Oho kondjo nashike esiku kehe? Mbela owu li omutse gwegumbo nowu na iinakugwanithwa oyindji? Mbela owu li omuvali to kambadhala okusila oshimpwiyu aanona yoye ongoye awike? Mbela owu li omugundjuka ngoka ha hindwa koomakula kosikola? Mbela oto kondjo nokwaahe na uukolele nenge nuukulupe? Kehe gumwe ota kondjo nuupyakadhi. Aakriste oyendji otaya ungaunga nomaupyakadhi ogendji poshikando. Ihe otu shi shi kutya masiku otatu ka manguluka mo momaupyakadhi ngoka. — 2Kor 4:16-18.

Manga shono inaashi ningwa, otashi tu hekeleke okutseya kutya Jehova oku shi omaudhigu getu. Ohe tu pandula wo sho tu li aadhiginini nohatu idhidhimike note ke tu yambeka lela monakuyiwa. (Jer 29:11, 12) Jesus naye oku na ko nasha natse pauhandimwe. Okwe tu shilipaleka a ti: “Otandi kala pamwe nane,” sho tatu gwanitha po iinakugwanithwa yetu yopaKriste. (Mat 28:20) Uuna tatu tedhatedha kemanguluko lyomonakuyiwa kohi yUukwaniilwa waKalunga, ohatu koleke etegameno lyetu nokukala twa tokola toko okwiidhidhimikila omamakelo ngoka tu li mugo ngashingeyi. — Rom 8:19-21.

TALA OKAVIDIO SHO OSHIKUNGULU SHI LI POKUTHIKA, KALA WA TALA KUJESUS! — OMAYAMBEKO NGOKA TAGE KE ETWA KUUKWANIILWA MONAKUYIWA, E TO YAMUKULA OMAPULO NGAKA:

• Aantu oya topoka ko ngiini kuKalunga nosha etitha iizemo yini?

• Mboka aadhiginini kuJehova oya tegelela onakuyiwa ya tya ngiini?

• Onakuyiwa ndjoka ombwanawa otayi ke ya ngaa shili?

• Omayambeko geni wa halelela oku ka mona muuyuni uupe?