Omolwashike hatu tyapula iigongi yetu yoshitopolwa? Ngaashi pethimbo lyAaisraeli yonale, iigongi yoshitopolwa kunena olundji ohayi tu pe ompito tu longele Jehova nooitaali ooyakwetu omathele nokuli nomayovi. Ohatu nyanyukilwa uuyelele mboka hatu pewa po, hawu tu kwathele tu kale popepi naJehova. Otu hole wo ethimbo ndyoka hatu kala po nookuume nosho wo noyaandjetu. Olupandu lwetu lwokomutima ohalu tu inyengitha tu kale po poshigongi shoka omasiku agehe gatatu.

Ngele otwa gongala pamwe, inatu kala owala tatu dhiladhila kombinga yaashoka tatu mono paumwene, ihe natu dhiladhile wo kunkene tatu vulu okuulukila yalwe ohole. (Gal 6:10; Heb 10:24, 25) Uuna twa kwatele omumwatate nenge omumwameme omweelo a pite nenge tatu yaleke owala iipundi mbyoka twa pumbwa, otatu ulike kutya otatu lalakanene uuwanawa wayalwe. (Fil 2:3, 4) Iigongi yoshitopolwa ohayi tu pe ompito tu mone ookuume aape. Manga oshigongi inaashi tameka nokonima ngele sha pu nosho wo pethimbo lyomwiha, natu konge ompito tu popye naamboka kaatu shi. (2Kor 6:13) Uukuume mboka hatu panga nayo pethimbo ndyoka ohawu vulu okukalelela! Shoka sha dhenga mbanda, ngele yalwe ya mono nkene tatu ulike ohole yashili, otashi vulika ye tu wayimine tu longele Jehova. — Joh 13:35.

TALA OKAVIDIO OSHIGONGI SHOPAIGWANA SHI NA OSHIPALANYOLO “OHOLE ITAYI HULU PO”!, E TO YAMUKULA OMAPULO NGAKA:

• Aayenda oya li yu ulukilwa ngiini ohole piigongi yopaigwana yomo 2019?

• Omolwashike uukumwe nohole mokati koshigwana shaJehova hayi kumitha aantu?

• Iilyo yOlutuwiliki oya li ya tsu omuthindo iinima yini mbyoka Aakriste ye na okuninga mokuulika ohole?

• Ohole yopaKriste oya hanganitha ngiini aamwatate moNdowishi nomo South Korea?

• Otu na okukala twa tokola toko okuninga shike?