Momagongalo getu omu na aamwatate naamwameme mboka ya longela Jehova omimvo odhindji. Otatu vulu okwiilonga sha kuyo kunkene ya kala yi inekela Jehova. Otatu vulu oku ya pula kombinga yehangano lyaJehova nokombinga yomaupyakadhi ngoka ya li yi iyadha mugo nankene Jehova e ya kwathele ye gi idhidhimikile. Otatu vulu okuhiya gumwe gwomaaholike mboka e ye e tu lombwele iimoniwa ye pethimbo lyElongelokalunga lyetu lyuukwanegumbo.

Ngele owa longela Jehova ethimbo ele, popya kombinga yeitaalo lyoye wa manguluka nAakriste aagundjuka. Jakob naJosef oya li ya lombwele oluvalo lwawo kombinga yaashoka Jehova e ya ningila. (Gen 48:21, 22; 50:24, 25) Konima, Jehova okwa li a lombwele omitse dhomagumbo dhi longe oyana kombinga yiilongankondo ye. (Deut 4:9, 10; Eps 78:4-7) Kunena, aavali nosho wo yalwe megongalo, otaya vulu okulombwela aagundjuka kombinga yiilonga iikumithi mbyoka ya mona ya gwanithwa po kuJehova okupitila mehangano lye.

TALA OKAVIDIO OTWA KALA MUUKUMWE, NONANDO IILONGA YETU OYA LI YI INDIKWA, E TO YAMUKULA OMAPULO NGAKA:

• Oshitayimbelewa shaAustria osha kwathele ngiini aamwatate yomiilongo yimwe moka iilonga yetu ya li yi indikwa?

• Aamwatate miilongo mbyoka oya kala nokukoleka ngiini eitaalo lyawo?

• Omolwashike aauvithi oyendji moRomania ya li ya thigi po ehangano lyaJehova, noya galuka ngiini?

• Iimoniwa mbyoka ohayi koleke ngiini eitaalo lyoye?