunina, olufo lwoye olwa adha wu gandje oshikombo shoye kaayambi. Sho to shi gandja owa dhimbulukwa kutya opu na omumwaho gumwe ngoka mwa ningathana nayi naye, tashi vulika e li mongundu yaantu nenge moshilando. Jesus okwa yelitha shoka wu na okuninga. (Lesha Mateus 5:24.) Ongiini ngoye nomumwaho ngoka mwa ningathana naye tamu vulu okulalakanena ombili ngaashi Jesus a ti? Tula okangombe peyamukulo ndyoka li li mondjila momusholondondo ngoka gu li pevi.

OWU NA . . . 

• okupopya nomumwaho, ihe ongele owala wu wete kutya oku na etompelo lyomondjila lyokugeya

• okukambadhala oku mu pukulula, ngele owala wu wete kutya ohu uvu nayi nziya nenge oye e etitha uupyakadhi

• okupulakena neidhidhimiko sho ta popi nokuli nonando ku shi uvite ko naanaa, mu pa ombili sho we mu uvitha nayi nenge molwuupyakadhi mboka we etitha, nonando ino shi ningila owina

OMUMWAHO OKU NA . . . 

• okukonga yalwe megongalo ye mu ambidhidhe moku ya lombwela kutya owe mu uvitha nayi

• oku ku ganda nenge oku ku nyenyetela, okupopya ashihe shoka wa ninga nokutegelela wu zimine kutya epuko olyoye

• okundhindhilika kutya oshe ku pula eifupipiko nuulaadhi wu ye kuye, e te ku dhimine po tashi zi komutima

Nonando kunena ihatu yambele Kalunga iinamwenyo, Jesus okwa li te tu longo shike kombinga yekwatathano ndyoka li li pokati kokukala nombili naamwatate nosho wo nokulongela Kalunga momukalo ngoka a hokwa?